1. Yuushshi qoppiyoogaa giyoogee woygiyoogee? (2 Ximootiyoosa 4:5)

 NUNA wolqqaama paacee gakkiyo wode Yihoowawunne A dirijjitiyawu ammanettanawu metootana danddayoos. Nuuni hegaa mala paaciyaa waati xoonana danddayiyoo? Nuuni yuushshi qoppananne ammanuwan minnana koshshees. (2 Ximootiyoosa 4:5 nabbaba. b) Nuuni woppu giyo wode, loytti qoppiyo wodenne issibaa Yihoowaagaadan xeelliyo wode, yuushshi qoppiyaageeta gidoos. Nuuni yaatiyo wode, issibaa yuushshi qoppennan coo oottokko.

2. Nuuni ha huuphe yohuwan beˈanabay aybee?

² Kasetiya huuphe yohuwan Seexaanay nuna paaccana danddayiyo heezzu ogeta beˈida. Yihoowa ammanettiyoogee metanaadan oottiya, gubaaˈiyaappe gakkiya heezzu paaceta ha huuphe yohuwan beˈana. Hegeeti, (1) nu mala Kiristtaanee nuna naaqqidabadan nuussi siyettiyo wode, (2) nuussi seeray imettiyo wode, qassi (3) dirijjitee laammido issi issibaa meezetanawu metootiyo wode. Hegaa mala paacciyaabati gakkiyo wode, yuushshi qoppiyaageetanne Yihoowawunne A dirijjitiyawu ammanettiyaageeta waani gidana danddayiyoo?

3. Nu mala Kiristtaanee nuna naaqqidabadan siyettiyo wode waanana danddayiyoo?

³ Ne mala Kiristtaanee geella aawatettay deˈiyo issi uri nena naaqqidabadan neessi siyetti erii? He ishay nena naaqqidoy  eriiddi waayi gidana. (Roo. 3:23; Yaaq. 3:2) Gidikkonne, I oottidobay nena yiilloyana danddayees. Hegaabaa qoppaydda xiskkuwaa xayana danddayaasa. Neeni hagaadan qoppana danddayaasa: ‘Issi ishay hagaadan oottiyaaba gidikko, hagee tumuppe Xoossaa dirijjitee?’ Nuuni hegaadan qoppanaadan Seexaanay koyees. (2 Qor. 2:11) Nuuni hegaadan qoppikko, Yihoowanne A dirijjitiyaa aggana danddayoos. Yaatiyo gishshawu, issi ishay woy issi michchiya nuna naaqqidabadan nuussi siyettikko, yuushshi qoppiyaageetanne iitabaa qoppiyoogaappe naagettiyaageeta waani gidana danddayiyoo?

4. Yooseefi naaqettido wode yuushshi qoppiya asa gidiyoogaa waati bessidee, qassi nuuni appe ay tamaariyoo? (Doomettaabaa 50:19-21)

⁴ Uluwan lancciyaa oyqqoppa. Yooseefi yelagatettan deˈiyo wode, A bayra ishantti A naaqqidosona. Eti A ixxidosona, qassi etappe amaridaageeti A woranawu koyidosona. (Doo. 37:4, 18-22) Wurssettan, eti A aylletettawu bayzzidosona. Hegaappe denddidaagan, 13 gidiya layttawu Yooseefa wolqqaama metoy gakkiis. Yooseefi Yihooway bana siiqennabadan qoppana danddayees. Maadoy koshshiyo he wodiyan Yihooway A aggidabadankka qoppana danddayees. SHin Yooseefi uluwan lancciyaa oyqqiyoogaappe woppu giyoogan yuushshi qoppiya asa gidiyoogaa bessiis. I ba ishanttu bolli haluwaa kiyiyo injjiyaa demmikkonne, hegaadan oottibeenna; shin eta siiqiyoogaa bessiisinne etawu atto giis. (Doo. 45:4, 5) Yooseefi hegaadan oottidoy loytti qoppiya asa gidiyo gishshataassa. I ubbatoo ba metuwaabaa qoppiyoogaappe Yihooway koyiyoobaa qoppiis. (Doomettaabaa 50:19-21 nabbaba.) Nuuni ay tamaariyoo? Nena issi uri naaqqikko, Yihoowa bolli lanccoppa woy I nena aggidabadan qoppoppa. Neeni metuwaa genccanaadan I nena ay keena maaddidaakko loytta qoppa. Hegaa bollikka, harati nena naaqqiyo wode siiquwan eta nagaraa kammanawu baaxeta.—1 PHe. 4:8.

5. Mikaasi harati A naaqqidabadan awu siyettido wode yuushshi qoppiya asa gidiyoogaa waati bessidee?

⁵ Tohossa Amarkkan deˈiya Mikaasa c giyo cimaa hanotaa beˈa. Aawatettay deˈiyo amarida ishantti A keehi naaqqidabadan I qoppido wodiyaa hassayees. I hagaadan giis: “Taani hagaappe kase hegaadan mule unˈˈetta erikke. Taani unˈˈettaas. Qammi xiskkana danddayabeykke. Taani aybanne oottana danddayennabadan tawu siyettido gishshawu yeekkaas.” Gidikkonne, Mikaasi hanotaa yuushshi qoppanawu baaxetiis. I genccanawu geeshsha ayyaanaanne wolqqaa immanaadan Yihoowa woossiis. Qassi I bana maaddana danddayiya qofaa nu xuufetuppe nabbabiis. Nuuni ay tamaariyoo? Issi ishay woy michchiyaa nena naaqqidabadan siyettikko, woppu gaanawunne neessi siyettana danddayiya iita qofaa agganawu baaxeta. He uri hegaadan haasayanaadan woy oottanaadan gaaso gididabaa neeni erennan aggana danddayaasa. Yaatiyo gishshawu, Yihoowa woosan haasayissa; qassi he allaalliyaa hara uraagaadan xeellanawu maaddana mala A oychcha. Yaatiyoogee, ne mala Kiristtaanee nena qohiyaabaa aybanne eriiddi oottennaagaa qoppanaadaaninne neeni ayyo atto gaanaadan maaddana danddayees. (Lee. 19:11) Yihooway ne hanotaa eriyoogaanne genccanawu koshshiya wolqqaa neeyyo immanaagaa hassaya.—2 Odi. 16:9; Era. 5:8.

6. Yihooway nuna seeriyoogee I nuna keehi siiqiyo gishshataassa gidiyoogaa akeekiyoogee keehi koshshiyoy aybissee? (Ibraawe 12:5, 6, 11)

⁶ Seeray nuuni azzananaadan oottana danddayees. SHin nuuni hegee nuna keehi azzanttidoogaa xallaa qoppikko, nuussi imettida  seeray likke gidennabadaaninne nuussi hanennabadan, woy keehi qohiyaabadan qoppana danddayoos. Hegaappe denddidaagan, keehi koshshiyaabaa, hegeekka Yihooway nuna seeriyoy nuna siiqiyo gishshataassa gidiyoogaa dogana danddayoos. (Ibraawe 12:5, 6, 11 nabbaba.) Qassi seeray nuna keehi azzanttidoogaa xallaa qoppikko, Seexaanay nuna qohanaadan oottoos. I nuuni seeraa ekkennan ixxanaadan, ubba qassi Yihoowappenne gubaaˈiyaappe haakkanaadan oottanawu koyees. Neeyyo seeray imettikko, yuushshi qoppiya asa waana gidana danddayay?

7. (a) Misilee qonccissiyoogaadan, PHeexiroosi seeraa ekki simmidi Yihoowa haggaazuwan ay oottidee? (b) Neeni PHeexiroosa hanotaappe ay tamaaray?

⁷ Seeraa ekka, yaatada koshshiyaaban laametta. Yesuusi kiitettida haratu sinttan PHeexiroosa darotoo seeriis. (Mar. 8:33; Luq. 22:31-34) Hegee PHeexiroosa keehi yeellayennan waayi aggana! SHin PHeexiroosi Yesuusawu ammanettidi deˈiis. I seeraa ekkiis, qassi ba mooruwaappe tamaariis. PHeexiroosi ammanettido gishshawu, Yihooway A woytiis; qassi gubaaˈiyan gita aawatettaa awu immiis. (Yoh. 21:15-17; Oos. 10:24-33; 1 PHe. 1:1) Nuuni PHeexiroosa hanotaappe ay tamaarana danddayiyoo? Nuuni ay keena yeellatidaakko qoppiyoogaappe seeraa ekkidi, koshshiyaaban laamettiyoogee nunakka haratakka maaddees. Yaatiyo wode, kaseegaappe aaruwan Yihoowawu oottananne nu ishantta maaddana danddayoos.

8-9. Zoree imettido gishshawu Berinarddoyyo koyro aybi siyettidee, shin I loˈˈobaa qoppanaadan aybi maaddidee?

⁸ Moozambbiken deˈiya Berinarddo giyo ishaa hanotaa beˈa. Cima gididi haggaaziyo maataappe I wodhdhiis. Berinarddoyyo koyro aybi siyettidee? I hagaadan giis: “Tawu imettida seeraa dosabeenna gishshawu lanccaas.” Gubaaˈiyan deˈiya harati babaa iitabaa qoppana giidi I hirggiis. Hagaadan giis: “Taayyo imettida seeray likke gidiyoogaa akeekanawu, qassi zaarettada Yihoowaninne A dirijjitiyan ammanettanawu amarida aginaa ekkiis.” Berinarddoy ba qofaa laammanaadan maaddidabay aybee?

⁹ Berinarddoy loˈˈobaa qoppiyoogaa doommiis. I hagaadan giis: “Taani cima gidada oottiyo wode harati Yihoowa seeray likke giidi ekkanaadan maaddanawu Ibraawe 12:7 goˈettays. Tana hagaadan oychchaas: ‘Ha xiqisiyaa oosuwan peeshshana koshshiyay oonee?’ Tana gujjin, Yihoowa ashkkarati ubbay oosuwan peeshshana  koshshees.” Berinarddoy Yihoowaninne A dirijjitiyan zaarettidi ammanettanawu harabaakka oottiis. I kaseegaappe aaruwan Geeshsha Maxaafaa nabbabanawunne nabbabidobaa wotti dentti qoppanawu daro wodiyaa bazziis. Ishanttinne michchontti A waati xeellanaakko I hirggidaba gidikkonne, etaara haggaazees, qassi shiiqotun qofaa yootees. Guyyeppe, Berinarddoy zaarettidi gubaaˈe cima gidiis. Berinaarddoogaadan neeyyo seeray imettidaba gidikko, neeni ay keena yeellatidaakko qoppiyoogaappe zoriya ekkada koshshiyaaban laametta. d (Lee. 8:33; 22:4) Neeni yaatikko, Yihoowawunne A dirijjitiyawu ammanettada deˈido gishshawu I nena woytanaagaa ammanettana danddayaasa.

10. Amarida Israaˈeelati ammanettiyoogee paacettanaadan oottida he wode laamettidabay aybee?

¹⁰ Dirijjitee issi issibaa laammiyoogee nuuni ammanettiyoogee paacettanaadan oottana danddayees. Nuuni naagettana xayikko, hegee nuna Yihoowappe shaakkanaadan oottana danddayoos. Leemisuwawu, Israaˈeelatuura gayttidaagan issi issibati waani laamettidaakko qoppa. Yihooway etawu Higgiyaa immanaappe kase qeeseti oottiyoobaa so asawu huuphe gididaageeti oottoosona. Eti yarshshiyoosaa keexxidi bantta soo asaa gishshawu Yihoowawu yarshshuwaa yarshshoosona. (Doo. 8:20, 21; 12:7; 26:25; 35:1, 6, 7; Iyy. 1:5) SHin Higgee imetti simmin so asawu huuphe gididaageeti hegeeta oottanawu paqqadettibeenna. Yarshshuwaa yarshshanaadan Aaroona zaretuppe Yihooway qeeseta sunttiis. He wodeppe doommidi, so asawu huuphe gidida, Aaroona zare gidenna uri qeeseti oottiyoobaa oottikko hayqqana danddayees. e (Wog. 17:3-6, 8, 9) Qoraahi, Daataani, Abiiraaminne 250 asati, Muusenne Aaroona bolli makkalidoy geella hegaa gishshataassee? (Qoo. 16:1-3) Nuuni geeshshidi erana danddayokko. SHin, Qoraahinne aara deˈiya harati Yihoowawu ammanettibeennaagaa eroos. Dirijjitee laammido issi issibati neeni ammanettiyoogee paacettanaadan oottikko, waatana danddayay?

11. Qahaata yara gidida amaridaageetuppe nuuni ay tamaariyoo?

¹¹ Dirijjitee laammidobata loytta kaafa. Bazzuwan hemettiyo wode Qahaata yaratussi dumma aawatettay deˈees. Israaˈeelati issisaappe harasaa biyo wode ubban Qahaata yaratuppe amaridaageeti maachchaa taabootaa tokkidi asaa ubbaappe sinttawu boosona. (Qoo. 3:29, 31; 10:33; Yaas. 3:2-4) Hegee gita maata! Gidikkonne Israaˈeelati Hidootaa Biittaa gelido wode issi issibay laamettiis. Taabootaa ubbatoo tookkidi issisaappe harasaa efaana koshshenna. Solomoni kawo gididi haariyoogaa doommido wode Qahaata yaratuppe amaridaageeti mazamuriyaa yexxiyaageeta, harati penggiyaa naagiyaageeta, harati qassi buquraa naagiyaageeta gididi oottanaadan sunttettidosona. (1 Odi. 6:31-33; 26:1, 24) Qahaata yarati kase he dumma aawatettan oottido gishshawu zuuzummidoogaa woy hara aawatettaa demmanawu koyidoogaa yootiyaabi baawa. Nuuni ay tamaariyoo? Neessi deˈiya aawatettaara gayttidaba gidikkonne, Yihoowa dirijjitee laammidobaa wozanappe kaafa. Neeyyo imettida aawatettay ayba gidikkonne ufaytta. Neeni Yihoowawu alˈˈo gidanaadan oottiyay neeyyo deˈiya aawatettaa gidennaagaa hassaya. Yihooway neessi deˈiya ay  aawatettaappekka aaruwan neeni azazettiyoogaa nashshees.—1 Sam. 15:22.

12. Ziyaana Beeteeleppe kiyada dumma aqinye gidado wode iyyo aybi siyettidee?

¹² Hara oosoy imettidonne A keehi dosiyo maatay ippe ekettido, Ziyaano giyo issi michchee hanotaa qoppa. A Beeteelen 23 layttaappe dariya wodiyaa haggaaza simmada, dumma aqinye gidada haggaazanaadan sunttettaasu. A hagaadan gaasu: “Ta oosoy laamettidoogee tana keehi daganttiis. Taani tana pattenna asadan xeellido gishshawu, ‘Taani mooridobay aybee’ gaada ubbatoo oychchays.” Gubaaˈiyan deˈiya amarida ishanttinne michchontti hagaadan giyoogan A yaa unˈˈettanaadan oottiyaabaa haasayidoogee azzanttiyaaba: “Neeni maaddiya asa gidiyaakko, dirijjitee neeni Beeteeleppe kiyanaadan oottenna.” Ziyaana unˈˈettido gishshawu, amarida wodiyawu qammi qammi aggennan yeekkaasu. SHin, A hagaadan gaasu: “Yihooway woy A dirijjitee tana siiqiyoogaa mule sira erikke.” Ziyaana yuushsha qoppiya asa gidiyoogaa waata bessadee?

13. Ziyaana iitabaa qoppiyoogaa agganawu waatadee?

¹³ Ziyaana iitabaa qoppiyoogaa aggaasu. Waatada? O gakkidaagaa malabaa yootiya huuphe yohota nu xuufetuppe nabbabaasu. Wochchiyo Keelan, Usuppune 1, 2001n (Amaarattuwaa) “Hidootaa Qanxxiyoogaa Aggana Danddayaasa” giya huuphe yohoy O keehi maaddiis. He huuphe yohoy, Geeshsha Maxaafaa xaafida Marqqoosawu hara oosoy imettido wode hegaara issi malabay awu siyettidoogaa qonccissees. Ziyaana hagaadan gaasu: “Taani hidootaa qanxxiyoogaa agganaadan Marqqoosa hanotay tawu xale gidiis.” Qassi Ziyaana haratuura dabbotaa minttaasu. A ishanttuuranne michchonttuura shiiqiyoogaa woy haggaaziyoogaa aggabeykku, qassi A banan azzaniyoogaa aggaasu. Yihoowa ayyaanay A dirijjitiyaa kaalettiyoogaanne aawatettay deˈiyo ishantti iyyo wozanappe qoppiyoogaa akeekaasu. Qassi, Yihoowa oosoy oosettanaadan Xoossaa dirijjitee danddayettida ubbabaa oottiyoogaa A akeekaasu.

14. Vilaadoy hashettanawu metootido laamettidabay aybee, qassi A maaddidabay aybee?

¹⁴ Siloveeniyan deˈiya layttay 73 gidido, Vilaado giyo gubaaˈe cimay A gubaaˈee hara gubaaˈiyaara walahettidoogaanne I shiiqiyo SHiiquwaa Addaraashaa hegaappe simmin goˈettennaagaa erido wode, ammananawu metootiis. I hagaadan giis: “Hegaadan loˈˈiya SHiiquwaa Addaraashaa goˈettiyoogee aybissi  attidaakko akeekanawu metootaas. He addaraashaa nuuni mata wode bottokonido gishshawu, taani keehi azzanaas. Taani anaaxe gidiyo gishshawu, ooratta xaraphpheezaanne oyde malabata medhdhaas. Gubaaˈee walahettido gishshawu darobaa giigissana koshshiis, hegee nuussi gastta aassiyaageetussi metiyaaba.” Dirijjitee laammidobaara hashettanaadan Vilaada maaddidabay aybee? I hagaadan giis: “Yihoowa dirijjitee laammidobaara hashetiyoogee ubbatoo anjjuwaa demissees. Hegee sinttappe yaana gita laamiyawu nuuni giigetti uttanaadan maaddees.” Gubaaˈee walahettido woy hara oosoy imettidoogaa gaasuwan laamettidabaa meezetanawu baaxetaydda deˈay? Yihooway neeyyo siyettiyaabaa akeekiyoogaa ammanetta. Neeni he laamettidabaara hashetiyo wodenne Yihoowawunne I goˈettiyo dirijjitiyawu ammanettiyo wode anjjettana.—Maz. 18:25.

15. Gubaaˈiyaa giddoppe paacciyaabati gakkiyo wode nuuni yuushshi qoppiyaageeta waani gidana danddayiyoo?

¹⁵ Wurssettay mati mati biyo wode gubaaˈe giddoppe paacciyaabay gakkanaagaa eroos. Hegee nuuni Yihoowa ammanettiyoogee paacettanaadan oottana danddayees. Yaatiyo gishshawu, nuuni yuushshi qoppiyaageeta gidana bessees. Issi Kiristtaanee nena naaqqidabadan neeyyo siyettikko, uluwan lancciyaa oyqqoppa. Neeyyo seeray imettikko, hegee nena ay keena yeellayidaakko qoppoppa; zoriyaa ekka, qassi koshshiyaaban laametta. Qassi Yihoowa dirijjitee laammiyoobay ne hanotaara gayttiyaaba gidikko, laamettidabaara hasheta, qassi kaaletuwaa kaalla.

16. Neeni Yihoowaninne A dirijjitiyan ubbatoo waana ammanettana danddayay?

¹⁶ Neeni ammanettiyoogee paacettiyo wode, Yihoowawunne A dirijjitiyawu ubbatoo ammanettada deˈana danddayaasa. SHin yaatanawu, neeni yuushsha qoppiya asa gidana koshshees; hegaa giyoogee, woppu gaana, loytta qoppananne issibaa Yihoowagaadan xeellana koshshees giyoogaa. Geeshsha Maxaafan etabay odettido, neegaara issi malabay gakkin genccidaageetubaa xannaˈanawunne eta hanotaa wotta dentta qoppanawu murtta. Yihooway maaddanaadan woossa. Qassi gubaaˈiyan deˈiyaageetuura dabbotaa mintta. Yaatikko, aybi gakkinkka Seexaanay Yihoowappe woy A dirijjitiyaappe nena shaakkana danddayenna.—Yaaq. 4:7.