AYHUDA asa gidida Marddikiyoosi Asttiri maxaafan odettida taarikiyan darobaa oottida asa. I Parsse kawo keettan oottida, Ayhuda biittaappe omoodettida asa. Hegee ‘Kawuwaa Arxxekssiisi’ haariyo, ichashantta xeetu layttaa K.K. doommiis. (Ha wodiyan, daro asay he kawuwaa Arxxekssiisa koyruwaa giidi xeegees.) Marddikiyoosi harati kawuwaa woranawu maqqido maqqoy attanaadan oottiis. Kawoy hegawu galatiyoogaa qonccissanawu, Marddikiyoosi deriyaa sinttan bonchchettanaadan oottiis. Guyyeppe, Marddikiyoosassinne hara Ayhudatussi morkke gidida Hamaani hayqqi simmin, kawoy Marddikiyoosi kiike mocona gidanaadan sunttiis. Marddikiyoosi he maataa goˈettidi Parsse Haaruwan deˈiya Ayhudata hayquwaappe ashshiis.—Ast. 1:1; 2:5, 21-23; 8:1, 2; 9:16.

Asttiri maxaafay medhdhi kessi xaafidoba, qassi Marddikiyoosi mule deˈibeenna giidi 20tta xeetu layttaa doometta heeran deˈida issi issi eranchchati palamettoosona. SHin, 1941 biittaa bookkidi xannaˈiyaageeti demmidobay, Marddikiyoosa xeelliyaagan Geeshsha Maxaafay yootiyoobaara maayettiya naqaasha gidana danddayees. Eti ay demmidonaa?

Eranchchati Mardduka (Wolayttattuwan Marddikiyoosa) giya sunttay deˈiyo Parssetu xuufiyaa demmidosona. Marddikiyoosi miishshaara gayttidaban Suusan alaafe gididi oottennan aggenna. He xuufee beettido wode he heeran deˈiya, taarikiyaa eranchchay Arter Unginadi, ‘Geeshsha Maxaafan gidennan hara sohuwan, Marddikiyoosa giya sunttay xaafettido koyro’ xuufee hegaa gidiyoogaa yootiis.

Unginada iripporttee bessiyoogaadan, eranchchati hara daro shaˈu Parsse xuufeta birshshidosona. Perssepaalisa katamay laalettidaagaa matan beettida, eta bolli xaafettidabay deˈiyo urqqaappe merettida miishshati hegeetuppe amaridaageeta. Hegeeti katamaa dirssaa matan, alˈˈobadan goˈettiyoobatu giddoppe beettidosona. Eta bolli xaafettidabay deˈiyo urqqaappe merettida he miishshati, Arxxekssiisi koyroy kawotido wode deˈiyaabata. Eti Eelaama qaalan xaafettidosona, qassi Asttiri maxaafan deˈiya daro sunttati hegankka deˈoosona. a

Arxxekssiisi koyroy kawotido wode, Suusan kawo keettan kawuwaa xaafe gididi oottida issi bitanee urqqaappe merettida miishshatun xaafettida daro Parssepaalise xuufetun Mardduka giyo sunttay deˈiyoogaa qonccissiis. Marddikiyoosi issi doonaappe hara doonawu birshshiya asa gidiyoogaa urqqaappe merettida issi miishshaa bolli xaafettidabay qonccissees. Hegee Marddikiyoosa xeelliyaagan Geeshsha Maxaafay yootiyoobaara issi mala. I Kawuwaa Arxxekssiisawu (Arxxekssiisa koyruwaa) oosanchcha gididi oottanaadan sunttettiis; qassi I baa giishin naaˈˈu doonaa haasayees. Marddikiyoosi darotoo Suusan deˈiya kawo keettaa geliyo penggiyan uttees. (Ast. 2:19, 21; 3:3) Hegee kawo keettaa oosanchchati oottiyoosan deˈiya gita pengge.

Urqqaappe merettida miishshan xaafettida Marddukanne Geeshsha Maxaafan odettida Marddikiyoosa issi mala oottiyaabay deˈiyoogee keehi maalaalees. Eti issi mala wodiyaaninne issi mala sohuwan deˈidosona, qassi issi mala maatan issi mala oosuwaa oottidosona. Ha ubbabay Marddukinne Marddikiyoosi issi uri gidiyoogaa qonccissiyaaba milatees.