Issi issi oosoti likkeba woy keehi balaba gidiyogaa daro asay maayees. Leemisuwawu, woriyogaa, wolqqan mattumaa gayttiyogaanne naata mattuman qohiyogaa daroti eqettikkonne, suurebaa oottiyogaa, kehiyogaanne qarettiyogaa daro asay nashshees. Shin mattumaa gaytettaa, ammanettiyogaa woy naata dichchiyogaa mala hara hanotatun daroti likke woy bala dooroy baynnabadan qoppoosona. Eti ay dooroykka haniyabadan qoppoosona. Daroti issibaa xeelliyagan banttayyo woy haratuyyo siyettiyagaa maaran kuuyoosona. Shin yaatiyogee loꞌꞌoo?

Nuuni darotoo likkebaanne balabaa xeelliyagan nuuyyo siyettiyagaa maaran, hegeekka nu kahay yootiyogaa maaran kuuyoos. (Roome 2:14, 15) Ubba, guutta naatikka issibay likke gidenna wode eroosona, qassi balabaa oottiyo wode zilꞌꞌettoosona. So asaappe, laggetuppe, asttamaaretuppe, deretettaappe, haymaanootiyappenne wogaappe tamaariyoban wodiyappe wodiyan nu kahay loohees. Nuuni issibaa kuuyiyo wode, nu kuuyiyobay likkebaa woy balabaa xeelliyagan nuuni eridobaara maayettiyakko maayettennaakko nu kahay yootees.

Likkebaanne balabaa xeelliyagan nuuni qoppiyobay, nuuni haratuyyo siyettiyabaa akeekiyageeta, nashshiyageeta, suurebaa oottiyageetanne qarettiyageeta gidanaadan oottees. Qassi hegee nuuni siiqiyogeeta qohiyabaa, woy nuna hanqqetissana, yeellayananne zilꞌꞌana danddayiyabaa oottennaadan naagees.

Nuuyyo siyettiyabay ubbatoo ammanttiya kaaleto gidii? Gaariki yelagatettan doorido deꞌuwabaa hagaadan giis: “Taani koyido aybanne oottana danddayays.” Gidikkonne, I bawu likke milatidabaa oottidoogee loꞌꞌobaa kaalettibeennaagaa akeekiis. A deꞌoy “moorettida kandduwan, jallissiyabaa goꞌettiyogan, ushshaa likkiyappe aattidi uyiyogaaninne makkalan kumida cammida deꞌo” gididoogaa I guyyeppe qonccissiis.

Nuuyyo siyettiyabaa maaran kuuyiyogaa bolli, issi issitoo nuuni kuuyiyobata xeelliyagan haratu qofaa kaallidi kuuyoos. Hegee nuuni eta meeziyappenne hayyuwappe goꞌettanaadan maaddees. Nu so asay, laggetinne deretettay likke giidi qoppiyobaa nuuni oottiyo wode eti nuna bonchchoosona.

Haratuyyo siyettiyabay ubbatoo ammanttiya kaaleto gidii? Pirisiila yelagatettan deꞌiyo wode ba laggetuppe daroti dosiyobaa oottawusunne aqo oyqqanaappe kase mattumaa gayttawusu. Gidikkonne, harati likke giidi qoppiyobaa kaallidoogee A ufayttanaadan oottibeennaagaa akeekaasu. A hagaadan gaasu: “Ubba asay oottiyobaa kaallidoogee, taani ufayttanaadan oottibeenna. Hegee taani oottiyobay eeyyabanne qohiyaba gidanaadan oottiis.”

Nuuyyo siyettiyabaynne haratuyyo siyettiyabay nuuni likkebaanne balabaa xeelliyagan kuuyiyo wode keehi maaddees. Shin hegaa xallaa kaalliyogee ubbatoo loꞌꞌo ayfiya demissenna. Nuuni kuuyiyobay ay kaalettanaakko erenna gishshawu, issi issitoo nuna woy harata qohiyabaa oottana danddayoos. (Leemiso 14:12) Qassi nuuninne harati issibay likke giidi qoppikkokka, hegee qohiyaba gidananne he qofay laamettana danddayees. Ubbaappe aaruwan, kase balabadan qoppiyo issi issi eeshshay haꞌꞌi daro asay dosiyoba gidiis; qassi kase daroti dosiyobay haꞌꞌi bessennabadan xeelliyoba gidiis.

Likkebaynne balabay aybakko kuuyanawu maaddiya aybippe aadhdhiya kaaletoy deꞌii? Likkebaynne balabay aybakko eranawu maaddiya, daro layttaappe simminkka laamettenna nuuni ha wodiyan kaallana danddayiyobi deꞌii?

Ufayssiyabay, ubbasan deꞌiya, ubba asawu haniyanne awudenne laamettenna ammanttiya kaaletoy deꞌees. Nuuni likkebaanne balabaa shaakkanawu maaddiya ammanttiya kaaletuwa awuppe demmana danddayiyakko kaalliya huuphe yohoy qonccissees.