1, 2. Yihoowawu goynniyaageeti daro layttawu waati qoppidonaa?

YIHOOWAWU goynniyaageeti ayyaanaa kaaletuwan xaafettida hiraagay polettanaagaa daro wodiyawu naagidosona. Leemisuwawu, Ermmaasi Yihudaa biittay baysa gidanaagaa kasetidi yootiis; qassi Baabilooneti 607n K.K. he biittaa baysa oottidosona. (Erm. 25:8-11) Isiyaasi geeshsha ayyaanay denttettin, Yihooway Ayhudata omooduwaappe eta biittawu zaaranaagaa kasetidi yootiis; qassi i, “A naagiyaageeti ubbati anjjettidaageeta” yaagiis. (Isi. 30:18) Yihooway qaalaa gelidobay polettanaagaa Mikiyaasikka naagiis; i, “Taani ufaissan GODAA xeellashshana” yaagiis. (Mik. 7:7) Masiyaa woy Kiristtoosa xeelliyaagan odettida hiraagati polettanaagaakka Xoossaa ashkkarati daro xeetu layttawu naagidosona.—Luq. 3:15; 1 PHe. 1:10-12. *

² Masiyaabaa yootiya hiraagati haˈˈikka polettiiddi deˈiyo gishshawu, Xoossaa ashkkarati ha wodiyankka naagoosona. Yihooway mata wode iitata xayssiyoogaaninne Seexaanay haariyo iita alamiyaappe ba asaa ashshiyoogan, Mase Kawotettaa baggaara asaa metuwaa qaarana. (1 Yoh. 5:19) Yaatiyo gishshawu, ha siraatay  mati xayanaaga loytti akeekidi naagi uttoos.

3. Wurssettay yaanaagaa nuuni daro layttawu naagiiddi takkidaba gidikko, woygidi qoppana danddayiyoo?

³ Nuuni Yihoowa ashkkara gidiyo gishshawu, Xoossaa shenee “saluwan hanidoogaadan, sa7ankka” hananaadan amottoos. (Maa. 6:10) Gidoppe attin, nuuni wurssettay yaanaagaa daro layttawu naagidaba gidikko, ‘Wurssettay eesuwan yaana giidi nuuni ubbatoo aybissi naagana koshshii?’ yaagidi qoppana danddayoos. Hegaa ane beˈoos.

4. Nuuni naagi uttana koshshiyo waana gaasoy aybee?

⁴ Keehi matida ha alamiyaa xayuwaabaa nuuni ay qoppana koshshiyaakko Geeshsha Maxaafay geeshshidi yootees. Yesuusi bana kaalliyaageeti ‘naagi uttanaadaaninne’ ‘minnanaadan’ yootiis. (Maa. 24:42; Luq. 21:34-36) Yesuusi nuuni naagi uttanaadan yootido gishshawu, hegaadan oottiyoogee bessiyaaba! Hegaara gayttidaagan, Yihoowa dirijjitee nuussi leemiso gidees. Nu dirijjitiyaa xuufee nuuni ‘Xoossaa gallassaa naaganaadaaninne’ Xoossay ehaana giido ooratta alamiyan hidootaa wottanaadan ubbatoo zorees.—2 PHeexiroosa 3:11-13 nabbaba.

5. Ha wodiyan nuuni kaseegaappe aaruwan naagi uttana koshshiyoy aybissee?

⁵ Daro xeetu layttaappe kase deˈida Kiristtaaneti naagi uttana koshshikkokka, yaatiyoogee nuussi hegaappe aaruwan koshshiyaaba. Ayssi giikko, nuuni Kiristtoosi qoncci takkiyo wodiyan deˈoos. I qonccidoogaa bessiya malaataa 1914ppe doommidi beˈiiddi deˈoos. Alamiyaa hanotay yaa iitiyoogaanne Kawotettaabaa mishiraachoy kumetta saˈan odettiyoogaa gujjin, daro qommo malaataa beˈiyoogee nuuni ‘wodiyaa wurssettan’ deˈiyoogaa bessees. (Maa. 24:3, 7-14) Wurssettay yaana gakkanaashin he wodee ay keena takkanaakko Yesuusi yootibeenna gishshawu, nuuni beegotti uttananne naagi uttana koshshees.

6. Wurssettay keehi matiyo wode alamiyaa hanotay yaa iitana giidi nuuni qoppana danddayiyoy aybissee?

⁶ ‘Wodiyaa wurssettay’ sinttappe alamiyaa hanotay yaa iitana wodiyaa bessiyaaba gidana danddayennee? giidi oychana danddayoos. “Wurssetta gallassi” iitatettay yaa daranaagaa Geeshsha Maxaafay yootees. (2 Xim. 3:1, 13; Maa. 24:21; Ajj. 12:12) Yaatiyo gishshawu, haˈˈi iiti uttida alamiyaa hanotay yaa iitana giidi qoppana danddayoos.

7. Wurssetta gallassi alamiyan hananabaa Maatiyoosa 24:37-39y woygidi qonccissii?

⁷ SHin ‘daro waayiyaappe’ kase alamiyaa hanotay ay keena iitana gaada qoppay? (Ajj. 7:14) Leemisuwawu, ubba biittan olay denddana, o sonkka qumi deˈenna, qassi harggee ubba keettaa gelana gaada qoppay? Hegaa mala hanotan, siriya urikka Geeshsha Maxaafaa hiraagay polettiiddi deˈiyoogaa ammanana danddayees. SHin Yesuusi ba yuussaa xeelliyaagan daro asay kaseegaadan deˈiiddi, wodee aadhiichana gakkanaashin ‘akeekennaagaa’ yootiis. (Maatiyoosa 24:37-39 nabbaba.) Hegaa gishshawu, wurssetta gallassi asay wurssettay matidoogaa wolqqan ammananaadan oottiya keehi iitabay hanennaagaa Geeshsha Maxaafay qonccissees.—Luq. 17:20; 2 PHe. 3:3, 4.

8. Nuuni Yesuusi yootido malaatay polettanaagaa ‘naagi uttido’ gishshawu ay ammaniyoo?

⁸ Yesuusi bana kaalliyaageetussi eti deˈana wodiyaa qonccissiya malaataa yootiis. Yesuusa kaalliyaageeti ‘naagi uttidosona.’ (Maa. 24:27, 42) Dumma dumma macaray deˈiyo Yesuusi yootido malaatay 1914ppe  doommidi polettiis. Nuuni ‘wodiyaa wurssettan’ deˈiyoogaa ammanoos. Seexaanaa alamiyaa xayssiyo wodiyaa Yihooway keeri uttiis.

9. Wurssettay matan yaanaagaa nuuni naagi uttana koshshiyoy aybissee?

⁹ Yaatin, Kiristtaaneti ha wodiyan naagi uttana koshshiyoy aybissee? Nuuni Yesuus Kiristtoosawu azazettiyo gishshawu, naagi uttoos. I yiidi takkiyo wodiyaa malaataakka akeekoos. Nuuni wurssettay matidoogaa ammaniyoy siyiyo ubbabaa ammaniyo gishshataassa gidennan, Geeshsha Maxaafaa hiraagay polettiyoogaa ammaniyo gishshataassa. Wurssettay yaanaagaa nuuni naagi uttananne he wodiyawu giigetti uttana bessees.

10, 11. (a) Yesuusi bana kaalliyaageeti aybawu giigettanaadan yootidee? (b) Yesuusi bana kaalliyaageeti wurssettay yaana giidi qoppidoogaappe aaruwan naagikko, ay oottanaadan yootidee? (Ha huuphe yohuwaa doomettan deˈiya misiliyaa xeella.)

¹⁰ Daroti daro wodiyawu ayyaanaaban beegotti deˈida. Nuuni ay keena wodiyaa naagikkokka, Yihoowa gallassay matan yaana giidi naagi uttana bessees. Yesuusi Seexaanaa alamiyaa xayssanawu yaana wodiyawu nuuni giigi uttana bessees. Yesuusi bana kaalliyaageeta hagaadan giidi zoridoogaa hassaya: “He wodee aude gidanaakko, intte erenna gishshau, naagettite; minnite; Xoossaa woossite. Ta yuussai ba keettaa aggidi, oge biya bitaniyaa mala; bitanee ba ashkkaratuyyo huuphen huuphen oosuwaa immidi, eta ba oosuwaayyo alaafe oottiis; qassi kariyaa naagiyaageekka minttidi naagana mala azaziis. Hegaa gishshau, minnite; aissi giikko, keettaawai omarssa gidin, woi qamma bilahe gidin, woi kuttoi waassiyo wode gidin, woi maallado guuraara gidin aude yaanaakko, intte erekketa. Intte akeekennan i yiikko, inttena xiskkidaageeta demmenna mala minnite. Taani intteyyo odiyoogaa asa ubbau odais; minnite.”—Mar. 13:33-37.

¹¹ Kiristtoosi 1914n qoncciyoogaa doommidoogaa akeekidi, Yesuusa kaalliyaageeti wurssettay eesuwan yaana giidi giigettidoogee bessiyaaba. Eti Kawotettaabaa kaseegaappe aaruwan sabbakiyoogan hegaadan oottidosona. Yesuusi i guuttaa takkidi, ‘kuttoy waassiyo wode woy maallado guuraara’ yaana danddayiyoogaa yootiis. Hegaadan hanikko, a kaalliyaageeti waananee? I, “Minnite” yaagiis. Hegaappe denddidaagan, daro naagido gishshawu, wurssettay gamˈˈidi yaana giidi qoppana woy qassi yeenna giidi, naagennan aggana bessenna.

12. Imbbaaqoomi Yihoowa ay oychidee, qassi Xoossay waatidi zaaridee?

¹² Yerusalaame xayuwaabaa kasetidi yootanaadan kiitettida, hananabaa yootiya Imbbaaqoomabaa qoppa. I yootiyo wode, he katamay baysa gidanaagee kasetidi daro layttawu odetti uttiis. He wode ‘nagaranchati xillo asata dooddi oyqqidosona, pirddaykka geellattiis.’ Yaatiyo gishshawu, Imbbaaqoomi, ‘Abeet Yihoowawu, neeni tana maaddanaadan awude gakkanaashin xeesoo?’ yaagidoogee garamissiyaabaa gidenna. Yihooway i oychidoogaadan zaarana xayikkonne, kasetidi odettida xayoy ‘gamˈˈennaagaa’ hananabaa ammanettidi yootiyaagaassi odiis. Imbbaaqoomi ‘naagi’ uttanaadan Xoossay yootiis.—Imbbaaqooma 1:1-4; 2:3 nabbaba.

13. Imbbaaqoomi woygidi qoppana danddayii, qassi hegee bessennaba gidiyoy aybissee?

¹³ Imbbaaqoomi hidootaa qanxxidi hagaadan giis giidi qoppoos: ‘Yerusalaame xayuwaabaa daro layttawu siyaas. Hegee  daro wodiyaa gamˈˈikko shin? Katamay qoppennan xayiyoobadan ubbatoo hananabaa yootiyoogee bessiyaaba milatenna. Hegaa haratussi agga bayana.’ Imbbaaqoomi hegaadan qoppiyaakko, i Yihoowan nashettiyoogee attees; qassi Baabilooneti Yerusalaame katamaa xayssiyo wode ikka hayqqana danddayees!

14. Naagi uttiyoogee hidootaa qanxxissiyaaba gidennaagaa nuuni ammanettana danddayiyoy aybissee?

¹⁴ Wodiyaa wurssettaa xeelliyaagan odettida ubbabay polettidoogaa nuuni ooratta alamiyan qoppiyoogee bessiyaaba. Ubbabay waani polettidaakko wotti dentti qoppiyoogee nuuni Yihoowaaninne i qaalaa gelido polettiichibeennaban loytti ammanettanaadan oottees. (Yaasa 23:14 nabbaba.) Nuuni ‘ubbabawukka wurssettay matattidoogaa’ akeekidi deˈanaadan zorida, ‘aginaanne wodiyaa keerida’ Xoossaa galatoos.—Oos. 1:7; 1 PHe. 4:7.

15, 16. Ha wurssetta gallassan sabbakanawu nuuni danddayettida ubbabaa oottana koshshiyoy aybissee?

¹⁵ Nuuni eesuwan Xoossawu haggaazana koshshiyoogaa Yihoowa dirijjitee ubbatoo hassayissanaagaa naagana danddayoos. Hegaadan hassayissiyoy nuuni minnidi Xoossawu haggaazanaadaana xalla gidennan, Kiristtoosi qonccidoogaa bessiya malaatay polettiiddi deˈiyoogaa nuuni ubbatoo akeekanaadan maaddanaassa. Nuuni deˈiyo wodiyaa akeekidoogaa bessanawu waatana koshshii? Mishiraachuwaa mishettidi sabbakiyoogan, Xoossaa kawotettaanne a xillotettaa ubbatoo kasetidi koyana bessees!—Maa. 6:33; Mar. 13:10.

¹⁶ Issi michiyaa, “Nuuni Xoossaa Kawotettaa mishiraachuwaa yootiyoogan, . . . sinttappe alamiyan yaana bashshaappe attanaadan asaa maaddana danddayoos” yaagaasu. Vilhelm Gustlof giyo markkabee 1945n abban muukettido wode, keehi gita bashshay gakkiis. SHaˈan qoodettiya asay hayqqiis. He michiyaanne i azinay he bashshaappe attidosona. Markkabee muukettishinkka issi maccaasiyaa, “Ta shanxxaa! Ta shanxxaa! Ta alleequwaa! Ta alleeqoy ubbay garssan deˈiya kifiliyan deˈees. Tabay ubbay xayiis!” yaagada waassidoogaa a hassayawusu. Hegaappe dummatiyaabay, markkabiyan deˈiyaageetuppe amaridaageeti harata maaddanawu giidi, shacha gidida abban kunddida asaa ashshanawu bantta shemppuwaa aattidi immidoogaa. He asatuugaadan, nuunikka harata maaddanawu danddayettida ubbabaa oottoos. Nuuni sibikatiyaa oosoy eesoyiyoogaa ubbatoo hassayidi, sinttappe yaana bashshaappe harati  attanaadan wodee aadhiichennan maaddoos.

17. Wurssettay ay wodekka yaana danddayiyoogaa nuuni ammananaadan oottiyay aybee?

¹⁷ Geeshsha Maxaafaa hiraagay polettiiddi deˈiyoogaanne ha iita alamee xayiyo wodee keehi matidoogaa alamiyan haniyaabay loytti qonccissees. Hegaa gishshawu, Ajjuutaa 17:16n odettida “tammu kaceenne do7ai” alamiyaa worddo haymaanootiyaa xaaxa waaxiya Gita Baabilooni bolli denddanawu daro wodee attiis giidi nuuni qoppana koshshenna. Eti hegaadan oottanaadan Xoossay ‘eta wozanan amuwaa wottanaagaa’ hassayana koshshees; qassi hagee eesuwan, ay wodekka hanana danddayees. (Ajj. 17:17) Ha alamee xayana wodee haaho gidenna. Yesuusi, “Muussan, ushshan, mattooninne aqossi hirggiyooban intte wozanai balenna mala, qassi intte qoppennan he gallassai intte bolli yeennaadan, inttena naagite” yaagido zoriyaa siyiyoogee bessiyaaba. I he gallassay nuna ‘piriyaadan oyqqenna mala’ naagettanaadan yootiis. (Luq. 21:34, 35; Ajj. 16:15) Yihooway ‘banan ammanettidi naagiyaageetussi maalaalissiyaabaa oottanaagaa’ ammanidi, mishettidi ayyo haggaazanawu murttoos.—Isi. 64:4.

18. Kaalliya huuphe yohuwan beˈana oyshay awugee?

¹⁸ Nuuni ha iita alamee xayana wodiyaa naagiiddi, erissiyo ashkkaray Yihuday ayyaanaa kaaletuwan hagaadan giidi zorido zoriyaa siyoos: “Ta dabbotoo, ubbaappe aadhdhiya geeshsha ammanuwan intte huuphiyaa keexxite; qassi Geeshsha Ayyaanaa wolqqan Xoossaa woossite. Qassi nu Godai Yesuus Kiristtoosi ba maarotettan intteyyo immana merinaa de7uwaa naagiiddi, intte huuphiyaa Xoossaa siiquwan wottite.” (Yih. 20, 21) Gidoppe attin, nuuni Xoossay ehaanawu qaalaa gelido ooratta alamiyaa yeemottidi naagiiddi deˈiyoogaa waati bessana danddayiyoo? Hegaa kaalliya huuphe yohuwan beˈana.