1. Nuuni waatanaadan Yihooway nuna minttettii?

YIHOOWAY aggenna siiquwan ufayttees. (Hoo. 6:6) I ba ashkkaratikka yaatana mala minttettees. Nuuni ‘aggenna siiquwaa bessanaadan’ hananabaa yootiya Mikiyaasa baggaara Xoossay nuna zorees. (Mik. 6:8) SHin, nuuni hegaadan oottanaappe kase, aggenna siiqoy aybakko erana koshshees.

2. Aggenna siiqoy aybee?

² Aggenna siiqoy aybee? “Aggenna siiquwaa” giya qofay Ooratta Alamiyaa Geeshsha Maxaafaa Birshshettan 230 sohuwan deˈees. Issi uri aggenna siiquwaa bessiyaagaa gidikko, I hara uraa ubbatoo keehi siiqeesinne ayyo ammanettidi deˈees. Aggenna siiquwaa bessiyoogan Yihooway ooppenne aadhdhiya leemiso. Yihooway aggenna siiquwaa asawu waati bessidaakko ha huuphe yohuwan beˈana. Kaalliya huuphe yohuwan, Xoossaa ashkkarati issoy issuwawu aggenna siiquwaa bessiyoogan Yihoowa waati milatana danddayiyaakko xannaˈana.

3. Yihooway Muusessi babaa ay yootidee?

³ Israaˈeelati Gibxxeppe kiyi simmin darin takkennan, Yihooway Ba sunttaabaanne eeshshatubaa Muusessi yootiis. I hagaadan giis: “Taani GODAA; taani GODAA; qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. Taani ta aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa.” (Kes. 34:6, 7) Ha ufayssiya qaalatun, Yihooway  Ba aggenna siiquwaa xeelliyaagan keehi dummabaa Muusessi yootiis. Hegee aybee?

4-5. (a) Yihooway babaa waati qonccissidee? (b) Nuuni beˈana oyshati awugeetee?

⁴ Yihooway babaa qonccissiyo wode aggenna siiquwaa bessiyaagaa xalla gidennaan, ‘aggenna siiqoy daridoogaa’ gidiyoogaakka qonccissiis. He qofay Geeshsha maxaafan hara usuppun sohotun odettiis. (Qoo. 14:18; Maz. 86: 13, 15; 103:8; 106:45; Yona. 4:2) He ubba sohotunkka he qofay qonccissiyoy Yihoowa xallappe attin, asa gidenna. Yihooway Geeshsha Maxaafan bana darotoo hegaadan qonccissiyoogee bessiyaaba. Yaatiyo gishshawu, aggenna siiquwaa I xoqqu ootti xeelliyoogaa akeekoos. * Kawuwaa Daawiti hagaadan giidoy hegaassa: “Abeet GODAU, aggenna ne siiqoi salota gakkees; . . . Abeet Xoossau, aggenna ne siiqoi aiba al77obee! Asai ne qefiyaa giddo baqati attees.” (Maz. 36:5, 7) Nuuni Daawitaagaadan aggenna Xoossaa siiquwaa nashshiyoo?

⁵ Aggenna siiqoy aybakko loytti akeekanawu ane naaˈˈu oyshata pilggoos: Yihooway aggenna siiquwaa oossi bessii? Yihooway nuussi aggenna siiquwaa bessiyoogee nuna waati maaddii?

6. Yihooway aggenna siiquwaa oossi bessii?

⁶ Yihooway aggenna siiquwaa oossi bessii? Nuuni darobaa siiqana woy dosana danddayiyoogaa Geeshsha Maxaafay yootees; hegeetuppe amaridaageeti “goshshaa,” ‘woyne eessaanne zaytiyaa,’ ‘seeraa,’ “eratettaa,” qassi “aadhdhida eraa.” (2 Odi. 26:10; Lee. 12:1; 21:17; 29:3) SHin aggenna siiqoy harabawu mule bessiyooba gidenna; hegee asa xallawu bessiyooba. Gidoppe attin, Yihooway aggenna siiquwaa ubba asawu bessenna. I hegaa ba mata dabbotussi bessees. Nu Xoossay ba dabbotussi ammanettees. I etawu loˈˈobaa halchcheesinne eta siiqiyoogaa mule aggenna.

7. Yihooway asa ubbawu siiquwaa waati bessidee?

⁷ Yihooway asa ubbawu siiquwaa bessiis. Niqoodimoosa giyo issi bitaniyawu Yesuusi hagaadan giis: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa [asaa] keehi siiqido gishshau, ba mexi issi Na7aa immiis.”—Yoh. 3:1, 16; Maa. 5:44, 45.

8-9. (a) Yihooway ba ashkkaratussi aggenna siiquwaa bessiyoy aybissee? (b) Nuuni kaallidi ay beˈanee?

⁸ Qommoora qonccidaagaadan, Yihooway aggenna siiquwaa banaara dabbotaa minttida ba ashkkaratu xallawu bessees. Kawuwaa Daawitinne hananabaa yootiya Daaneeli  giidobaappe hegaa akeekana danddayoos. Leemisuwawu, Daawiti hagaadan giis: ‘Nena eriyaageetuyyo ne aggenna siiquwaa bessiyoogaa aggoppa.’ “GODAAYYO yayyiyaageetuyyo aggenna a siiqoi merinaappe merinaa gakkanaassa.” Daaneeli hagaadan giis: ‘Abeet Yihoowawu, nena siiqiyaageetuyyoonne ne azazuwaayyo eeniyaageetuyyo ne aggenna siiquwaa bessiyaagoo.’ (Maz. 36:10, NW; 103:17; Dane. 9:4) Ayyaanaa kaaletuwan xaafettida ha qofaa maaraadan, Yihooway A ashkkarati A eriyo gishshawu, awu yayyiyo gishshawu, A siiqiyo gishshawunne A azazota naagiyo gishshawu etawu aggenna siiquwaa bessees. Yihooway bawu suure ogiyan goynniyaageetu xallawu ba aggenna siiquwaa bessees.

⁹ Nuuni Yihoowawu haggaaziyoogaa doommanaappe kase, Xoossay ubba asawu bessiyo siiquwaa nuuni beˈida. (Maz. 104:14) Qassi awu goynniyaageeta gidiyo gishshawu, aggenna A siiquwankka goˈettoos. Yihooway ba ashkkaratussi hagaadan giis: “Ta aggenna siiqoi [intteppe] shaahettenna.” (Isi. 54:10) Daawiti giidoogaadan, ‘Yihooway baassi ammanettiyaageeta dumma ogiyan oyqqiyoogee’ qoncce. (Maz. 4:3, NW) Hagee nuuni waatanawu koyanaadan oottana bessii? Mazamuraawee hagaadan giis: “Eranchcha gidiyaagee ha yohuwaa qoppo; GODAA aggenna siiquwaa akeeko.” (Maz. 107:43) Ha loˈˈo zoriyaa zoriyay Yihoowa. Hegaa gishshawu, Yihooway aggenna siiquwaa bessiyo heezzu ogetanne I nuussi aggenna siiquwaa bessiyoogee nuna waati maaddiyaakko beˈana.

10. Aggenna Yihoowa siiqoy merinaagaa gidiyoogaa eriyoogee nuna waati maaddii? (Mazamure 31:7)

¹⁰ Aggenna Xoossaa siiqoy merinaagaa. Mazamure 136n hegee 26too odettiis. Doomettan deˈiya paydoy hagaadan gees: “GODAA galatite! Aissi giikko, i keha, aggenna a siiqoi merinaagaa.” (Maz. 136:1) Paydo 2ppe 26 gakkanaassi deˈiya ubba paydotun “aggenna a siiqoi merinaagaa” giya qaalay deˈees. Nuuni ha mazamuriyaa nabbabiyo wode, Yihooway ba aggenna siiquwaa muletoo daro ogiyan bessidoogee nuna maalaalissees. “Aggenna a siiqoi merinaagaa” giya zaari zaari odettida qaalati Xoossay ba ashkkarata siiqiyo siiqoy  mule laamettennaagaa qonccissoosona. Yihooway ba ashkkarata siiqiyoogaa sohuwaara aggennaagaa eriyoogee keehi minttettiyaaba! Ayyo haggaaziya issi ura I siiqiyoogaa doommiyo wode, ubba qassi A metoy gakkiyo wode Yihooway mule aggibayenna. Nuuni goˈettiyo ogiyaa: Yihooway nuna aggibayennaagaa eriyoogee nuuni ufayttanaadan, metuwaa genccanawu koshshiya wolqqaa demmanaadaaninne ubbatoo ayyo haggaazanaadan maaddees.—Mazamure 31:7 nabbaba.

11. Mazamure 86:5y yootiyoogaadan, Yihooway atto gaanaadan oottiyaabay aybee?

¹¹ Aggenna Xoossaa siiqoy I atto gaanaadan oottees. Nagaranchcha uri ba nagaraappe simmiyo wodenne ba iita ogiyaa aggiyo wode Yihooway beˈees; qassi aggenna A siiqoy I atto gaanaadan oottees. Mazamuraawee Daawiti Yihoowabaa hagaadan giis: “I nuna nu nagaraadan oottenna; nu iitatettaadan nuuyyo zaarenna.” (Maz. 103:8-11) Daawiti bana mooranchchadan xeelliyoogee ay keena qohiyaakko bana gakkida azzanttiyaabaappe eriis. SHin Yihooway “atto giyaagaa” gidiyoogaakka I eriis. Yihooway atto gaanaadan oottiyaabay aybee? Hegaa zaaroy Mazamure 86:5n deˈees. (Nabbaba.) Daawiti ba woosan yootidoogaadan, atto gaanaadan Yihoowa woossiya ubbawu I ba aggenna siiquwaa bessiyo gishshawu atto gees.

12-13. Nuuni kase oottido mooruwaa gaasuwan zilˈˈettiyo wodenne azzaniyo wode, nuna aybi maaddana danddayii?

¹² Nuuni nagaraa oottikko nu oottidobawu azzaniyoogee bessiyaaba, ubba qassi loˈˈoba. Hegee nuuni maarotaa oychchanaadaaninne laamettanaadan maaddana danddayees. SHin, amarida asati kase oottido moorobaa gaasuwan azzaniyoogaa aggana danddayibookkona. Eti Yihooway atto gaanaadan oychchidabanne iitabaa oottiyoogaa aggidaba gidikkonne, Yihooway etawu haˈˈikka mule atto gibeennabadan qoppoosona. Yihooway neeyyo aggenna ba siiquwaa bessanawu koyiyoogaa neeni akeekiyoogee ne hegaadan qoppiyoogaa agganaadan maaddana.

¹³ Nuuni goˈettiyo ogiyaa: Nuuni nagaranchcha gidikkonne, geeshsha kahan Yihoowawu ufayssan haggaazana danddayoos. Hegee danddayettiyaaba; ayssi giikko, “Yesuus Kiristtoosa suuttai nagara ubbaappe nuna  ashshees.” (1 Yoh. 1:7) Neeni oottido nagaraa gaasuwan azzanada ne nagaraappe simmikko, Yihooway atto gaanawu tumuppe koyiyoogaa hassaya. Aggenna siiquwaanne atto giyoogaa Daawiti waati gattidaakko akeeka. I hagaadan giis: “Saloi sa7aappe xoqqiyoogaadan, GODAAYYO yayyiyaageetuyyo aggenna a siiqoi gita. Awai mokkiyoosaappe awai wulliyoosai haakkiyoogaadan, hegaadankka GODAI nu mooruwaa nuuppe haassees.” (Maz. 103:11, 12) Yihooway ‘coo atto gaanawu’ eeno giyoogee qoncce.—Isi. 55:7.

14. Aggenna Xoossaa siiqoy nuna naagiyoogaa Daawiti waati qonccissidee?

¹⁴ Aggenna Xoossaa siiqoy ayyaanaaban naagees. Daawiti Yihoowa hagaadan woossiis: “Neeni taayyo qosettiyo soho; neeni tana metuwaappe naagana. Atotettaa yettaa yexxiyaageeta ta yuushuwan wottadasa. . . . GODAN ammanettiyaageeta aggenna siiqoi dooddana.” (Maz. 32:7, 10) Beni wode, katamaa yuushuwan deˈiya gimbbeti asaa morkketuppe naagoosona. Gimbbiyaadan, aggenna Yihoowa siiqoy aara nu dabbotido dabbotaa shugissana danddayiya aybippenne nuna naagees. Hegaa bollikka, aggenna Yihoowa siiqoy nuuni akko shiiqanaadan oottees.—Erm. 31:3.

15. Aggenna Yihoowa siiqoy naagetti attiyo soho mala gidiyoy aybiinee?

¹⁵ Daawiti Xoossay ba asaa waati naagiyaakko bessiya hara leemisuwaa goˈettiis. I hagaadan giis: “Taani qosetta attiyo sohoinne aggenna siiquwaa tana bessiya Xoossai nena.” Daawiti Yihoowabaa hagaadankka yootiis: ‘I taassi aggenna siiquwaa bessiya Xoossaanne ta qatuwaa; I ta miixaanne tana ashshiyaagaa. I ta gonddalliyaanne taani baqatada attiyo soho.’ (Maz. 59:17; 144:2) Daawiti aggenna Yihoowa siiquwaa baqati attiyo sohuwaaranne qatuwaara geeddarissidoy aybissee? Nuuni saˈan deˈiyo heeray awanne gidin, Yihoowa ashkkarata gidikko, nu aara dabbotido dabbotay moorettennaadan teqqanawu koshshiya oge ubban I nuna naagees. Mazamure 91 hegaa qonccissees. He mazamuriyaa xaafidaagee hagaadan giis: “Neeni taayyo qatonne baqata attiyo soho.” (Maz. 91:1-3, 9, 14) Baqati attiyo sohuwaa xeelliyaagan Muusee hegaara issi malaban leemisiis. (Maz. 90:1) Muusee hayqqanaappe guuttaa kasetidi hara loˈˈo geeddarssuwaa goˈettiis. I hagaadan giis: “Merinaa Xoossai intteyyo qato; a merinaa kusheti intteppe garssaara de7oosona.” (Zaa. 33:27) “A merinaa kusheti intteppe garssaara de7oosona” giya qofay Yihoowabaa nuussi ay qonccissii?

16. Yihooway nuna maaddiyo naaˈˈu ogeti aybee? (Mazamure 136:23)

¹⁶ Yihooway nuna naaganaagaa ammanettikko, nuuni minettana danddayoos. SHin nuuni issi issitoo azzanananne minettennan aggana danddayoos. Hegaa mala wodetun Yihooway nuussi ay oottanee? (Mazamure 136:23 nabbaba.) I ba kusheta garssaara yeddidi leddan nuna dentteesinne nuuni azzaniyoogaa agganaadan maaddees. (Maz. 28:9; 94:18) Nuuni goˈettiyo ogiyaa: Nuuni ubbatoo Xoossan ammanettana danddayiyoogaa eroos. Hegee nuna naaˈˈu ogiyan maaddees. Koyroogee, nuuni awan deˈikkonne Yihooway nuna awudenne naaganaagaa eroos. Naaˈˈanttoogee, saluwan deˈiya siiqiya nu Aaway nuussi loytti qoppees.

17. Aggenna Xoossaa siiquwaappe denddidaagan ay ammanettana danddayiyoo? (Mazamure 33:18-22)

¹⁷ Nuuni tamaaridoogaadan, nuna metoy gakkiyo wode ubban, nuuni Yihoowawu ammanettidi deˈanaadan I nuna maaddanaagaa ammanettana danddayoos. (2 Qor. 4:7-9) Hananabaa  yootiya Ermmaasi hagaadan giis: “Hegeenne, GODAA aggenna siiquwaappe denddidaagan nuuni xayibookko. A qaretaikka mule wuri erenna.” (Zil. 3:22) Geeshsha Maxaafay “GODAA aifeti ayyo yayyiyaanne aggenna a siiquwan ufaissaa oottiya asatu bollaana” giyo gishshawu, Yihooway nuussi ubbatoo aggenna siiquwaa bessanaagaa ammanettana danddayoos.—Mazamure 33:18-22 nabbaba.

18-19. (a) Nuuni ubbatoo ay hassayana koshshii? (b) Nuuni kaalliya huuphe yohuwan ay xannaˈanee?

¹⁸ Nuuni ubbatoo ay hassayana koshshii? Nuuni Yihoowawu haggaaziyoogaa doommanaappe kase, Xoossay ubba asawu bessiyo siiquwaa beˈida. SHin nuuni awu goynniyaageeta gidiyo gishshawu, aggenna A siiquwankka goˈettoos. He siiqoy denttettin, Yihooway ba ashshiya kushetun nuna oyqqees. I nuna ubbatoo baakko shiishsheesinne nuussi gelido ba qaalaa naagees. Nuuni merinawu A dabbo gidanaadan I koyees! (Maz. 46:1, 2, 7) Yaatiyo gishshawu, nuna ayba metoy gakkikkokka, nuuni Yihoowawu ammanettidi deˈanaadan koshshiya wolqqaa I nuussi immana.

¹⁹ Yihooway ba ashkkaratussi aggenna siiquwaa waati bessiyaakko beˈida. I nuunikka haratussi aggenna siiquwaa bessanaadan koyees. Nuuni hegaadan waati oottana danddayiyoo? Kaalliya huuphe yohuwan ha keehi koshshiya qofaa xannaˈana.