XANNAˈIYO HUUPHE YOHUWA 39
MAZAMURE 125 ‘Maariyaageeti Ufayttiyaageeta!’
Immiyogan Loytta Ufayttiyagaa Gida
“Immiyogee ekkiyogaappe aaruwan ufayssees.”—OOS. 20:35.
TAMAARANABAA
Haratuyyo immiyogan nuuni ubbatoo waani loytti ufayttana danddayiyakko beˈana.
1-2. Yihooway nuuni haratussi immiyogan ufayttanaadan oottidi nuna medhdhidoy aybissee?
IMMIYOGEE ekkiyogaappe aaruwan nuna ufayssees. Ayssi giikko, Yihooway nuna hegaadan oottidi medhdhiis. (Oos. 20:35) Hegaa giyogee issi uri nuuyyo imotaa immiyo wode nuuni ufayttokko giyogee? Chii, gidenna. Nuuni ubbay imotaa ekkiyo wode keehi ufayttoos. Shin nuuni imotaa immiyo wode hegaappe aaruwan ufayttoos. Yihooway nuna hegaadan medhdhidoogee nuna goˈˈees. Aybissi?
2 Yihooway nuna hegaadan medhdhido gishshawu, nuuni loytti ufayttanaadan maaddiyabaa oottana danddayoos. Nuuni haratuyyo immana danddayiyo ogiya qoppidi hegaadan oottiyo wode kaseegaappe aaruwan ufayttana danddayoos. Yihooway hegaadan nuna medhdhidoogee ufayssiyaba.—Maz. 139:14.
3. Yihooway “ufayttiya Xoossaa” geetettidoy aybissee?
3 Haratussi immiyageeti ufayttiyogaa Geeshsha Maxaafay yootiyo gishshawu, Yihooway “ufayttiya Xoossaa” gidiyogaa metootennan akeekana danddayoos. (1 Xim. 1:11, NW) Haratussi immiyogan koyroy Yihoowa; qassi immiyogan ooninne aara likketenna. Yihooway nuussi deˈuwa immiis; qassi nuuni ‘qaaxxiyoynne deˈiyoy’ aana. (Oos. 17:28) “Lo77o imo ubbainne kumetta woito ubbai” Yihoowappe yees.—Yaaq. 1:17.
4. Nuuni loytti ufayttanaadan nuna aybi maaddanee?
4 Nuuni ubbaykka haratuyyo immiyogan kaseegaappe aaruwan ufayttana koyiyogee qoncce. Keha gidida Yihoowa leemisuwa kaalliyogan yaatana danddayoos. (Efi. 5:1) Harati nu imotaa nashshibeennabadan nuuyyo siyettiyo wode waatana danddayiyakko ha huuphe yohuwan beˈana. Hegee nuuni aggennan immanaadaaninne ufayttanaadan maaddana.
YIHOOWAGAADAN KEHA GIDA
5. Yihooway nuussi immidobati awugeetee?
5 Yihooway kehatettaa waati bessidee? Ane amarida leemisota beˈoos. Yihooway nuussi koshshiyabaa immees. Nuussi ubbabay keehi injjetana xayikkokka, Yihooway koshshiyabaa kunttees. Leemisuwawu, I nuuni qumaa, maayuwanne deˈiyosaa demmanaadan maaddees. (Maz. 4:8; Mat. 6:31-33; 1 Xim. 6:6-8) Yihooway nuussi koshshiyabaa kunttiyoy I yaatana bessiyo gishsha xallaassee? Chii, gidenna! Yaatin, Yihooway hegaadan oottiyoy aybissee?
6. Maatiyosa 6:25, 26ppe nu ay tamaariyoo?
6 Yihooway nuna siiqiyo gishshawu nuussi koshshiyabaa kunttees. Yesuusi Maatiyosa 6:25, 26n yootidobaa ane beˈoos. (Nabbaba.) Yesuusi kafotubaa leemisodan yootiiddi hagaadan giis: “Eti kattaa zerokkona woy cakkokkona woy shiishshidi gootaran yeggokkona.” Shin I kaallidi giidobaa akeeka: “Saluwan deˈiya intte Aaway eta mizees.” Yaatidi Yesuusi eta hagaadan oychchiis: “Intte etappe aadhdhekketii?” Nuuni hegaappe ay tamaariyoo? Yihooway bawu goynniyageeta mehiyappenne doˈaappe aaruwan xoqqu ootti xeellees. Yaatiyo gishshawu, Yihooway mehiyassinne doˈaassi koshshiyabaa kunttikko, nuussikka koshshiyabaa kunttanaagaa ammanettana danddayoos! Qoppiya aawaagaadan, Yihoowaykka siiqoy denttettin ba so asawu koshshiyabaa kunttees.—Maz. 145:16; Mat. 6:32.
7. Yihoowagaadan keha gidana danddayiyo issi ogee aybee? (Misiliyakka xeella.)
7 Yihoowaagaadan, nuunikka harata siiqiyo gishshawu koshshiyaban eta maaddoos. Leemisuwawu, qumay woy maayoy koshshiyo ishaa woy michchiyo neeni eray? Yihooway etassi koshshiyabaa kunttanawu nena goˈettana danddayees. Qassi Yihoowa asay meto wodiyan harata sohuwara maaddees. Leemisuwawu, koronaa harggiya wode qumay, maayoynne harabay koshshidoogeeta ishanttinne michchontti maaddidosona. Daroti qassi kumetta saˈan oosettiya oosuwa maaddanawu miishshaa immidosona. He miishshay kumetta saˈan daafaban qohettidaageetussi koshshiyabaa kunttanawu maaddiis. Keha gidida he ishanttinne michchontti Ibraawe 13:16n deˈiya qofaa oosuwan peeshshidosona: “Lo77obaa oottiyoogaanne issoi issuwaa maaddiyoogaa dogoppite. Aissi giikko, Xoossaa ufaissiyaagee hegaa mala yarshshuwaa.”
Nuuni ubbaykka haratuyyo kehiyogan Yihoowa leemisuwa kaallana danddayoos (Mentto 7 xeella)
8. Yihooway nuuni ay oottanaadan wolqqaa immii? (Isiyaasa 40:29)
8 Yihooway wolqqaa immees. Zawi baynna wolqqay deˈiyo Yihooway ba ashkkaratussi wolqqaa immiyogan ufayttees. (Isiyaasa 40:29 nabbaba.) Paaciya eqettanawu woy waayiya genccanawu minotettaa demmanaayyo woossa eray? Gallassaa giddon neeppe koyettiyabaa oottanaassi wolqqaa demmanawu woossennan aggakka. Neeni wolqqaa demmanawu woossin Yihooway ne woosaa zaariyo wode, ‘I tawu immido wolqqan, ubbabaa oottanawu danddayays’ giida kiitettida Phawuloosa qofan maayettana danddayaasa.—Pili. 4:13.
9. Nuuni nu wolqqan harata maaddiyogan Yihoowa milatana danddayiyo amarida ogeti awugeetee? (Misiliyakka xeella.)
9 Yihoowagaadan, zawi baynna wolqqi nuussi baawa; qassi haratussi aagaadan wolqqaa immana danddayokko. Shin nu wolqqan harata maaddiyogan A milatana danddayoos. Leemisuwawu, son oottiyogan woy suuqiyappe issi issibaa shammiyogan cimida woy sahettida ishanttanne michchontta maaddana danddayoos. Nuuyyo hanotay injjetikko, Shiiquwa Addaraashaa geeshshiyogaaninne bottokoniyogan maaddana danddayoos. Nu wolqqaa hegaadan goˈettiyogee Yihoowawu goynniya harata maaddees.
Nuuni harata maaddanawu nu wolqqaa goˈettana danddayoos (Mentto 9 xeella)
10. Nuuni haasayiyoban harata waati minttettana danddayiyoo?
10 Neeni haasayiyobaykka harata minttettana danddayiyogaa hassaya. Neeni wozanappe galatiyogaa yootiyakko minettana ura qoppana danddayay? Minttettoy koshshiyo ura eray? Yaanikko, neeni he urawu qoppiyogaa yootana danddayaasa. Neeni he ura baada oychchana, awu silkkiya dawalana, woy geella karddiya, imeeliya, woy kiitaa xaafada kiittana danddayaasa. Neeni haasayiyobawu darin unˈˈettana koshshenna. Ne ishay woy michchiya ammanettidi deˈanaadaaninne loˈˈobaa qoppanaadan koshshiyabay neeni siiquwan yootiyo amarida qofaa xalaala gidana danddayees.—Lee. 12:25; Efi. 4:29.
11. Yihooway ba aadhdhida eratettaa haratuyyo waati immii?
11 Yihooway aadhdhida eratettaa immees. Yesuusa kaalliya Yaaqoobi hagaadan giis: “Intteppe ooninne baayyo aadhdhida eratettai xayikko, borennan ubbau kehatettan immiya Xoossaa woosso. I ayyo immana.” (Yaaq. 1:5.) Ha xiqisee Yihooway ba aadhdhida eratettaa ba xalaalawu goˈettennaagaa bessees. I hegaa haratuyyo kehatettan immees. Yihooway aadhdhida eratettaa immiyo wode “borennan” immiyogaakka akeeka. Nuuni kaaletuwa A oychchiyo wode yeellatanaadan I mule koyenna. Shin nuuni hegaa demmanawu A woossanaadan I koyees.—Lee. 2:1-6.
12. Nuuni eriyobaa harata erissana danddayiyo wodeti awugeetee?
12 Nuuni shin waatana danddayiyoo? Nuuni eridobaa haratuyyo yootiyogan Yihoowa milatana danddayiyoo? (Maz. 32:8) Eridobaa harata erissiyo daro injjee Yihoowa asawu deˈees. Leemisuwawu, nuuni oorattata haggaazuwan darotoo loohissoos. Galchchawu oottiyageetinne haattan muukettida ishantti galchchan banttawu imettiya aawatettaa waati polanaakko eranaadan cimati danddayan maaddoosona. Qassi keexxiyogaaninne bottokoniyogan meezee deˈiyo ishanttinne michchontti Yihoowa dirijjitee goˈettiyo keettata keexxanaadan harata loohissoosona.
13. Nu eridobaa harata loohissiyo wode nuuni Yihoowa leemisuwa waati kaallana danddayiyoo?
13 Neeni harata loohissiyo wode Yihoowa leemisuwa kaallanawu baaxeta. Yihooway ba aadhdhida eratettaa kehatettan immiyogaa hassaya. Hegaadankka, nuuni nuuyyo deˈiya eraanne meeziya nu loohissiyogeetuyyo loytti erissanawu koyoos. Nuuni loohissiyo uri sinttappe nu aawatettaa ekkana gi hirggidi harata loohissiyogaa aggana koshshenna. Nuuni hagaadankka qoppana koshshenna: ‘Tana ooninne loohissibeenna! I bawu meezeto.’ Yihoowa asaappe ooninne hegaadan mule qoppana koshshenna. Nuuni loohissiyogeetuyyo nu eridobaa tamaarissiyogaa xalla gidennan, ‘nu deˈuwakka immiyogan’ ufayttoos. (1 Tas. 2:8) Eti, ‘harata tamaarissanawu danddayiyageeta’ gidanaadan koyoos. (2 Xim. 2:1, 2) Nuuni ubbay nu eridobaa harata kehatettan erissikko, nuunikka haratikka aadhdhida eranchchanne ufayttiyageeta gidana.
NU IMOTAA HARATI NASHSHIBEENNABADAN NUUYYO SIYETTIYO WODE
14. Daroti nuuni etawu issibaa oottiyo wode waatiyonaa?
14 Nuuni haratuyyo imotaa immiyo woy eta maaddiyo wode, ubba qassi eti nu ishanttanne michchontta gidikko, darotoo nuna galatoosona. Eti kiitaa xaafiyogan woy hara ogiyan galatiyogaa qonccissana danddayoosona. (1 Tas. 5:18) Harati nuna galatiyogee nuuni kaseegaappe aaruwan ufayttanaadan oottees.
15. Amaridaageeti nu imotaa nashshennan aggiyo wode nuuni ay hassayana koshshii?
15 Shin amaridaageeti nuuni etawu oottidobaa gishshawu issi issitoo galatokkona. Harati issi issitoo, nuuni eta maaddanawu oottido ubbabaa dogana danddayoosona; woy nuuni eta maaddanawu nu wodiya, nu wolqqaanne nu miishshaa ay keena goˈettidaakko akeekennan aggana danddayoosona. Hegaadan hanikko, nuuni ufayssaa xayennaadan woy azzanennaadan waatana danddayiyoo? Ha huuphe yohuwan waannatiya xiqise gidida Oosuwa 20:35y yootiyobaa hassaya. Nuuni keehi ufayttanaadan oottiyay haratussi immiyogaappe attin, eti hegaa ay keena nashshiyona giyagaa gidenna. Harati nu imotaa nashshennabadan nuuyyo siyettiyo wodekka ufayttiiddi immanawu kuuyana danddayoos. Hegawu nuna aybi maaddana danddayii? Ane amaridabaa beˈoos.
16. Ubbatoo nuuni ufayssan immanaadan nuna aybi maaddana danddayii?
16 Neeni haratuyyo immiyo wode Yihoowa milatiyogaa hassaya. Asay galatiyagaa gidin aggin Yihooway ubbawu loˈˈobaa oottees. (Mat. 5:43-48) Nuunikka “aybanne demmana giidi qoppennan” haratuyyo immikko, nuuni ‘gita woytuwa demmanaagaa’ Yihooway qaalaa geliis. (Luq. 6:35) Hegaa gishshawu asay nena ubbatoo galatana xayikko azzanoppa. Neeni “ufaissan immiya uraa” gidiyo gishshawu harata maaddanawu oottido loˈˈobawu ubbatoo Yihooway nena woytanaagaa hassaya.—Lee. 19:17; 2 Qor. 9:7.
17. Nuuni haratuyyo kehiyo waanna gaasoy aybee? (Luqaasa 14:12-14)
17 Haratuyyo immiyo wode nuuni Yihoowa milatanawu oottana danddayiyo harabay Yesuusi Luqaasa 14:12-14n yootido qofaa oosuwan peeshshiyogaa. (Nabbaba.) Nuussi kushiya zaarana danddayiyageeta qumaa shoobbiyogee woy etawu kehiyogee bala gidennaagee tuma. Nuuni nuuyyo kushiya zaarana danddayoosona giidi qoppiyogeeta darotoo shoobbiyogaa akeekikko shin? Yaanikko, nuuni Yesuusi giidobaa oosuwan peeshshanawu baaxetana koshshees. Nuussi kushiya zaarana danddayenna urawu nuuni kehatettaa bessana danddayoos. Yaatikko nuuni Yihoowa leemisuwa kaalliyo gishshawu ufayttana. Qassi nuuni harati nuuyyo kushiya zaaranaadan naagennaba gidikko, eti galatenna wodekka etayyo loˈˈobaa oottiyogan ubbatoo ufayttana.
18. Nuuni waatana koshshennee, qassi aybissi?
18 Haratubaa iitabaa qoppoppa. (1 Qor. 13:7) Harati nashshennaba gidikko, nuna hagaadan oychchana danddayoos: ‘Eti tumuppe nashshennaageeteeyye nashshana koshshiyogaa dogidonaa?’ Geella eti nuuni qoppidoogaadan nashshennan aggido hara gaasoy deˈana danddayees. Issoti issoti bantta wozanan galatikkonne hegaa yootanawu metootoosona. Ubba eti kase harata maaddiyageeta gidikko, haˈˈi maaduwa ekkanawu yeellatana danddayoosona. Shin nuuni nu ishanttanne michchontta wozanappe siiqikko, etabaa iitabaa qoppokko; qassi ubbatoo ufayssan eta maaddana.—Efi. 4:2.
19-20. Nuuni haratuyyo kehiyo wode danddayanchcha gidiyogee maaddiyoy aybissee? (Misiliyakka xeella.)
19 Danddayanchcha gida. Eranchcha Kawuwa Solomoni issi wode hagaadan giis: “Ne oittaa haattaa bollan ola; daro gallassatuppe guyyiyan, neeni zaarettada a demmana.” (Era. 11:1) Ha xiqisee amaridaageeti nuuni kehidobawu “daro gallassatuppe guyyiyan” galatana danddayiyogaa bessees. Hegaa qonccissiya taarikiya ane beˈoos.
20 Daro layttaappe kase, woradaa xomoosiya issi ishaa machchiya mati haattan muukettida issi michcheeyyo minttettiya dabddaabbiya xaafaasu. Yihoowawu ammanettidi deˈiyogee keehi koshshiyogaa A he dabddaabbiyan qonccissaasu. He michchiya hosppuna gidiya layttaappe simmin iyyo dabddaabbiya xaafaasu; hagaadan gaasu: “Neeni erana xayikkokka, aadhdhida layttatun ne tana ay keena maaddidaakko neeyyo yootanawu koyays.” A gujjada hagaadan gaasu: “Neeni minttettiya qofaa xaafadasa; qassi neeni xaafido xiqisiya mule dogikke.” a He michchiya bana gakkida amarida paaciya qonccissa simmada hagaadan gaasu: “Issi issitoo taani ubbabaa agga bayada Yihoowawu haggaaziyogaa essanawu koyaas. Shin neeni xaafido xiqisiya taani ubbatoo qoppidoogee ammanettada deˈanaadan tana maaddiis.” A gujjadakka hagaadan gaasu: “Aadhdhida hosppun layttatun, hegaa keenaa tana maaddidabi baawa.” Woradaa xomoosiyagaa machchiya “daro gallassatuppe guyyiyan” ha dabddaabbee O gakkin ay keena ufayttidaakko qoppa! Hegaadankka, nuuni issi ura maaddin unddenna wodiyappe guyyiyan he uri nuna galatana danddayees.
Nuuni issi ura maaddin unddenna wodiyappe guyyiyan he uri nuna galatana danddayees (Mentto 20 xeella) b
21. Neeni kehatettaa bessiyogan Yihoowa leemisuwa ubbatoo kaallanawu murttidoy aybissee?
21 Qommoora qonccidaagaadan, ekkiyogaappe aaruwan immiyogan ufayttanaadan oottidi Yihooway nuna medhdhiis. Nuuni nu mala Kiristtaaneta maaddiyo wode keehi ufayttoos. Eti nuna nashshiyo wodekka nuuni ufayttoos. Shin nuuni kehatettaa bessido uri hegaa nashshin aggin nuuni suurebaa oottidoogan ufayttana danddayoos. Neeni haratuyyo immiyobay ayba gidikkokka, ‘Yihooway neeyyo hegaappe aattidi immanawu danddayiyogaa’ mule dogoppa. (2 Odi. 25:9) Yaaniyo gishshawu Yihooway ubbatookka nena darissidi woytana! Qassi Yihooway nuna woytiyogaappe aaruwan ufayssiyabi baawa. Yaatikko, kehatettaa bessiyogan saluwan deˈiya nu Aawaa leemisuwa ubbatoo kaallanawu murttidaageeta gidoos.
MAZAMURE 17 ‘Ta Koyays’
a Woradaa xomoosiyagaa machchiya, 2 Yohaannisa 8 michcheeyyo xaafaasu; xiqisee hagaadan gees: “Intte oottidoogau kumetta woituwaa ekkanaappe attin, intte oottidoogaa bashshenna mala, inttena naagite.”
b MISILIYA QONCCISSUWA: Mentto 20n odettida machcheebaa leemiso hanotan qonccissiya misiliya: A minttettiya dabddaabbiya issi michcheeyyo xaafawusu. Daro layttaappe guyyiyan, he michchiya dabddaabbiya xaafada O galataasu.
