NUUNI keehi metiya wodiyan deˈoos. (2 Xim. 3:1-5) Yihoowa siiqennaadaaninne a xillotettaa maaraa kaallennaadan oottiyaabay nuna galla galla gakkees. Yesuusi ha wayssiya wodiyaabaa kaseti eridi, bana kaalliyaageeti wurssettay gakkanaashin genccanaadan maaddiyaabaa demmanaagaa yootiis. (Maa. 24:3, 13; 28:20) I bana kaalliyaageeta minttettanawu, ayyaanaabaa “qumaa koshshiyo wodiyan” etawu immiya, ammanettida ashkkaraa sunttiis.—Maa. 24:45, 46.

Ammanettida ashkkaray 1919n sunttettido wodiyaappe doommidi, dumma dumma qaalaa haasayiya miilooniyan qoodettiya asay Xoossaa dirijjitiyaakko yiidi ‘a so asaa’ gidiis; qassi ayyaanaabaa qumaa miiddi deˈees. (Maa. 24:14; Ajj. 22:17) Gidikkokka, ubba qaalan kumetta xuufee deˈenna; qassi ubba asay Intternneetiyan kiyiyaabaa demmenna. Leemisuwawu, daroti jw.org sayttiyaa xallan kiyiya huuphe yohotanne biiduwaa demmokkona. Hegee issoti issoti ayyaanaaban payya gididi deˈanaadan maaddiya qumaa demmokkona giyoogee? Ha oyshaa zaaruwaa demmanawu kaallidi deˈiya oyddu waanna oyshatu zaaruwaa ane beˈoos.

Seexaanay Yesuusi shuchaa oytta oottanaadan oychido wode, Yesuusi, “Asi Xoossai haasayiyo qaala ubban de7anaappe attin, oitta xalaalan de7enna” yaagidi zaariis. (Maa. 4:3, 4) Yihoowa qaalay Geeshsha Maxaafan xaafettiis. (2 PHe. 1:20, 21) Hegaa gishshawu, ayyaanaaban nuussi giigiya quman deˈiya waannabay Geeshsha Maxaafaa qofaa.—2 Xim. 3:16, 17.

Yihoowa dirijjitee Ooratta Alamiyaa Geeshsha Maxaafaa Xuufetu Birshshettaa kumettaa woy appe amaridaagaa 120ppe dariya qaalatun giigissiis; qassi layttan layttan he qooday gujjees. Hara birshshettatunkka Geeshsha Maxaafay kumettay woy appe amaridaagee daro shaˈu qaalan biilooniyan qoodettiyaagee deˈees. Hegee “asai ubbai attanaadaaninne tumatettaa eranaadan” koyiya Yihoowa sheniyaara maayiyaaba. (1 Xim. 2:3, 4) Qassi Yihoowa “aifiyan geemmiya mereti” baynna gishshawu, i “bantta ayyaanan hiyyeesa gididoogaa [eriyaageeta]” ba dirijjitiyawu ehaanaagaanne ayyaanaaban eta mizanaagaa ammanettoos.—Ibr. 4:13; Maa. 5:3, 6; Yoh. 6:44; 10:14.

Geeshsha Maxaafaa nabbabiyoogaa xallan issi uri ba ammanuwaa minttana danddayenna. I nabbabiyoobaa akeekananne eridobaa oosuwan peeshshan koshshees. (Yaaq. 1:22-25) Koyro xeetu layttan deˈida Toophiyaa biittaa mureessay hegee tuma gidiyoogaa akeekiis. I Xoossaa Qaalaa nabbabishin Piliphoosi a, “Neeni nabbabiyoogaa akeekai?” giidi oychiis. Oychin I, “Tau odidi akeekissiya asi bainnan waanidi akeekettii?” yaagidi zaariis. (Oos. 8:26-31) Yaatin, Piliphoosi he mureessay Xoossaa Qaalaa suure akeekanaadan maaddiis. He mureessay tamaaridobaa ammanido gishshawu xammaqettiis. (Oos. 8:32-38) Hegaadankka, nu xuufeti nuuni Geeshsha Maxaafan deˈiya tumaa eranaadan maaddoosona. He xuufeti nu qofaa denttettoosona; qassi tamaaridobaa oosuwan peeshshanawu maaddoosona.—Qol. 1:9, 10.

Yihoowa ashkkarati ayyaanaaban miyoonne uyiyo darobaa xuufetuppe demmoosona. (Isi. 65:13) Leemisuwawu, 210ppe dariya qaalan deˈiya Wochiyo Keelay Geeshsha Maxaafan deˈiya hiraagaa qonccissees, nuuni ciimma gidida ayyaanaabaa tumaa akeekanaadan oottees, qassi Geeshsha Maxaafaa maaraadan deˈana mala denttettees. Qassi 100 gidiya qaalan deˈiya Beegottite! maxeetee Yihooway medhidobaa nuuni loytti akeekanaadan maaddeesinne Geeshsha Maxaafan deˈiya loˈˈo zoriyaa waatidi oosuwan peeshshanaakko qonccissees. (Lee. 3:21-23; Roo. 1:20) Ammanettida ashkkaray 680ppe dariya qaalan Geeshsha Maxaafaa qofay deˈiyo xuufiyaa giigissees. Geeshsha Maxaafaa nabbabanawu galla galla wodiyaa bazzay? Ne qaalan giigiya ooratta maxeetiyaanne layttan layttan kiyiya hara xuufiyaa ubbaa nabbabay?

Yihoowa dirijjitee xuufeta giigissiyoogaa xalla gidennan, gubaaˈe shiiquwaaninne gita shiiquwan haasayaa shiishshanawu maaddiyaabaakka giigissees. Hegaa mala shiiquwan shiiqiya diraamaa, ootti-besuwaanne oysha-zaaruwaa ufayssan kaallay? Yihooway nuuyyo ayyaanaaban gita gibiraa giigissiyoogee qoncce!—Isi. 25:6.

CHii, namisettakka. Issi issi wode, Yihoowa ashkkaratuppe amaridaageeti haratuugaappe daro ayyaanaabaa qumaa demmidoogee garamissenna. Aybissi? Kiitettidaageetu leemisuwaa beˈa. Eti koyro xeetu layttan deˈida hara erissiyo ashkkarati demmidoogaappe dariya kaaletuwaa demmidosona. (Mar. 4:10; 9:35-37) SHin, hara erissiyo ashkkaratikka ayyaanaaban koshshiya qumaa demmidoogee qoncce.—Efi. 4:20-24; 1 PHe. 1:8.

Yesuusi saˈan deˈiyo wode yootidobaappenne oottidobaappe dariya baggay Wonggeliyaa maxaafatun xaafettibeennaagaakka akeekana bessees. Kiitettida Yohaannisi, “Yesuusi oottido hara darobaikka de7ees; ubbabai huuphiyan huuphiyan xaafettiyaakko, xaafettiya maxaafatuyyo ha mule sa7ai gidanabaa taayyo milatenna” yaagiis. (Yoh. 21:25) Koyro xeetu layttan Yesuusa kaallidaageeti polo gidida Yesuusabaa nu eriyoogaappe darobaa eriyaaba gidikkokka, nuunikka abaa amaridabaa eroos. Yihooway nuuni Yesuusa leemisuwaa kaallanawu gidiyaagaa keenaa abaa eranaadan maaddees.—1 PHe. 2:21.

Kiitettidaageeti koyro xeetu layttan deˈiya gubaaˈetuyyo kiittido issi issi dabddaabbetubaakka qoppa. Leemisuwawu, PHawuloosi xaafido dabddaabbetuppe guuxxiis giishin issoy Geeshsha Maxaafan xaafettibeenna. (Qol. 4:16) Nuuni he dabddaabbiyaa nabbabibeenna gishshawu ayyaanaaban koshshiyaagaa keena qumaa demmibookkoo? CHii. Yihooway nuussi koshshiyaabaa erees; qassi nuuni ayyaanaaban minnanawu maaddiyaagaa keena qumaa immees.—Maa. 6:8.

Ha wodiyan, Yihoowa ashkkaratuppe amaridaageeti haratuugaappe dariya ayyaanaabaa qumaa demmoosona. Geella ne qaalan keehi guutta xuufe xallay deˈana danddayees. Hegaadan gidikko, Yihooway neeyyo qoppiyoogaa akeeka. Neeyyo deˈiyaagaa keena xuufiyaa xannaˈa; qassi ne qaalan kaalettiyo gubaaˈe shiiquwaa shiiqa. Neeni ayyaanaaban mino gidada deˈanaadan Yihooway maaddanaagaa akeeka.—Maz. 1:2; Ibr. 10:24, 25.

Nu Weyb sayttiyan maxeetetinne Geeshsha Maxaafaa xannaˈanawu maaddiya harabati deˈoosona. Aqo oyqqidaageeta, yelagatanne guutta naati deˈiyoogeeta maaddiyaabaykka nu Weyb sayttiyan deˈees. So asay hegan deˈiyaabaappe issi issibaa So Asaa Goynuwaa wode xannaˈiyoogan goˈettana danddayees. Qassi nu Weyb sayttiyan Giiliyaade Timirtte Keettaappe anjjettiyoogaaranne laytta shiiquwaa mala dumma prograametuura gayttidabay kiyees; qassi meretay gattiyo daafabaanne Yihoowa Markkati higgiyan shatimmanawu oottiyoobaa kumetta saˈan deˈiya ishati eranaadan maaddiya issi issi qofay kiyees. (1 PHe. 5:8, 9) Nu Weyb sayttee kawotettati nu oosuwaa diggido woy teqqido biittatunkka mishiraachuwaa yootanawu keehi maaddees.

SHin neeni nu Weyb sayttiyan deˈiyaabaa goˈettin goˈettana xayin, ayyaanaaban minnada deˈana danddayaasa. Ammanettida ashkkaray Yihoowa asaa ayyaanaaban loytti mizanawu gidiyaagaa keena xuufiyaa giigissiiddi deˈees. Hegaa gishshawu, jw.org sayttiyan deˈiyaabaa goˈettana xallawu gaada hegawu goˈettiyo miishshaa shammana bessiyaabadan qoppoppa. Issi issi ishati nu Weyb sayttiyan deˈiya issi issibaa attamidi, Intternneetiyaa goˈettanawu danddayenaageetussi immana danddayoosona; shin gubaaˈeti hegaadan oottennan aggana danddayoosona.

Yesuusi ba qaalaa naagidi nuuyyo ayyaanaabaa qumaa immiyo gishshawu, a keehippe nashshoos. Ha wayssiya gallassati wurana haniyo wodiyan, Yihooway nuuyyo “qumaa koshshiyo wodiyan” immanaagaa ammanettana danddayoos.