Yesuusi Godaa Kahuwa doomissido wode, A kaalliya 70ti aara deꞌennaagee I eta koyibeennaagaa woy eti A kaalliyogaa aggidoogaa bessees giidi nuuni qoppanaadan oottiya gaasoy baawa. Yesuusi he wode, ba kiittidoogeetu xalaalaara bonchchanawu koyiis.

Tammanne naaꞌꞌatikka 70tikka Yesuusa kaalliyageeta. Yesuusi bana kaalliya darotuppe 12ta dooridi, eta kiitettidaageeta giidi xeesiis. (Luq. 6:12-16) I “tammanne naaꞌꞌata xeegidi” ‘Xoossaa Kawotettaabaa yootanaadaaninne harggidaageeta pattanaadan eta kiittido’ wode Galiilan deꞌees. (Luq. 9:1-6) Guyyeppe, Yesuusi Yihudaa biitti biidi “hara 70 asata dooriis; yaatidi, eta naaꞌꞌaa naaꞌꞌaa oottidi . . . kiittiis.” (Luq. 9:51; 10:1) Hegaa gishshawu, dumma dumma sohotun Yesuusabaa markkattiya A kaalliyageeti deꞌoosona.

Yesuusa kaalliya Ayhudati layttan layttan Paasikaa baalaa bonchchoosona; geella eti bantta so asaara bonchchennan aggokkona. (Kes. 12:6-11, 17-20) Yesuusi hayqqanaappe guuttaa kasetidi, ba kiittidoogeetuura Yerusalaame biis. Shin, I Yihudan, Galiilaaninne Peeriyan deꞌiya bana kaalliyageeti Yerusalaame yiidi Paasikaa issippe bonchchanaadan xeesibeenna. He wode Yesuusi ba kiittidoogeetuura bonchchanawu koyidoogee qoncce. I etawu hagaadan giis: “Taani waayettana wodiyappe kase ha Paasikaa inttenaara maanawu keehi koyaas.”—Luq. 22:15.

I yaatanaadan oottida loꞌꞌo gaasoy deꞌees. Yesuusi “asaa nagaraa xayssiya Xoossaa Dorssaa” gididi matan hayqqana. (Yoh. 1:29) Daro wodiyawu Xoossaayyo yarshshoy yarshshettiiddi takkido Yerusalaamen I hayqqana. Paasikaa dorssay Israaꞌeelati Yihooway eta Gibxxeppe kessidoogaa hassayanaadan oottees. Shin Yesuusa yarshshoy hegaappe keehi aadhdhees. I asa ubbaa nagaraappenne hayquwappe laꞌa kessiis! (1 Qor. 5:7, 8) Yesuusa yarshshuwa gaasuwan, kiitettida tammanne naaꞌꞌati Kiristtaane galchchawu baaso gididosona. (Efi. 2:20-22) Geeshsha katamiya, Yerusalaama “Dorssai kiittido tammanne naa77atu sunttai xaafettido tammanne naa77u shuchchatu bolli” gimbbettidoogee garamissiyaba. (Ajj. 21:10-14) Ee, Xoossaa halchchoy polettanaadan oottiyogaara gayttidaagan kiitettida ammanettidaageetussi gita maatay deꞌees. Yaaniyo gishshawu, Yesuusi wurssetta Paasikaanne hegaappe simmin sohuwara Godaa Kahuwa etaara bonchchanawu koyidoy aybissakko nuuni akeekana danddayoos.

Yesuusa kaalliya 70tinne harati aara he kahuwa mibookkona. Shin Yesuusi doomissido Godaa Kahoy A kaalliya ammanettiyageeta ubbaa maaddees. Guyyeppe tiyettida Kiristtaane gidida ubbay kiitettidaageetussi Yesuusi he galla qammi qonccissido kawotettaa maachchaa maacettidosona.—Luq. 22:29, 30.