1-2. (a) Mati aqo oyqqidaageeti Yihoowan ammanettana koshshiyoy aybissee? (Mazamure 37:3, 4) (b) Nuuni ha huuphe yohuwan ay beˈanee?

NEENI aqo oyqqanawu qoppaydda deˈay, woy mati aqo oyqqadii? Yaatikko, neeni keehi siiqiyo uraara ufayssiya deˈuwaa deˈanaagee sirissiyaaba gidenna. Aqo deˈuwan metiyaabay deˈiyoogee qoncce; qassi mati aqo oyqqidaageeti keehi koshshiyaabata kuuyoosona. Metiyaabay inttena gakkiyo wodenne intte issi issibaa kuuyiyo wode oottiyoobay intte naaˈˈaykka daro layttawu ufayttanaadan woy ufayttennaadan oottana. Intte Yihoowan ammanettikko, intte loˈˈobaa kuuyana, intte aqo deˈoy mino gidana, qassi intte ufayttana. Xoossaa zoriyaa intte oosuwan peeshshana xayikko, intte aqo deˈuwan metoy merettanaadan oottiyaabay inttena gakkana danddayees, qassi intte ufayttekketa.—Mazamure 37:3, 4 nabbaba.

² Ha huuphe yohoy mati aqo oyqqidaageetubaa yootiyaaba gidikkonne, aqo oyqqida ubbaa gakkana danddayiya metuwaakka qonccissees. Geeshsha Maxaafan etabay odettido ammanettida asatuppe nuuni tamaarana danddayiyoobaa yootees. Geeshsha Maxaafan etabay odettido asatuppe nu deˈuwaaninne nu aqo deˈuwan oosuwan peeshshana danddayiyoobaa tamaaroos. Ha wodiyan aqo oyqqida amaridaageetu deˈuwan hanidabaappe nuuni tamaarana danddayiyoobaakka beˈana.

3-4. Mati aqo oyqqidaageeta gakkana danddayiya metoy aybee?

³ Amarida asati mati aqo oyqqidaageeta ha wodiyan deˈiya daro asay deˈiyoogaadan deˈana mala minttettana danddayoosona.  Leemisuwawu, aqo laggeti sohuwaara naata yelanaadan yelidaageetinne hara dabboti minttettana danddayoosona. Woy qassi laggetinne so asay mati aqo oyqqidaageeti keettaanne soossi koshshiya loˈˈobaa shammanaadan minttettana danddayoosona.

⁴ Azinaynne machchiyaa naagettana xayikko, eti daro acuwan gelanaadan oottiyaabaa kuuyana danddayoosona. Yaatikko, azinaynne machchiyaa he acuwaa qanxxanawu daro saatiyaa oottiyoogee koshshennan waayi aggana. Geeshsha Maxaafaa buzo xannaˈanawu, so asaa goynuwaa goynnanawunne haggaazanawu etawu wodee xayanaadan oosoy oottana danddayees. Azinaynne machchiyaa daro miishshaa demmanawu woy bantta oosuwaappe kiyennan agganawu gujjo saatiyaa oottiyoogan shiiqota shiiqennan aggana danddayoosona. Hegaappe denddidaagan, eti Yihoowawu loytti haggaazana danddayiyo keehi ufayssiya injjee etappe halees.

5. Klawusanne Maresi hanotaappe intte tamaariyoobay aybee?

⁵ Daro aquwaa demmanawu bichchaariyoogee ufayttanaadan oottennaagaa darotu hanotay bessees. Klawusinne Maresa akeekidobaa qoppa. * Eti aqo oyqqido wode, naaˈˈaykka kumetta gallassa oottiyo gishshawu injje deˈuwaa deˈoosona. SHin, eti tumuppe ufayttibookkona. Klawusi hagaadan giis: “Nuussi koshshiyaabaappe darobay deˈikkonne, ayyaanaaban nuuni aybanne halchchibookko. Nuussi deˈoy kirqqi giisinne unˈˈettoos.” Aquwaabaa demmanawu bichchaariyoogee ufayssaa demissennaagaa inttekka akeekennan waayi aggana. Yaatikko, hidootaa qanxxoppite. Harati oottido loˈˈobaa xannaˈiyoogee koshshiyaaban laamettanaadan inttena maaddana danddayees. Koyro, Kawuwaa Yoosaafixi oottidobaappe azinati ay tamaarana danddayiyaakko ane beˈoos.

6. Daro olanchchati Yoosaafixa asaara olettanawu yiido wode, I Leemiso 3:5, 6n deˈiya zoriyaa waati oosuwan peeshshidee?

⁶ Azinatoo, intteyyo aawatettay daridabadan issi issitoo qoppi ereetii? Yaatikko, Kawuwaa Yoosaafixa hanotaappe goˈettana danddayeeta. Yoosaafixi kawo gidiyo gishshawu kumetta deriyaa qohuwaappe naagiyo aawatettay awu deˈees! He gita aawatettaa polanawu I ay oottidee? Yoosaafixi deriyaa naaganawu bawu danddayettidabaa oottiis. I Yihudan katamata keexxiisinne 1,160,000ppe daro mino olanchchata shiishshiis. (2 Odi. 17:12-19) Guyyeppe, Yoosaafixa gita metoy gakkiis. Amoonatu, Mooˈaabatunne Seˈiira Deriyaa heeran deˈiyaageetu daro olanchchati A, A soo asaanne A deriyaa yashissidosona. (2 Odi. 20:1, 2) Yoosaafixi waatidee? I Yihooway maaddanaadaaninne wolqqaa immanaadan woossiis. Hegee Leemiso 3:5, 6n deˈiya loˈˈo zoriyaara maayettees. (Nabbaba.) Yoosaafixi bana ziqqi oottidi woossido 2 Hanidabaa Odiya 20:5-12n deˈiya woosay I Yihoowan  keehi ammanettiyoogaa bessees. Yoosaafixa woosaa Yihooway waati zaaridee?

7. Yihooway Yoosaafixa woosaa waati zaaridee?

⁷ Leewa zare gidida Yahaaziˈeela baggaara Yihooway Yoosaafixa haasayissiis. Yihooway hagaadan giis: “Intte sohuwaa sohuwaa oiqqi eqqidi, GODAI inttena ashshiyoogaa be7eeta.” (2 Odi. 20:13-17) Yaatiyoogee olaa olettiyo wode meeze gididaba gidenna! SHin, ha azazoti yiidoy asappe gidennan, Yihoowappe yiidosona. Yoosaafixi Xoossan wozanappe ammanettidi he azazota azazettiis. Inne A asay bantta morkketuura gayttanawu kiyido wode, I wotaaddaratu sinttan eqqiis, eti olaa miishshaa gixxennan mazamuriyaa yexxiyaageetappe attin, gooba olanchchata gidokkona. Yihooway Yoosaafixassi gelido ba qaalaa naagiis; Yoosaafixi morkketu olanchchata xooniis.—2 Odi. 20:18-23.

8. Yoosaafixa hanotaappe azinati ay tamaarana danddayiyoonaa?

⁸ Azinatoo, Yoosaafixa hanotaappe intte tamaarana danddayeeta. Intte soo asawu koshshiyaabaa kunttiyo aawatettay inttessi deˈiyo gishshawu, qohuwaappe eta naaganawunne maaddanawu intte minni ootteeta. Inttena metoy gakkiyo wode, hegaa intterkka giigissana danddayiyaabadan qoppennan waayi aggana. SHin intte wolqqan mule ammanettoppite. Yaatiyoogaappe, Yihooway maaddana mala buzo woossite. Hegaa bollikka, intte machchotuura woossite. Geeshsha Maxaafaanne Xoossaa dirijjitee giigissido xuufeta xannaˈiyoogan Yihoowa kaaletuwaa koyite, qassi intte demmido zoriyaa oosuwan peeshshite. Geeshsha Maxaafaa maaran intte kuuyiyoobaa harati maayettennan aggana danddayoosona, ubba qassi eti inttena eeyya gaana danddayoosona. Eti miishshaynne miishshan shammana danddayiyoobay qohuwaappe intte soo asaa loytti naagana giidi yootana danddayoosona. Gidoppe attin, Yoosaafixa taarikiyaa hassayite. I Yihoowan ammanettiisinne hegaa ba oottidobatun bessiis. Yihooway he ammanettida bitaniyaa aggibeenna; qassi nenakka aggenna. (Maz. 37:28; Ibr. 13:5) Aqo oyqqidaageeti ufayttidi deˈanawu oottana danddayiyo harabay aybee?

9. Hananabaa yootiya Isiyaasabaanne A machcheebaa woygana danddayiyoo?

⁹ Hananabaa yootiya Isiyaasinne A machchiyaa Yihoowawu haggaaziyoogaa bantta deˈuwan kaseyidosona. Isiyaasi hananabaa yootiyaagaa, qassi A machchiyaakka ‘hananabaa yootiyaaro’ geetettido gishshawu, akka hiraagaa yootennan waaya aggana. (Isi. 8:1-4) Isiyaasinne A machchiyaa Yihoowawu haggaaziyoogaa bantta deˈuwan kaseyidosona. Ha wodiyan aqo oyqqidaageetussi eti keehi loˈˈo leemiso!

10. Azinaynne machchiyaa Geeshsha Maxaafaa hiraagata xannaˈiyoogee eti danddayettida ubban Yihoowawu oottanawu murttanaadan eta waati maaddii?

¹⁰ Aqo oyqqidaageeti ha wodiyan Yihoowa haggaazuwan banttawu danddayettida ubbabaa oottiyoogan Isiyaasanne A keettaayyiyo milatana danddayoosona. Eti Geeshsha Maxaafaa hiraagaa issippe xannaˈiyoogaaninne hegee ubbatoo waani polettiyaakko akeekiyoogan kaseegaappe aaruwan Yihoowan ammanettana danddayoosona. * (Tii. 1:2) Geeshsha Maxaafay yootiyo hiraagatuppe amaridaageeti polettanaadan eti waatana danddayiyaakko wotti dentti qoppana danddayoosona. Leemisuwawu, eti wurssettay  gakkanaappe kasetidi kumetta saˈan mishiraachchuwaa yootiyoogan Yesuusi yootido hiraagay polettanaadan oottana danddayoosona. (Maa. 24:14) Azinaynne machchiyaa Geeshsha Maxaafaa hiraagay polettiyoogaa loytti ammanikko, eti banttawu danddayettida ubban kaseegaappe aaruwan Yihoowawu oottanawu murttana.

11. PHirisqqilanne Aqiili ay oottidonaa, qassi aybissi?

¹¹ Roome kataman deˈiya Ayhuda asa gidida Aqiilanne PHirisqqilo giyo azinaappenne machcheeppe aqo oyqqida yelagati tamaarana danddayoosona. Eti Yesuusabaa yootiya mishiraachchuwaa siyidi Kiristtaane gididosona. Bantta deˈuwan eti ufayttidoogee qoncce. SHin, Kawuwaa Qalawudeyoosi ubba Ayhudati Roomeppe kiyanaadan azazido wode, qoppennan eta deˈoy laamettiis. Hegee Aqiilassinne PHirisqqilissi woygiyoogaakko qoppite. Eti hegaa heerappe baana koshshiyoogaa erido wode, ooratta keettaa koyidosonanne dunkkaaniyaa sikkiyo bantta oosuwaa zaarettidi doommidosona. Eti banttassi danddayettida ubban Yihoowawu haggaazennaadan he waayissiya hanotay eta teqqidee? Ha oyshaa zaaruwaa intte erennan waayi aggana. Qoronttoosan deˈiya bantta ooratta keettan, Aqiilinne PHirisqqila yan deˈiya gubaaˈiyaa maaddiyoogaa doommidosonanne ishantta minttettanawu kiitettida PHawuloosaara oottidosona. Guyyeppe, eti sabbakiyaageeti keehi koshshiyo hara katamata biidosona. (Oos. 18:18-21; Roo. 16:3-5) Eti oosoy keehi daridoogeetanne ufayttiyaageeta!

12. Issi azinaynne machchiyaa Yihoowawu haggaazanawu halchchana koshshiyoy aybissee?

¹² Ha wodiyan deˈiya azinatinne machchoti Kawotettaabaa kaseyiyoogan PHirisqqilonne Aqiila milatana danddayoosona. Issi azinaynne machchiyaa bantta halchchuwaabaa aqo oyqqanaappe kase haasayiyoogee keehi loˈˈo. Issi azinaynne machchiyaa Yihoowawu haggaazanawu halchchiyo wodenne he halchchuwaa polanawu minni oottiyo wode Yihoowa maaduwaa bantta deˈuwan loytti akeekoosona. (Era. 4:9, 12) Raasilanne Elzabeti hanotaa qoppite. Raasili hagaadan giis: “Nuuni aqo oyqqanaappe kase, Yihoowawu oottanawu koyiyo issi issibata loytti haasayida.”  Elzabeta hagaadan gaasu: “Guyyeppe nuuni issi issibata kuuyiyo wode nu dooriyoobay he halchchidobata poliyoogaa diggenna mala haasayida.” Raasilanne Elzabeti hanotay eti aassiyaageeti keehi koshshiyo Maykronezhiyaa biidi haggaazanaadan oottiis.

13. Mazamure 28:7y yootiyoogaadan, nuuni Yihoowan ammanettiyo wode ayba ayfe demmiyoo?

¹³ Raasilaagaadaaninne Elzabetiigaadan, aqo oyqqida daroti mishiraachchuwaa sabbakiyoogaaninne tamaarissiyoogan banttawu danddayettida keenan daro wodiyaa aattanawu bantta deˈuwaa sima oottidi deˈanawu kuuyidosona. Issi azinaynne machchiyaa Yihoowawu haggaazanawu halchchiyo wodenne hegaa polanawu issippe oottiyo wode loˈˈo ayfiyaa demmana. Yihooway etawu koshshiyaabaa loytti kunttanaagaanne eti an kaseegaappe aaruwan ammanettiyoogaa akeekana; qassi eti keehi ufayttanna.—Mazamure 28:7 nabbaba.

14. Maatiyoosa 6:25, 31-34n deˈiya qaalaa gelidoban kiitettida PHeexiroosinne A keettaayyiyaa ammanettiyoogaa waati bessidonaa?

¹⁴ Qassi aqo oyqqidaageeti kiitettida PHeexiroosa hanotaappenne A machchee hanotaappe tamaarana danddayoosona. Kiitettida PHeexiroosi Yesuusaara koyro gayttoosappe usuppun aginaappe biidi issi laytta gakkanaashin deˈiya wodiyan gitabaa kuuyiis. PHeexiroosi ba soo asawu koshshiyaabaa kunttanawu moliyaa oyqqiyo oosuwaa oottees. Yaatiyo gishshawu, PHeexiroosi ubba wode A kaallanaadan Yesuusi oychchido wode, PHeexiroosi issibaa kuuyiyo wode ba machcheebaa qoppana koshshiis. (Luq. 5:1-11) PHeexiroosi Yesuusaara baanawunne sabbakanawu kuuyiis. I loˈˈobaa kuuyiis! PHeexiroosa keettaayyiyaa I kuuyidoban maayettaasu giidi nuuni qoppiyoogee bessiyaaba. Yesuusi hayquwaappe denddi simmin, A PHeexiroosaara amarida wodiyawu manddaridoogaa Geeshsha Maxaafay yootees. (1 Qor. 9:5) A loˈˈo Kiristtaane machcho gidiyo gishshawu, PHeexiroosi Kiristtaane azinatanne machchota zorido wode laˈatettan haasayana danddayidoogee qoncce. (1 PHe. 3:1-7) Eti bantta deˈuwan Kawotettaabaa kaseyikko, etawu koshshiyaabaa Yihooway immanawu gelido qaalan PHeexiroosikka A keettaayyiyaakka ammanettidoogee tuma.—Maatiyoosa 6:25, 31-34 nabbaba.

15. Tiˈaganne Esteri hanotaappe intte ay tamaareetii?

¹⁵ Intte amarida wodiyaappe kase aqo oyqqidaageeta gidikko, Yihoowawu kaseegaappe aaruwan ubbatoo oottanawu waatana danddayeetii? Yaatana danddayiyo issi ogee aqo oyqqida harati oottidobaappe tamaariyoogaana. Leemisuwawu, kaalli kaalli kiyiya, “Bantta Dosan Eeno Giidosona” giya huuphe yohuwaa nabbabana danddayeeta. Braazilen deˈiya Tiˈaganne Estero giyo azinaynne machchiyaa aassiyaageeti keehi koshshiyoosaa biidi haggaazanaadan he huuphe yohoti maaddidosona. Tiˈagoy hagaadan giis: “Ha wodiyan Yihooway ba ashkkarata waati maaddidaakko nuuni nabbabiyo wode, Yihoowa zoriyaa kaallanawunne A maaduwaa ekkanawu koyoos.” Eti wurssettan Paraguwaye biitti biidosona, yan 2014ppe doommidi Porchchugaale doonan haggaaziiddi deˈoosona. Estera hagaadan gaasu: “Nuuni naaˈˈaykka keehi dosiyo xiqisee Efisoona 3:20. Nuuni Yihoowawu haggaaziyoogaara gayttidaagan he xiqisiyaa qofay darotoo polettiyoogaa akeekida.” Nuuni woossiyoogaappe keehi darissidi Yihooway immanaagaa PHawuloosi Efisoona Kiristtaanetussi xaafido he dabddaabbiyan yootiis. He qaalay darotoo polettiis!

16. Aqo oyqqida yelagati ayyaanaabaa halchchuwaa kessiyo wode zoriyaa oona oychchana danddayiyoonaa?

 ¹⁶ Aqo oyqqida yelagati Yihoowan ammanettida haratu hanotaappe ha wodiyan goˈettana danddayoosona. Amarida aqo laggeti daro layttawu ubba wode haggaazuwaa haggaazidaageeta gidana danddayoosona. Intte halchchuwaa xeelliyaagan intte qoppiiddi deˈikko, zoriyaa eta oychchite. Hagee intte Yihoowan ammanettiyoogaa bessiyo hara oge. (Lee. 22:17, 19) Aqo oyqqida yelagati ayyaanaabaa halchchuwaa kessanaadaaninne hegaa polanaadan cimatikka maaddana danddayoosona.

17. Klawusanne Mareso aybi gakkidee, qassi eta hanotaappe nuuni ay tamaariyoo?

¹⁷ SHin, nuuni nu haggaazuwaa aassanawu kuuyidobay qoppennan issi issitoo laamettana danddayees. Qommoora etabaa beˈido Klawusanne Mareso hegaa malabay gakkiis. Eti aqo oyqqoosappe heezzu layttay aadhdhi simmin bantta keettaa aggi biidi, Filandde macara biiruwaa keexxiyoogaa bantta dosan maaddidosona. Gidoppe attin, eti yan usuppun agginaappe daruwaa takkanawu paqqadettennaagaa eridosona. Eti koyro keehi azzanidosona. SHin hegaappe simmin daro takkennan, eti Araba doonaa tamaaranaadan shoobettidosona; qassi haˈˈi Araba doonaa haasayiyaageetussi hara biittan ufayttidi markkattoosona. Maresa hanidabaa qoppada hagaadan gaasu: “Taani kase mule ootta erennabaa oottanawu yayyidaba gidikkonne, wozanappe Yihoowan ammanettana koshshiis. SHin nuuni qoppibeenna ogetun ubbatoo Yihooway nuna waati maaddidaakko beˈaas. Hegaa beˈa simmada, Yihoowan kaseegaappe aaruwan ammanettaas.” Ha hanotay bessiyoogaadan, intte wozanappe Yihoowan ammanettikko I inttena ubbatoo woytanaagaa ammanettana danddayeeta.

18. Aqo oyqqidaageeti Yihoowan ammanettidi deˈanawu ay oottana danddayiyoonaa?

¹⁸ Aqo deˈoy Yihoowa imota. (Maa. 19:5, 6) Aqo oyqqidaageeti he imotan ufayttanaadan I koyees. (Lee. 5:18) Aqo oyqqida yelagatoo, intte deˈuwan intte oottanabaa loytti qoppite. Yihooway intteyyo immido imotaa gishshawu A galatanawu inttessi danddayettida ubbabaa oottite. Woosan Yihoowa haasayissite. Intte hanotawu haniya maarata demmanawu A Qaalaa pilggite. Yaatidi Yihooway immiyo zoriyaa kaallite. Intte Yihoowawu haggaaziyoogaa intte deˈuwan kaseyikko, ufayssiyaanne woppa deˈuwaa deˈanaagaa ammanettana danddayeeta!