1. Neeni Yihoowabaa ay qoppay?

 YIHOOWAY ay mala Xoossakko qoppa eray? Neeni A woossiyo wode abaa ay qoppay? Nuuni Yihoowa beˈana danddayennaba gidikkonne, Geeshsha Maxaafay dumma dumma ogiyan A qonccissees. Yihooway “[awa, NW] gonddallenne” “bashshiya tama” geetettiis. (Maz. 84:11; Ibr. 12:29) Hizqqeeli Yihooway sampperiya giyo inqquwa, phooliya biratanne phooliya zuulla mala gidiyogaa ajjuutan beˈiis. (Hiz. 1:26-28) Yihoowa qonccissiya ha qofati nuuni maalaalettanaadan woy yayyanaadan oottana danddayoosona.

2. Nuuni Yihoowakko shiiqanawu metootanaadan oottana danddayiyabay aybee?

² Nuuni Yihoowa beˈana danddayenna gishshawu, I nuna siiqiyogaa ammananawu metootana danddayoos. Woy nuna daro metoy gakkido gishshawu, Yihooway nuna siiqiyogaa ammaniyogee deexxiyaba gidana danddayees. Geella siiqiya aaway nuussi deˈennan aggana danddayees. Yihooway nuna qofissidabata akeekees; qassi hegeeti nuuni akko loytti shiiqanawu metootanaadan oottana danddayiyoy aybissakko erees. I nuna maaddanawu ufayssiya ba eeshshata Geeshsha Maxaafan qonccissiis.

3. Nuuni Yihoowa siiquwabaa pilggana koshshiyoy aybissee?

³ Yihoowa loytti qonccissiya issi qaalay siiquwa. Geeshsha Maxaafay Xoossay siiqo gidiyogaa yootees. (1 Yoh. 4:8) I ubbabaa oottanaadan denttettiyay siiquwa. Xoossay siiqo gidiyo gishshawu, I ba kehatettaanne mino siiquwa bana siiqiyageetussi xalla gidennan, bana siiqennaageetussikka bessees. (Mat. 5:44, 45) Nuuni ha huuphe yohuwan Yihoowabaanne A siiquwabaa pilggana. Nuuni nu Xoossaabaa loytti eriyo wode A loytti siiqana.

 YIHOOWAY NUNA KEEHI SIIQEES

4. Yihoowa siiqoy neeni waananaadan oottii? (Misiliyakka xeella.)

⁴ “[Yihooway] qaretai kumidoogaa.” (Yaaq. 5:11) I siiqiya aayen bana leemisidoogaa Geeshsha Maxaafay yootees. (Isi. 66:12, 13) Ba guutta naˈaa keehi siiqiya issi aayyiyo qoppa. A ba kiyuwan idimmada liiqo cenggurssan haasayissawusu. I yeekkiyo wode woy azzaniyo wode ayyo koshshiyabaa kunttawusu. Nuuni azzaniyo wode Yihooway nuna siiqiyogaa ammanettana danddayoos. Mazamuraawee hagaadan giis: “Tana hirggai woriyo wode, neeni tana woppu oottada ufaissaasa.”—Maz. 94:19.

5. Aggenna Yihoowa siiqoy nena waati maaddii?

⁵ Yihooway ammanettiyagaa. (Maz. 103:8) Nuuni balabaa oottiyo wode I nuna siiqiyogaa aggenna. Israaˈeelati Yihoowa zaari zaari azzanttidosona. Gidikkonne, bantta nagaran zilˈˈettidi laamettida ba asawu ba aggenna siiquwa hagaadan giidi qonccissiis: ‘Neeni ta sinttan alˈˈonne bonchcho gidiyo gishshawu taani nena siiqays.’ (Isi. 43:4, 5) Yihooway ha wodiyan nuussikka hegaa mala siiquwa bessees. Nuuni ubbatoo an ammanettana danddayoos. Nuuni gita mooruwa moorikkokka Yihooway nuna aggenna. Nuuni nu nagaran zilˈˈettidi laamettiyo wodenne Yihoowakko simmiyo wode I nuna siiqiyogaa aggibeennaagaa akeekoos. I nuussi ‘coo atto gaanawu’ qaalaa geliis. (Isi. 55:7) Hegee “Godaa matappe . . . minotettaa wodee” yaanaadan oottiyogaa Geeshsha Maxaafay yootees.—Oos. 3:19.

6. Zakkaariyaasa 2:8y Yihoowabaa nuna ay tamaarissii?

⁶ Zakkaariyaasa 2:8 nabbaba. Yihooway nuna ba ayfiya buluwan leemisiis. Ayfee eesuwan qohettana danddayiyanne alˈˈo gidida bolla kifile. Hegaa giyogee Yihooway hagaadan giyogaa mala: ‘Inttena, ta asaa qohiya ooninne tawu alˈˈo gididaageeta qohees.’ Yihooway nuna siiqiyo gishshawu nubaa akeekeesinne nuna naaganawu giigi uttiis. Nuuni azzaniyo wode ikka azzanees. Hegaa gishshawu nuuni hagaadan giidi woossiyo wode I nuuyyo zaaranaagaa ammanettana danddayoos: “Ne aifiyaa na77iyaadan tana naaga.”—Maz. 17:8.

7. Nuuni Yihoowa siiquwan mintti ammanettana koshshiyoy aybissee?

⁷ Yihooway I nuna siiqiyogaa nuuni ammanettanaadan koyees. Shin nuna daro metoy  gakkido gishshawu, I nuna siiqiyogaa nuuni sirana danddayiyogaa erees. Woy nuuni Yihoowa siiquwan ammanettennaadan oottiya metoy ha wodiyan nuna gakkana danddayees. Nuuni mintti ammanettanaadan maaddiyabay aybee? Yihooway Yesuusa, tiyettidaageetanne nuna siiqiyogaa waati qonccissidaakko tamaariyogaa.

YIHOOWAY BA SIIQUWA WAATI QONCCISSII?

8. Yesuusi A Aaway A siiqiyogaa ammanettidoy aybissee?

⁸ Yihoowaynne Yesuusi ooppenne aaruwan adussa wodiya issippe deˈidosona. Eti saluwan keehi daro biiloone layttaa issippe deˈido wode loytti dabbotidosonanne issoy issuwara loytti siiqettidosona. Maatiyosa 17:5n odettidaagaadan, Yihooway Yesuusa siiqiyogaa qoncciyan yootiis. Yihooway ‘hagee tana ufayssiyagaa’ giidi xalla yootana danddayees. Shin I Yesuusa keehi siiqiyogaa nuuni eranaadan koyido gishshawu, ‘hagee ta Naˈaa, taani siiqiyogaa’ yaagiis. Yihooway Yesuusaninne I oottanaban ceeqettiis. (Efi. 1:7) Qassi Yesuusi A Aaway A siiqiyogaa mule siri erenna. Yihooway Yesuusa siiqiyo siiqoy qoncci beettiyogaa Yesuusi akeekiis. Yesuusi A Aaway A siiqiyogaa ammanettidi darotoo yootiis.—Yoh. 3:35; 10:17; 17:24.

9. Yihooway tiyettidaageeta siiqiyo siiquwa yootiya qofay awugee? Qonccissa. (Roome 5:5)

⁹ Yihooway tiyettidaageetakka siiqiyogaa yootiis. (Roome 5:5 nabbaba.) ‘Gussiis’ giya qaalaa akeeka. Geeshsha Maxaafaa eranchchay hegee nu bolli “goggiya haatta” mala gidiyogaa yootiis. Ha qofay Yihooway tiyettidaageeta keehi siiqiyogaa bessees! Tiyettidaageeti ‘Xoossay eta siiqiyogaa’ eroosona. (Yih. 1) Kiitettida Yohaannisi ayyaanan tiyettidaageetuyyo siyettiyabaa hagaadan giidi xaafiis: “Nuuni Xoossaa naata geetettidi xeesettana mala, Xoossai nuna ai keenaa siiqidaakkonne be7ite!” (1 Yoh. 3:1) Yaatin Yihooway tiyettidaageetu xallaa siiqii? Chii, Yihooway nu ubbaa siiqiyogaa bessiis.

10. Yihooway nena siiqiyogaa loytti qonccissiyabay aybee?

¹⁰ Yihoowa siiquwa loytti qonccissiyabay aybee? Wozuwa. Yihooway yaatiyogan oogaappenne aadhdhiya siiquwa bessiis! (Yoh. 3:16; Roo. 5:8) Yihooway nuuni nu nagaraappe maarotettaa demmanaadaaninne Aara dabbotanaadan asaa ubbaa gishshawu ba alˈˈo Naˈaa immiis. (1 Yoh. 4:10) Yihoowaynne Yesuusi nuuyyo qanxxidobaa loytti qoppiyo wode, eti nuna ubbaa ay keena siiqiyakko loytti akeekana danddayoos. (Gal. 2:20) Yihooway wozuwa giigissidoy ba suure pirddaa gishsha xallawu gidenna. Hegee siiqidi oottidoba. Yihooway ba alˈˈo Naˈaa, Yesuusa wozo ootti immiyogan nuna siiqiyogaa bessiis. Yihooway ba Naˈay nu gishshawu waayettanaadaaninne hayqqanaadan paqqadiis.

11. Ermmaasa 31:3​ppe nuuni ay tamaariyoo?

¹¹ Nuuni beˈidoogaadan, Yihooway nuna siiqiyogaa yootiyogankka qonccissees. (Ermmaasa 31:3 nabbaba.) Yihooway nuna siiqidi baakko shiishshiis. (Zaarettido Wogaa 7:7, 8​ra gatta xeella.) He siiquwappe nuna ooninne woy aybinne shaakkana danddayenna. (Roo. 8:38, 39) Ha siiqoy neeni waananaadan oottii? Mazamure 23 nabbaba; yaatada Yihoowa siiquwa xeelliyagan Daawitawu aybi siyettidaakko, qassi hegee ne waananaadan oottiyakko akeeka.

YIHOOWA SIIQOY NEENI WAANANAADAN OOTTII?

12. Mazamure 23​n odettidabay aybee?

¹² Mazamure 23:1-6 nabbaba. Mazamure 23​n Daawiti Yihooway A siiqiyogaa ammanettiyogaa  yootiis. Daawiti, ba Henttanchchaa giido Yihoowara loytti dabbotidoogaa qonccissiis. Daawiti Yihooway A kaalettanaadan eeno giido gishshawu woppu giis, qassi kumetta wozanaappe an ammanettiis. Daawiti ba deˈo laytta ubban Yihooway A siiqanaagaa eriis. I ammanettanaadan oottidabay aybee?

13. Daawiti Yihooway ayyo koshshiyabaa kunttanaagaa ammanettidoy aybissee?

¹³ “Taayyo aibinne paccenna.” Daawiti Yihooway awu koshshiya ubbabaa kunttido gishshawu woppu giidi deˈiis. Qassi Daawiti Yihooway A dabbo gidiyogaanne A nashshiyogaa eriis. Daawiti sinttappe A gakkanabay ayba gidinkka, Yihooway awu koshshiya ubbabaa muletoo kunttanaagaa ammanettidoy hegaassa. Daawiti Yihooway A siiqiyogaanne awu koshshiyabaa kunttanaagaa ammanettidoogee hirggiyogaa aggidi ufayttanaadaaninne woppu gaanaadan maaddiis.—Maz. 16:11.

14. Yihooway nuussi koshshiyabaa siiquwan waati kunttii?

¹⁴ Iitabay nuna gakkiyo wode, Yihooway awudeegaappenne aaruwan nuussi koshshiyabaa kunttees. Laatamaappe dariya layttaa Beeteelen haggaazida Kelera, a eta soo asaa bolli bollan gita metoy gakkido wode, eta waata maaddana danddayiyakko iyyo kirqqi giis. I aawaayyo guuggiyan suuttay gukkiis, I kaalo michchiya bohettaasu, so asay miishshaa metootiis, qassi bankkee eta keettaa ekkiis. Yihooway etawu koshshiyabaa siiquwan waati kunttidee? Kelera hagaadan gaasu: “Ubba galla nu soo asawu koshshiya mulebaa Yihooway ubbatoo kunttiis. Nuussi  koshshiyabaappe aarobaa Yihooway nuuyyo darotoo immiis! Yihooway nuna waati maaddidaakko ubbatoo qoppays; qassi I nuna siiqido siiquwa mule dogikke. Hegee ta deˈuwan hara metotikka gakkiyo wode Yihoowawu ufayssan ubbatoo haggaazanaadan tana maaddiis.”

15. Daawiti ooraxxidoy aybissee? (Misiliyakka xeella.)

¹⁵ “Ta de7uwaa ooraxissees.” Daawiti daro metoynne tuggay bana gakkido gishshawu, issi issitoo unˈˈettiis. (Maz. 18:4-6) Gidikkonne, Yihoowa siiqoy A ooraxissiis. Yihooway unˈˈettida ba dabbuwa ‘aaca qooruwakkonne’ “woppu giida haattaakko” laaggiis. Hegaappe denddidaagan, Daawiti minettiisinne aggennan Yihoowawu haggaaziis.—Maz. 18:28-32.

16. Yihoowa siiqoy nena waati ooraxissidee?

¹⁶ Hegaadan ha wodiyan, nuna metoynne tuggay gakkikkokka, “GODAA aggenna siiquwaappe denddidaagan nuuni xayibookko.” (Zil. 3:22; Qol. 1:11) Raacheli hanotaa beˈa. Koronaa harggiya wode I azinay onne Yihoowa aggidoogan A keehi dagammaasu. Yihooway O waati maaddidee? A hagaadan gaasu: “Yihooway tana siiqiyogaa taani ammanettanaadan oottiis. Tanaara wodiya aattiya laggeti tawu deˈanaadan oottiis; eti tawu qumaa ehoosona, minttettiya kiitaanne xiqisiya kiittoosona, tanaara miiccoosona, qassi Yihooway tana siiqiyogaa ubbatoo tana hassayissoosona. Siiqiya ishanttanne michchontta immido gishshawu Yihoowa ubbatoo galatays.”

17. Daawiti “iitabau yayyikke” giidoy aybissee?

¹⁷ “Neeni ta GODAI tanaara de7iyo gishshau . . . iitabau yayyikke.” Daawiti darotoo hayqqiichchi attiis, qassi wolqqaama gidida daro morkketi ayyo deˈoosona. Shin Yihoowa siiqoy I woppu gaanaadaninne naagettidi deˈanaadan oottiis. Daawiti ubba hanotatunkka Yihooway banaara deˈiyogaa akeekiis, qassi hegee A minttettiis. Hegaa gishshawu I hagaadan giidi yexxiis: “Taani yayyiyoobaa ubbaappe tana [Yihooway] ashshiis.” (Maz. 34:4) Daawiti issi issitoo yayyikkonne, Yihooway A siiqiyogaa eriyo gishshawu yayyiyogaa aggiis.

18. Neeni yayyiyo wode Yihooway nena siiqiyo siiquwan ammanettiyogee nena waati minttii?

¹⁸ Yayyanaadan oottiyabay nuna gakkiyo wode, Yihooway nuna siiqiyogaa eriyogee  waati minttii? Suuzo giyo aqinya anne I azinay bantta naˈay bana barkka worido wode, etawu siyettidabaa hagaadan gaada qonccissaasu: “Keehi azzanttiyabay nena gakkiyo wode hegan keehi qohettaasanne hagaappe aadhdhiya keehi iitabay gakkana gaada yayyaasa. Shin Yihoowa siiqoy nuuni woppu gaanaadaninne naagettidi deˈanaadan oottiis.” Qommoora ibay odettido Raachela hagaadan gaasu: “Taani keehi azzanido, hirggidonne yayyido issi qammi ta cenggurssaa xoqqu oottada Yihoowa woossaas. Issi aayyiya ba guutta naˈaa woppissiyogaadan, I taani sohuwara woppu gaanaadaaninne xiskkanaadan oottiis. He wodiya taani mule dogikke.” Taasosa giyo issi cimay olaa olettanawu ixxis giido gishshawu, oyddu layttaa qashettiis. Yihooway A siiqiyogaa I waati akeekidee? I hagaadan giis: “Tawu koshshiyabaappe aaruwa Yihooway tawu immiis. Hegee taani kaseegaappe aaruwan an ammanettanaadan oottiis. Qassi qasho keettay keehi unˈˈissiya soho gidikkonne, Yihooway ba ayyaana baggaara taani ufayttanaadan oottiis. Hegee taani Yihoowan kaseegaappe aaruwan ammanettiyo wode, I tana kaseegaappe aaruwan siiqiyogaa akeekanaadan maaddiis. Yaatiyo gishshawu, taani qasho keettan deˈaydda ubba wode aqinye gidada awu haggaaziyogaa doommaas.”

SIIQIYA NE XOOSSAAKKO LOYTTA SHIIQA

19. (a) Xoossay nuna siiqiyogaa erikko woygi woossana danddayiyoo? (b) Yihoowa siiquwa qonccissiyabatuppe nena keehi ufayssiyagee awugee? (“ Yihooway Nuna Keehi Siiqiyogaa Akeekanaadan Maaddiya Xiqiseta” giya saaxiniya xeella.)

¹⁹ Nuuni beˈido deˈuwan hanidabati “siiqo Xoossai,” Yihooway nunaara deˈiyogaa qonccissoosona! (2 Qor. 13:11) I nu ubbawu qoppees. Nuna ‘aggenna A siiqoy dooddanaagaa’ ammanettoos. (Maz. 32:10) I nuna keehi siiqiyogaa nu loytti qoppiyo wode I nuussi keehi qoppiyogaanne akko keehi shiiqidoogaa akeekoos. Yayyennan A woossananne A siiqoy nuussi keehi koshshiyogaa ayyo yootana danddayoos. I nu hanotaa akeekiyogaanne nuna maaddanawu giigi uttidoogaa nu ammanettiyo gishshawu nuna qofissiya ubbabaa ayyo yootana danddayoos.—Maz. 145:18, 19.

20. Yihoowa siiqoy nuuni akko loytti shiiqanaadan waati oottii?

²⁰ Meeggiya gallassi nuna hoˈˈettiya tamaagaadan, metoynne waayee gakkiyo wode Yihoowa siiqoykka nuna minttettana danddayees. Yaatiyo gishshawu minttettuwanne sarotettaa demmanaadan oottiya Yihoowa siiquwan ufaytta. I nena siiqiyogaadan neenikka, “Taani GODAA siiqais” gaana danddayaasa!—Maz. 116:1.