1. Matan Yesuusi ay oottanee?

 NUUNI wurssettay keehi matido wodiyan deˈoos! Mata wode Yesuusi ubba asaa bolli pirddana. He pirddaappe kase ha saˈaa bolli haniyabata Yesuusi qonccissiis. I beettenna hanotan qoncciyo wodiyawunne “wodiya wurssettawu malaatay” aybakko bana kaalliyageetuyyo yootiis. (Mat. 24:3) Ha hiraagay Maatiyosa shemppo 24​ninne 25​n, qassi Marqqoosa shemppo 13​ninne Luqaasa shemppo 21​n odettiis.

2. Nuuni ha huuphe yohuwan ay beˈanee, qassi hegee nuna maaddiyoy aybissee?

² Yesuusi nuuni giigettanaadan maaddanawu heezzu leemisota yootiis. He leemisoti nuuyyo zore mala. Hegeeti dorssaanne deeshshaabaa, cinccanne cincca gidenna geelaˈotubaanne taalanttiyabaa yootiya leemisota. Ha leemisoti ubbay Yesuusi issi uray oottiyobaa beˈidi pirddanaagaa nuuni akeekanaadan maaddoosona. Nuuni ha leemisotanne etappe tamaarana danddayiyobata ha huuphe yohuwan beˈana. Nuuni koyruwan, dorssatubaanne deeshshatubaa yootiya leemisuwa beˈana.

DORSSATANNE DEESHSHATA

3. Yesuusi asaa bolli pirddanay awudee?

³ Yesuusi dorssatubaanne deeshshatubaa yootido leemisuwan  mishiraachchuwa siyanawunne tiyettida A ishantta kaafanawu injjiya demmida asatu bolli I pirddiyo pirddaabaa qonccissiis. (Mat. 25:31-46) ‘Gita waayiya’ wode, Armmageedoona olay doommanaappe guuttaa kasetidi eti dorssa woy deeshsha gidiyogaa I kuuyees. (Mat. 24:21) Henttanchchay dorssata deeshshatuppe shaakkiyogaadan, Yesuusikka A kaalliya tiyettidaageeta ammanettidi kaafida asata kaafibeennaageetuppe shaakkana.

4. Isiyaasa 11:3, 4y yootiyogaadan, Yesuusi asaa bolli suure pirddanaagaa nuuni ammanettana danddayiyoy aybissee? (misiliyakka xeella.)

⁴ Yesuusi Yihooway sunttido Daanna gidiyo gishshawu, ubbatoo suurebaa pirddanaagaa Geeshsha Maxaafaa hiraagay bessees. (Isiyaasa 11:3, 4 nabbaba.) I asay tiyettida ba ishantta oyqqiyo ogiya gujjin, asay oottiyobaa, qoppiyobaanne haasayiyobaa loytti kaallees. (Mat. 12:36, 37; 25:40) Yesuusi tiyettida ba ishanttanne eta oosuwa kaafidaageeta erana. a Dorssa mala gidida asati Kiristtoosa ishantta kaafiyo waannatiya ogetuppe issoy sabbakuwa oosuwan etaara hashetiyogaa. Hegaadan maaddidaageeta I ‘xillo’ giidi pirddana; qassi eti saˈan “merinawu deˈana.” (Mat. 25:46; Ajj. 7:16, 17) Ammanettidi deˈiyageetuyyo hegee gita woyto! Eti gita waayiya wodiyaninne hegaappe simmin ammanettidi deˈiyogan ‘deˈo maxaafaappe’ bantta sunttay qucettennaadan oottoosona.—Ajj. 20:15.

5. Dorssatubaanne deeshshatubaa yootiya leemisuwappe ay tamaariyoo, qassi hegaappe goˈettana danddayiyageeti oonee?

⁵ Ammanettada deˈa. Yesuusi dorssatubaanne deeshshatubaa yootido leemisoy waannatettan saˈan merinawu deˈanawu hidootiyageetubaa yootees. Eti sabbakuwa oosuwan Kiristtoosa ishanttuura hashetiyogaaninne Yesuusi doorido ammanettida wozannaama ayllee immiyo kaaletuwa mintti kaalliyogan banttawu ammanoy deˈiyogaa bessoosona. (Mat. 24:45) Shin saluwa biyo hidootay deˈiyogeetikka he leemisuwan odettida zoriya oosuwan peeshshana koshshees. Aybissi? Yesuusi eti oottiyobaa, qoppiyobaanne haasayiyobaa loytti kaalliyo gishshataassa. Etikka ammanettiyageeta gidana koshshees. Qassi Yesuusi yootido hara naaˈˈu leemisotun tiyettidaageeta zoriis. He leemisotikka Maatiyosa shemppo 25​n deˈoosona. Cinccanne cincca gidenna geelaˈotubaa yootiya leemisuwa ane kaallidi beˈoos.

CINCCANNE CINCCA GIDENNA GEELAˈOTA

6. Ichchashu geelaˈoti cincca gidiyogaa waati bessidonaa? (Maatiyosa 25:6-10)

⁶ Yesuusi geelaˈotubaa yootido leemisuwan, mishiraa mokkanawu kiyida tammu geelaˈotubaa yootiis. (Mat. 25:1-4) Eti ubbay mishiraara bullachchaa gelanawu hidootidosona. Yesuusi etappe ichchashati “cincca” gidiyogaanne hara ichchashati ‘cincca gidennaagaa’ yootiis. Cincca geelaˈoti loytti giigettidinne beegottidi naagidosona. Mishiray gakkidoy qamma bilahiyan gidikkokka, eti I yaana gakkanaashin naaganawu giigi uttidosona. Yaaniyo gishshawu, eti xuman pooˈissanawu xomppiyayyo zaytiya oyqqidosona. Eti geella mishiray takkikko giidi gujo zaytiyakka oyqqidosona. Yaatiyo gishshawu, eti xomppiya xomppiiddi takkanawu giigettidosona. (Maatiyosa 25:6-10 nabbaba.) Mishiray gakkido wode cincca geelaˈoti aara bullachchawu gelidosona. Hegaadankka, Yesuusi yaana gakkanaashin beegottidinne ammanettidi deˈiyogan giigi uttida tiyettida  Kiristtaaneti Mishira gidida Yesuusaara saluwa Kawotettan haariyogan bantta woytuwa ekkana. b (Ajj. 7:1-3) Cincca gidenna ichchashu geelaˈoti shin?

7. Cincca gidenna ichchashu geelaˈoti waanidonaa, qassi aybissi?

⁷ Cincca gidida geelaˈotuppe dumma hanotan, cincca gidenna ichchashati mishiray yiyo wode giigi uttibookkona. Eta xomppee xayana hanees, qassi eti gujo zaytiya oyqqibookkona. Mishiray yaana haniyogaa eridi, zaytiya shammanawu biidosona. Mishiray yiyo wode eti biido sohuwappe simmibookkona. He wode, “giigi uttida geelaˈoti aara bullachchawu gelidosona; yaatin karee gorddettiis.” (Mat. 25:10) Guyyeppe, cincca gidenna geelaˈoti yiidi gelanawu koyido wode mishiray etawu hagaadan giis: “Taani inttena erikke.” (Mat. 25:11, 12) He geelaˈoti mishiray yaana gakkanaashin giigettidi naagibookkona. Tiyettidaageeti hagaappe ay tamaariyonaa?

8-9. Tiyettidaageeti geelaˈotubaa yootiya leemisuwappe ay tamaarana danddayiyonaa? (Misiliyakka xeella.)

⁸ Giigettadanne beegottada deˈa. Tiyettidaageeti ha alamee xayiyo wodee gakkanaashin naaganawu giigi uttidanne giigi uttibeenna naaˈˈu citan deˈiyabadan Yesuusi yootibeenna. Shin wurssettay gakkanaassi ammanettidi genccana xayikko, tiyettidaageetu bolli gakkanabaa I qonccissiis. Eti giigi uttana xayikko, bantta woytuwa ekkokkona. (Yoh. 14:3, 4) Hegee keehi azzanttiyaba! Nuuni deˈanawu hidootiyoy saluwan woy saˈan gidin nuuni ubbaykka geelaˈotubaa yootiya leemisuwan odettida zoriya kaallana koshshees. Nuuni ubbay naagi uttana, giigettananne wurssettay gakkanaashin genccana bessees.—Mat. 24:13.

⁹ Giigettidinne beegottidi deˈiyogee keehi koshshiyogaa bessanawu Yesuusi geelaˈotubaa qonccissiya leemisuwa yooti simmidi, taalanttiyabaa qonccissiya leemisuwa yootiis.  He leemisoy nuuni minni oottana koshshiyogaa qonccissees.

TAALANTTIYA

10. Naaˈˈu aylleti ammanettiyageeta gidiyogaa waati bessidonaa? (Maatiyosa 25:19-23)

¹⁰ Taalanttiyabaa qonccissiya leemisuwan, Yesuusi bantta godawu ammanettida naaˈˈu aylletubaanne ammanettibeenna issi aylliyabaa yootiis. (Mat. 25:14-18) Naaˈˈu aylleti bantta godawu miishshaa worissanawu minni oottiyogan ammanettiyageeta gidiyogaa bessidosona. I hara biitti baanaappe kase taalanttiya, hegeekka keehi daro miishshaa etayyo hadaraa immiis. Ammanettida naaˈˈu aylleti minni oottidosonanne miishshaa suure goˈettidosona. Eti ayba ayfe demmidonaa? Eta goday simmiyo wode, eti banttayyo imettida miishshaa naaˈˈu kushe worissidi naagidosona. He goday eta galatiis, qassi eti ‘aara ufayttidosona.’ (Maatiyosa 25:19-23 nabbaba.) Heezzantto ayllee shin? A goday awu immido miishshaa I waatidee?

11. ‘Azalla aylliya’ bolli gakkidabay aybee, qassi aybissi?

¹¹ Heezzantto ayllee issi taalanttiya ekkidaba gidikkonne, I “azalla aylle.” A goday I taalanttiya suure goˈettana giidi qoppiis. Shin I taalanttiya biittan moogiis. Goday yiyo wode he ayllee aybanne worissidi zaaribeenna. He ayllee loˈˈobaa qoppibeenna. Ubba I ba godawu miishshaa worissibeennaagawu maarotaa oychchiyogaa aggidi, “ufayssanawu metiya asa” giidi ba godaa cayiis. He ayllee ba godan nashettibeenna. Hegaappe aaruwan, A goday appe taalanttiya ekkidi ba sooppe A kessiis.—Mat. 25:24, 26-30.

12. Ammanettida naaˈˈu aylleti ha wodiyan oona qonccissiyonaa?

¹² Ammanettida naaˈˈu aylleti ayyaanan tiyettida ammanettida Kiristtaaneta qonccissoosona. Goday Yesuusi eti ‘bantta godaara ufayttanaadan’ shoobbees. Eti koyro dendduwa denddidi saluwan woytuwa ekkana. (Mat. 25:21, 23; Ajj. 20:5b) Azalla ayllee oottido iitabay tiyettidaageeti naagettana koshshiyabaa bessees. Waatidi?

13-14. Taalanttiyabaa yootiya leemisuwappe tiyettidaageeti ay tamaarana danddayiyonaa? (Misiliyakka xeella.)

¹³ Ubbatoo minna ootta. Geelaˈotubaa yootiya  leemisuwagaadan, taalanttiyabaa yootiya leemisuwankka Yesuusi tiyettidaageeti azalla gidanaagaa yootiiddi deˈenna. Eti minni oottiyogaa aggikko aybi hananaakko I yootiiddi deˈees. Eti “Xoossai xeesidoogaanne dooridoogaa minttanau” baaxetokkona; qassi saluwa Kawotettaa laattokkona.—2 PHe. 1:10.

¹⁴ Yesuusi geelaˈotubaanne taalanttiyabaa yootido leemisuwan, tiyettida Kiristtaaneti ubbay giigettidi naagana, beegottidi deˈananne minnidi oottana koshshiyogaa qonccissiis. Shin Yesuusi tiyettidaageeta zoranawu harabaakka yootidee? Ee, yootiis! Yesuusi Maatiyosa 24:40, 41n yootido qofay tiyettidaageetu bolli wurssettan wodhdhiya maatafaabaakka yootees.

XOOSSAY EKKANAY OONEE?

15-16. Maatiyosa 24:40, 41 tiyettidaageeti naagi uttana koshshiyogaa waati qonccissii?

¹⁵ Yesuusi heezzu leemisota yootanaappe kase, wurssetta maatafay wodhdhana bessiyo asatubaa yootiis. I gaden oottiya naaˈˈu attumaasatubaanne woxan gaacciya naaˈˈu maccaasatubaa yootiis. Attumaageeti issi malabaa qassi maccaageetikka issi malabaa oottiyaba milatees; shin Yesuusi ‘Xoossay issuwa ekkidi, hinkkuwa agganaagaa’ yootiis. (Maatiyosa 24:40, 41 nabbaba.) Hegaappe simmin, I bana kaalliyageetussi hagaadan giis: “Hegaa gishshawu, intte Goday yaana gallassaa intte erenna gishshawu, naagi uttite.” (Mat. 24:42) Yesuusi geelaˈotu leemisuwa odi simmidikka, hegaara issi malabaa yootiis. (Mat. 25:13) He qofati gayttiyonaa? Gayttiyaba milatees; ayssi giikko saluwa Kawotettan Yesuusaara haarana mala tumuppe ayyaanan tiyettida ammanettidaageetu xalaalaa Xoossay “ekkana.”—Yoh. 14:3.

¹⁶ Naaga utta. Ayyaanan tiyettidaageetuppe giigi uttibeenna ooninne ‘doorettidaageetuura’ shiiqenna. (Mat. 24:31) Qassi saˈan merinawu deˈanawu hidootiyageeti ubbaykka naagi uttananne ammanettidi deˈana koshshees.

17. Yihooway amaridaageeta ayyaanan tiyanawu dooriyo wodiya xeelliyagan nuuni hirggana koshshennay aybissee?

¹⁷ Nuuni Yihoowa loytti eriyo gishshawu A pirddan ammanettoos. Yaaniyo gishshawu, ha wodiyan Yihooway ammanettidaageetuppe amaridaageeta ayyaanan tiyanawu doorikko, hegee nuna hirggissana koshshenna. c Yesuusi woyne gadiyabaa yootido leemisuwan, 11 saate heeran qaxarettida oosanchchatubaa woygidaakko nuuni hassayoos. (Mat. 20:1-16) Woyniya gaden oottanaadan omarssi qaxarettidaageetikka, maalladoppe doommidi oottiiddi takkidaageetuura lagge miishshaa ekkidosona. Hegaadankka, Yihooway ayyaanan tiyanaageeta dooriyoy awude gidikkokka, eti ammanettidi deˈikko saluwan woytuwa ekkana.

YESUUSI YOOTIDO ZORIYA OOSUWAN PEESHSHA

18-19. Nuuni ha leemisotuppe ay tamaaridoo?

¹⁸ Nuuni hanno gakkanawu ay beˈidoo? Saˈan merinawu deˈanawu hidootiyageeti haˈˈikka sinttappe gita waayiya wodekka Yihoowawu ammanettidi deˈiyogee keehi koshshiyogaa dorssatubaanne deeshshatubaa yootiya leemisoy bessees. Sinttappe Yesuusi ammanettidaageeti ‘merinawu deˈanaadan’ kuuyana.—Mat. 25:46.

¹⁹ Tiyettidaageeti naagettanaadan maaddiya naaˈˈu leemisotakka beˈida. Yesuusi yootido cinccanne cincca gidenna geelaˈotu leemisuwan, ichchashati akeekanchcha gidiyogaa  bessidosona. Eti mishiray yaana gakkanaashin giigettidinne beegottidi naagidosona. Shin cincca gidenna geelaˈoti giigi uttibookkona. Yaaniyo gishshawu, mishiray eti ba bullachchaa gelennaadan diggiis. Yesuusi ha alamiya xayssana gakkanawu nuuni ay keena wodiya naagana koshshikkokka giigi uttana bessees. Qassi Yesuusi yootido taalanttiya leemisuwan, ammanettida naaˈˈu aylleti minni oottidoogaa beˈida. Eti bantta godawu minni oottido gishshawu an nashettidosona. Shin goday azalla aylliya yedettiis. Nuuni hagaappe ay tamaariyoo? Nuuni wurssettay gakkanawu Yihoowayyo minnidi haggaazana koshshees. Tiyettidaageeti Yesuusi eta saluwa efaana gakkanawu naagi uttiyogee ay keena koshshiyakko wurssettan beˈida. Eti saluwan Yesuusaara ‘deˈanawu shiiqiyo’ wodiya yeemuwan naagoosona. Armmageedoona olaappe simmin, eti Dorssaa bullachchan Yesuusa mishira gidoosona.—2 Tas. 2:1; Ajj. 19:9.

20. Yihooway ba zoriya oosuwan peeshshiyageetuyyo ay oottanee?

²⁰ Yesuusi pirddiyo wodee keehi mati mati biikkokka, nuuni hirggana koshshenna. Nuuni ammanettidi deˈikko, saluwan deˈiya nu siiqo Aaway ‘nuuni attidi asa Naˈaa sinttan eqqana’ mala ‘ubbaappe aadhdhiya wolqqaa’ nuussi immana. (2 Qor. 4:7; Luq. 21:36) Nuuni deˈanawu hidootiyoy saluwan woy saˈan gidin, Yesuusi yootido leemisotun deˈiya zoriya oosuwan peeshshikko nu Aawaa ufayssana. Yihoowa aaro kehatettaappe denddidaagan nu sunttay deˈo ‘maxaafan xaafetti’ uttana.—Dane. 12:1; Ajj. 3:5.