Hegee ubba asaa, ubba qassi ba siiqo aqo laggee hayqqido uraa keehi qofissiya oysha. Hegaa mala asati ooratta alamiyan hayquwaappe denddiya bantta aqo laggiyaara zaarettidi issippe deˈanawu amottana danddayoosona. Machiyaa hayqqido issi ishay hagaadan giis: “Taanikka ta machiyaakka shaahettana giidi qoppi erokko. Nuuni azinanne macho gididi merinawu issippe Yihoowawu goynniiddi deˈanawu amottida. Taani hegaadan amottiyoogaa haˈˈikka aggabeykke.” Hayquwaappe denddiyaageeti aqo oyqqana danddayoosona giidi amottiyoogee bessiyaabee? He oyshaa zaaruwaa nuuni erokko.

Yesuusi dendduwaanne macho ekkiyoogaa xeelliyaagan yootidobay saˈan deˈanawu denddiyoogaanne denddiyaageeti ooratta alamiyan aqo oyqqennaagaa bessiyaaba gidennan waayi aggana giidi daro layttawu nu xuufeti yootidosona. * (Maa. 22:29, 30; Mar. 12:24, 25; Luq. 20:34-36) Nuuni issi qofan zozzu gaana xayikkonne, Yesuusi saluwan deˈanawu denddiyoogaa xeelliyaagan he wode yootidee? Yesuusi yootidobaa ane pilggoos.

Hanotaa ane qoppa. (Luqaasa 20:27-33 nabbaba.) Hayqqida asi denddenna giya Saaduqaaweti dendduwaanne ishaa machiyo ayssiyoogaa * xeelliyaagan Yesuusa paaccanawu oychidosona. Yesuusi hagaadan zaariis: “Ha wodiyaa asai machchiyo ekkees; maccaageeti azinaa geloosona. SHin haiquwaappe denddidi, sinttappe yiya wodiyan de7anau bessiya attumaasainne maccaasai ekkennanne gelenna. Aissi giikko, eti kiitanchchatu mala gidiyo gishshau, naa77anttuwaa haiqqanau danddayokkona. Qassi eti haiquwaappe denddido gishshau, Xoossaa naata.”—Luq. 20:34-36.

Yesuusi yootidoy saˈan deˈanawu denddiyoogaa xeelliyaagaana gidennan waayi aggana giidi nu xuufeti qonccissidoy aybissee? Hegaadan giidi qoppanaadan oottida naaˈˈu gaasoy deˈees. Koyruwan, Saaduqaaweti saˈan deˈanawu denddiyoogaa qoppennan aggokkona, qassi Yesuusi eti qoppidoogaadan zaarennan aggenna giidi qoppida. Naaˈˈanttuwan, Yesuusi etawu zaariiddi wurssettan saˈan deˈanawu denddana ammanettida asatubaa, hegeetikka Abrahaamabaa Yisaaqabaanne Yaaqoobabaa denttiis.—Luq. 20:37, 38.

Gidoppe attin, Yesuusi qoppidoy saluwan deˈanawu denddiyoogaa gidanakka danddayees. Nuuni hegaadan qoppanaadan oottana danddayiyaabi aybee? Ane he xiqisiyan deˈiya naaˈˈu qofaa beˈoos.

‘Hayquwaappe denddidi, deˈanawu bessiyaageeta.’ Ayyaanan tiyettida ammanettidaageeti “Xoossaa kawotettaayyo bessiyaageeta gididi qoodettana.” (2 Tas. 1:5, 11) Yesuusa wozuwaa baggaara eti bantta deˈuwan xillo geetettido gishshawu, nagarancha geetetti pirddettidi hayqqokkona. (Roo. 5:1, 18; 8:1) Eti “anjjettidaageetanne geeshshata,” qassi saluwan deˈanawu hayquwaappe denddana bessiyaageeta geetettidosona. (Ajj. 20:5, 6) Hegaappe dumma ogiyan, saˈan deˈanawu denddiyaageetu giddon ‘worddotikka’ deˈoosona. (Oos. 24:15) Eti hayquwaappe denddana ‘bessiyaageeta’ geetettana danddayiyoonaa?

 “Eti . . . naa77anttuwaa haiqqanau danddayokkona.” Yesuusi, “Eti naaˈˈantto hayqqokkona” gibeenna. I, “Eti . . . naa77anttuwaa haiqqanau danddayokkona” yaagiis. Hara birshshettati he qofaa “hegaappe simmin hayqoy eta qohenna”; qassi “hegaappe simmin hayquwawu eta bolli ayba wolqqinne baawa” yaagoosona. Saˈan ammanettidi deˈida, ayyaanan tiyettidaageeti hayquwaappe denddidi saluwan hayqqenna deˈuwaa, hegeekka merinawu xayenna deˈuwaa demmana. (1 Qor. 15:53, 54) Saluwan deˈanawu denddiyaageetu bolli hegaappe simmin hayquwawu wolqqi baawa. *

Qommoora beˈidobaappe ay kuuyana danddayiyoo? Macho ekkiyoogaanne dendduwaa xeelliyaagan Yesuusi yootidobay saluwan deˈanawu denddiyoogaara gayttidaba gidana danddayees. Hegaadaana gidikko, i yootidobaappe saluwan deˈanawu denddiyaageetubaa darobaa akeekoos: Eti macho ekkokkona; eti hayqqana danddayokkona; qassi eti issi issiban saluwan deˈiya kiitanchatu mala. SHin hegaadan kuuyiyoogee issi issi oyshaa oychanaadan oottees.

Koyruwan, Saaduqaaweti saˈan deˈanawu denddiyoogaa qoppennan aggokkona; yaatin Yesuusi eta oyshaa zaariyo wode saluwan deˈanawu denddiyoogaabaa ayssi yootii? Yesuusi bana eqettiyaageetussi ubbatoo eti qoppidoogaadan zaaribeenna. Leemisuwawu, malaataa banttana bessanaadan oychida Ayhudatussi i, “Ha Beeta Maqidasiyaa qolite; taani heezzu gallassan zaarettada keexxana” yaagiis. Yesuusi eti he wode beeta maqidasiyaabaa qoppiyoogaa erennan waayi aggana; “shin i haasayiyo Beeta Maqidasee ba asatettaa.” (Yoh. 2:18-21) Dendduwaanne kiitanchati deˈiyoogaa ammanenna iita Saaduqaawetu oyshaa zaarana koshshenna giidi Yesuusi qoppennan waayi aggana. (Lee. 23:9; Maa. 7:6; Oos. 23:8) I sinttappe saluwan deˈanawu denddana ashkke gidida ba erissiyo ashkkarati goˈettanaadan saluwaa dendduwaabaa tumaa qonccissanawu koyennan aggenna.

Naaˈˈanttuwan, Yesuusi saˈan deˈanawu denddana Abrahaamabaa, Yisaaqabaanne Yaaqoobabaa wurssettan yootidoy aybissee? (Maatiyoosa 22:31, 32 nabbaba.) Yesuusi he asatubaa yootiyo wode, “haiqqidaageetu dendduwaabaa gidikko” yaagidi doommidoogaa akeeka. I hegaadan doommidoogee hara qofaa yootana haniyoogaa bessiyaaba gidana danddayees. Hegaappe simmin, Saaduqaaweti ammanoos giyo Muuse xuufetun deˈiya qofaappe, Yesuusi lacottiya buuraa matan Yihooway Muusessi yootido qaalaa goˈettidi, asay saˈan deˈanawu denddiyoogee Xoossaa halcho gidiyoogaa yootiis.—Kes. 3:1-6.

Heezzanttuwan, Yesuusi dendduwaabaanne macho ekkiyoogaabaa yootidoy saluwan deˈanawu denddiyoogaara gayttidaagaana gidikko, saˈan deˈanawu denddiyaageeti ekkananne gelana danddayoosona giyoogee? Xoossaa Qaalan he oyshawu qoncce zaaroy odettibeenna. Yesuusi yootidoy saluwan deˈanawu denddiyoogaabaa gidikko, i yootido qofay ooratta alamiyan deˈanawu denddiyaageeti ekkiyaakko ekkennaakko woy geliyaakko gelennaakko aynne qonccissenna.

SHin, aqo laggetuppe issoy hayqqiyo wode eti azinanne macho gidiyoogee attiyoogaa Xoossaa Qaalay geeshshidi yootiyoogaa eroos. Hegaa gishshawu, issi uri ba aqo laggee hayqqin hara ura ekkanawu woy gelanawu qoppikko, ba dosidoogaadan oottana danddayees. Hegee asi ba huuphen kuuyiyooba gidiyo gishshawu, issi uri aqo oyqqidi ufayttidi deˈanawu koyikko a borana koshshenna.—Roo. 7:2, 3; 1 Qor. 7:39.

Ooratta alamiyaa deˈuwaabaa nuuni darobaa oychana danddayiyoogee qoncce. He oyshatu zaaruwaabaa bessennabaa qoppiyoogaappe, hegaa gakkidi beˈanawu naagana koshshees. SHin, Yihooway baassi azazettiya asay koyiyoobaanne amottiyoobaa ubbaa palahissidi immanaagaa nuuni ammanettana danddayoos.—Maz. 145:16.