Daawiti, “Xillo asi coo attin, woikko a naati miyoobaa woossin, taani mulekka be7a erikke” yaagiis. I ba deˈuwan akeekidobaa hassayidi hegaadan giis. Xoossay bana ubba wode maaddiyoogaa i akeekiis. (Maz. 37:25) Gido shin, Daawiti giidobay Yihoowayyo goynniyaageeti deˈuwawu koshshiyaabi xayin mulekka waayettokkona woy sinttappekka hegaa malabi eta bolli gakkenna giyoogaa gidenna.

Daawiti ba huuphe metootido wodee deˈees. Hegaappe issoy, i Saaˈoolappe baqatido wodiyaa. Daawiti shinqqee wurido wode baassinne banaara deˈiya asatussi oyttaa immanaadan issi asa oychiis. (1 Sam. 21:1-6) Daawiti he wode ‘miyoobaa woossiis.’ SHin he meto wodiyan, Yihooway bana aggennaagaa i akeekiis. Gidoppe attin, Daawiti koshatidi asa quma woossidoogaa yootiyaabaa awankka demmokko.

Maatiyoosa 6:33y, Kawotettaabaa kaseyidi ammanettidi haggaaziyaageetussi Xoossay koshshiyaabaa kunttanaagaa Yesuusi mintti yootidoogaa qonccissees. I, “Kasetidi, Xoossaa kawotettaanne a xillotettaa koyite; i intteyyo he ubbabaa [maanabaa, uyanabaa, maayanabaa] immana” yaagiis. SHin, Yesuusi yedetaa gaasuwan ba ‘ishantti’ namisettana danddayiyoogaa yootiis. (Maa. 25:35, 37, 40) Hegaa malabay kiitettida PHawuloosa bolli gakkiis. I issi issitoo namisettiisinne saamettiis.—2 Qor. 11:27.

Dumma dumma ogiyan nu bolli yedetay gakkanaagaa Yihooway kasetidi yootiis. Dabloosi denttido oyshaayyo nuuni zaaruwaa immanaadan nu bolli metoy gakkanaadan Yihooway paqqadana danddayees. (Iyy. 2:3-5) Leemisuwawu, yedetaa gaasuwan Naaze kamppiyan qashettida issi issi Kiristtaaneti keehi barchetidosona. Dabloosi tumu Kiristtaaneti Yihoowayyo ammanettidi deˈennaadan oottanawu goˈettiyo ogetuppe issoy eti deˈuwawu koshshiya qumaa demmennaadan oottiyoogaa. Yihoowayyo ammanettida Kiristtaaneti ubba wode ayyo azazettidosona; ikka eta yeggibeenna. Yihooway ubba Kiristtaanetu bolli dumma dumma paacee gakkanaadan paqqadiyoogaadan, he ishatu bollikka hegaa mala metoy gakkanaadan paqqadiis. SHin Yihooway ba sunttaa gishshawu metootiyaageta ubbaa maaddiyoogee qoncce. (1 Qor. 10:13) Piliphphisiyuusa 1:29n, “Kiristtoosayyo oottiyo qaadai inttena gakkidoogee intte a gishshau waayettiyo gishshassappe attin, intte a ammaniyoogaa xalaalaassa gidenna” yaagiyaagaa hassayana danddayoos.

Yihooway baassi haggaaziyaageeta maaddanaagaa qaalaa geliis. Leemisuwawu Isiyaasa 54:17y, “Nena qohanau oottido ai miishshinne nena qohidi kantti kiyenna” yaagees. Hegeenne Xoossay qaalaa gelido hegaa mala hara qofay i ba asaa ubbaa naagiyoogaa bessees. SHin issi issi Kiristtaaneti paacettana, ubba hayqqanakka danddayoosona.