1. Nuuni aybi hananaagaa eriyoo, qassi ay ammanettana danddayiyoo?

 NUUNI haggaaziyo wode, asay nuna eqettanaagaa eroos. Sinttappe eti nuna kaseegaappe aaruwan eqettana danddayoosona. (Dane. 11:44; 2 Xim. 3:12; Ajj. 16:21) SHin, nuussi koshshiya maaduwaa Yihooway immanaagaa ammanettana danddayoos. Aybissi? Yihooway ba ashkkaratussi immido oosoy ay keena deexxiyaaba gidikkonne, eti hegaa polanaadan I ubbatoo eta maaddiis. Hegaabaa akeekanawu, Baabiloonen omooddettidi deˈiya Ayhudatussi sabbakida, hananabaa yootiya Hizqqeela gakkidabaa ane beˈoos.

2. Hizqqeeli etawu sabbakana koshshido asatubaa Yihooway woygidee, qassi ha huuphe yohuwan ay beˈanee? (Hizqqeela 2:3-6)

² Hizqqeeli ay mala asatussi sabbakana koshshidee? Eti ‘wozana muume,’ “morgge zozza,” qassi “makkalanchcha” gidiyoogaa Yihooway yootiis. Eti agunttaadaaninne masimasuwaadan keehi qohiyaageeta. Yihooway Hizqqeelawu, “yayyoppa” giidi darotoo yootidoy hegaassa! (Hizqqeela 2:3-6 nabbaba.) Hizqqeeli sabbakiyo oosuwaa poliis; ayssi giikko, (1) Yihooway A kiittiis, (2) Xoossaa ayyaanay awu koshshiya wolqqaa immiis, qassi (3) Xoossaa qaalay A ammanuwaa minttiis. Ha heezzubati Hizqqeela waati maaddidonaa? Qassi, hegeeti ha wodiyan nuna waati maaddiyoonaa?

3. Hizqqeela minttettida qofay awugaa gidana danddayii, qassi Yihooway A maaddanaagaa waati qonccissidee?

³ Yihooway Hizqqeela hagaadan giis: “Taani nena . . . kiittais.” (Hiz. 2:3, 4) Ha qofay Hizqqeela minttettennan waayi  aggana. Aybissi? Gaasoykka, Muuseenne Isiyaasi Yihooway kiittin hananabaa yootiyaageeta gidanaadan doorettido wode, etawu giidobaara issi malabaa awu giidoogaa Hizqqeeli hassayennan aggenna. (Kes. 3:10; Isi. 6:8) He hananabaa yootiyaageeti banttawu imettida deexxiya oosuwaa polanaadan Yihooway maaddidoogaakka Hizqqeeli erees. Yaatiyo gishshawu, “Taani nena . . . kiittais” giidi Yihooway Hizqqeelawu naaˈˈutoo yootidoogee, I Yihoowa maaduwan ammanettanaadan oottiya loˈˈo gaaso. Qassi Hizqqeela maxaafan, hagaadan giya qofay daro sohuwan deˈees: “GODAA qaalai taakko hagaadan yaagiiddi yiis.” (Hiz. 3:16; 6:1) Hizqqeeli Yihooway A kiittidoogaa ammaniis. Qassi, Hizqqeela aaway qeese gidiyo gishshawu, Yihooway hananabaa yootiyaageeta maaddana giidi darotoo yootidoogaa I Hizqqeela tamaarissennan aggenna. Leemisuwawu, Yihooway Yisaaqawu, Yaaqoobawunne Ermmaasawu “Taani nenaara de7ais” giidi yootiis.—Doo. 26:24; 28:15; Erm. 1:8.

4. Hizqqeeli minnanaadan maaddida qofay awugaa gidana danddayii?

⁴ Daro Israaˈeelati Hizqqeeli etawu yootidobaa siyidonaa? Yihooway hagaadan giis: “Israa7eela asai taani yootiyoogaa siyanau koyenna gishshau, eti neeni yootiyoogaakka siyokkona.” (Hiz. 3:7) Asay Hizqqeeli yootiyoobaa siyennan ixxiyoogan, Yihooway yootiyoobaa siyennan ixxidosona. He qofay, asay A ixxidoogee Hizqqeeli hananabaa yootiyaagaa gididi oottiyo oosuwaa polibeennaagaa bessiyaaba gidennaagaa I ammanettanaadan oottiis. Qassi Hizqqeeli awaajjido pirdday polettiyo wode, “hananabaa yootiyaagee eta giddon de7iyoogaa” asay eranaagaa Yihooway yootiis. (Hiz. 2:5; 33:33) He minttettiya qofay Hizqqeeli ba haggaazuwaa polanaadan maaddidoogee qoncce.

5. Isiyaasa 44:8y yootiyoogaadan, nuuni xalatettaa awuppe demmana danddayiyoo?

⁵ Sabbakanaadan nuna kiittidaagee Yihoowa gidiyoogaa eriyo gishshawu, nuunikka xala gidana danddayoos. “Ta markkata” giidi xeesiyoogan I nuna bonchchiis. (Isi. 43:10) Hegee gita maata! Yihooway Hizqqeelawu, “Yayyoppa” giis; hegaadankka nuna, “Dagammoppite” yaagees. Nuna eqettiyaageeta nuuni yayyana koshshennay aybissee? Hizqqeelaagaadan, Yihooway nuna kiittidoogaanne I nuna maaddiyoogaa nuuni eriyo gishshataassa.—Isiyaasa 44:8 nabbaba.

6. (a) Yihooway nuna maaddanaagaa woygi qonccissidee? (b) Nuuni minettanaadan oottiyaabay aybee?

⁶ Yihooway nuna maaddanawu qaalaa geliis. Leemisuwawu, Yihooway, “Intte ta markkata” giidi yootanaappe kasetidi hagaadan giis: “Neeni haattaa gidduwaara pinniyo wode, taani nenaara gidana. Neeni shaafatu gidduwaara pinniyo wodekka eti nena muukkokkona. Neeni tamaa giddoora aadhdhiyo wode, xuugettakka; lacoikka nena meenna.” (Isi. 43:2) Issi issitoo, nuuni haggaaziyo wode diˈuwaa mala daro metotinne tamaa mala keehi deexxiya paaceti nuna gakkana danddayoosona. SHin, nuuni aggennan sabbakanaadan Yihooway nuna maaddana. (Isi. 41:13) Hizqqeela wodiyaagaadan, ha wodiyankka daro asay nu yootiyoobaa siyenna. SHin, hegee nuuni loytti sabbakibeenna gishshataassa gidenna. Nuuni ammanettidi mishiraachchuwaa yootiyoogan Yihooway ufayttiyoogaa eriyo gishshawu minettoos. Kiitettida PHawuloosi hagaadan giis: “Xoossai huuphiyan huuphiyan a daafuraa keenaa ayyo woitana.” (1 Qor. 3:8; 4:1, 2) Daro wodiyawu aqinye gidada haggaazida issi michchiyaa hagaadan gaasu: “Nu daafuraa Yihooway anjjiyoogaa eriyoogee taani ufayttanaadan oottees.”

7. Hizqqeeli ajjuutan beˈidobaa qoppido wode awu aybi siyettidee? (Koyro sinttan deˈiya misiliyaa xeella.)

⁷ Xoossaa ayyaanay keehi wolqqaama gidiyoogaa Hizqqeeli akeekiis. Hizqqeeli ajjuutan beˈidobay geeshsha ayyaanay wolqqaama kiitanchchata maaddiyoogaanne saluwaa saragallaa irzzoti baanaadan oottiyoogaa I akeekanaadan maaddiis. (Hiz. 1:20, 21) Hizqqeeli waanidee? I hanidobaa hagaadan giis: “Taani hegaa be7ido wode, biittan duge [gufannaas].” Hizqqeeli keehi maalaalettido gishshawu biittan duge gufanniis. (Hiz. 1:28) Guyyeppe, Hizqqeeli he maalaalissiya ajjuutaabaa qoppido wode, Xoossaa ayyaanay maaddin I ba haggaazuwaa polana danddayiyoogaa mintti ammanennan waayi aggana.

8-9. (a) Hizqqeeli ‘denddanaadan’ Yihooway yootido wode hanidabay aybee? (b) Waayissiya moottan haggaazanaadan Yihooway Hizqqeela waati loytti maaddidee?

⁸ Yihooway Hizqqeelawu hagaadan giis: “Laa asa na7au, denddada ne gediyan eqqa. Taani neeyyo yootana.” He azazoynne Xoossaa ayyaanay Hizqqeeli saˈaappe denddanawu koshshiya wolqqaa demmanaadan maaddiis. Hizqqeeli hagaadan giis: “Ayyaanai ta giddo gelidi, tana ta gediyan essiis.” (Hiz. 2:1, 2) Hegaappe simmin, Hizqqeeli haggaazido wode ubban Xoossaa “kushee” hegeekka, Xoossaa ayyaanay A kaalettiis. (Hiz. 3:22; 8:1; 33:22; 37:1; 40:1) Hizqqeeli bawu imettida oosuwaa polanaadan, hegeekka I haggaaziyo moottan deˈiya, “morgge zozzanne wozana muume” asatussi sabbakanaadan geeshsha ayyaanay awu wolqqaa immiis. (Hiz. 3:7) Yihooway Hizqqeelayyo hagaadan giis: “Taani nenakka etaagaadan morgge zozzanne mino oottana. Taani ne som77uwaa salo giyo shuchchaappe aaro minniya shuchchaa oottana. . . . Etayyo yayyoppa; woikko etayyo shabbirettoppa.” (Hiz.  3:8, 9) Yihooway Hizqqeelawu hagaadan giidoogaa mala: ‘Asay morgge zozza gidiyoogee neeni hidootaa qanxxanaadan oottoppo. Taani nena minttana.’

⁹ Hegaappe simmin, Xoossaa ayyaanay Hizqqeela I sabbakiyo moottaa efiis. Hizqqeeli, ‘Yihoowa kushee ta bolli minni uttiis’ yaagiis. Hananabaa yootiyaagee xalatettan yootanawu I sabbakanabaa issi saaminttawu loytti tamaarananne akeekana koshshiis. (Hiz. 3:14, 15) He wode wombbaakko, ‘an ayyaanay gelido’ sohuwaa baanaadan Yihooway awu yootiis. (Hiz. 3:23, 24) Hizqqeeli ba haggaazuwaa doommanawu giigetti uttiis.

10. Sabbakiyo oosuwaa oottanawu nuussi koshshiyaabay aybee, qassi aybissi?

¹⁰ Nuuni nu haggaazuwaa polanawu koshshiyaabay aybee? He oyshaa zaaranawu, Hizqqeela gakkidabaa qoppa. I sabbakiyoogaa doommanaappe kase, Xoossaa ayyaanay awu koshshiya wolqqaa immiis. Hizqqeelaagaadan, nuunikka ha wodiyan sabbakana danddayiyoy Xoossaa ayyaanay nuna maaddiyo gishsha xallaassa. Aybissi? Nuuni sabbakiyo oosuwaa essanaadan Seexaanay nu bolli olaa awaajjido gishshataassa. (Ajj. 12:17) Seexaanay wolqqaama gidiyo gishshawu, nuuni aara olettidi xoonana danddayennabadan daro asay qoppees. SHin, nuuni sabbakiyo oosuwaa oottiyoogan A xooniiddi deˈoos! (Ajj. 12:9-11) Ayba ogiyan? Nuuni sabbakiyo wode, Seexaanawu yayyennaagaa bessoos. Nuuni sabbakiyo wode ubban Seexaanay xoonettees. Nu morkketi nuna eqettikkokka, nuuni aggennan sabbakiyo wode loytti akeekana danddayiyoobay aybee? Yihooway ba geeshsha ayyaanaa baggaara nuussi wolqqaa immiyoogaanne nunan ufayttiyoogaa akeekana danddayoos.—Maa. 5:10-12; 1 PHe. 4:14.

11. Xoossaa ayyaanay nuna waati maaddii, qassi nuuni hegaa ubbatoo waati demmana danddayiyoo?

¹¹ Hizqqeeli sabbakanawu awu koshshiya wolqqaa Yihooway immidoogaa qoppiyo wode nuuni harabaa ay akeekiyoo? Nuuni haggaaziyo  wode nuna gakkiya ay metuwaakka genccanaadan Xoossaa ayyaanay nuussi koshshiya wolqqaa immees. (2 Qor. 4:7-9) Yaatin, nuuni Xoossaa ayyaana ubbatoo demmanawu waatana koshshii? Yihooway nu woosaa siyanaagaa ammanettidi, hegaa demmanawu aggennan woossana koshshees. Yesuusi ba erissiyo ashkkarati aggennan ‘woossanaadan, koyanaadaaninne kare yiidi xeesanaadan’ tamaarissiis. Yaatiyo wode, Yihooway “bana woossiyaageetussi geeshsha ayyaanaa” immana.—Luq. 11:9, 13; Oos. 1:14; 2:4.

12. Hizqqeela 2:9–3:3 maaran, he xaatta maxaafay awuppe yiidee, qassi I yootiyoobay aybee?

¹² Xoossaa ayyaanay Hizqqeeli sabbakanaadan koshshiya wolqqaa immiis. SHin hegaa xalla gidenna. Xoossaa qaalay Hizqqeela ammanuwaakka minttiis. Xaatta maxaafaa oyqqida issi kushiyaa Hizqqeeli ajjuutan beˈiis. (Hizqqeela 2:9–3:3 nabbaba.) He xaatta maxaafay awuppe yiidee? I yootiyoobay aybee? Hegee Hizqqeela waati minttettidee? Ane beˈoos. He xaatta maxaafay Xoossaa araataappe yiis. Hizqqeelawu he xaatta maxaafaa immanaadan, I kaseti beˈido oyddu kiitanchchatuppe issuwaa Yihooway goˈettennan aggenna. (Hiz. 1:8; 10:7, 20) He xaatta maxaafay Xoossaa qaalaa hegeekka, omoodettida makkalanchchatussi Hizqqeeli odana pirddaa kiitaa yootees. (Hiz. 2:7) Hegee xaatta maxaafan naaˈˈu baggaarakka xaafettiis.

13. Xaatta maxaafaa waatanaadan Yihooway Hizqqeelawu yootidee, qassi hegee A malˈˈidoy aybissee?

¹³ Hananabaa yootiyaagee he xaatta maxaafaa maanaadaaninne hegaa ‘ba uluwaa kunttanaadan’ Yihooway yootiis. Hizqqeeli azazettidi he xaatta maxaafaa muleera mi aggiis. Ha ajjuutaa shaahoy woygiyoogee? Hizqqeeli I yootanabaa loytti akeekana bessees. I sabbakiyoobay A denttettana mala I hegaa ammanana koshshees. Hegaappe simmin, maalaalissiyaabay haniis. Hizqqeeli he xaatta maxaafay ‘eessaadan malˈˈiyoogaa’ akeekiis. (Hiz. 3:3) Aybissi? Yihooway kiittin hananabaa yootiyo maatay Hizqqeelawu malˈˈiyaaba woy keehi ufayssiyaaba. (Maz. 19:8-11) Hizqqeeli hananabaa yootiyaagaa gidanaadan Yihooway A sunttido gishshawu keehi ufayttiis.

14. Hizqqeeli bawu imettida oosuwaa polanaadan A maaddidabay aybee?

¹⁴ Guyyeppe, Yihooway Hizqqeelawu hagaadan giis: “Taani neeyyo yootiyo qaalaa ubbaa minttada ezgganne ne wozanan wotta.” (Hiz. 3:10) Hegaadan azaziyoogan, xaatta maxaafay yootiyoobaa hassayanawu baaxetanaadaaninne hegaa loytti qoppanaadan Yihooway Hizqqeelawu yootiis. Hizqqeeli yaatido wode, A ammanoy minniis. Qassi, he xaatta maxaafay I wolqqaama kiitaa asawu yootanawu giigettanaadan oottiis. (Hiz. 3:11) Hizqqeeli Xoossaa qaalaa loytti akeekidonne ammanido wode, sabbakiyoogaa doommanawunne he aawatettaa polanawu giigettiis.—Maz. 19:14.

15. Genccanawu nuuni nu ‘wozanan wottana’ bessiyaabay aybee?

¹⁵ Nuuni minnidi haggaazanawu, Xoossaa qaalay nu ammanuwaa minttanaadan eeno gaana koshshees. Nuuni Yihooway nuussi yootido ubbabaa nu ‘wozanan wottana’ bessees. Ha wodiyan, Yihooway ba Qaalaa, Geeshsha Maxaafaa baggaara nuna haasayissees. Nu qofaynne nuuni issibaa oottiyo gaasoy loˈˈo gidanaadan Xoossaa Qaalay nuna ubbatoo maaddiyoogaa waati ammanettana danddayiyoo?

16. Nuuni Xoossaa Qaalaa nabbabiyo wode oottana koshshiyaabay aybee, qassi nu wozanan hegaa waati wottana danddayiyoo?

¹⁶ Nuuni qumaa miyo wodenne hegee gaacettidi nu bollaara walahettiyo wode nu bollay  minnees; hegaadankka, nuuni Geeshsha Maxaafaa nabbabiyo wodenne hegaa wotti dentti qoppiyo wode nu ammanoy minnees. Nuuni tamaaranaadan Yihooway koyiyoobay hegaa. Yihooway A Qaalaa nuuni nu ‘uluwan kunttanaadan’ koyees, hegaa giyoogee A Qaalaa loytti akeekiyoogaa giyoogaa. Nuuni woossiyoogan, nabbabiyoogaaninne wotti dentti qoppiyoogan yaatana danddayoos. Koyruwan, Xoossaa qofaa akeekanawu nu wozanaa giigissanawu woossoos. Kaallidi, Geeshsha Maxaafaa nabbaboos. Hegaappe simmin, nuuni nabbabidobaa loytti qoppanawu takki goos. Yaatiyoogee ay demissii? Nuuni kaseegaappe aaruwan wotti dentti qoppiyo wode, Xoossaa Qaalaa loytti akeekoos.

17. Nuuni Geeshsha Maxaafaappe nabbabidobaa wotti dentti qoppiyoogee keehi koshshiyoy aybissee?

¹⁷ Geeshsha Maxaafaa nabbabiyoogeenne hegaa wotti dentti qoppiyoogee keehi koshshiyaaba gidiyoy aybissee? Yaatiyoogee, nuuni ha wodiyan Kawotettaa mishiraachchuwaa sabbakanawunne mata wode wolqqaama pirddaa kiitaa yootanawu koshshiya xalatettaa demmanaadan maaddana. Qassi, nuuni ufayssiya Yihoowa eeshshatubaa wotti dentti qoppiyoogee awudeegaappenne aaruwan akko shiiqanaadan maaddana. Hegaappe denddidaagan, keehi malˈˈiyaaba woy ufayssiyaaba gidida sarotettaa demmananne nuussi deˈiyaaban ufayttana.—Maz. 119:103.

18. Nu haggaazo moottan deˈiya asay ay akeekanee, qassi aybissi?

¹⁸ Hizqqeeli hananabaa yootiyaagaa, shin nuuni gidokko. Gidikkonne, sabbakiyo oosoy eqqana gakkanaashin, Yihooway ba Qaalan xaafissidobaa ubbatoo yootanawu murttida. Pirddaa gallassay yiyo wode, nu moottan deˈiya asati akeekissuwaa siyibookko woy Xoossay nuna aggibayiis giidi gaasoyana danddayokkona. (Hiz. 3:19; 18:23) SHin nuuni sabbakido mishiraachchoy Xoossaappe yiidoogaa eti akeekana.

19. Nu haggaazuwaa polanawu wolqqaa awuppe demmanee?

¹⁹ Nu haggaazuwaa polanawu wolqqaa awuppe demmanee? Hizqqeela minttettida heezzubati nunakka minttettana. Nuna Yihooway kiittidoogaa, Xoossaa geeshsha ayyaanay nuussi wolqqaa immiyoogaanne Xoossaa Qaalay nu ammanuwaa minttiyoogaa eriyo gishshawu nuuni ubbatoo sabbakoos. Yihooway maaddin, nuuni nu haggaazuwaa polanawunne “wurssettaa gakkanaashin” genccanawu murttida.—Maa. 24:13.