Ixoy Keehi Daridoy Aybissee?
Ha alamiyan ixoy hagaa keeni keehi daridoy aybissee? Nuuni hegaa zaaruwaa eranawu, ixoy aybakko, asay ixxiyoogaa aybissi doommidaakko, qassi ixoy ubbasan deˈiyoy aybissakko akeekana koshshees.
Ixoy Aybee?
Ixoy issi uraa woy amarida asaa beˈanaappe giyoogaa woykko keehippe ixxiyoogaa bessiyaaba. Hegee amarida wodiyawu haratu bolli hanqqettiyoogaappe dummatees.
ASAY IXXIYOOGAA DOOMMIDOY AYBISSEE?
Asay ixxiyoogaa doommiyo daro gaasoy deˈees. Eti issi citan deˈiyaageeta, ubba qassi iitabaa aybanne oottibeennaageetakka ixxana danddayoosona. Hegaa mala asati, he citan deˈiyaageeti iita, makkalanchchanne laamettana danddayennaageeta giidi qoppiyo gishshawu eta ixxennan waayi aggana. Qassi eti hegaa mala asata haratuppe guuxxiyaabadaaninne metoy merettanaadan oottiyaabadan xeellana danddayoosona. Harati banttana ixxiyaabadan qoppiyaageeti makkalay, naaqoynne hara iitabay eta gakkido gishshawu, etikka harata ixxoosona.
IXOY UBBASAN DEˈIYOY AYBISSEE?
Issi issitoo, asay mule erenna asaakka ixxees. Leemisuwawu, issi uri darotoo bantta so asay woy laggeti ixxiyo ura ixxana danddayees. Yaatiyo gishshawu, so asaappe amaridaageeti hara citan deˈiyaageeta ixxiyaaba gidikko, son deˈiya ubbay eta ixxiyoogaa doommana danddayees.
Ixoy ubbasaa sohuwaara waani gakkiyaakko nuuni eriyo wode, daroti harata ixxiyoy aybissakko akeekana danddayoos. SHin, alamiyan deˈiya ixoy waani xayanaakko nuuni eranawu, ixoy koyro waani doommidaakko akeekana koshshees. Hegaabaa Geeshsha Maxaafaappe tamaarana danddayoos.
IXOY KOYRO WAANI DOOMMIDAAKKO GEESHSHA MAXAAFAY YOOTEES
IXUWAA KOYRO DOOMMIDAY ASAA GIDENNA. Seexaanaa Dabloosa geetettida kiitanchchay saluwan Xoossaa bolli makkalido wode ixoy doomettiis. Dabloosi, ‘shemppo woriyoogaa’ doommidoy Xoossaa bolli makkalido wodiyaana. “I worddanchchanne qassi wordduwaukka aawa” gidiyo gishshawu, ixoynne makkalay keehi daranaadan oottiis. (Yohaannisa 8:44; 1 Yohaannisa 3:11, 12) I keehi iita, hanqqettiyaagaanne makkalanchcha gidiyoogaa Geeshsha Maxaafay yootees.—Iyyooba 2:7; Ajjuutaa 12:9, 12, 17.
ASAY NAGARANCHCHA GIDIYO GISHSHAWU HARATA IXXEES. Seexaanaagaadan, koyro bitanee Addaamee nagaraa oottiis. Hegaa gishshawu, asa ubbay nagaraa laattiis. (Roome 5:12) Addaame bayra naˈay Qaayeeli, ba ishaa keehi ixxidi woriis. (1 Yohaannisa 3:12) Siiqiyaanne qarettiya daro asay deˈiyoogee tuma. SHin asay nagaraa laattido gishshawu, daroti bantta xallaa siiqoosona, miqqaynnoosonanne otorettoosona; hegee qassi eti harata ixxanaadan oottees.—2 Ximootiyoosa 3:1-5.
ZAGGIYOOGEE IXOY DARANAADAN OOTTEES. Ha alamiyan meqettaa iita asaynne qohiya eeshshati dari dari biido gishshawu ixoy yaa dariis. “Ha mule sa7aikka xalahe halaqan,” Seexaanaa Dabloosan haarettiyo gishshawu, harata zaggiyoogee, coo ixxiyoogee, yashshissiyoogeenne cashshay keehi dariis.—1 Yohaannisa 5:19.
Gidikkonne, Geeshsha Maxaafay ixoy waani doommidaakko yootiyoogaa xalla gidennan, hegaa waati xayssana danddayiyaakkokka yootees.
