Taani 1934n yelettaas. Tana yelidaageeti Siwezerlanddeppe Kanaadan, Ontariyo giyosan alꞌꞌo shuchchaa bookkidi kessiyo Timinsa giyo katamaa yiidosona. Ta aayyiya 1939 heeran, Wochchiyo Keelaa maxeetiya nabbabiyogaanne Yihoowa Markkatu shiiqota shiiqiyogaa doommaasu. A tana, ta heezzu ishanttanne ta heezzu michchontta banaara ekka bawusu. Darin takkennan, ta aayyiya Yihoowa Markka gidaasu.

Ta aayyiya Yihoowa Markka gididoogan ta aaway ufayttibeennaba gidikkonne, A tumaa siiqiyo gishshawu Yihoowawu ammanettada deꞌanawu murttaasu. Kanaadan 1940 doometta heeran, Yihoowa Markkatu oosoy teqettido wodiyankka A hegaadan oottaasu. Qassi ta aaway iyyo meqettaa iitiyo wodekka A ta aawawu kehawusunne A bonchchawusu. A keehi loꞌꞌo leemiso gididoogee taaninne ta ishanttinne michchonttikka Yihoowawu haggaazanaadan maaddiis. Guyyeppe, nu aaway ba qofaa laammidoogaaninne nu so asawu kehiyogaa doommidoogan nuuni keehi ufayttida.

Taani Naase 1950n Tiꞌokiraasiya Dichchaa giyo gita shiiquwa Niwu York Sitin shiiqaas. Kumetta saꞌaappe shiiqida ishanttuuranne michchonttuura gaytta simmadanne Giiliyade Timirtte Keettan loohidaageeta oychchiyo ufayssiya oysha zaaruwa siya simmada Yihoowawu kaseegaappe aaruwan haggaazanawu amottaas! Ubba wode haggaazuwa doommanawu awudeegaappenne aaruwan murttaas. Taani soo simmada sohuwara ubba wode aqinye gidanawu qitsiya kunttaas. Yaatin Kanaada macara biiroy taani kasetada haattan muukettana koshshiyogaa yootiya dabddaabbiya kiittiis. Taani Xiqimita 1, 1950n haattan muukettaas. Issi aginaappe guyyiyan, ubba wode aqinye gidaas; taani koyro maddabettidoy Kapuskasing giyo katamaana. He katamay  he wode taani deꞌiyosaappe keehi daro kilo meetiriya haakkees.

Macara biiroy 1951n Paransaayettuwa haasayana danddayiya Yihoowa Markkati Kuwibeken Paransaayettuwa haasayiyageeti deꞌiyo heeraa baana koyiyakkonne oychchiis. Aassiyageeti yan keehi koshshoosona. Taani Paransaayettuwanne Inggilizettuwa haasayana danddayiyo gishshawu, he shoobiya ekkada Royan giyo kataman maddabettaas. Ta eriyo asi yan baawa. Taani doomettan odidoogaadan, issi ura adraashaa xalaalay tawu deꞌees. Shin ubbabaykka injjetiis. Marseelinne taani keehi loꞌꞌo lagge gidida, qassi oyddu layttawu Kuwibeken ufayttaydda haggaazada wurssettan taani dumma aqinye gidaas.

Taani Kuwibeken deꞌiyo wode, Niwu Yorken, Sawuz Lansinggen Giiliyade Timirtte Keettan 26tta kayan tamaaranaadan shoobettidoogan keehi ufayttaas. Taani Usuppune 12, 1956n anjjettada, haꞌꞌi Gaana b geetetti xeesettiya Arggo Afirkka maddabettaas. Taani Gaana baanaappe kase yaa baanawu koshshiyabata giigissana gakkanaashin, Kanaada simmana koshshiis. Taani Kanaadan naaꞌꞌu woy heezzu saamintta xalaala takkays gaada qoppaas.

He koshshiyabati giiganaashin taani Torontton laappun aginaa takkaas. He wode Kiripisa so asay taani eta keettan takkanaadan paqqadidosona; yaatin Sheyilo giyo eta naꞌeera erettaas. Nuuni keehi siiqettida. Taani O ekkanawu qoppishin, Gaana biitti geliyo piqaadiya demmaas. Sheyilanne taani hegaabaa woossi simmidi, taani yaa baana koshshiyogaa kuuyida. Shin nuuni sinttappe aqo oyqqana danddayiyo wodiya naagiiddi issoy issuwawu dabddaabbiya xaafanawukka kuuyida. Hegaadan kuuyiyogee keehi deexxiyaba; shin nuuni likkebaa kuuyidoogaa guyyeppe akeekida.

Baaburiyan, caana markkabiyaninne horophphilliyan baada issi aginaappe guyyiyan Gaana waanna katamaa Akra gakkaas. Taani yan awuraajjaa xomoosiyagaa gidida maddabettaas. Yaatiyo gishshawu, taani kumetta Gaana, qassi heeran deꞌiya Ayvori Kostenne (haꞌꞌi Kot Divuwar  geetettees) Togoland (haꞌꞌi Toogo geetettees) giyosaa yuuyada xomoosaas. Darotoo taani macaraa biiruwa kaamiyan tarkka manddaraas. Taani ishantta xomoosanawu biidoogan keehi ufayttaas!

Saaminttaa wurssettan shiiqiyo woradaa shiiqotun taani oottiyobati deꞌoosona. Nuuyyo Gita Shiiquwa Addaraashati baawa. Yaatiyo gishshawu, ishantti asaa awaappe ashshanawu woyshshaa essidi bollaara zambbaa hayttaa kammoosona. Quma keettan piriijee baynna gishshawu ishantti banttawu deꞌiya mehiya shukkidi shiiquwa shiiqida asaa mizoosona.

He shiiqotun issi issitoo garamissiyabay haniis. Issi wode, tanaara misoonaawe gididi haggaaziya Herb Jenenezi, c haasayaa haasayiiddi deꞌishin quma keettaappe issi miizziya keesa ekkada yaasu. He miizziya madirakiyappenne shiiqida asaappe gidduwara kanttaasu. Herbi haasayiyogaa essiis; qassi miizziya barggaagaasu. Shin mino gidida oyddu ishantti O oyqqidi quma keettaa efiido wode shiiqida asay ufayttiis.

Woradaa shiiqotuppe kasetiya gallassatun taani Ze Niwu Worlid Sosayiti In Akishin giya pilimiya matan deꞌiya gaxare heeratun bessays. Yaatanawu taani naaꞌꞌu mittaa haaranne yaara essada bootta carqqiya A bolli kaqqays; yaatada pilimiya hegan bessays. Asay hegaa beꞌidi dosiis! Daroti hegaappe kase pilimiya beꞌi erokkona. Eti asay haattan muukettiyogaa pilimiyan beꞌidi kushiya loytti baqqidosona. Eti he pilimeta beꞌidoogee Yihoowa Markkati issuwa gidiyogaanne kumetta saꞌan deꞌiyogaa akeekanaadan maaddiis.

Afirkkan naaꞌꞌu laytta gidiyagaa takka simmada, 1958n Niwu York Sitin dumma dumma biittaappe yiidaageeti shiiqido gita shiiquwa shiiqada keehi ufayttaas. Kuwibekeppe yiida Sheyiliira gayttada keehi ufayttaas; A yan dumma aqinye gidada haggaazawusu. Nuuni issoy issuwawu dabddaabbiya xaafiiddi takkidi haꞌꞌi issippe gayttida; yaatin ta O ekkanawu oychchin A eeno gaasu. Sheyila Giiliyade Timirtte Keettan tamaarada Afirkkan tanaara haggaazana danddayiyakkonne oychchanawu Ishaa Noorawu d dabddaabbiya xaafaas. I eeno giis. Wurssettan Sheyila Gaana yaasu. Nuuni Xiqimita 3, 1959n Akran aqo oyqqida. Nuuni nu deꞌuwan Yihoowa kaseyido gishshawu I tumuppe nuna anjjidoogaa beꞌida.

Nuuni 1961n Kaameruune biitti maddabettida. He biittan ooratta macara biiruwa essiyogan maaddanaadan taani sunttettido gishshawu tawu oosoy keehi dariis. Taani Kaameruunen oosettiya oosuwa xomoosiyo gishshawu darobaa tamaarana koshshiis. Guyyeppe 1965n Sheyila shahaaridoogaa nuuni erida. Nuuni aawanne aayo gidanaagaa qoppidi unꞌꞌettida. Shin guyyeppe nuuni ha ooratta aawatettan ufayttidi Kanaada simmanawu giigettiyo wodiyan keehi azzanttiyabay haniis.

Sheyili uluwan deꞌiya naꞌi hayqqiis. He naꞌi attuma gidiyogaa dottoree nuussi yootiis. Hegee hanoosappe 50​ppe dariya layttay aadhdhikkonne, nuuni hegaa mule dogibookko. Nuuni keehi azzanidaba gidikkokka, kare biittan haggaaziyo nu dosiyo aawatettan takkida.

Polotikaban oossinne exatenna gishshawu Kaameruunen deꞌiya ishantta darotoo yedetay gakkees. Kawuwa dooriyo wodetun hanotay yaa iitees. Uddufune 13, 1970n, nuuni mule qoppibeennabay haniis; kawotettay Yihoowa Markkatu oosuwa muleera diggiis. Nuuni geloosappe ichchashu aginaa gidido keehi loꞌꞌiya nu ooratta macara biiruwa kawotettay ekkiis. Issi saamintta giddon Sheyilonne tana gujjin, misoonaaweta ubbaa he biittaappe kessidosona. Nuuni ishanttanne michchontta siiqiyo gishshawunne eta gakkanabay nuna hirggissido gishshawu etappe shaahettidi biyogee nuussi deexxiis.

Hegaappe simmin usuppun aginaa Paransaaye macara biiruwan takkida. Yan deꞌaydda Kaameruunen deꞌiya nu ishanttussi koshshiyabaa kunttanawu tawu danddayettida ubbabaa oottiyogaa aggabeykke. He laytti Tisaase aginan, nuuni Nayjeeriya macara biiruwa maddabettida; he macara biiroy Kaameruunen oosettiya oosuwa kaalliyogaa doommiis. Nayjeeriyan deꞌiya ishanttinne michchontti nuna loytti mokkidosona; qassi nuuni yan daro layttawu ufayttiiddi haggaazida.

Nuuni 1973n keehi deexxiyabaa kuuyana koshshiis. Sheyila keehi sahettaasu. Nuuni gita shiiquwawu Niwu Yorke biido wode, A yeekkaydda, “Taani guyye simmana danddayikke! Ayssi giikko, taani keehi daafuraas, qassi tana darotoo sakkees” yaagaasu. A Arggo Afirkkan 14 layttappe daruwa tanaara haggaazaasu. A ammanettada haggaazidoogan taani ufayttikkonne, nuuni issi issibaa laammana koshshiis. Nuuni nu hanotaabaa loytti tobbidinne hegaabaa mintti woossi simmidi A loytta akkamettana danddayiyo Kanaada biitti guyye simmanawu kuuyida. Misoonaawe gididi oottiyogaanne ubba wode haggaazuwa aggiyogee nuuni nu deꞌuwan kuuyido keehi deexxiyanne azzanttiya kuushsha.

Nuuni Kanaada simmido wode, tanaara adussa wodiyawu lagge gidida uraara oosuwa doommaas; Toronttoppe huuphessa baggan deꞌiya kataman kaamiya bayzziyo dirijjitee awu deꞌees. Nuuni keettaa keraa ekkida, asay goꞌettido xawulaappe giigida miishshata shammida, qassi acon gelibookko. Sinttappe nuuni ubba wode haggaazuwa zaarettidi doommana danddayoos giidi qoppido gishshawu nu deꞌuwa sima oottanawu  koyida. Nuuni qoppido wodiyappe kasetidi ubba wode haggaazuwa doommidoogan keehi maalaalettida.

Ontariyon, Norvalan ooratta Gita Shiiquwa Addaraashaa keexxiyo oosuwa Qeeraa Qeeraa baada ta dosan maaddiyogaa doommaas. Guyyeppe, taani he Gita Shiiquwa Addaraashaa xomoosiyagaa gidida sunttettaas. Sheyiliyyo kehido gishshawu A he ooratta aawatettaa polana danddayiyogaa akeekida. Yaatiyo gishshawu, he Gita Shiiquwa Addaraashan deꞌiya keettan deꞌanawu Tamme 1974n biida. Nuuni ubba wode haggaazuwa zaaretti doommidoogan keehi ufayttida!

Sheyiliyyo kehi kehi biidoogee ufayssiyaba. Naaꞌꞌu layttaappe guyyiyan, nuuni woradaa oosuwa oottiyogaa doommida. Nu woraday Manitooba giyo sohuwa; he heeray Kanaadan keehi meeggiya sohotuppe issuwa. Shin yan deꞌiya ishanttinne michchontti wozanappe siiqoosona. Nuuni haggaaziyosay awanne gidin, waannabay nuuni deꞌiyosa ubban Yihoowawu haggaaziyogaa gidiyogaa akeekida.

Nuuni amarida layttawu woradaa oosuwa ootti simmidi, Kanaada Beeteelen haggaazanaadan 1978n shoobettida. Darin takkennan, taani keehi koshshiyabaa tamaaraas. Montriyalen shiiqido dumma shiiquwan taani Paransayettuwan issi saatenne baggawu haasayaa haasayanaadan maddabettaas. Shiiqida asay ta haasayaa ufayttidi siyana danddayibeennaagee azzanttiyaba; hegaa gishshawu Haggaazo Kifiliyan oottiya issi ishay hegaara gayttidagan tana zoriis. Tumaa yootanawu, taani haasayaa haasayiyogan gooba gidennaagaa haꞌꞌi akeekaas; shin he wode hegaa akeekabeykke. Gidikkokka, taani he zoriya siyennan ixxaas. Nuuni maayettana danddayibookko. Qassi I tana boriyabadaaninne taani oottido loꞌꞌobaa yootennabadan qoppada hanqqettaas. Taani zoree imettido ogiyaninne zoriya immida uran xeelaa wottidoogee bala.

Amarida gallassaappe guyyiyan, Macara Biiruwa Konttiya yaray hegaabaa tana haasayissiis. Taani zoriya siyennan ixxidoogaanne hegan zilꞌꞌettidoogaa awu yootaas. Hegaappe simmada tana zorida ishaara haasayaas. Taani maarotaa oychchin I tawu kehatettan atto giis. Ashkketettay keehi koshshiyaba gidiyogaa taani he hanotaappe tamaaraas; qassi hegaa mule dogikke. (Lee. 16:18) Taani hegaa xeelliyagan Yihoowa zaara zaarada woossaas; qassi zoriya iita ogiyan xeellennan agganawu murttaas.

Taani 40​ppe dariya layttawu Kanaada Beeteelen takkaas; qassi 1985​ppe doommada Macara Biruwa Konttiya yara gidiyo maataa demmaas. Usuppune 2021n, ta siiqo machchiya Sheyila hayqqaasu. Taani O keehi laamotays; hegaa bollikka tana sakkees. Shin taani ta ‘deꞌo layttaabaa daro qoppennaagee’ Yihoowa haggaazuwan xeelaa wottanaadaaninne ufayttanaadan maaddiis. (Era. 5:20) Ta deꞌuwan tana daro metoy gakkikkokka, taani loytta ufayttanaadan oottiya keehi darobaa demmaas. Taani ta deꞌuwan Yihoowa kaseyada ubba wode haggaazuwan 70 layttawu haggaazaydda takkidoogee tawu anjjo. Nuuni Yihoowawu haggaaziyo wode xalaalan demmana danddayiyo ufayssiyanne woppa deꞌuwa yelaga ishanttinne michchonttikka demmanaagaa taani ammanettays. Yaatiyo gishshawu, etikka bantta deꞌuwan Yihoowa ubbatoo kaseyanaadan woossays.