XANNAˈIYO HUUPHE YOHUWA 25
MAZAMURE 7 Yihooway Nuuyyo Wolqqa
Yihooway ‘Deˈo Xoossaa’ Gidiyogaa Hassaya
“GODAI de7ees!”—MAZ. 18:46.
TAMAARANABAA
Nuuni goynniyo Xoossay ‘deˈo Xoossaa’ gidiyogaa hassayiyogan keehi goˈettoos.
1. Metoy gakkishinkka nuuni Yihoowawu aggennan goynnanaadan aybi maaddanee?
NUUNI ‘keehi waayissiya wodiyan’ deˈiyogaa Geeshsha Maxaafay yootees. (2 Xim. 3:1) Seexaanaa alamiyan deˈiya ubba asaa gakkiya metoy nunakka gakkees. Qassi nuuni Yihoowawu haggaaziyo gishshawu yedetay nuna gakkees. Ha metoti deˈishinkka nuuni Yihoowawu aggennan goynnanawu nuna aybi maaddanee? Hegawu maaddiya waannabay Yihooway ‘deˈo Xoossaa’ gidiyogaa eriyogaa.—Erm. 10:10; 2 Xim. 1:12.
2. Yihooway nuussi wolqqaa immana danddayiyogaa waati eriyoo?
2 Yihooway nuna gakkiya meto ubbaa beˈees; qassi I ubbatoo nuna maaddanawu koyees. (2 Odi. 16:9; Maz. 23:4) Xoossay nuna siiqiyogaanne nuna maaddanawu ubbatoo giigi uttidoogaa hassayiyo wode nuna gakkiya ay metuwanne genccanawu wolqqaa demmana danddayoos. Hegee tuma gidiyogaa akeekanawu Kawuwa Daawita hanotaa beˈa.
3. Daawiti “GODAI de7ees!” giido wode woyganawu koyidee?
3 Daawiti Yihoowa eriisinne an ammanettiis. Kawuwa Saaˈoolinne harati Daawita woranawu yedettiyo wode, I maaduwa demmanawu Yihoowa woossiis. (Maz. 18:6) Yihooway Daawita woosaa zaariisinne A ashshiis; yaatin I hagaadan giis: “GODAI de7ees!” (Maz. 18:46) Daawiti woyganawu koyidee? Issi xuufee qonccissiyogaadan, Daawiti yootidobay Yihooway ba ashkkarata ubbatoo maaddiya tumu Xoossaa gidiyogaa bessees. Daawiti bana gakkiiddi deˈiyabaa Yihooway akeekiyogaanne A maaddanawu giigi uttidoogaa eriis. Hegee Daawiti ubbatoo Yihoowawu haggaazanaadaaninne A sabbanaadan minttettiis.—Maz. 18:28, 29, 49.
4. Yihooway deˈo Xoossaa gidiyogaa nuuni mintti ammaniyogee nuna waati maaddii?
4 Yihooway deˈo Xoossaa gidiyogaa nuuni mintti ammaniyogee wozanappe awu haggaazanaadan nuna maaddana danddayees. Qassi metuwa genccanawu wolqqaa demmanaadaaninne ubbatoo minnidi awu haggaazanaadan maaddana. Nuuni Yihoowara dabbotidi deˈanawu murttanaadankka maaddees.
DEˈO XOOSSAY NEESSI WOLQQAA IMMANA
5. Nuna metoy gakkiyo wode nuuni xala gidanaadan aybi maaddanee? (2 Qoronttoosa 4:7)
5 Yihooway deˈiyogaanne I nuna ubbatoo maaddanaagaa hassayikko, nuna gakkiya metoy gita gidin woy guutta gidinkka nuuni genccana danddayoos. Nu Xoossaa wolqqaappe dariya metoy baynna gishshawu, nuna metoy gakkiyo wode I maaddana danddayees. I Ubbaa Danddayiya Xoossaa, qassi genccanaadan nuussi wolqqaa immana danddayees. (2 Qoronttoosa 4:7 nabbaba.) Hagee nuna metoy gakkiyo wode xala gidanaadan maaddees. Qassi guutta metoy gakkin Yihooway nuna maaddiyogaa akeekikko, gita metoy gakkiyo wode I nuna maaddanaagaa ammanettana danddayoos.
6. Daawiti naatettan deˈiyo wode Yihoowan loytti ammanettanaadan oottidabay aybee?
6 Daawiti Yihoowan loytti ammanettanaadan oottida naaˈˈu wodeta beˈa. Daawiti naatettan dorssaa heemmiyo wode beeriya giyo doˈaynne gaammoy A aawaa wudiyappe dorssaa oyqqoosona. He wodetun Daawiti xalatettan doˈatu geeduwa biidi dorssaa ashshiis. Shin hegaa Daawiti ba wolqqan oottidabadan qoppibeenna. I yaatanaadan Yihooway awu wolqqaa immidoogaa eriis. (1 Sam. 17:34-37) He wodeta Daawiti mule dogibeenna. I hegeeta wotti dentti qoppiyogan deˈo Xoossay sinttappe awu wolqqaa immanaagaa ammanettiis.
7. Daawiti aybin xeelaa wottidee, qassi hegee Gooliyadaara olettanaadan A waati maaddidee?
7 Guyyeppe, Daawiti Israaˈeela olanchchati dunkkaanidosaa biis. He wodekka I naˈa gidennan aggenna, wotaaddarati keehi yayyidoogaa I akeekiis; ayssi giikko, Gooliyada giyo adussa mino Pilisxxeema bitanee ‘Israaˈeela olanchchata naassiis.’ (1 Sam. 17:10, 11) Wotaaddarati Gooliyadi keehi gita gidiyogaaninne I eta bolli haasayidoban xeelaa wottido gishshawu keehi yayyidosona. (1 Sam. 17:24, 25) Shin, Daawiti haraban xeelaa wottiis. Gooliyadi Israaˈeela olanchchatu bolli qilliicciyo wode, “de7o Xoossaa” cayidoogaa Daawiti eriis. (1 Sam. 17:26) Daawiti Yihoowabaa qoppiis. I dorssaa heemmiyo wode maaddida Xoossay ha hanotankka maaddanaagaa ammanettiis. Daawiti Xoossaa maaduwan ammanettiyogan Gooliyadaara olettidi xooniis!—1 Sam. 17:45-51.
8. Yihooway metoy nuna gakkiyo wode maaddanaagaa nuuni loytti ammanettanaadan oottiyabay aybee? (Misiliyakka xeella.)
8 Deˈo Xoossay nuna maaddanawu giigi uttidoogaa hassayikko, nuunikka nuna gakkiya metuwa xoonana danddayoos. (Maz. 118:6) Yihooway nuussi kase oottidobaa loytti qoppiyogan, I nuna maaddanaagaa kaseegaappe aaruwan ammanettana danddayoos. Yihooway bawu goynniyageeta waati ashshidaakko neeni hassayanaadan maaddiya Geeshsha Maxaafaa taariketa nabbaba. (Isi. 37:17, 33-37) Qassi ha wodiyan Yihooway nu ishanttanne michchontta waati maaddidaakko yootiyabata jw.org saytiyan nabbaba woy beˈa. Hegaa bollikka, Yihooway nena maaddido wodeta qoppa. Yihooway gaammuwappe woy beeriyappe ashshiyogaa mala maalaalissiyaba neessi oottibeennabadan neeni qoppennan waaya aggana. Yihooway neessi keehi darobaa oottiis! I neeni aara dabbotanaadan oottiis. (Yoh. 6:44) Neeni ha wodiyan awu haggaazana danddayidoy I nena maaddido gishshataassa. Hegaa gishshawu I ne woosaa zaaridoogaa, neessi koshshiyabaa bessiya wodiyan kunttidoogaa woy metoy nena gakkin I nena kaafidoogaa neeni hassayanaadan maaddana mala Yihoowa woossa. Neeni hegaa wotta dentta qoppiyogee Yihooway nena sinttappekka maaddanaagaa ne loytta ammanettanaadan oottees.
Metoy nuna gakkiyo wode nuuni oottiyobay Yihoowa ufayssana woy azzanttana danddayees (Mentto 8-9 xeella)
9. Metoy nuna gakkiyo wode nuuni ay hassayana koshshii? (Leemiso 27:11)
9 Nuna metoy gakkiyo wode keehi koshshiyaban xeelaa wottana bessees. Dabloosi metoy nuna gakkiyo wode nuuni Yihoowa aggana giidi yootees. Yaatiyo gishshawu, nuna metoy gakkin nuuni oottiyobay Yihoowa azzanttana woy ufayssana danddayees. (Iyy. 1:10, 11; Leemiso 27:11 nabbaba.) Nuna metoy gakkishinkka nuuni Yihoowawu ammanettidi deˈikko A siiqiyogaanne Dabloosi worddanchcha gidiyogaa bessoos. Kawotettay naaqqiyogaa, miishshaa metuwa, asay mishiraachchuwa siyennaagaa woy hara metuwa neeni genccaydda deˈay? Yaatikko, neeni Yihoowa ufayssana danddayiyo hanotan deˈiyogaa hassaya. I ne danddayiyogaappe aaruwan paacettanaadan eeno geennaagaakka hassaya. (1 Qor. 10:13) I neeni genccanaadan neessi wolqqaa immana.
DEˈO XOOSSAY NENA WOYTANA
10. Deˈo Xoossay bawu goynniyageetussi ay oottanee?
10 Yihooway bawu goynniyageeta ubbatoo woytees. (Ibr. 11:6) I nuussi ha wodiyan sarotettaynne ufayssay deˈanaadan oottees, qassi sinttappe merinaa deˈuwa immana. Yihooway nuna woytanawu koyiyogaanne yaatanawu awu wolqqay deˈiyogaa nuuni wozanappe ammanettoos. Hegaa gishshawu, kase Yihoowa ashkkarati oottidoogaadan nuuni awu goynnanawu nuussi danddayettida ubbabaa aggennan oottoos. Ximootiyosikka hegaadan oottiis.—Ibr. 6:10-12.
11. Ximootiyosi galchchan minnidi oottidoy aybissee? (1 Ximootiyoosa 4:10)
11 Koyro Ximootiyoosa 4:10 nabbaba. Ximootiyosi Xoossay A woytanaagaa mintti ammaniis. Yihoowassinne haratussi minnidi oottidoy hegaassa. I oottidobay aybee? I haggaazuwaninne galchchan gooba asttamaare gidanaadan kiitettida Phawuloosi minttettiis. Qassi Ximootiyosi yelagatussinne cimatussi loˈˈo leemiso gidanaadan minttettiis. Hegaa bollikka, zoree koshshiyogeeta siiquwan mintti zoriyogaa gujjin, gita aawatettati awu imettidosona. (1 Xim. 4:11-16; 2 Xim. 4:1-5) Issi issitoo Ximootiyosi oottiyobaa harati beˈana woy hegawu galatana xayikkokka, Yihooway woytanaagaa I ammanettiis.—Roo. 2:6, 7.
12. Cimati galchchan minnidi oottiyoy aybissee? (Misiliyakka xeella.)
12 Ha wodiyan deˈiya cimatikka Yihooway eta loˈˈo oosuwa beˈiyogaanne nashshiyogaa ammanettana danddayoosona. Daro cimati harata minttettiyogaa, tamaarissiyogaanne sabbakiyogaa xalla gidennan, keexuwa oosuwaninne daafabay gakkidoogeeta maaddoosona. Harati qassi Sahettidaageeta Oychchiya Citan woy Hosppitaaletuura Gattiya Konttetun oottoosona. Cimati galchchay asaba gidennan, Yihoowaba gidiyogaa eroosona. Hegaa gishshawu eti galchchan minni oottoosonanne eta oosuwawu Xoossay eta woytanaagaa ammanettoosona.—Qol. 3:23, 24.
Neeni galchchawu minna oottiyo gishshawu deˈo Xoossay nena woytana (Mentto 12-13 xeella)
13. Yihooway nuuni awu oottiyobaa waati xeellii?
13 Nuuni ubbay cima gidana danddayokko. Shin ubbaykka Yihoowawu immana danddayiyobay deˈees. Nuuni awu haggaazanawu nuussi danddayettida ubbabaa oottiyo wode I keehi ufayttees. Nuuni immana danddayiyobay guutta gidikkokka, kumetta saˈan oosettiya oosuwawu miishshaa immiyo wode I beˈees. Nuuni dungguuxa gidikkokka, shiiquwan qofaa yootanawu kushiya denttiyo wodenne nuna yiilloyidaageetussi atto giyo wode I keehi ufayttees. Neeni koyiyogaa keenaa Yihoowayyo oottana danddayennabadan qoppikkokka, I ne oottiyobaa nashshiyogaa ammanetta. Neeni hegaa oottido gishshawu I nena siiqees, qassi I nena woytana.—Luq. 21:1-4.
DEˈO XOOSSAARA DABBOTADA DEˈA
14. Yihoowara loytti dabbotiyogee nuuni ammanetti deˈanaadan waati maaddii? (Misiliyakka xeella.)
14 Nuuni Yihoowara loytti dabbotikko, awu ammanetti deˈanawu metootokko. Yooseefi hegaadan oottiis. I pokkobaa oottennan ixxiis. Yooseefi Xoossaara loytti dabbotido gishshawu A azzanttanawu koyibeenna. (Doo. 39:9) Nuuni Yihoowara loytti dabbotanawu wodiya bazzidi woossananne A Qaalaa xannaˈana koshshees. Yaatikko nuuni aara dabbotaa minttoos. Yooseefaagaadan, nuunikka Yihoowara loytti dabbotikko, A azzanttiyabaa aybanne oottanawu koyokko.—Yaaq. 4:8.
Neeni deˈo Xoossaara dabbotiyogee ammanettada deˈanaadan maaddana (Mentto 14-15 xeella)
15. Israaˈeelati bazzuwan deˈiyo wode eti oottidobaappe nuuni ay tamaariyoo? (Ibraawe 3:12)
15 Yihooway deˈo Xoossaa gidiyogaa dogidaageeti sohuwara appe haakkana danddayoosona. Israaˈeelati bazzuwan deˈiyo wode hanidabaa beˈa. Yihooway deˈiyogaa eti eriyaba gidikkokka, I etassi koshshiyabaa kunttanaagaa siriyogaa doommidosona. Haray atto eti, “GODAI nu giddon de7iiyye de7ennee?” giidi oychchidosona. (Kes. 17:2, 7) Hegaappe denddidaagan, eti Xoossaa bolli makkalidosona. Nuuni eta iita leemisuwa kaallanawu koyennaagee qoncce.—Ibraawe 3:12 nabbaba.
16. Nu ammanuwa paaccana danddayiyabay aybee?
16 Ha alamee nuuni Yihoowara dabbotidi deˈanawu metootanaadan oottees. Daroti Xoossay deˈiyogaa ammanokkona. Xoossay koyiyobaa oottennaageeti darotoo injje deˈuwa deˈiyaba milatees. Nuuni hegaa beˈiyo wode nu ammanoy paacettana danddayees. Xoossay deˈiyogaa nuuni ammanikkokka, I nuna maaddanaagaa siriyogaa doommana danddayoos. Mazamure 73 xaafidaagee issi issitoo hegaadan qoppiis. I Xoossaa higgiya xaasayi xeelliyageeti injje deˈuwa deˈiyogaa beˈiis. Hegaappe denddidaagan, Xoossawu haggaaziyogee aynne maaddenna giidi I qoppiyogaa doommiis.—Maz. 73:11-13.
17. Yihoowa dabbo gididi deˈanaadan nuna aybi maaddanee?
17 Mazamuraawee ba qofaa laammanaadan maaddidabay aybee? I Yihoowan ammanettiyogaa aggidaageetu bolli gakkanabaa wotti dentti qoppiis. (Maz. 73:18, 19, 27) Xoossawu haggaaziyogee demissiyo goˈˈaakka I wotti dentti qoppiis. (Maz. 73:24) Nuunikka Yihooway nuna anjjidobata wotti dentti qoppana danddayoos. Qassi nuuni Yihoowawu haggaazennaakko nu deˈoy ay mala gidanaakko qoppana danddayoos. Yihoowawu haggaaziyogee nuussi loˈˈo gidiyoy aybissakko hassayiyogee nuuni awu ammanetti deˈanaadan maaddana. Nuuni mazamuraawiyagaadan, “Taassa gidikko, taani Xoossaa matan de7iyoogee taayyo lo77o” yaagana.—Maz. 73:28.
18. Nuuni sinttanaa xeelliyagan hirggana koshshennay aybissee?
18 Ha wurssetta gallassatun nuna ay metoy gakikkokka, nuuni “worddotenna de7o Xoossaayyo” oottiyageeta gidiyo gishshawu, genccana danddayoos. (1 Tas. 1:9) Xoossay nuussi qoppeesinne ubbatoo nuna maaddees. Yihooway beni ba ashkkarata kaafidoogaadan ha wodiyan nunakka kaafees. Mata wode gita waayee saˈan denddana. Shin nuuni nurkka deˈokko, ayssi giikko Yihooway nunaara deˈees. (Isi. 41:10) Nuuni “xalidi, ‘Godai tana maaddiyaagaa; taani yayyikke’” gaana danddayoos.—Ibr. 13:5, 6.
MAZAMURE 3 Nu Wolqqaa, Nu Hidootaa, Nu Qatuwaa
