Nuuni xannaꞌanawu giigettiyo wode, nuna hagaadan oychchana danddayoos; ‘Taani hagaappe ay eranawu koyiyanaa?’ Shin nuuni eranawu koyiyobay Yihooway nuna tamaarissiyobaa nu akeekennaadan oottenna mala naagettana koshshees. Nuuni xannaꞌiyo wode oorattabaa eranawu ubbatoo waatana danddayiyoo?

Aadhdhida eratettaa demmanawu woossa. Neeni haꞌꞌi tamaaranaadan Yihooway koyiyobaa akeekanawu maaddanaadan woossa. (Yaaq. 1:5) Neeni kase eriyobay gidana gaada qoppennaadan naagetta.—Lee. 3:5, 6.

Xoossaa Qaalawu deꞌiya wolqqay ne deꞌuwa laammanaadan eeno ga. “Xoossaa qaalai paxa [de7ees.]” (Ibr. 4:12) Yaatiyo gishshawu, nuuni Geeshsha Maxaafaa nabbabiyo wode ubban oorattabaa erana danddayoos; qassi yaatiyogee dumma dumma ogetun nuna maaddees. Shin hegaadan haniyoy Xoossay nuna tamaarissiyobaa nuuni akeekiyo wode xallaana.

Yihooway nuna tamaarissanawu goꞌettiyo ubbabaa nashsha. I giigissiyo ayyaanaabaa qumay “gita gibiraa” mala. (Isi. 25:6) Neeni xannaꞌanawu dosenna qofata nabbabennan aggoppa. Xoossay giigissiyobati nena maaddiyogaa xalla gidennan, neeni tumuppe ufayttanaadankka oottoosona!