Shin Yihooway I issibaa oottanawu keerido wodee gakkanaashin nuuni danddayan A naaganaadan koyees. Nuuni hegaadan oottanaadan I koyiyoy aybissee? Danddayan naagiiddi ufayttanaadan nuna aybi maaddanee?

NUUNI DANDDAYAN NAAGANAADAN YIHOOWAY KOYIYOY AYBISSEE?

Geeshsha Maxaafay hagaadan gees: “GODAI intteyyo kehanau naagees; i intteyyo qarettiyoogaa bessanau denddees. Aissi giikko, GODAI xillo pirddiya Xoossaa; a naagiyaageeti ubbati anjjettidaageeta.” (Isi. 30:18) Isiyasi hagaa koyro yootidoy makkalanchcha Ayhudatussa. (Isi. 30:1) Shin Ayhudatu giddon ammanettida amaridaageeti deˈoosona; qassi ha qofay etawu hidootay deˈanaadan oottiis. Hegee ha wodiyan Yihoowawu ammanettidi haggaaziyageetussikka hidootay deˈanaadan oottees.

Yihooway danddayan naagiyo gishshawu, nuunikka danddayan naagana koshshees. I ha iita alamiya xayssanawu wodiya keeri uttiis; qassi I he gallassaanne saatiya danddayan naagees. (Mat. 24:36) Yihoowanne Awu haggaziyageeta Dabloosi mootidobay worddo gidiyogee he wode qonccana. Qassi I Seexaanaanne aara hashetiya ubbaa xayssana; shin I ‘nuussi qarettana.’

He wodee gakkanaashin, Yihooway nu metuwa xayssana xayikkonne, danddayan naagiyogan ufayttana danddayiyogaa I yootiis. Isiyasi yootidoogaadan loˈˈobay hanana giidi hidootiyogan ufayttana danddayoos. (Isi. 30:18) He ufayssaa waati demmana danddayiyoo? Oyddubati nuna maaddana danddayoosona.

DANDDAYAN NAAGIIDDI UFAYTTIYO OGIYA

Ubbatoo loˈˈobaa qoppa. Kawuwa Daawiti ba deˈo layttan iitabaa beˈiis. (Maz. 37:35) Gidikkonne, I hagaadan giis: “GODAA sinttan co77u gaada, i oottanaashin, danddayan naaga. Eta iita halchchoi polettin, duretida asatu bolli yiillotoppa.” (Maz. 37:7) Daawiti Yihooway ashshanawu qaalaa gelidobaa ubbatoo qoppiyogan he zoriya oosuwan peeshshiis. Qassi Yihooway awu oottido loˈˈoba ubbaa gishshawu A galatiis. (Maz. 40:5) Nuna gakkida iitabaa gidennan, nu demmido  loˈˈobaa ubbatoo qoppikko, Yihoowa danddayan naaganawu metootokko.

Demmido injje ubban Yihoowabaa loytta yoota. Mazamure 71 xaafiday Daawita gidennan aggenna; I Yihoowawu hagaadan giis: “Taani ubbaton nena ufaissan naagana. Taani gujja gujjada nena galatana.” (Maz. 71:14) I Yihoowa waati sabbidee? I haratussi Yihoowabaa yootiisinne mazamuriyan A sabbiis. (Maz. 71:16, 23) Daawitaagaadan, Yihoowa danddayan naagiiddi ufayttana danddayoos. Nu haggaazuwan, ubba galla haasayiyobaaninne mazamuriya yexxiyogan A sabboos. Kaalliya wodiyan nu mazamuretuppe issuwa yexxiyo wode danttuwanne hegee neeni ufayttanaadan waati oottiyakko loytta qoppa.

Ne ishanttuuranne michchonttuura wodiya aattiyogan minttettuwa demma. Daawiti paacee bana gakkido wode Yihoowawu hagaadan giis: “Taani ammanettidaageetu sinttan ne sunttan hidootaa wottays.” (Maz. 52:9, NW) Nuunikka shiiquwaninne haggaazuwan xalla gidennan, nu mala Kiristtaanetuura allaxxiyo wodekka etappe minttettuwa demmana danddayoos.—Roo. 1:11, 12.

Ne hidootan mintta ammanetta. Mazamure 62:5y hagaadan gees: “Xoossaa xalaalan taani shemppuwaa demmaas; taani ufaissan naagiyoogee appe yees.” Nuuni qoppido wodiyan wurssettay yaana xayikko, nu hidootan mintti ammanettiyogee keehi koshshiyaba. Nuuni danddayan naagana koshshiyo wodee ay keena gidikkokka, Yihooway qaalaa gelidobati polettanaagaa ammanettana bessees. Xoossaa Qaalaa xannaˈiyogan nu hidootan mintti ammanettana danddayoos. Leemisuwawu, Geeshsha Maxaafan kasetidi odettida ubbabay polettidoogaa, Geeshsha Maxaafaa xaafida dumma dumma asatu qofay maayettiyogaanne Yihooway babaa loytti qonccissiyogaa qoppana danddayoos. (Maz. 1:2, 3) Qassi, merinaa deˈuwa hidootay polettanaagaa danddayan naagiiddi Yihoowara dabbotaa minttidi deˈanawu ‘geeshsha ayyaana wolqqan ubbatoo woossana’ koshshees.—Yih. 20, 21.

Yihooway Bana danddayan naagiyageeta xeelliyogaanne etawu aggenna siiquwa bessiyogaa Kawuwa Daawitaagaadan ammanetta. (Maz. 33:18, 22) Ubbatoo loˈˈobaa qoppiyogan, demmido injje ubban Yihoowabaa haratuyyo loytta yootiyogan, ne mala Kiristtaanetuppe minttettuwa demmiyogaaninne ne alˈˈo hidootan mintta ammanettiyogan ubbatoo danddayan naaga.