1, 2. Yihooway ba ashkkarata ayba ogiyan haasayissii?

AADHIDA wodetu ubban, Yihooway ba asaa dumma dumma ogiyan kaalettiis. Xoossay kiitanchata kiittidi, ajjuutan woy aymuwan sinttappe hananabaa issi issi asata erissiis. Qassi Yihooway he asati oottana issi issibaakka yootiis. (Qoo. 7:89; Hiz. 1:1; Dane. 2:19) Xoossay issi issitoo, a gishshaa kiitaa yootiya asata dooriis. Yihoowa asay a qaalaa siyidoy ay ogiyaana gidikkokka, a kaaletuwaa kaallida ubbay anjjettiis.

² Ha wodiyan, Yihooway ba asaa kaalettanawu Geeshsha Maxaafaa, ba ayyaanaanne gubaaˈiyaa goˈettees. (Oos. 9:31; 15:28; 2 Xim. 3:16, 17) A kaaletoy qoncce gidiyo gishshawu, nuuni ‘“Ogee hagaa; an biite” yaagiya cenggurssaa siyiyoogaa’ mala. (Isi. 30:21) Qassi Yihooway Yesuusa baggaara gubaaˈiyawu ba cenggurssaa sissiiddi deˈees. ‘Ammanettida wozannaama ashkkaraa’ baggaara gubaaˈeta kaalettanaadan i Yesuusa sunttiis. (Maa. 24:45) Nuuni merinaa deˈuwaa demmanawu azazettana bessiyo gishshawu, he kaaletuwaa loytti kaallana bessees.—Ibr. 5:9.

3. Nuuni Yihoowa kaaletuwaa loytti kaallennaadan oottiyaabi aybee? (Ha huuphe yohuwaa doomettan deˈiya misiliyaa xeella.)

³ Seexaanay Yihoowa kaaletoy nu shemppuwaa ashshiyoogaa eriyo gishshawu, nuuni hegaa siyennaadan nu qofaa wora zaaranawu koyees. Hegaa bollikka, ‘cimmiya nu wozanay’ nuuni Yihoowa kaaletuwaa loytti kaallennaadan oottana danddayees.  (Erm. 17:9) Hegaa gishshawu, nuuni Yihoowa cenggurssaa siyennaadan oottana danddayiyaabaa waati xoonana danddayiyaakko ane beˈoos. Qassi nu hanotay ayba gidinkka, Yihoowa cenggurssaa loytti siyiyoogeenne woosan aara haasayiyoogee nuuyyo aara deˈiya dabbotaa waati minttiyaakkokka beˈana.

4. Seexaanay asaa qofaa mooranawu ayba hiillaa goˈettii?

⁴ Seexaanay wordduwaaninne cimmiya qofan asay suure qoppennaadan oottanawu baaxetees. (1 Yohaannisa 5:19 nabbaba.) Kumetta saˈan deˈiya asay, ubba gaxariyan deˈiya asaykka xuufeta gujjin, eraadooniyan, televizhiiniyaaninne Intternneetiyan odettiyaabaa siyees. Hegaa malabati issi issi maaddiyaabaa yootana danddayikkokka, darotoo Yihooway kessido maaraara maayennabaa yootoosona. (Erm. 2:13) Leemisuwawu, hegaa malabati attuma asay attuma asaa, qassi macca asay macca asaa ekkiyoogee woy geliyoogee bala gidennabadan yootoosona; hegaappe denddidaagan daro asay Geeshsha Maxaafay attuma asay attuma asaara, qassi macca asay macca asaara zinˈˈana bessenna giyoobay azazettanawu deexxiyaaba gees.—1 Qor. 6:9, 10.

5. Nuuni Seexaanay yootiyo bala qofan cimettennaadan waani naagettana danddayiyoo?

⁵ Xoossaa xillotettaa siiqiyaageeti Seexaanay yootiyo bala qofan cimettennaadan waani naagettana danddayiyoonaa? Eti loˈˈuwaa iitaappe waati shaakki erana danddayiyoonaa? ‘Xoossaa qaalay giyoogaadan deˈiyoogaana!’ (Maz. 119:9) Xoossaa Qaalay nuuni tuma gididabaa worddo gididabaappe shaakki eranawu maaddiyaabaa yootees. (Lee. 23:23) Yesuusi ‘asi Xoossay haasayiyo qaala ubban deˈana’ bessiyoogaa yootiis. (Maa. 4:4) Nuuni Geeshsha Maxaafaa maaraa waatidi oosuwan peeshshana danddayiyaakko erana bessees. Leemisuwawu, wodiraa laammiyoogee nagara geetettidi odettanaappe daro wodiyaa kasetidi, yelaga gidida Yooseefi hegee gita nagara gidiyoogaa akeekiis. PHoxiifaara machiyaa Yooseefi nagaraa oottanaadan cimmido wode, i Yihoowayyo azazettennan agganawu mule qoppibeenna. (Doomettaabaa 39:7-9 nabbaba.) A he yohuwaa zaara zaarada yootikkokka, Yooseefi Xoossaa cenggurssaa siyiisippe attin iigaa siyibeenna. Nuuni loˈˈuwaa iitaappe shaakki eranawu Yihoowa cenggurssaa siyiyoogee, qassi Seexaanay aggennan yootiyo wordduwaa siyennan aggiyoogee keehi koshshiyaaba.

6, 7. Seexaanaa iita zoriyaa siyennan agganawu nuuni ay oottana bessii?

⁶ Alamiyan issoy haraa phalqqiya dumma dumma haymaanoote timirttee kumido gishshawu, daro asay tumu haymaanootee erettennabadan qoppees. SHin nuuni Yihooway yootiyoobaa siyanawu koyiyaaba gidikko, tumaa shaakki erana danddayoos. Nuuni ooni yootiyoobaa siyanaakko kuuyana bessees. Issi kutti naaˈˈu uraa cenggurssaa siyana danddayokko; hegaa gishshawu, Yihooway  ba dorssata heemmanaadan sunttido Yesuusa ‘qaalaa erananne’ i giyoobaa siyana koshshees.—Yohaannisa 10:3-5 nabbaba.

⁷ Yesuusi, “Intte siyiyoogaa ezggidi siyite” yaagiis. (Mar. 4:24) Yihoowa zoree qonccenne suure; shin nuuni nu wozanaa giigissidi i yootiyoobaa siyana bessees. Nuuni naagettana xayikko, Yihoowa siiqo zoriyaa siyiyoogaa aggidi, Seexaanaa iita zoriyaa siyana danddayoos. Alamiyaa muuziqaa, biiduwaa, televizhiine prograamiyaa, maxaafatu, laggetu, asttamaaretunne erancha giyo asatu zoriyaa siyennaadan naagetta.—Qol. 2:8.

8. (a) Nu wozanay nuuni Seexaanan cimettanaadan oottana danddayiyoy ayba ogiyaanee? (b) Nuuni nu wozanay waaniiddi deˈiyaakko akeekennaba gidikko waanana danddayiyoo?

⁸ Seexaanay nu wozanay nagarawu zuubbariyoogaa eriyo gishshawu, nuuni nagaraa oottanaadan cimmanawu baaxetees. Seexaanay nuna hegaadan cimmiyo wode, Yihoowawu ammanettidi deˈanawu metootana danddayoos. (Yoh. 8:44-47) Nuuni he paaciyaa waatidi xoonana danddayiyoo? Leemisuwawu, kase oottanawu mule qoppi erenna nagaraa haˈˈi amottidi oottida issi uraabaa qoppa. (Roo. 7:15) A he iitabawu kaalettidabay aybee? I Yihoowa cenggurssaa kaseegaadan waayi loytti siyana. Ba wozanay waaniiddi deˈiyaakko akeekennan aggana woy hegaa eriiddi sheneho gaana danddayees. I geella woossiyoogaa, kaseegaadan haggaaziyoogaa woy shiiqiyoogaa aggana danddayees. Hegaappe denddidaagan, i ba iita amuwan paacettidi, nagara eriiddi oottana danddayees. Nuuni nu wozanay waaniiddi deˈiyaakko akeekidi hegaa sohuwaara suurissikko, hegaa mala nagaraappe haakkana danddayoos. Qassi nuuni Yihoowa cenggurssaa siyiyaaba gidikko, kaddidaageeti yootiyo ay qofanne siyokko.—Lee. 11:9.

9. Nuuni nagaraa oottanaadan denttettiya nu wozanaa qofaa sohuwaara akeekiyoogee koshshiyoy aybissee?

⁹ Harggiyaa qommuwaa sohuwaara eriyoogee shemppo ashshana danddayees. Hegaadankka, nuuni paacettanaadan oottiya nu wozanaa qofaa sohuwaara akeekikko, nu bolli iitabay gakkennaadan teqqana danddayoos. Nu wozanan hegaa mala iita qofay deˈiyoogaa akeekikko, ‘Seexaanaa gitiyan oyqettanaappe’ kase hegaa sohuwaara giigissiyoogee eratetta. (2 Xim. 2:26) Nuuni qoppiyoobaynne amottiyoobay Yihooway nuuppe koyiyoobaa nuuni oottennaadan diggidoogaa akeekikko, ay oottana koshshii? Sohuwaara, nu huuphiyaa kawushshidi akko simmana, a zoriyaa siyananne i yootiyoobaa wozanan wottana koshshees. (Isi. 44:22) Nuuni Yihoowakko simmikkokka, kase oottido nagaraa gaasuwan haˈˈikka qohettana danddayoos. Nuuni hegaa mala nagaraappe kasetidi haakkiyoogee aadhida eratetta!

10, 11. (a) Otorettiya uri aybin erettii? (b) Qoraahi, Daataaninne Abiiraami oottido iitabaappe ay tamaariyoo?

¹⁰ Nu wozanay nuna Yihoowappe haassana danddayiyoogaa akeekana bessees. Nagaraa oottiyo koshshay nu bolli wolqqaama metuwaa gattees. Leemisuwawu, otorettiyoogeenne yaaretiyoogee kaalettiyoobaa qoppa. Ha naaˈˈu eeshshati nuuni Yihoowa cenggurssaa loytti siyennaadan waati diggana danddayiyaakkonne, qassi nuna waati qohana danddayiyaakko beˈa. Otorettiya uri bana xoqqu oottidi xeellees. I ba koyido ubbabaa oottana danddayiyaabadan, qassi ooninne a ‘yaata yaatoppa’ gaana bessennabadan qoppees. Hegaa gishshawu, i hara Kiristtaaneti, cimati, woy ubba Xoossaa dirijjiteekka bana zorana danddayennabadan qoppana danddayees. Hegaa mala asi Yihoowappe keehi haakkidi deˈiyo gishshawu, awu Yihoowa cenggurssay darin siyettenna.

¹¹ Israaˈeelati bazzon deˈiyo wode Qoraahi, Daataaninne Abiiraami Muusanne Aaroona maataa eqettidosona. He makkalancha asati otorettidi, banttawu qoppido ogiyan Yihoowayyo goynnanawu koyidosona. Yaatin, Yihooway waatidee? I eta xayssiis. (Qoo. 26:8-10) He taarikiyaappe gitabaa tamaaroos! Yihoowa bolli makkaliyoogee bashshaa kaalettees. Hegaa bollikka, “otoruwaa geeduwaa bashshai” kaalliyoogaa nuuni mule dogana bessenna.—Lee. 16:18; Isi. 13:11.

12, 13. (a) Yaaretiyoogee bashshaa kaalettiyoogaa bessiya leemisuwaa yoota. (b) Nuuni naagettana xayikko, kaseegaappe aaruwan waani yaaretana danddayiyaakko qonccissa.

¹² Yaaretiyoogee kaalettiyoobaakka qoppa. Yaaretiya uri Yihoowa kaaletuwaa kaallana bessiyaabadan qoppenna; qassi bawu bessennabaa ekkana danddayiyaabadan qoppees. Sooriyaa kawuwaa ola gadaaway Naaˈimaani hanttaara goga harggiyaappe paxi simmidi, hananabaa yootiya Elssaaˈayyo imotaa immana koyiis; shin, Elssaaˈi hegaa ekkibeenna. Gidoppe attin, Elssaaˈa ashkkaray Gehaazi he imotaa ekkanawu amottiis. Gehaazi ba wozanan, “GODAI ero! Taani [Naaˈimaana] geeduwaa woxxada, appe issibaa ekkana” yaagidi qoppiis. I Elssaaˈayyo yootennan, Naaˈimaana geeduwaa woxxi biidi, ‘heezzu shaˈu xaqara biraanne naaˈˈu kumetta maayuwaa’ ekkanawu worddobaa yootiis. Gehaazi hegaadan oottido gishshawunne Yihooway kiittin hananabaa yootiyaagaayyo worddotido gishshawu waanidee? Naaˈimaana oyqqida hanttaara goga harggee yaaretiya Gehaaza oyqqi aggiis!—2 Kaw. 5:20-27.

¹³ Issi uri naagettana xayikko, kaseegaappe aaruwan yaaretees; hegee qassi keehi qohiyaaba. Geeshsha Maxaafan deˈiya Akkaana taarikiyaappe hegaa akeekana danddayoos. Akkaana iita amoy waani dicci dicci biidaakko akeeka. I, “Nuuni omooddido miishshaa giddon taani issi lo77iya Baabiloone biittaa kaabbaa, naa77u xeetu xaqara biraanne bagga kilo gidiya worqqaa be7aas; be7ada ekkanau amottido gishshau ekkaas” yaagiis. Akkaani he iita amuwaappe haakkiyoogaa aggidi, yaaretidi he miishshata wuuqqiis; yaatidi ba dunkkaane giddon qottiis. Akkaana nagaray qoncciyaa kiyi simmin, Yihooway a bolli metuwaa ehaanaagaa Yaasu ayyo yootiis. He gallassi asay Akkaananne a soo asaa shuchan caddidi woriis. (Yaas. 7:11, 21, 24, 25) Yaaretiyoogee nuna qohana danddayiyaaba. Yaatiyo gishshawu, nuuni ‘amottiyo’ woy yaaretiyo qofa ubbaappe naagettana bessees. (Luq. 12:15) Kandduwan shori baynnabaa haniyoogeekka yaaretiyoogaa bessiyaaba. Yaatiyo gishshawu, nuuni issi issitoo iitabaa amottana danddayikkokka, nagaraa oottennaadan naagettana bessees.—Yaaqooba 1:14, 15 nabbaba.

14. Nuuni geella otorettiyoogaanne yaaretiyoogaa akeekikko ay oottana koshshii?

¹⁴ Otorettiyoogeenne yaaretiyoogee bashshaa kaalettana danddayees. Iitabaa oottiyoogee  kaalettiyoobaa wotti dentti qoppiyoogee, hegaa malabay nuuni Yihoowa cenggurssaa siyiyoogaa diggennaadan naagettana mala maaddees. (Zaa. 32:29) Tumu Xoossay Geeshsha Maxaafan likke ogee awugaakko yootiyoogaa xalla gidennan, hegan hemettiyoogee waati goˈˈiyaakkonne bala ogiyan hemettiyoogee waati qohiyaakko qonccissiis. Otorettiyoogaappe woy yaaretiyoogaappe denddidaagan nuuni issibaa oottanawu qoppiyaaba gidikko, hegee kaalettiyoobaa yereriyoogee eratetta! Bessennabaa oottiyoogee nunanne nuuni siiqiyo asata qohiyoogaa, ubbaappe aaruwan qassi nuuyyo Yihoowaara deˈiya dabbotaa mooriyoogaa qoppana bessees.

15. Xoossaara haasayiyoogaa xeelliyaagan Yesuusa leemisuwaappe ay tamaarana danddayiyoo?

¹⁵ Yihooway nuuyyo loˈˈobaa qoppees. (Maz. 1:1-3) I nuuyyo koshshiya wodiyan loˈˈo kaaletuwaa immees. (Ibraawe 4:16 nabbaba.) Yesuusi polo gidikkonne Yihoowaara ubbatoo haasayiis; i ubba wode woossiis. Yihooway maalaalissiya ogiyan Yesuusa maaddiisinne kaalettiis. Yihooway kiitanchati Yesuusayyo oottanaadan kiittiis, a maaddanawu geeshsha ayyaanaa immiis, qassi i 12 erissiyo ashkkarata dooriyo wode maaddiis. Yihooway Yesuusa kaafiyoogaanne an ufayttiyoogaa qonccissiya a cenggurssaykka saluwaappe siyettiis. (Maa. 3:17; 17:5; Mar. 1:12, 13; Luq. 6:12, 13; Yoh. 12:28) Yesuusaagaadan nuunikka nu wozanan deˈiya ubbabaa Xoossaayyo woosan yootana bessees. (Maz. 62:7, 8; Ibr. 5:7) Yaatiyoogan Yihoowaara nu wozanaabaa haasayana danddayoos; qassi ubba wode a bonchissiya ogiyan deˈana danddayoos.

16. Yihooway nuuni a cenggurssaa siyanaadan waati maaddii?

¹⁶ Yihooway nuna zoriyaaba gidikkokka, nuuni a zoriyaa kaallanaadan giddenna. I ba geeshsha ayyaanaa immanaadan nuuni woossana koshshees; yaatikko, i nuuyyo hegaa darissidi immana. (Luqaasa 11:10-13 nabbaba.) Qassi nuuni ‘siyiyo yohuwaa ezggidi siyiyoogeekka’ keehi koshshiyaaba. (Luq. 8:18) Leemisuwawu, nuuni pokkobaa bessiyaabaa woy shori baynna kandduwaara gayttida biiduwaa beˈiiddi, shori baynnabaa oottenna mala nuna Yihooway maaddanaadan woossiyoogee nuuni loˈˈo milatiya iita gidiyoogaa bessiyaaba. Yihooway maaddanaadan, nuuni a ayyaanaa demmana danddayiyo sohuwaaninne hanotan deˈana bessees. Gubaaˈe shiiquwan a ayyaanay deˈiyoogaa eroos. Yihoowa ashkkaratuppe daroti Yihooway gubaaˈiyaa baggaara yootiyoobaa siyidi metuwaappe attidosona. Hegaappe denddidaagan, bantta wozanan iitabaa qoppiyoogaa akeekidi bantta ogiyaa suurissidosona.—Maz. 73:12-17; 143:10.

17. Nu akeekan zemppiyoogee qohiyaaba gididoy aybissee?

¹⁷ Beni Israaˈeela Kawuwaa Daawitabaa ane qoppa. I yelagatettan wogga wolqqaama asa gidida Pilisxxeemiyaa Gooliyaada xooniis. Daawiti he deriyawu wotaaddara, kawo, naagiyaagaanne kuuyiyaagaa gididi oottiis. SHin Daawiti ba akeekan zemppido wode, a wozanay a balettin Berssaabiira shaaramuxiis; ubba he maccaasee azinaa Ooriyoona worissiis. Xoossay a seerido wode, i ba huuphiyaa kawushshidi nagaraa oottidoogaa ammaniis; qassi Yihoowaara deˈiya dabbotaa zaarettidi minttiis.—Maz. 51:4, 6, 10, 11.

18. Nuuni ubba wode Yihoowa cenggurssaa siyanaadan aybi maaddana danddayii?

¹⁸ Nuuni 1 Qoronttoosa 10:12n deˈiya zoriyaa kaalliyaageetanne nu akeekan zemppennaageeta gidana bessees. Nuuni ‘nu hemetaa suurissana’ danddayennaageeta gidiyo gishshawu, Yihoowa cenggurssaa woy Seexaanaa cenggurssaa siyana. (Erm. 10:23) Nuuni ubba wode woossiyaageeta, geeshsha ayyaanaa kaaletuwaa kaalliyaageetanne ubba wode Yihoowa cenggurssaa siyiyaageeta gidoos.