1, 2. (a) Oottiyoobaara gayttidaagan Xoossaa asaappe koyettiyaabay aybee? (b) Ha huuphe yohuwan woygiya oyshatu zaaruwaa beˈanee?

NUUNI Kiristtaane gidiyo gishshawu nu ooso ubban geeshsha gidana koshshiyoogaa, Wogaabaa Maxaafan loytti qonccida geeshshatettaara gatti xaafanaadan Yihooway kiitettida PHeexiroosa ayyaanan denttettiis. (1 PHeexiroosa 1:14-16 nabbaba.) “Geeshsha” gidida Yihooway tiyettidaageetikka “hara dorssatikka” amaridabaa xallan gidennan, bantta ooso ubban geeshsha gidanaadan koyees.—Yoh. 10:16.

² Wogaabaa maxaafan deˈiya ayyaanaaban keehi koshshiya harabaa pilggiyoogee keehi maaddees; qassi tamaaridobaa oosuwan peeshshiyoogee nu ooso ubban geeshsha gidanaadan maaddees. Ha huuphe yohuwan kaallidi deˈiya oyshata beˈana: Nuuni Geeshsha Maxaafaa maaraa mintti kaallennaadan paacciyaabay gakkiyo wode waatana bessii? Wogaabaa maxaafay Yihooway ubbaa haariyo maataabaa ay tamaarissii? Yarshshuwaa shiishshiyoogaa xeelliyaagan ay tamaarana danddayiyoo?

3, 4. (a) Kiristtaaneti Geeshsha Maxaafaa higgiyaanne maaraa xaasayi xeellana bessennay aybissee? (b) Nuuni halo kiyana woy uluwan lancce oyqqana bessennay aybissee?

³ Yihoowa ufayssanawu koyiyaaba gidikko, a higgiyaanne maaraa mintti kaallana besseesippe attin, hegaa xaasayi xeellidi geeshsha gidennabaa mulekka qoppana bessenna. Nuuni Muuse  Higgiyaa maaran deˈennaba gidikkokka, he Higgee Xoossaa ufayssiyaabay aybakko qassi a ufayssennabay aybakko nuuni eranaadan maaddees. Leemisuwawu, Israaˈeelatuyyo hagaadan giya azazoy imettiis: “Haluwaa kiyoppa; qassi ne asaappe issuwaayyoonne uluwan lancce oiqqoppa. SHin ne shooruwaa ne huuphedan siiqa. Taani GODAA.”—Wog. 19:18.

⁴ Yihooway nuuni halo kiyennaadan, qassi uluwan lancce oyqqennaadan koyees. (Roo. 12:19) Nuuni Yihoowa higgiyaanne maaraa mintti naagennaba gidikko, Dabloosi ufayttees; qassi Yihooway borettanaadan oottoos. Issi uri eriiddi nuna naaqqidaba gidikkokka, nuuni lancciyaa dagayiyo miishsha gidana koyokko. Nuuni “urqqaappe merettida miishsha” gidikkokka, Xoossay nu giddon minjja miishsha gidida mishiraachuwaa wottiis. (2 Qor. 4:1, 7) Keehi qohiyaaba gidida lancciyaa hegaa mala miishshan dagayana bessenna!

5. Aaroonabaanne a naatu hayquwaa yootiya taarikiyaappe ay tamaarana danddayiyoo? (Ha huuphe yohuwaa doomettan deˈiya misiliyaa xeella.)

⁵ Aaroona soo asaa xeelliyaagan Wogaabaa 10:1-11n deˈiya qofay keehi azzanttiyaaba. Dunkkaaniyaa giddon deˈiya Aaroona naata Nadaabanne Abiiha tamay saluwaappe wodhidi miido wode eti keehi azzanidoogee erettidaba. Aarooninne a soo asay hayqqida bantta dabbotuyyo yeekkennaadan odettida azazoy eta ammanuwaa keehi paacciyaaba! Intte soo asaa yara gidin woy hara oonanne gidin, bohettida uraara laggetenna mala imettida azazuwaa kaalliyoogan neeni geeshsha gidiyoogaa bessay?—1 Qoronttoosa 5:11 nabbaba.

6, 7. (a) Bullachawu woosa keetti baanaakkonne kuuyiyo wode, qoppana koshshiya issi issibay aybee? (Tohossa qofaa xeella.) (b) Yihoowa Markka gidenna nu dabboti nuuni bantta bullachawu woossiyo keettaa baanaadan xeesiyo wode, nu qofaa etawu waati yootana danddayiyoo?

⁶ Aaroonanne a soo asaa gakkidaagaa mala wolqqaama paacee nuna gakkennan aggana danddayees. SHin Yihoowa Markka gidenna nu dabboy nuuni a bullachawu woossiyo keetti baanaadan woy yan oottiyo issi issibaa oottanaadan shoobbikko shin? Nuuni yaa beennaadan diggiya Geeshsha Maxaafaa higgee baawa; shin hegaa mala sohuwaa baanaakkonne kuuyanawu maaddiya Geeshsha Maxaafaa maari deˈii? *

⁷ Nuuni geeshsha gididi deˈanawu qommoora qonccidabaara gayttidaagan kuuyiyoobay Yihoowa Markka gidenna nu dabbota ufayssennan aggana danddayees. (1 PHe. 4:3, 4) Nuuni eta yiilloyana koyennaagee erettidaagaa; gidikkokka nuuni kuuyidobaa kehatettan qassi qoncciyan odana bessees. Hegaa kasetidi erissiyoogee loˈˈo. Eti bantta bullachawu nuna xeesido gishshawu ufayttidoogaa yootidi eta galatana danddayoos. Yaatidi, nuuni eti bantta bullachaa gallassan ufayttana mala koyiyoogaa, qassi nuuni eta woossiyo keetti biidi yan oottiyoobaa oottennan aggidi etanne eta imattata yeellayana koyennaagaa yootana danddayoos. Yaatiyoogee Geeshsha Maxaafaa maaran ammanido nu ammanuwaa ubbatoo mintti kaalliyoogaa bessiyo ogiyaappe issuwaa.

8. Wogaabaa maxaafay Yihooway ubbaa haariyaagaa gidiyoogaa waati qonccissii?

⁸ Wogaabaa maxaafay Yihooway ubbaa haariyaagaa gidiyoogaa loytti yootees. Wogaabaa maxaafay Yihooway higgiyaa immiyaagaa gidiyoogaa 30ppe dariya sohuwan yootees. Muusee hegaa akeekiis; qassi Yihooway a azazidobaa poliis. (Wog. 8:4, 5) Hegaadan, nuunikka Ubbaa Haariyo Maatay deˈiyo Yihooway nuna azaziyoobaa ubbatoo oottana bessees. Hegaadan oottanawu, Xoossaa dirijjitee nuna keehi maaddees. SHin Yesuusi bazzon deˈiyo wode a gakkidoogaadan, nuuni nurkka deˈiyo wodiyan nuna paacee gakkana danddayees. (Luq. 4:1-13) Nuuni Xoossan ammanettiyaabanne  i ubbaa haariyaagaa gidiyoogaa loytti akeekiyaaba gidikko, nuuni Geeshsha Maxaafaa maaraa mintti kaalliyoogaa agganaadaaninne asa yayyanaadan oottana danddayiya uri baawa.—Lee. 29:25.

9. Xoossaa asay kumetta saˈan ixettiyoy aybissee?

⁹ Nuuni Yihoowa Markka qassi Yesuusa kaalliyaageeta gidiyo gishshawu, kumetta saˈan nu ubbaa yedetay gakkees. Yesuusi ba ashkkaratuyyo “Asai he wode inttena waissananne worana; ta sunttaa gishshau, dere ubbai inttena ixxana” giidi yootido gishshawu, hegee haniyoogee garamissiyaaba gidenna. (Maa. 24:9) Nuna asay hegaadan ixxishinkka Kawotettaabaa sabbakiyo oosuwan genccoos; qassi ubbatoo Yihoowa sinttan geeshsha gididi deˈanawu baaxetoos. Nuuni ammanettiyaageeta, geeshsha deˈo deˈiyaageetanne higgiyawu azazettiyaageeta gididaashin asay nuna keehi ixxiyoy aybissee? (Roo. 13:1-7) Hegee haniyoy nuuni Yihooway nuna haariya Goda gidanaadan doorido gishshassa! Nuuni “a xalaalau” geeshsha goynuwaa goynnoos; qassi i kessido higgiyaanne maaraa aggennan mintti kaalloos.—Maa. 4:10.

10. Issi ishay wotaaddara gidi simmidi guyyeppe waanidee?

¹⁰ Hegaa bollikka, nuuni “sa7aabaa” gidokko. Hegaa gishshawu, olaaninne polotikaaban ooyyoonne exatokko. (Yohaannisa 15:18-21; Isiyaasa 2:4 nabbaba.) Banttana Xoossawu geppida issoti issoti polotikan shaalettidi bantta ammanuwaa shugissidosona. Etappe daroti bantta nagaraappe simmidi, saluwan deˈiya maariya Aawaara zaarettidi dabbotidosona. (Maz. 51:17) SHin amaridaageeti bantta nagaraappe simmibookkona. Leemisuwawu, Naaˈˈantto Alamiyaa Olaa wode sunttati bessenna ogiyan qashettida nu ishatuppe Hanggaare biittan dumma dummasan qasho keettan deˈiya, layttay 45ppe guuxxiyo 160 ishata shiishshidi issi katamawu efiidosona. Sunttati nu ishantti olawu baanaadan azazidosona. Ammanettida ishati hegaadan oottanawu ixxiis giidi genccidosona; shin etappe uddufunati wotaaddara gidanawu qaalaa gelidi wotaaddaratu maayuwaa ekkidosona. Naaˈˈu layttappe guyyiyan, hegeetuppe issoy ammanettida Yihoowa Markkata woranaadan kiitettiis. I woranawu biido Yihoowa Markkatuppe issoy a ishaa! SHin hanotay laamettido gishshawu, eti qoppido iitabay polettibeenna.

11, 12. Beni Israaˈeelati yarshshiyo yarshshuwaa Yihooway xeelliyo ogiyaappe ay tamaariyoo?

¹¹ Muuse Higgee Israaˈeelati ay qommo yarshuwaa yarshshanaakko qoncciyan yootees. (Wog. 9:1-4, 15-21) Eta yarshshoy wotoy baynna Yesuusa yarshshuwawu eesho gidiyo gishshawu, geeshsha gidana bessees. Hegaa bollikka, shiishshiyo yarshsho ubbaa giigissana bessiyo ogeekka odettiis. Leemisuwawu, mata wode naˈa yelida aayyiyaa oottana bessiyaabaa qoppa. Wogaabaa 12:6y hagaadan gees: “Maccaasiyaa attuma na7a gidin macca na7a gidin yelada, ba geeyiyo wodiyaa wurssoogaappe guyyiyan, xuuggiyo yarshshuwaassi issi laitta dorssaanne nagaraa yarshshuwaassi qassi issi haraphphiyaa buuba woikko issi mara haraphphiyaa Xoossaa Dunkkaaniyaa penggen de7iya qeesiyaakko ehu.” Higgee Yihooway etappe koyiyoobaa qoncciyan yootiyaaba gidikkokka, i siiqiyaagaanne eta wolqqaappe daruwaa immanaadan oychennaagaa gidiyoogaa qonccissees. Maccaasiyaa dorssa orggiyaa ehaanawu iyyo miishshi gidana xayikko, naaˈˈu buuba harapheta woykko naaˈˈu mara harapheta ehaana danddayiyoogee odettiis. (Wog. 12:8) Yihooway he hiyyeesa maccaasiyo keehi alˈˈo imotaa immiyaageetuura lagge siiqeesinne xoqqu oottidi xeellees. Hegaappe nuuni ay tamaarana danddayiyoo?

¹² Kiitettida PHawuloosi ba mala Kiristtaaneti Xoossawu “galataa yarshshuwaa” yarshshanaadan odiis. (Ibr. 13:15) Nuuni Yihoowa geeshsha sunttaabaa haratuyyo yootiyo wode, ayyo menttershshaa yarshshuwaa shiishshoos. Hayttay siyenna ishanttinne michontti malata qaalaa goˈettidi Xoossaayyo  galataa yarshshuwaa yarshshoosona. Asi maaddennan sooppe kare kiyana danddayenna Kiristtaaneti dabddaabbiyaaninne, silkkiyan, qassi banttana xeelliyaageetuuyyoonne oychana yiyaageetuyyo markkattiyoogan Yihoowa galatoosona. Nu wolqqaanne nu payyatettaa keesaa Yihoowa sunttaa erissiyoogaaninne mishiraachuwaa yootiyoogan ayyo galataa yarshshuwaa yarshshoos. SHin nuuni ayyo immiyoobay muruta gidana bessees.—Roo. 12:1; 2 Xim. 2:15.

13. Nuuni haggaazido saatiyaa irpportte oottana koshshiyoy aybissee?

¹³ Nu galataa yarshshoy nuuni Xoossaa siiqiyo gishshawu dosan immiyo imota. (Maa. 22:37, 38) SHin nuuni haggaazuwan oottidobaa irpportte oottana koshshiyoogee odettiis. Yaatin, ha giigissuwaa nuuni waati xeellana koshshii? Nuuni aginan aginan irpportte oottiyoobay nuuni Xoossaa milatiyoogaara gayttidaba. (2 PHe. 1:7) Gidoppe attin, nu giddoppe ooninne daro saatiyaa irpportte oottanawu giidi daro saatiyaa haggaazana bessiyaabadan qoppana bessenna. Layttay sugido gishshawu woy daro wodiyawu keehi sahettido gishshawu daro saatiyawu haggaazanawu danddayennaageeti 15 daqiiqaakka irpportte oottana danddayoosona. Yihooway issi uri a siiqidi, qassi haggaaziyo maataa keehi nashshidi irpportte oottido he daqiiqaakka keehi nashshees. Alˈˈo gididabaa yarshsho oottidi shiishshanawu danddayenna Israaˈeelatuugaadan, ha wodiyankka bantta abbee paca gidikkokka Yihoowawu haggaaziyaageeti irpportte oottana danddayoosona. Nuuni ubbay huuphiyan huuphiyan irpportte oottiyoobay kumetta saˈaa irpporttiyan gelees; hegee qassi sabbakiyo oosuwaara gayttidaagan Yihoowa dirijjitee sinttappe ay oottanaakko halchanawu maaddees. Yaatin, nu haggaazidoogaa irpportte oottiyoogee hegaa keena metiyaabee?

14. Nuuni aggennan xannaˈiyaakkonne nu huuphiyaa qorana koshshiyoy aybissakko yoota.

¹⁴ Ayyaanaaban keehi maaddiyaabaa Wogaabaa maxaafaappe xannaˈa simmada neeni, ‘Ha maxaafay Xoossay ba geeshsha ayyaanan xaafissido maxaafaappe issuwaa gidido gaasuwaa haˈˈi akeekaas’ gaana danddayaasa. (2 Xim. 3:16) Neeni Yihooway azazido gishsha xallawu gidennan, i neeni ufayssana koshshiyo Xoossa gidiyo gishshawukka geeshsha gidada deˈanawu kaseegaappe aaruwan murttennan aggakka. Ha naaˈˈu huuphe yohotun Wogaabaa maxaafaa xeelliyaagan neeni tamaaridobay Geeshsha Maxaafan deˈiya hara maxaafatakka neeni loytta pilgganaadan denttettennan aggenna. (Leemiso 2:1-5 nabbaba.) Minna woossiyoogan, neeni aggennan xannaˈiyaakkonne eranawu akeekan ne huuphiyaa qora. Neeni Yihooway ne yarshshuwaa ekkanaadan koyiyoogee erettidaagaa. Televizhiine prograamee, biiduwaa kaassay, ispporttee woy neeni wodiyaa aattanawu oottiyo harabay ayyaanaaban diccennaadan xube gididee? Yaaniyaabaa gidikko, kiitettida PHawuloosi Ibraawe maxaafan yootido issi issibaa wotta dentta qoppiyoogee nena keehi maaddana danddayees.

15, 16. PHawuloosi Ibraawe Kiristtaanetu balaa qoncciyan yootidoy aybissee?

¹⁵ PHawuloosi Ibraawe Kiristtaanetu balaa qoncciyan yootiis. (Ibraawe 5:7, 11-14 nabbaba.) PHawuloosi yootanawu koyidobaa yootanawu  guyye gibeenna. I eti akeekanawu “azalla” gidiyoogaa yootiis. PHawuloosi hagaadan qoncciyan yootidoy aybissee? I hegaadan giidoy ayyaanaaban maata xallaa uyiiddi deˈanawu koyiya eta Yihooway siiqiyoogaanne etawu qoppiyoogaa qonccissanaassa. Geeshsha Maxaafaa koyro timirttiyaa erana koshshiyoogee tuma. SHin ayyaanaaban diccidi kayma Kiristtaane gidanawu, “mino quma” maana koshshees.

¹⁶ Ibraawe Kiristtaaneti ayyaanaaban diccidi harata tamaarissiyaageeta gidana bessishin, eta hara asi tamaarissana koshshiis. Aybissi? Eti “mino quma” ixxido gishshataassa. Nena hagaadan gaada oycha: ‘Ayyaanaabaa mino qumaa bessiyaagaadan xeelliyaanaa? Taani mino qumaa miyaanaa? Woossiyoogaanne Geeshsha Maxaafaa loytta xannaˈiyoogaa aggidanaa? Hegaadaana gidikko, hegawu issi metoy taani ubbatoo xannaˈennaageeshshaa?’ Nuuni asawu sabbakiyoogaa xalla gidennan, eta tamaarissananne erissiyo ashkkara oottana bessees.—Maa. 28:19, 20.

17, 18. (a) Nuuni ayyaanaabaa mino qumaa ubbatoo maana koshshiyoy aybissee? (b) Gubaaˈe shiiquwaa baanaappe kase ushshaa uyiyoogaa xeelliyaagan nu qofay ayba gidana bessii?

¹⁷ Nuuppe darotuyyo Geeshsha Maxaafaa xannaˈiyoogee metiyaaba gidana danddayees. Yihooway ba asay zilˈˈettidi Geeshsha Maxaafaa xannaˈanaadan koyennaagee erettidaagaa. Gidikkokka, nuuni nu huuphiyaa geppidi daro layttawu Yihoowayyo oottidaageeta gidin woy guutta wodiyawu hegaadan oottidaageeta gidin, ayyaanaabaa mino qumaa ubbatoo maana bessees. Yaatiyoogee geeshsha gididi deˈanawu keehi koshshiyaaba.

¹⁸ Nuuni geeshsha gidanawu, Xoossaa Qaalaa akeekan pilggananne Xoossay nuuppe koyiyoobaa oottana bessees. Yihooway ‘eta azazibeenna tamaa’ shiishshidoogaa gaasuwan taman meetetti hayqqida Aaroona naatu Nadaababaanne Abiihubaa qoppa; eti yaatidoy geella mattottido gishshataassa gidennan aggenna. (Wog. 10:1, 2) Hegaappe simmin Yihooway Aaroonayyo odidobaa qoppa. (Wogaabaa 10:8-11 nabbaba.) Hagee nuuni gubaaˈe shiiquwaa baanaappe kase ushshaa mule uyana bessenna giyoogee? Hagaa qoppa: Nuuni Muusee Higgiyaa naagana bessenna. (Roo. 10:4) Issi issi biittan, nu ishantti gubaaˈe shiiquwaa baanaappe kase qumaa miyo wode guutta ushshaa uyoosona. Paasikaa baalaa wode oyddu burccukko woynee eessaa goˈettidosona. Yesuusi Godaa Kahuwaa essiyo wode, ba erissiyo ashkkarata a suuttaa leemiso gidida woyne eessaa ushshiis. (Maa. 26:27) Geeshsha Maxaafay likkiyaappe aatti uyiyoogaanne mattottiyoogaa diggees. (1 Qor. 6:10; 1 Xim. 3:8) Qassi daro Kiristtaaneti bantta kahaappe denddidaagan, ayyaanaaban ay oosonne oottanaappe kase ushsha giyoobaa uyokkona. SHin, hanotay issi biittaappe hara biittan dummatees; qassi nu ooso ubban geeshsha gididi Xoossaa ufayssanawu keehi koshshiyaabay, “geeshshabaanne geeshsha gidennabaa” shaakki eriyoogaa.

19. (a) So asaa goynuwaaranne buzo xinaatiyaara gayttidaagan ay qoppana bessii? (b) Neeni geeshsha gidada deˈanawu ay oottanawu murttadii?

¹⁹ Xoossaa Qaalaa loytta pilggikko ayyaanaaban keehi maaddiya darobaa demmana danddayaasa. So asaa goynuwaunne buzo xinaatiyawu Geeshsha Maxaafaa loytta pilgganaadan maaddiya miishshata goˈetta. Yihoowabaanne a halchuwaabaa gujjada era. Kaseegaappe aaruwan akko shiiqa. (Yaaq. 4:8) “Ne higgiyaa giddon de7iya maalaalissiya tumatettaa taani be7ana mala ta aifiyaa poga” yaagidi yexxida mazamuraawiyaagaadan Xoossaakko woossa. (Maz. 119:18) Geeshshaa Maxaafaa higgiyaanne maaraa mintta kaalliyoogaa mule aggoppa. “Geeshsha” gidida Yihooway kessido ubbaappe aadhiya higgiyaa boncha; qassi “Xoossaa wonggeliyaa mishiraachchuwaa” yootiyo boncho oosuwaa mishettada ootta. (1 PHe. 1:16; Roo. 15:16) Keehi wayssiya ha wurssetta gallassatun geeshsha gidada deˈa. Ubbatoo geeshsha gididi deˈiyoogan geeshsha gidida nu Xoossaa Yihooway ubba haariyo maatawu haarettiyaageeta gidoos.