1-2. Aggenna siiquwaa nuuni issoy issuwawu bessanaadan oottiya gaasoti aybee?

AGGENNA SIIQUWAA nuuni issoy issuwawu bessanaadan oottiya gaasoti deˈoosona. Hegeetuppe amaridaageeti aybee? Geeshsha ayyaanaa kaaletuwan xaafettida leemiso maxaafay ha oyshaa waati zaariyaakko akeeka: “Aggenna siiqoinne tumatettai neeppe haakkoppona; . . . Yaatikko, neeni Xoossaanne asaa sinttan sabettananne nashettana.” “Aggenna siiquwaaninne ammanettiyoogan nagarai atto geetettees.” “Xillotettaanne aggenna siiquwaa koyiya uraa baree aduqqees.”—Lee. 3:3, 4; 16:6; 21:21.

² Nuuni aggenna siiquwaa bessana koshshiyo heezzu gaasota leemiso maxaafay qonccissees. Koyroogee, nuuni aggenna siiquwaa bessiyo wode Xoossay nuna xoqqu ootti xeellees. Naaˈˈanttoogee, nuuni aggenna siiquwaa bessiyo wode goˈettoos. Leemisuwawu, nuuni haratuura duuxxenna laggetettaa medhdhoos. Heezzanttoogee, nuuni aggenna siiquwaa bessiyo wode, merinaa deˈuwaa gujjin, sinttappe loˈˈobaa demmana. Nuuni Yihooway yootiyoobata azazettanaadan oottiya gaasoti deˈoosona: “Asappe koyettiyaagee aggenna siiquwaa.”—Lee. 19:22.

3. Nuuni ha huuphe yohuwan beˈana oyshati awugeetee?

³ Ha huuphe yohuwan nuuni oyddu oyshatu zaaruwaa beˈana. Aggenna siiquwaa nuuni oossi bessana koshshii? Aggenna siiquwaa bessiyoogaa xeelliyaagan nuuni Uruti maxaafaappe ay tamaarana danddayiyoo? Aggenna siiquwaa nuuni ha wodiyan waati bessana danddayiyoo? Aggenna siiquwaa nuuni bessiyo wode ayba goˈˈaa demmiyoo?

4. Aggenna siiquwaa bessiyoogan Yihoowa waani milatana danddayiyoo? (Marqqoosa 10:29, 30)

⁴ Hagaappe kasetiya huuphe yohoy Yihooway A siiqiyaageetunne awu haggaaziyaageetu xallawu aggenna siiquwaa bessiyoogaa  nuuni akeekanaadan maaddiis. (Dane. 9:4) Nuuni ‘Xoossay siiqiyo naatudan, A milatanawu’ koyoos. (Efi. 5:1) Yaatiyo gishshawu, nuuni nu ishanttussinne michchonttussi aggenna siiquwaa bessanawu koyoos.—Marqqoosa 10:29, 30 nabbaba.

5-6. Kehatettay aggenna siiquwaappe waani dummatii?

⁵ Aggenna siiqoy aybakko nuuni loytti akeekiyo wode, nu ishanttussinne michchonttussi hegaa loytti bessanaagaa ammanettoos. Nuuni aggenna siiquwaa kaseegaappe aaruwan akeekanawu, hegee kehatettaappe waani dummatiyaakko ane beˈoos.

 ⁶ Kiitettida PHawuloosinne hara asay deˈiyo markkabee meˈˈidoogaa yootiya taarikee kehatettaa bessiyaaba. Beetay sugin Maltta haruuruwaa dooni eti kiyidosona. Maltta asay markkabiyan manddariya asawu qaalaa gelidobi woy etaara kase dabbotidobi baynnaba gidikkonne, he haruuruwaa asati imatuwaa eta mokkiyoogan etawu kehatettaa bessidosona. (Oos. 28:2, 7) SHin Maltta asay aggenna siiquwaa bessiis gaana danddayiyoo? CHii, ayssi giikko, eti giigettennan mokkidosona, qassi maadoy koshshiyo asaa maaddanawu koyidosona.

7-8. (a) Issi uri aggenna siiquwaa bessanaadan oottiyaabay aybee? (b) Uruti maxaafaappe amarida xiqiseta nuuni pilggiyoy aybissee?

⁷  Mentto 6n beˈidoogaadan kehatettay aggenna siiquwaappe dummatees. Dummatettaa eranawu, Xoossaa asay bessido aggenna siiquwaa xannaˈana danddayoos. Leemisuwawu, Daawita hanotaa beˈa. Yonaataana aaway Daawita woranawu koyikkonne Daawiti ba mata laggiyaa Yonaataanawu aggenna siiquwaa bessiis. Yonaataani hayqqin daro layttay aadhdhi simminkka, Daawiti Yonaataana naˈaa Mafibosheetawu aggenna siiquwaa bessiyoogaa aggibeenna. Daawiti hegaadan oottidoy aybissee? I Yonaataana keehi siiqiyo gishshataassa. Hegee kehatettaanne aggenna siiquwaa giddon deˈiya dummatettaa bessees.—1 Sam. 20:9, 14, 15; 2 Sam. 4:4; 8:15; 9:1, 6, 7. *

⁸ Geeshsha Maxaafan Uruti maxaafaappe amarida xiqiseta pilggiyoogan aggenna siiquwaa xeelliyaagan darobaa tamaarana danddayoos. He maxaafan etabay odettido asatuppe aggenna siiquwaabaa ay tamaarana danddayiyoo? He tamaaridobata nu gubaaˈiyan waati oosuwan peeshshana danddayiyoo? *

9. Naaˈooma bana Yihooway eqettees gaada qoppidoy aybissee?

⁹ Uruti maxaafay Naaˈoomibaa, I naˈaa keettaayee Urutibaanne Naaˈoomi azinaa dabbo gidida, Xoossawu yayyiya Booˈeezabaa yootees. Israaˈeelan koshay denddido gishshawu, Naaˈooma, I keettaawaynne attuma naati naaˈˈay Mooˈaaba biitti biidosona. SHin yan Naaˈoomissi keettaaway hayqqiis. I naaˈˈu attuma naati machchidaba gidikkonne, etikka hayqqidoogee azzanttiyaaba. (Uru. 1:3-5; 2:1) Ha gakkida iitabay Naaˈooma keehi azzananaadan oottiis. A keehi azzanido gishshawu, bana Yihooway eqettees gaada qoppaasu. Xoossaa xeelliyaagan baassi siyettidabaa A woyga yootidaakko akeeka: ‘Yihooway tana tuggayiis.’ A gujjadakka hagaadan gaasu: “Ubbaa Danddayiya Xoossai ta de7uwaa daro camettiis. . . . GODAI tana tuggayiis; Ubbaa Danddayiya Xoossai tanan palabaa gattiis.”—Uru. 1:13, 20, 21.

10. Naaˈooma haasayidoban Yihoowawu aybi siyettidee, qassi I iyyo ay oottidee?

¹⁰ Naaˈooma haasayidoban Yihoowawu aybi siyettidee, qassi I iyyo ay oottidee? I Naaˈoomo  maaddiyoogaa aggibeenna. I iyyo qarettiis. “Sugetta oosoi aadhdhida eranchchaa eeyya” kessiyoogaa Yihooway akeekees. (Era. 7:7) SHin, Yihooway Naaˈoomo aggibeennaagaa A akeekanaadan iyyo maadoy koshshiis. Xoossay waati maaddidee? (1 Sam. 2:8) I Uruta Naaˈoomissi aggenna siiquwaa bessanaadan denttettiis. Uruta Naaˈoomo siiqiyoogaa bessanawu koyido gishshawu, A keehi azzanennaadaaninne Yihooway O siiqiyoogaa aggibeennaagaa A eranaadan kehatettan maaddaasu. Uruta oottidobaappe nuuni ay tamaariyoo?

11. Keha gidida daro ishanttinne michchontti azzanidaageeta woy hidootaa qanxxidaageeta maaddanawu baaxetiyoy aybissee?

¹¹ Nuuni aggenna siiquwaa bessikko, azzanidaageeta woy hidootaa qanxxidaageeta maaddanawu baaxetoos. Uruta Naaˈoomippe shaahettabeennaagaadan, ha wodiyankka keha gidida daro ishanttinne michchontti gubaaˈiyan deˈiya azzanidaageeta woy hidootaa qanxxidaageeta aggennan maaddoosona. Eti bantta ishanttanne michchontta siiqoosonanne eta maaddanawu banttawu danddayettida ubbabaa oottanawu koyoosona. (Lee. 12:25; 24:10) Kiitettida PHawuloosi, “Yayyiyaageeta [“unˈˈettidaageeta,” NW] minttettite. Wolqqi bainnaageeta maaddite. Asa ubbaa danddayite” giidi yootidobaa nuuni oosuwan peeshshanaadan I minttettiis.—1 Tas. 5:14.

12. Azzanida ishaa woy michchiyo maaddiyo aybippenne aadhdhiya ogee aybee?

¹² Azzanida ishantti woy michchontti yootiyoobaa siyiyoogeenne neeni eta siiqiyoogaa eti eranaadan oottiyoogee darotoo eta maaddana danddayiya aybippenne aadhdhiya oge. Yihooway siiqiyo A ashkkarata maaddanawu neeni oottiyoobaa I nashshees. (Maz. 41:1) Leemiso 19:17y hagaadan gees: “Hiyyeesaassi kehiya asi GODAASSI tal77ees; GODAI he lo77o oosuwaa acuwaa qanxxees.”

13. Uruta kuuyidobay Orppiigaappe waani dummatii, qassi Uruta aggenna siiquwaa waata bessadee? (Koyro sinttan deˈiya misiliyaa xeella.)

¹³ Naaˈoomi keettaawaynne I attuma naati naaˈˈay hayqqi simmin hanidabaa nuuni qoppikko, aggenna siiquwaabaa loytti akeekoos. Naaˈooma “GODAI ba asaa Israa7eela maaridi, kattaa etayyo gattidoogaa” siyido wode ba biitti simmanawu qofaa qachchaasu. (Uru. 1:6) Naatu maccaasati naaˈˈaykka iraa manddariyoogaa doommidosona. SHin, he macca naati Mooˈaaba biitti guyye simmanaadan Naaˈooma etawu ogiyan heezzutoo yootaasu. Aybi hanidee? Geeshsha Maxaafay hagaadan gees: “Orppa ba bollotiyo yera ekkada, simma aggaasu. SHin Uruta o baqqa oiqqada ixxaasu.” (Uru. 1:7-14) Orppa Naaˈooma iyyo yootidobaa siyada Mooˈaaba biitti simmaasu. SHin, Uruta Naaˈooma iyyo yootidobaappe aarobaa oottaasu. Akka soo simmana danddayawusu, shin Naaˈoomippe shaahettennan agganawu kuuyaasu. (Uru. 1:16, 17) Uruta Naaˈoomippe shaahettennan agganawu kuuyidoy hegee koshshiyo gishshataassa gidennan,  A yaatanawu koyido gishshataassa. Uruta aggenna siiquwaa bessaasu. Uruta oottidobaappe nuuni ay tamaariyoo?

14. (a) Ha wodiyan, siiqiya ishanttinne michchontti waatanawu kuuyiyoonaa? (b) Ibraawe 13:16y yootiyoogaadan, nuuni Xoossaa waati ufayssana danddayiyoo?

¹⁴ Nuuni aggenna siiquwaa bessiyo wode harata maaddanawu loytti baaxetoos. Beniigaadan ha wodiyan, nu ishanttuppenne michchonttuppe daroti bantta mala Kiristtaanetussi, ubba qassi eti mule erennaageetussi aggenna siiquwaa bessoosona. Leemisuwawu, meretay daafabaa gattidoogaa eti eriyo wode, waati maaddana danddayiyaakko eesuwan eranawu koyoosona. Gubaaˈiyan deˈiya issi ura miishshay metiyo wode, eti he urawu koshshiyaabaa akeekanawunne A maaddanawu sohuwaara baaxetoosona. Koyro xeetu layttan Maqidooniyan deˈiya Kiristtaanetudan eti loytti baaxetoosona. Eti bantta wodiyaanne bantta miishshaa immidosona. (2 Qor. 8:3) Eti aggenna siiquwaa hegaadan bessiyoogaa Yihooway beˈiyo wode keehi ufayttees!—Ibraawe 13:16 nabbaba.

15-16. Uruta maaddanawu ubbatoo baaxetiyoogaa waata bessadee?

¹⁵ Uruta Naaˈoomo waata maaddidaakko pilggiyoogan nuuni loˈˈo gidida darobaa tamaarana danddayoos. Ane amaridabaa beˈoos.

¹⁶ Maaddanawu ubbatoo baaxeta. Uruta ba bolloteera Yihudaa biitti baanawu kiyido wode, Naaˈooma O digganawu malaasu. SHin Uruta simmabeykku. Yaatin aybi hanidee? “Uruta iira baanau ba qofaa qachchidoogaa Naa7ooma erada, co77u gaada agga bayaasu.”—Uru. 1:15-18.

17. Nuuni maaddanawu baaxetiyoogaa aggennaadan aybi maaddanee?

¹⁷ Nu tamaariyoobaa: Unˈˈettiyaageeta maaddanawu danddayanchcha gidana koshshikkokka, eta maaddanawu ubbatoo baaxetana koshshees. Maadoy koshshiyo issi michchiyaa nu maaduwaa ekkanawu koyro koyennan aggana danddayawusu. * Gidikkonne, aggenna siiqoy nuuni O maaddanawu nuussi danddayettida ubbabaa oottanaadan denttettana. (Gal. 6:2) Nuuni O maaddanaadaaninne minttettanaadan A koyana giidi hidootoos.

18. Uruta azzananaadan oottana danddayiyaabay aybee?

¹⁸ Yiillotoppa. Naaˈoomanne Uruta Beetaliheeme gakkido wode, Naaˈooma ba kase shoorotuura gayttaasu. A etassi hagaadan gaasu: “Taani kumettan kiyada baas; shin GODAI tana mela zaariis.” (Uru. 1:21) Naaˈooma hegaadan haasayiyoogaa siyido wode, Urutissi aybi siyettidaakko qoppa! Uruta Naaˈoomo maaddanawu bawu danddayettida ubbabaa oottaasu. Uruta iraa yeekkaasu, O minttettaasunne daro gallassaa iraa hemettaasu. He ubbabay deˈishinkka Naaˈooma hagaadan gaasu: “GODAI tana mela zaariis.” Uruta he wode Naaˈoomippe shaahettabeennaba gidikkonne Naaˈooma haasayidobay Uruti maaduwaa A nashshabeennaagaa bessees. Hegee Uruta keehi azzananaadan oottennan aggenna! SHin A Naaˈoomippe shaahettabeykku.

19. Unˈˈettida ura aggennan maaddanaadan nuna aybi maaddii?

¹⁹ Nu tamaariyoobaa: Ha wodiyan, unˈˈettida issi michchiyo maaddanawu nuuni darobaa oottikkonne nuna qohiyaabaa A haasayana danddayaawusu. SHin yiillotennan agganawu baaxetoos. Maadoy koshshiyo nu michchiyo aggennan maaddoos, qassi O minttettiyo ogiyaa demmana mala Yihooway nuna maaddanaadan woossoos.—Lee. 17:17.

20. Uruta Naaˈoomo maaddiyoogaa aggennaadan koshshiya minttettuwaa awuppe demmadee?

 ²⁰ Issi urawu minttettoy koshshiyoogaa akeekikko minttetta. Uruta Naaˈoomissi aggenna siiquwaa bessaasu; shin iyyo haˈˈi minttettoy koshshiis. Qassi Yihooway Booˈeezi O minttettanaadan oottiis. Booˈeezi Urutiyyo hagaadan giis: “Neeni hanidoogaa kushiyaa GODAI neeyyo zaaro. Neeni a qefiyaa garssan attanau yiido GODAI, Israa7eela Xoossai neeyyo kumettabaa immo.” Ha ufayssiya haasayay Uruto minttettiis. A Booˈeezawu hagaadan gaasu: “Taayyo kehabaa haasayada, tana minttettadasa.” (Uru. 2:12, 13) Urutissi minttettoy koshshido wode Booˈeezi minttettiis; qassi hegee A hidootaa qanxxennaadan maaddiis.

21. Isiyaasa 32:1, 2y qonccissiyoogaadan, siiqiya cimati ay oottiyoonaa?

²¹ Nu tamaariyoobaa: Haratussi aggenna siiquwaa bessiya urawukka issi issitoo minttettoy koshshees. Uruta Naaˈoomissi daro kehidoogaa Booˈeezi akeekido wode O galatiis. Ha wodiyankka, gubaaˈiyan deˈiya ishanttinne michchontti harata kehatettan maaddidoogaa cimati akeekiyo wode eta galatoosona. Eti hegaadan bessiya wodiyan wozanappe minttettiyoogee ishanttinne michchontti minttettiyoogaa aggennaadan maaddees.—Isiyaasa 32:1, 2 nabbaba.

22-23. Naaˈoomi qofay waani laamettidee, qassi aybissi? (Mazamure 136:23, 26)

²² Amarida wodee aadhdhi simmin, Booˈeezi Urutiyyonne Naaˈoomiyyo kattaa kehatettan immiis. (Uru. 2:14-18) Booˈeezi etawu kehatettan immi simmin Naaˈooma waatadee? A hegaadan gaasu: “Haiqqidaageetuyyookka paxa de7iyaageetuyyookka ba kehatettaa aggibeenna GODAI anjjo.” (Uru. 2:20a) Naaˈoomi qofay daroban laamettiis! A kase yeekkaydda hagaadan gaasu: ‘Yihooway tana tuggayiis,’  shin haˈˈi ufayttaydda hagaadan gaasu: ‘Yihooway ba kehatettaa aggibeenna.’ Naaˈoomi qofay laamettanaadan oottiday aybee? *

²³ Naaˈooma Yihooway bana mule aggibeennaagaa akeekaasu. Yihuuda biitti biyo wode koshshiyaaban maaddanaadan Yihooway Uruto goˈettiis. (Uru. 1:16) Eta “wozanau” gattiyoogeetuppe issuwaa gidida Booˈeezi, naaˈˈu maccaasatussi siiquwan kehido wodekka Naaˈooma Yihoowa kushiyaa beˈaasu. * (Uru. 2:19, 20b) A hagaadan qoppennan aggukku: ‘Yihooway tana mule aggibeennaagaa haˈˈi akeekaas. Ha wode ubban I tanaara deˈiis!’ (Mazamure 136:23, 26 nabbaba.) Urutanne Booˈeezi banan hidootaa qanxxibeenna gishshawu, Naaˈooma keehi galatidoogee qoncce! Naaˈooma zaarettada ufayttidoogaaninne Yihoowawu minnida haggaaziyoogan eti ubbaykka keehi ufayttidosona.

24. Nuuni nu mala Kiristtaanetussi aggenna siiquwaa ubbatoo bessana koyiyoy aybissee?

²⁴ Aggenna siiquwaa xeelliyaagan nuuni Uruti maxaafaappe ay tamaaridoo? Unˈˈettiya ishanttuuninne michchonttun nuuni elle hidootaa qanxxennaadan aggenna siiqoy nuna maaddees. Hegee nuuni eta maaddanawu loytti baaxetanaadankka oottees. Aggenna siiquwaa haratussi bessiyaageeta cimati bessiya wodiyaaninne siiquwan minttettana koshshees. Maadoy koshshiyoogeeti kaseegaadan ufayttiyoogaanne minnidi Yihoowawu haggaaziyoogaa nu akeekiyo wode nuunikka keehi ufayttoos. (Oos. 20:35) SHin nuuni aggenna siiquwaa ubbatoo bessiyoogee keehi koshshiyoy aybissee? ‘Aggenna siiqoy darido’ Yihoowa milatanawunne A ufayssanawu nuuni koyiyo gishshataassa.—Kes. 34:6; Maz. 33:22.