1-2. Xoossaa ashkkarati ufayttanaadan oottiyabay aybee? (Yaaqooba 1:22-25)

 YIHOOWAYNNE I siiqiyo A Naꞌay nuuni ufayttanaadan koyoosona. Mazamure 119:2 xaafidaagee hagaadan giis: “I yootidoogaa oottiyaageetinne bantta kumetta wozanaappe a koyiyaageeti anjjettidaageeta” woy ufayttiyageeta. Yesuusikka hagaadan giis: “Xoossaa qaalaa siyidi naagiyageeti ufayttoosona!”—Luq. 11:28.

² Nuuni Yihoowa ashkkara gidiyo gishshawu ufayttoos. Aybissi? Daro gaasoti deꞌikkokka, nuuni ufayttanaadan oottiya waanna gaasoy, ubbatoo Xoossaa Qaalaa nabbabiyogaanne nuuni eridobaa oosuwan peeshshanawu baaxetiyogaa.—Yaaqooba 1:22-25 nabbaba.

3. Nuuni Xoossaa Qaalaappe nabbabidobaa oosuwan peeshshiyo wode waani goꞌettiyoo?

³ Nuuni ‘Xoossaa Qaalaa oosuwan peeshshiyo’ wode keehi daro ogetun goꞌettoos. Leemisuwawu, nuuni Xoossaa Qaalaappe eridobaa oosuwan peeshshiyo wode, Yihoowa ufayssoosinne nuunikka ufayttoos. (Era. 12:13) Qassi nuuni Xoossaa Qaalan odettida zoriya kaalliyo wode nu soo asaaranne nu galchchan deꞌiyageetuura dabbotaa minttoos. Hegee tuma gidiyogaa ne deꞌuwan beꞌennan aggakka. Hegaa bollikka, Yihoowa higgeta azazettennaageetu bolli gakkiya daro metotuppe nuuni attida. Nuuni Kawuwa Daawiti giidoban maayettoos. I Yihoowa higgiyabaa, azazuwabaanne pirddaabaa mazamuriyan yooti wurssiiddi hagaadan giis: “Ne higgiyaa naagiyoogan taani daro go7ettais.”—Maz. 19:7-11.

4. Xoossaa Qaalaappe nuuni nabbabidobaa oosuwan peeshshiyogee issi issitoo metiyaba gidiyoy aybissee?

⁴ Xoossaa Qaalaa nabbabiyogeenne oosuwan peeshshiyogee issi issitoo metiyaba gidana danddayees. Nuussi oosoy darikkokka,  Yihooway nuuppe koyiyobaa nuuni shaakki erana mala Geeshsha Maxaafaa nabbabanawunne xannaꞌanawu wodiya bazzana koshshees. Yaakko, nuuni ubba galla Geeshsha Maxaafaa nabbabanaadan maaddana danddayiya amarida qofata ane beꞌoos. Nuuni nabbabidobaa wotti dentti qoppanaadan nuna maaddiyabata beꞌana; qassi nu eridobaa oosuwan peeshshana danddayiyo ogetakka pilggana.

XOOSSAA QAALAA NABBABANAWU WODIYA BAZZA

5. Nuuni daro wodiya goꞌettidi oottiyo issi issibati awugeetee?

⁵ Yihoowa asaappe darotuyyo oosoy darees. Nuuni Yihooway nuussi immido dumma dumma aawatettaa polanawu nu wodiyappe dariya baggaa goꞌettoos. Leemisuwawu, nuuppe daroti nuussinne nu soo asawu koshshiyabaa kunttanawu oosuwa oottoos. (1 Xim. 5:8) Daro Kiristtaaneti sahettiya bantta dabbota maaddoosona, woy cimidaageeta heemmoosona. Nuuppe daroti nu payyatettaa naagana koshshees; qassi hegee wode ekkiyaba. Hegaa bollikka, galchchan nuuni oottana koshshiyabati deꞌoosona. Nuuni oottana koshshiyabatuppe waannatiyagee minnidi sabbakiyogaa. Neeni oottana koshshiya ha ubbabay deꞌishin, ubba galla Geeshsha Maxaafaa nabbabanawu, nabbabidobaa wotta dentta qoppanawunne oosuwan peeshshanawu wodiya waata demmana danddayay?

6. Neeni Geeshsha Maxaafaa nabbabanawu waatana danddayay? (Misiliyakka xeella.)

⁶ Nuuni Kiristtaane gidiyogaadan, Geeshsha Maxaafaa nabbabiyogee ‘loꞌꞌobatuppe’ woy keehi koshshiyabatuppe issuwa gidiyo gishshawu nuuni ubbatoo nabbabana bessees. (Pili. 1:10) Koyro mazamuree ufayttiya uraabaa yootiiddi hagaadan gees: “GODAA higgiyan i ufaittees; a higgiyaa gallassinne qammi qoppees.” (Maz. 1:1, 2) Hegee nuuni wodiya bazzidi Geeshsha Maxaafaa nabbabana koshshiyogaa yootiyogee qoncce. Geeshsha Maxaafaa nabbabanawu keehi loꞌꞌo wodee awudee? Nuuni ubbay issi gallassaa giddon keehi loꞌꞌo wodiya doorana danddayoos. Shin nuuni ubbatoo Geeshsha Maxaafaa nabbabanawu  injjetiya wodiya dooriyogee keehi koshshiyaba. Viktoora giyo ishay hagaadan giis: “Taani Geeshsha Maxaafaa maallado nabbabiyogaa dosays. Taani maallado denddiyogaa dosana xayikkokka, he wode ta qofay shaahettanaadan oottiyabay darenna. Taani loytta beegottiyo gishshawu, ta qofaa shiishsha ekkanawu metootikke.” Neenikka yaatana danddayay? Nena hagaadan oychcha, ‘Geeshsha Maxaafaa nabbabanawu taayyo keehi loꞌꞌo wodee awudee?’

NABBABIDOBAA WOTTA DENTTA QOPPA

7-8. Nuuni nabbabidoban loytti goꞌettennaadan diggana danddayiyabay aybee? Leemisuwa yoota.

⁷ Nuuni ubbatoo darobaa nabbabikkokka, aynne akeekennan aggana danddayoos. Neeni issibaa nabbaba simmada nabbabidobaa sohuwara doga eray? Nuuni ubbaykka dogi eroos. Shin nuuni Geeshsha Maxaafaa nabbabiyo wodekka hegaa malabay hanana danddayiyogee azzanttiyaba. Leemisuwawu, nuuni Geeshsha Maxaafaappe amarida shemppota ubba galla nabbabanawu halchchana danddayoos. Hegee loꞌꞌoba. Nuuni halchchuwa kessidi hegaa polanawu baaxetana koshshees. (1 Qor. 9:26) Shin nuuni Geeshsha Maxaafaa nabbabiyogan loytti goꞌettanawu koyikko, nabbabiyogaappe aarobaa oottana koshshees.

⁸ Ha leemisuwa qoppa: Mittawu maatawu iray koshshees. Gidikkokka amarida wodiya giddon keehi wolqqaama iray bukkikko, biittay urqqatees. Hegaa mala wodiyan iray gujjidi bukkikko biittaa giddo gelenna gishshawu mokkiya doliyabawu maaddenna. Haattay biittaa giddo gelin mittay maatay loytti diccanaadan leddi giidi bukkiya iray loꞌꞌo. Hegaadankka, nuuni wotti dentti qoppana, hassayananne goꞌettana danddayenna hanotan Geeshsha Maxaafaa eesuwan nabbabana koshshenna.—Yaaq. 1:24.

9. Nuuni Geeshsha Maxaafaa eesuwan nabbabiyogaa akeekikko waatana koshshii?

⁹ Neeni issi issitoo Geeshsha Maxaafaa eesuwan nabbabiyogaa akeekadii? Yaatikko neeni waatana koshshii? Leddi ga. Neeni nabbabaydda deꞌiyobaa woy nabbabaychchidobaa wotta dentta qoppanawu baaxeta. Neeni yaatanawu  unꞌꞌettana koshshenna. Neeni wotta dentta qoppanaadan maaddana mala xannaꞌanawu adussa wodiya bazzana danddayaasa. Woy amarida xiqiseta nabbaba simmada attida wodiyan qassi nabbabidobaa wotta dentta qoppana danddayaasa. Qommoora abay odettido Viktoori hagaadan giis: “Taani Geeshsha Maxaafaappe guuttaa nabbabays; geella issi shemppo gidana danddayees. Taani maallado nabbabiyo gishshawu, nabbabidobaa kumetta gallassan qoppana danddayays.” Neeni ay keena nabbabanaakko kuuyana danddayikkokka, neeni nabbabidobaa wotta dentta qoppana mala leddi gaada nabbabiyogee keehippe koshshiyaba.—Maz. 119:97; “ Qoppana Koshshiyo Oyshata” giya saaxiniya xeella.

10. Neeni eridobaa oosuwan peeshshana danddayiyo ogeta qonccissa. (1 Tasalonqqe 5:17, 18)

¹⁰ Neeni amarida paydota nabbabiyo wode, hegeeta waata oosuwan peeshshana danddayiyakko loytta qoppa. Neeni Xoossaa Qaalaappe amaridaagaa nabbabiyo wode, ‘Ha qofaa taani haꞌꞌi woy sinttappe waata oosuwa peeshshana danddayiyanaa?’ gaada nena oychcha. Leemisuwawu, neeni 1 Tasalonqqe 5:17, 18 nabbabaydda deꞌiyabadan qoppa. (Nabbaba.) Neeni aapputoo woossiyakko, qassi wozanappe woossiyakko ha paydota nabbaba simmada takki gaada qoppana danddayaasa. Neeni galatanaadan oottiyabatakka wotta dentta qoppana danddayaasa. Neeni heezzubawu Yihoowa galatanawu kuuyana danddayaasa. Neeni Geeshsha Maxaafaappe eridobaa wotta dentta qoppanawu amarida daqiiqaa bazziyogeekka neeni Xoossaa Qaalaa akeekanaadaaninne oosuwan peeshshanaadan maaddana. Qassi neeni Geeshsha Maxaafaappe nabbabidobaa ubba galla oosuwan peeshshikko, leddan leddan Yihoowawu loꞌꞌo ashkkara gidaasa! Gidikkokka, neeni giigissana bessiya darobati deꞌikko, ne waatana koshshii?

OOTTANA DANDDAYIYOBAA HALCHCHA

11. Neeni issi issitoo hidootaa qanxxana danddayiyoy aybissee? Leemisuwa yoota.

¹¹ Neeni Geeshsha Maxaafaa nabbabiyo wode giigissana koshshiya darobati deꞌiyogaa akeekada issi issitoo hidootaa qanxxana danddayaasa. Leemisuwawu, neeni asa asappe shaakkana koshshennaagaa yootiya zoriya Geeshsha Maxaafaappe hachchi nabbabaydda deꞌiyabadan qoppa. (Yaaq. 2:1-8) Neeni harata xeelliyo ogiya giigissana koshshiyogaa akeekikko, hegaa giigissanawu kuuyana danddayaasa. Hegee keehi loꞌꞌoba! Qassi wonttetta gallassi, haasayiyoban naagettiyogee keehi koshshiyogaa yootiya amarida paydota nabbabadasa. (Yaaq. 3:1-12) Qohiyabaa woy minttettennabaa neeni issi issitoo haasayiyogaa akeekadasa. Yaatiyo gishshawu neeni haratuura haasayiyo wode kaseegaappe aaruwan minttettiyabaa haasayanawu kuuyadasa. Kaalliya gallassi, ha alamiya  asaara laggetana koshshennaagaa yootiya qofaa Geeshsha Maxaafaappe nabbabadasa. (Yaaq. 4:4-12) Neeni nabbabiyobaa, beꞌiyobaanne siyiyobaa xeelliyagan loytta naagettana koshshiyogaa akeekadasa. Oyddantta gallassan, neeni giigissana koshshiyo ha ubbabata keehi deexxiyabadan qoppana danddayaasa.

12. Neeni Geeshsha Maxaafaa nabbabiyo wode giigissana koshshiyabaa akeekikko hidootaa qanxxana bessennay aybissee? (Tohossa qofaakka xeella.)

¹² Neeni laammana woy giigissana koshshiya darobay deꞌikko hidootaa qanxxoppa. Hegaa akeekiyogee neeyyo loꞌꞌo wozanay deꞌiyogaa bessiyaba. Bana ziqqi oottiyanne tumanchcha gidida uri giigissana koshshiyabaa qoppiiddi Geeshsha Maxaafaa nabbabees. a Neenikka ubbatoo “ooratta meretaa” maayana koshshiyogaa hassaya. (Qol. 3:10) Xoossaa Qaalaa ubbatoo oosuwan peeshshanawu nena aybi maaddanee?

13. Neeni tamaaridobaa oosuwan peeshshanawu maaddiya loꞌꞌo ogee awugee? (Misiliyakka xeella.)

¹³ Neeni nabbabido ubbabaa issi kutti oosuwan peeshshanawu baaxetiyogaappe, neeni oottana danddayiyobaa halchcha. (Lee. 11:2) Hagaadan oottanawu mala: Neeni giigissana koshshiyabata xaafada, neeni koyroora oottiyo issibaa woy naaꞌꞌubaa doora; yaatada hinkkoota haroode oottana danddayaasa. Neeni awugaappe doommana koshshii?

14. Neeni ayba halchchotun doommana danddayay?

¹⁴ Polanawu wayssenna halchchuwan doommanawu neeni kuuyana danddayaasa. Woy neeni kasetada giigissana koshshiyabaa doorana danddayaasa. Neeni giigissana koyiyobaa doorikko nu xuufeta goꞌettada pilgga; geella Wachtawur Onlayn Laybreeriyanne Yihoowa Markkati Geeshsha Maxaafaa Xannaꞌanawu Maaddiya  Xuufiya goꞌettana danddayaasa. ‘Nena eeno giissanaadaaninne ba koyiyobaa ootissanaadan’ Yihoowa woossa. (Pili. 2:13) Yaatada eridobaa oosuwan peeshshanawu baaxeta. Neeni koyro halchchidobaa poliyogee harabaakka giigissanaadan nena denttettana danddayees. Neeni Kiristtaanetuppe koyettiyagaadan deꞌikko, qassi Kiristtaanetuppe koyettiya eeshshaa bessikko, harabatunkka laamettanawu metootennan aggana danddayaasa.

XOOSSAA QAALAY ‘NENAN OOTTANAADAN’ EENO GA

15. Geeshsha Maxaafaa nabbabiya daro asaappe Yihoowa asay waani dummatii? (1 Tasalonqqe 2:13)

¹⁵ Amarida asati Geeshsha Maxaafaa darotoo nabbabidoogaa yootoosona. Shin eti Geeshsha Maxaafay yootiyobaa tumuppe ammaniyonaa? Geeshsha Maxaafay yootiyogaadan deꞌanawunne bantta deꞌuwan laamettanawu baaxetiyonaa? Chii. Daroti Geeshsha Maxaafay yootiyo zoriya kaallokkona. Shin Yihoowa asay eta mala gidenna! Koyro xeetu layttan deꞌida Kiristtaanetuugaadan, nuuni Geeshsha Maxaafaa ‘tuma gidida Xoossaa Qaalaadan’ ekkida. Hegaa bollikka, Geeshsha Maxaafay yootiyo zoriya nu deꞌuwan oosuwan peeshshanawu nuussi danddayettida ubbabaa oottoos.—1 Tasalonqqe 2:13 nabbaba.

16. Nuuni Xoossaa Qaalaa oosuwan peeshshiyageeta gidanaadan nuna aybi maaddana danddayii?

¹⁶ Xoossaa Qaalaa nabbabiyogeenne oosuwan peeshshiyogee issi issitoo metiyaba gidana danddayees. Nabbabanawu wodiya demmiyogee deexxiyaba gidana danddayees. Woy nuuni Geeshsha Maxaafaa eesuwan nabbabiyageeta woy nabbabidobaa loytti qoppennaageeta gidana danddayoos. Woy qassi nuuni giigissana koshshiya darobaa akeekidi unꞌꞌettana danddayoos. Ne metoy ayba gidikkokka hidootaa qanxxoppa. Yihooway maaddin neeni hegaa xoonana danddayaasa. Nuuni A maaduwa ekkanawunne Xoossaa Qaalaa siyiyageeta xalaala gidennan oottiyageeta gidanawu murttidaageeta gidoos. Nuuni Xoossaa Qaalaa loytti nabbabiyageetanne nu deꞌuwan oosuwan peeshshiyageeta gidikko, loytti ufayttanaagee qoncce.—Yaaq. 1:25.