Nu laggee guuggiyaa harggiyan waayettiyo wode nuuni unꞌꞌettana danddayoos. SHin I he harggiyaa genccanaadan maaddiyoogan awu keehi qoppiyoogaa bessana danddayoos. Waatidi?

‘Siyanawu eesota.’—YAAQOOBA 1:19.

Neeni ne laggiyaa maaddana danddayiyo aybippenne aadhdhiya ogee I haasayiyo wode ezggiyoogaa. I haasayiyo ubbabawu zaarana koshshiyaabadan qoppoppa. I yootiyoobaa ne siyaydda deꞌiyoogaanne neeni awu qoppiyoogaa I eranaadan ootta. Awu siyettiyaabaa akeekanawu mala; qassi A bolli pirddoppa. I haasayanawu koyibeennabaanne guyyeppe zilꞌꞌettanaadan oottiyaabaa haasayana danddayiyoogaa akeeka.—Iyyooba 6:2, 3.

‘Minttetta.’—1 TASALONQQE 5:14.

Ne laggee unꞌꞌettana woy bana pattennabadan xeellana danddayees. Neeni woyganaakko erana xayikkonne awu qoppiyoogaa I eranaadan oottiyoogan, A minttettana danddayaasa.

“Laggee mule wodekka siiqees.”—LEEMISO 17:17.

Koshshiyaaban maadda. Neeni A waata maaddana danddayiyaakko eriyaabadan qoppiyoogaappe ay oottanaakko oychcha. Ne laggee ba koyiyoobaa qonccissanawu metootikko, issippe hemettiyoogaa mala intte issippe oottana danddayiyoobata  qoppanawu mala. Woy suuqiyaappe shammiyoobata shammiyoogan, geeshshiyoogan, woykko hara amaridabata oottiyoogan maaddana danddayaasa.—Galaatiyaa 6:2.

‘Danddaya.’—1 TASALONQQE 5:14.

Ne laggee issi issitoo haasayanawu koyennan aggana danddayees. Ne laggee haasayanawu koyiyo wode, neeni ufayttada siyanawu koyiyoogaa I eranaadan ootta. Ne laggee sahettiyo gishshawu, nena azzanttiyaabaa haasayana woy oottana danddayees. I nenaara oottanawu halchchidobaa oottennan aggana woy demmoban dereqqoban yiillotana danddayees. Koshshiyaaban A maaddiyo wode danddayanchchanne A hanotaa akeekiya ura gida.—Leemiso 18:24.

“Ta laggiyaa metootennan haasayissiyo ura gidanawu baaxetays. Taani I metuwaa giigissana danddayennaba gidikkonne, A yootiyoobaa ubbatoo siyanawu malays. Issi issitoo A koyiyoobay harati A yootiyoobaa siyiyoogaa xalla; qassi hegee A woppu gaanaadan oottees.”—Feero, a qumaa maara maanawu metootanaadan oottiyaanne unꞌꞌettanaadan oottiya dumma dumma guuggiyaa harggiyan sakettiya laggiyaa deꞌiyooro.

“Ta laggetuppe issinniyaa kehanne minttettiyaaro. A malꞌꞌiya qumaa kattada tana ba soo shoobbaasu. A keehi siiqiyaaro; qassi tawu siyettiyaabaa taani metootennan qonccissanaadan oottaasu. Hegee tana keehi minttettiis!”—Haaꞌuuno, guuggiyaa sahuwaa sahettiyaaro.

“Danddayiyoogee keehi koshshiyaaba. Ta keettaayiyaa tana hanqettissiyaabaa oottiyo wode, A sahettido gishshawu yaatidoogaa akeekays. Hegee taani hanqqettennaadaaninne iyyo loytta qoppanaadan maaddees.”—Jaakooba, A keettayiyaa guuggiyaa harggiyaa sahettiyoogaa.

“Ta keettayiyaa tana keehi maaddawusunne minttettawusu. Taani keehi unꞌꞌettiyo wode, A taani oottanawu koyennabaa oottanaadan mule iisettukku. Hegaa giyoogee A oottanawu koyiyoobaakka issi issitoo oottukku giyoogaa. A taayyo keehi dumma; ayssi giikko, A kehappe attin ba xalla siiqiya asa gidukku.”—Enrika, unꞌꞌettanaadan oottiya guuggiyaa harggiyan sahettiyaagaa.