1. 1. SEEXAANAA DABLOOSA. Ha wodiyan deˈiya ixuwawu gaasoy Seexaanaa. Yaatiyo gishshawu, Seexaanaanne aagaadan harata ixxiyaageeta Xoossay xayssana.—Mazamure 37:38; Roome 16:20.

2. 2. SEEXAANAA IITA ALAMIYAA. Balibakkiya polotikaanne worddo haymaanootiyaa kaalettiyaageeta gujjin, ixuwaa denttettiya ubbaa Xoossay muleera xayssana. Qassi, yaaretiyaanne balibakkiya zalˈˈanchchatakka Xoossay xayssana.—2 PHeexiroosa 3:13.

3. 3. ASAY NAGARANCHCHA GIDIYOOGAA. Nuuni ubbaykka nagaranchcha gidiyoogaa Geeshsha Maxaafay yootees. (Roome 5:12) Yaatiyo gishshawu, nuuni darotoo iitabaa qoppoosinne oottoos; qassi harata ixxoos. He iitabata agganaadan Xoossay nuna maaddana; qassi I, ixuwaa merinawu xayssana.—Isiyaasa 54:13.

1. 1. HE ALAMIYAN NAAQOY DEˈENNA. Xoossaa Kawotettaa Kawoy saluwan uttidi kumetta saˈaa haarana; qassi suure pirdday merinawu deˈanaadan oottana. (Daaneela 2:44) He wode, asaa coo ixxiyoogee deˈenna. Xoossay ha wodiyan asaa gakkiya naaqo ubbaa muleera xayssana.—Luqaasa 18:7.

2. 2. ASA UBBAY SAROTETTAN DEˈANA. Makkalaanne olaa gaasuwan ooninne waayettenna. (Mazamure 46:9) He wode saˈan deˈiya asa ubbay sarotettaa dosiyo gishshawu, saˈan asay hirggi baynnan deˈana.—Mazamure 72:7.

3. 3. ASA UBBAY WOTTIYOOBI BAYNNAAGAA GIDIDI MERINAWU DEˈANA. Asay issoy issuwaa wozanappe siiqana. (Maatiyoosa 22:39) Iitabaa qoppiyoogaa woy hassayiyoogaa gaasuwan ooninne unˈˈettenna. (Isiyaasa 65:17 ) Ixoy muleera xayiyo wode, asa ubbay “sarotettaaninne duretettaani ufaittidi daana.”—Mazamure 37:11.

He wodiyan deˈanawu koyay? Ha wodiyankka, daro asay Geeshsha Maxaafay yootiyo maaraa oosuwan peeshshiyoogan, ixuwaa xayssiyoogaa tamaariiddi deˈees. (Mazamure 37:8) Kumetta alamiyan deˈiya Yihoowa Markkati hegaadan oottiiddi deˈoosona. Eti dumma dumma wogan diccidaageeta gidikkonne, sarotettan deˈoosona; qassi issoy issuwaa wozanappe siiqoosona.—Isiyaasa 2:2-4.

Naaquwaanne asaa zaggiyoogaa waati genccanaakko Yihoowa Markkati tamaaridoogaa haratuyyo yootiyoogan ufayttoosona. Nuuni ixxiyoogaa agganaadaaninne siiqiyoogaa doommanaadan neeni tamaaridobay maaddana danddayees. Galatennaageeta woy ixxiyaageeta waata siiqanaakko tamaarana danddayaasa. Hegaappe denddidaagan neeni ha wodiyan keehi ufayttana; qassi haratuura deˈiya ne dabbotay keehi minnana. Ubbaappe aaruwan, Xoossaa Kawotettaa haaruwan ixoy merinawu muleera xayiyo wode deˈanawu ne ay oottana danddayiyaakko tamaarana.—Mazamure 37:29.