IXUWAA WAATA XOONANA DANDDAYAY?
4 | Xoossaa Maaduwan Ixuwaa Xoona
Geeshsha Maxaafay Tamaarissiyoobaa:
“Geeshsha Ayyaanaa aifee, siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa.”—GALAATIYAA 5:22, 23.
Hegee Woygiyoogee?
Xoossay maaddin ixuwaa xoonana danddayoos. Nuuni baaxetidi nurkka demmana danddayenna daro eeshshati nuuyyo deˈanaadan, A geeshsha ayyaanay nuna maaddees. Nuuni nu wolqqan ixuwaa xayssanawu baaxetiyoogaappe, Xoossaa maaduwan ammanettana danddayoos. Nuuni Xoossan ammanettikko, nuuyyookka kiitettida PHawuloosaagaadan siyettana danddayees. I hagaadan giis: “Ubbaappe aadhdhiya wolqqai Xoossaagaa gidiyoogaappe attin, nuugaa [gidenna.]” (2 Qoronttoosa 4:7) Qassi nuuni, ‘Taayyo maadoy Yihoowappe yees’ gaana danddayoos.—Mazamure 121:2.
Ay Oottana Danddayay?
“Yihooway taani makkalancha asa gidiyoogaa aggada saro asa gida laamettanaadan maaddiis.”—WALDDA
Yihooway ba geeshsha ayyaanaa immanaadan akko wozanappe woossa. (Luqaasa 11:13) Neeyyo loˈˈo eeshshay deˈanaadan I maaddana mala A oychcha. Siiquwaa, sarotettaa, danddayaanne nena naagiyoogaa mala, ixuwaa xayssanaadan maaddiya eeshshatubaa Geeshsha Maxaafay woygiyaakko xannaˈa. Hegaa mala eeshshata bessanawu baaxeta. Qassi, hegaa mala eeshshata bessanawu baaxetiyaageetuura laggeta. Hegaa mala laggeti ‘siiquwawunne loˈˈo oosuwawu’ nena denttettana danddayoosona.—Ibraawe 10:24.
