Xoossay mata wodiyan ha iita alamiyaa A metuwaara issippe xayssanaagaa hagaappe kasetiya huuphe yohuwan beˈida. Hegee hananaagaa nuuni ammanana danddayoos. Aybissi? Xoossaa Qaalay, Geeshsha Maxaafay hegee hananaagaa yootiyo gishshataassa:

‘Ha alamee aadhdhana.’—1 YOHAANNISA 2:17.

Qommoora deˈiya Geeshsha Maxaafaa xiqisiyan Xoossay qaalaa gelido gishshawu attana asay deˈiyoogaa ammanettana danddayoos:

“Xoossai giidoogaa oottiya urai merinau de7ana.”

Yaatiyo gishshawu, nuuni attanawu koyiyaaba gidikko Xoossaa sheniyaa polana koshshees. Xoossaa shenee aybakko eranawu nuuni koyro A erana koshshees.

Yesuusi hagaadan giis: “Asai nena issi Xoossaa gididaagaa [eriyoogee], . . . . merinaa de7o.” (Yohaannisa 17:3) Nuuni bashshaappe attanawunne merinawu deˈanawu, Xoossaa ‘erana’ koshshees. Hegaa giyoogee coo Xoossan ammaniyoogaappe woy abaa guuttabaa eriyoogaappe aadhdhiyaabay koshshees giyoogaa. Nuuni A dabbo gidana koshshees. Nu laggetuura nu dabbotay minnanaadan koyikko, etaara wodiyaa aattana koshshees. Xoossaara dabbotiyoogeekka hegaa mala. Nuuni Xoossaara mino dabbotaa medhdhanawu nuna maaddiya Geeshsha Maxaafaappe tamaariyo keehi koshshiya amarida tumaa beˈa.

Deˈuwan deˈanawu nuuni ubbatoo qumaa moos. SHin Yesuusi hagaadan giis: “Asi Xoossai haasayiyo qaala ubban de7anaappe attin, oitta xalaalan de7enna.”—Maatiyoosa 4:4.

Ha wodiyan nuuni Xoossaa qaalaa, Geeshsha Maxaafan demmoos. Neeni Geeshsha Maxaafaa xannaˈikko, Xoossay hagaappe kase oottidobaa, Xoossay ha wodiyan oottiyoobaanne sinttappe I oottanabaa akeekaasa.

Neeni Xoossawu azazettanawu koyaasa shin I bala giyoobaa oottiyoogaa agganawu ne metootikko waatana danddayay? Hegaadaana gidikko, Xoossaa loytti eriyoogee nena maaddana danddayees.

Pokkobaa oottaydda deˈida Sakuro giyo maccaasee hanotaa qoppa. A Geeshsha Maxaafaa xannaˈiyoogaa doommido wode, “shaaramuxappe baqatite” giya Xoossaa azazuwaa tamaaraasu. (1 Qoronttoosa 6:18) Sakura minotettaa demmanawu Xoossaa woossaasu qassi he iitabaa oottiyoogaa aggaasu. SHin he iitabaa oottiyoogee O paacciyoogaa aggibeenna. A hagaadan gaasu: “Pokkobaa oottiyoogaa taani qoppiyo wode, hegaa tarkka baaxetada xoonana danddayenna gishshawu, aynne qosennan woosan Yihoowawu yootays. Woosan demmido wolqqan taani Yihoowakko shiiqaas.” Sakuriigaadan, miilooniyan qoodettiyaageeti Xoossaa eriiddi doosona. Xoossay eti bantta deˈuwan koshshiyaaban laamettanaadaaninne A ufayssiya deˈuwaa deˈanaadan koshshiya minotettaa etawu immiiddi dees.—Piliphphisiyuusa 4:13.

Neeni Xoossaa loytta erikko, ‘Xoossan erettida’ siiqo dabbo gidaasa. (Galaatiyaa 4:9; Mazamure 25:14) Yaatikko bashshaappe attada Xoossay ehaana ooratta alamiyan deˈana. SHin he ooratta alamee ay milatii? Kaalliya huuphe yohoy hegaa qonccissana.