1. Nuuni Yihoowa woossiyo maataa waati xeellana koshshii?

 NUUYYO alˈˈo imotaa saluwaanne saˈaa Medhdhidaagee immiis. I nuuni A woossanaadan paqqadiis. Ane hagaa qoppa: Nuuni wodiyaa keerennan awudenne, qassi ay doonankka nuuyyo siyettiya ubbabaa Yihoowawu yootana danddayoos. Nuuni hosppitaaliyan zinˈˈidi woy qasho keettan deˈiiddi nu siiqo Aaway nu woosaa siyanaagaa ammanettidi A woossana danddayoos. Ha imotawu nuuni A keehi galatoos.

2. Kawuwaa Daawiti woosaa maataa nashshiyoogaa waati bessidee?

² Kawuwaa Daawiti woosaa maataa keehi nashshiis. I Yihoowayyo hagaadan giidi yexxiis: “Ta woosai ixaanaa cuwaadan ne sintti shiiqo.” (Maz. 141:1, 2) Daawita wode, loytti qoppidi giigissido geeshsha ixaanaa, qeeseti tumu goynuwawu goˈettoosona. (Kes. 30:34, 35) Ixaanaa giigissiyaageeti loytti qoppidi giigissiyoogaadan, Daawiti Yihoowa woossiyo wode woyganaakko loytti qoppidi woossanawu koyiis. Nuunikka hegaadan oottanawu keehi koyoos. Nu woosay Yihoowa ufayssanaadan koyoos.

3. Nuuni Yihoowa ay mala ogiyan woossana koshshii, qassi aybissi?

³ Nuuni Yihoowa woossiyo wode bonchchiyoogaa bessiya ogiyan woossana koshshees. Isiyaasi, Hizqqeeli, Daaneelinne Yohaannisi beˈido maalaalissiya ajjuutatubaa ane qoppa. He ajjuutati issoy haraappe dummatiyaaba gidikkonne, eta issi mala oottiyaabay deˈees. Eti ubbaykka, Yihoowa keehi bonchchettida Kawodan qonccissidosona. Isiyaasi, Yihooway “bollaaninne xoqqa araatan uttidaagaa” beˈiis. (Isi. 6:1-3) ‘Zuullaadan phooliya pooˈoy’ yuushuwan deˈiyo saluwaa saragallan Yihooway uttidaagaa Hizqqeeli beˈiis. (Hiz. 1:26-28) “Merinaasappe De7iyaagee” bootta maayuwaa maayidaagaanne  A araataappe tamay lacottiyoogaa Daaneeli beˈiis. (Dane. 7:9, 10) Qassi, keehi loˈˈiyaa maata mera zuullay yuushuwan deˈiyo araatan Yihooway uttidaagaa Yohaannisi beˈiis. (Ajj. 4:2-4) Zawi baynna Yihoowa bonchchuwaabaa wotti dentti qoppiyoogee, woosan akko shiiqiyo maalaalissiya maataa nuna hassayissees; qassi bonchchiyoogaa bessiya ogiyan woossana koshshiyoogaakka akeekanawu maaddees. SHin nuuni aybaa xeelliyaagan woossana koshshii?

4. Maatiyoosa 6:9, 10 doomettan, woosaa xeelliyaagan Yesuusi giidobaappe nuuni ay tamaariyoo?

⁴ Maatiyoosa 6:9, 10 nabbaba. Yesuusi Maatiyoosa shemppo 5-7 gakkanawu haasayidoban, ba erissiyo ashkkarati Xoossaa ufayssiya ogiyan waati woossanaakko tamaarissiis. Yesuusi, “simmi intte hagaadan yaagidi, Xoossaa woossite” gi simmidi, Yihoowa sheniyaara gayttida keehi koshshiyaabaa koyro qonccissiis. Yihoowa sunttay geeyanaadan, Xoossaa morkketa ubbaa xayssana Kawotettay yaanaadan, qassi sinttappe saˈawunne asawu Yihooway loˈˈobaa oottanaagaa xeelliyaagan I tamaarissiis. Nuuni ha allaalleta xeelliyaagankka woossiyoogan, Xoossaa shenee nuussi aybippenne aadhdhiyoogaa bessoos.

5. Nu buzo allaalliyaa xeelliyaagan Yihoowa woossiyoogee bessiyaabee?

⁵ Yesuusi kaallidi, buzo allaalliyaa xeelliyaagan woossiyoogee bessiyaaba gidiyoogaa qonccissiis. Yihooway nuussi hachchi hachchi koshshiya qumaa immanaadan, nu nagaraa atto gaanaadan, nuna paaciyaappe naaganaadaaninne iitabaappe ashshanaadan A woossana danddayoos. (Maa. 6:11-13) Nuuni hegeeta xeelliyaagan Yihoowa woossiyo wode, A maadoy nuussi koshshiyoogaa eriyoogaanne an sabettanawu keehi koyiyoogaa bessoos.

6. Nuuni Yesuusi tamaarissido woosan deˈiyaabatu xallaa woossana koshshii? Qonccissa.

⁶ Yesuusi bana kaalliyaageeti I tamaarissido woosan deˈiya qofaa zaari zaaridi woossanaadan koyibeenna. I woossido hara wodetun, bana qofissida harabaa woossiis. (Maa. 26:39, 42; Yoh. 17:1-26) Nuunikka, nuna qofissida aybaanne woossana danddayoos. Nuuni  issibaa kuuyana koshshikko, aadhdhida eratettaanne akeekaa demmanawu woossana danddayoos. (Maz. 119:33, 34) Nuuyyo gita aawatettay imettiyo wode, hegaa waati oottanaakko akeekanawu maaddana mala woossana danddayoos. (Lee. 2:6) Yelidaageeti bantta naatuyyo, naati qassi banttana yelidaageetuyyo woossana danddayoosona. Nuuni ubbay, Geeshsha Maxaafaa xannaˈissiyoogeetuyyoonne nuuni mishiraachchuwaa sabbakiyo asatuyyo woossana danddayoos; qassi yaatiyoogee koshshiyaaba. SHin nuuni maaduwaa demmana xallawu Yihoowa woossana bessenna.

7. Nuuni woossiyo wode Yihoowa sabbana koshshiyoy aybissee?

⁷ Nuuni woossiyo wode Yihoowa sabbana bessiyoogaa hassayana koshshees. Nu Xoossay oogaappenne aaruwan sabettana bessees. I “kehanne atto giyaagaa.” Qassi “qarettiyanne maariya Xoossaa; hanqqettanau gam77iyaagaa; aggenna siiqoinne ammanettiyoobai dariyoogaa.” (Maz. 86:5, 15) Nuuni Yihoowa A oonatettaa gishshawunne I oottidobaa gishshawu sabbiyo daro gaasoy deˈees.

8. Nuuni Yihoowa galatana danddayiyo amarida gaasoti aybee? (Mazamure 104:12-15, 24)

⁸ Nuuni woosan Yihoowa sabbiyoogaa bolli, I nuussi immiyo maalaalissiyaabatu gishshawu A galatana bessees. Leemisuwawu, keehi loˈˈiya ciishshatu gishshawu, zawi baynna malˈˈiya qumaa gishshawunne laggetuura aattiyo ufayssiya wodiyaa gishshawu A galatana danddayoos. Nu siiqo Aaway nuuni ufayttanaadan hageetanne hara darobata immees. (Mazamure 104:12-15, 24 nabbaba.) Ubbaappe aaruwan, Yihooway gidi palahiya ayyaanaabaa qumaa nuussi giigissiyo gishshawunne maalaalissiya hidootay nuussi daanaadan oottido gishshawu A galatoos.

9. Nuuni Yihoowa galatiyoogaa dogennaadan aybi maaddana danddayii? (1 Tasalonqqe 5:17, 18)

⁹ Yihooway nuussi oottiyo ubbabaa gishshawu A galatiyoogaa dogana danddayoos. Yaatin neeni hassayanaadan aybi maaddana danddayii? Neeni woossido dumma dummabata xaafananne guyyeppe Yihooway neeni woossidobaa waati zaaridaakko eranawu he xaafidobata zaaretta xeellana danddayaasa. Hegaappe simmin, I nena maaddido gishshawu  woosan A galata. (1 Tasalonqqe 5:17, 18 nabbaba.) Ane hagaa qoppa: Harati nuna galatiyo wode nuuni ufayttoosinne hegaa dosoos. Hegaadan, Yihooway nu woosaa zaarido gishshawu nuuni A galatiyo wode I keehi ufayttees. (Qol. 3:15) SHin nuuni nu Xoossaa galatiyo hara keehi koshshiya gaasoy aybee?

10. Koyro PHeexiroosa 2:21y yootiyoogaadan, Yihooway Yesuusa saˈaa kiittido gishshawu nuuni galatana bessiyoy aybissee?

¹⁰ Koyro PHeexiroosa 2:21 nabbaba. Nuna tamaarissanawu Yihooway ba siiqo Naˈaa kiittido gishshawu, nuuni A galatana koshshees. Nuuni Yesuusa deˈuwaabaa xannaˈiyoogan Yihoowabaanne A ufayssana danddayiyo ogiyaabaa darobaa tamaaroos. Nuuni Kiristtoosa yarshshuwan ammanikko, Xoossaa Yihoowaara dabbotaa minttananne aara sarotettan deˈana danddayoos.—Roo. 5:1.

11. Nuuni Yesuusa sunttan woossana koshshiyoy aybissee?

¹¹ Nuuni Yesuusa baggaara Yihoowa woossana danddayiyo gishshawu Yihoowa galatoos. Nuuni oychchidobaa Yihooway Yesuusa baggaara nuussi immees. Nuuni Yesuusa sunttan woossiyo woosaa Yihooway siyeesinne zaarees. Yesuusi hagaadan giis: “Aawai Na7aa baggaara, ta baggaara bonchchettana mala, ta sunttan intte woossiyo ubbabaa taani intteyyo polana.”—Yoh. 14:13, 14.

12. Nuuni A Naˈaa gishshawu Yihoowa galatiyo hara gaasoy aybee?

¹² Yihooway Yesuusa wozuwaa yarshshuwaa baggaara nu nagaraa atto gees. Yesuusi “saluwan Ubbaappe Bolla Xoossai uttiyo kawotaa araataappe ushachcha baggaara uttida qeese ubbatu [halaqaa]” gidiyoogaa Geeshsha Maxaafay yootees. (Ibr. 8:1) Yesuusi ‘Aawaa matan nuuyyo gaannatees.’ (1 Yoh. 2:1) Nu shugo miyyiyaa akeekiyaanne ‘nuuyyo gaannatiya’ qeese ubbatu halaqaa Yihooway immido gishshawu A keehi galatoos! (Roo. 8:34; Ibr. 4:15) Nuuni nagaranchcha gidiyo gishshawu, Yesuusa yarshshoy baynnan woosan Yihoowakko shiiqana danddayokko. Yihooway nuussi immido alˈˈo imota gidida ba siiqo Naˈaa gishshawu, neeni Yihoowa wozanappe galatiyoogee qoncce!

13. Yesuusi hayqqanaappe kase qammi, ba erissiyo ashkkarata siiqiyoogaa waati bessidee?

¹³ Yesuusi hayqqanaappe kase qammi, bana kaalliyaageetussi adussidi woossiis; I, “xalahiyaappe eta naagana mala” ba Aawaa oychchiis. (Yoh. 17:15) Yesuusi eta keehi siiqees! I matan keehi waayettanaagaa erikkonne, kiitettidaageetu hanotay A keehi qofissiis.

14. Nu ishanttanne michchontta siiqiyoogaa waati bessana danddayiyoo?

¹⁴ Yesuusa leemisuwaa kaalliyoogan, nuunikka nuussi koshshiyaaba xallaa qoppana bessenna. Nu ishanttuyyoonne michchonttuyyo ubba galla woossoos. Yaatiyoogan, issoy issuwaara siiqettanaadan Yesuusi yootidobawu azazettoosinne nu mala Kiristtaaneta keehippe siiqiyoogaa Yihoowa bessoos. (Yoh. 13:34) Nu ishanttussinne michchonttussi woossiyoogee coo wode wurssiyooba gidenna. “Xillo asa woosai wolqqaama oosuwaa [oottiyoogaa]” Xoossaa Qaalay yootees.—Yaaq. 5:16.

15. Nuuni nu ishanttussinne michchonttussi woossana koshshiyoy aybissee?

¹⁵ Nu mala Kiristtaaneti daro metuwaa gencciiddi deˈiyo gishshawu, nuuni etawu  woossana koshshees. Sahuwaa, daafabay gattiyo qohuwaa, olaa, yedetaa, woy hara metota genccanaadan Yihooway eta maaddana mala oychchana danddayoos. Qassi maadoy koshshiyoogeeta maaddanawu minnidi oottiya nu ishanttussinne michchonttussi woossana danddayoos. Hegaa mala metoy gakkin waayettiya amaridaageeta neeni erennan waaya aggana. Neeni he ishanttunne michchonttu sunttaa xeesada woossana danddayaasa. Eti genccanaadan Yihooway maaddana mala woossiyoogan, nuuni eta wozanappe siiqiyoogaa bessoos.

16. Aawatettay deˈiyo ishanttussi nuuni woossana koshshiyoy aybissee?

¹⁶ Nuuni gubaaˈiyan aawatettay deˈiyoogeetu sunttaa xeesidi woossiyo wode, eti keehi nashshoosona; qassi nu woossay eta maaddees. Kiitettida PHawuloosi harati assi woossiyoogee koshshiyoogaa akeekiis. I hagaadan giis: “Qassi taani yayyennan wonggeliyaa xuuraa yootanau, Xoossai ta doonaa dooyidi, tau haasayiyoobaa immanaadan, taukka Xoossaa woossite.” (Efi. 6:19) Hegaadan, ha wodiyan aawatettay deˈiyo minnidi oottiya daro ishantti deˈoosona. Eta oosuwaa Yihooway anjjanaadan woossiyoogan, nuuni eta siiqiyoogaa bessoos.

17-18. Nuuni haratu sinttan woossanaadan awude shoobettana danddayiyoo, qassi nuuni ay hassayana koshshii?

¹⁷ Issi isstoo nuuni haratu sinttan woossanaadan shoobettana danddayoos. Leemisuwawu, Geeshsha Maxaafaa xannaˈissiya issi michchiyaa, banaara xannaˈissiya hara michchiyaa woossanaadan shoobbana danddayawusu. SHoobettida michchiyaa xinaatee hanotaa loytta erenna gishshawu, xinaatiyaa wurssiyo wode woossanawu koyana danddayawusu. Yaatiyoogee he michchiyaa xinaateessi woossiyo wode woyganaakko loytta eranawu maaddees.

¹⁸ Issi ishay haggaazo shiiquwan woy gubaaˈe shiiquwan woossanaadan shoobettana danddayees. Woossiyo maatay deˈiyo ishantti he shiiquwaa halchchoy aybakko hassayana koshshees. Woosaa nuuni gubaaˈiyan deˈiyaageeta zoranawu woy etawu erissuwaa yootanawu goˈettana koshshenna. Gubaaˈe  shiiqotun darotoo mazamuriyawunne woosawu ichchashu daqiiqay imettiyo gishshawu, woossiya ishay ‘adussidi’ woossana bessenna; ubba qassi shiiquwaa doomettan hegaadan oottana koshshenna.—Maa. 6:7.

19. Yihoowa pirddaa gallassawu giigetti uttanaadan nuna aybi maaddanee?

¹⁹ Yihoowa pirddaa gallassay matido gishshawu, nuuni nu deˈuwan aybippenne aaruwan woosaa kaseyana koshshees. Hegaa xeelliyaagan Yesuusi hagaadan giis: ‘Simmi intte he yaanabaa ubbaappe attanawu danddayana mala, ubba wode Xoossaa woosan minnite.’ (Luq. 21:36) Nuuni ubbatoo woossikko, nu ammanoy minnana, qassi matida Xoossaa pirddaa gallassawu giigetti uttana.

20. Nu woosay sawuwaa tonggu giya ixaanaa mala waani gidana danddayii?

²⁰ Nuuni ay tamaaridoo? Nuuni woosaa maataa keehi nashshoos. Nuuni woossana koshshiya waannabay Yihoowa halchchuwaara gayttidaba gidana bessees. Xoossaa Naˈaa gishshawunne A Kawotettaa haaruwaa gishshawu nuuni Yihoowa galatoos; qassi nu mala Kiristtaanetussi woossoos. Hegaa bollikka, Yihooway nuuni hachchi hachchi koshshiyaabawunne nu ammanoy minnidi deˈanaadan maaddanawu A woossanaadan koyees. Nuuni woyganaakko loytti qoppidi woossiyaaba gidikko, ha alˈˈo imotaa nashshiyoogaa bessoos. Nu woosay sawuwaa tonggu giya ixaanadan, Yihoowa ‘ufayssiyaagaa’ gidana.—Lee. 15:8.