1-2. (a) Nuuni beˈana oyshati awugeetee? (b) Yihooway nuna maaddanawu keehi koyiyoogaa bessiyaabay aybee?

 YIHOOWAY nuuni metuwaa genccanaadaaninne awu haggaaziyoogan ufayttanaadan maaddees. I nuna ayba ogetun maaddii? Yihoowa maaduwaappe nuuni waani loytti goˈettana danddayiyoo? Ha oyshatu zaaruwaa ha huuphe yohuwan beˈana. SHin zaaruwaa beˈanaappe kase, hara oyshaa ane beˈoos: Yihooway nuna maaddanawu keehippe koyii?

² Kiitettida PHawuloosi Ibraawe Kiristtaanetussi xaafido dabddaabbiyan yootido qofay, hegaa zaaruwaa eranaadan nuna maaddana danddayees. PHawuloosi hagaadan giis: “Godai tana maaddiyaagaa; taani yayyikke. Asi tana ai oottii?” (Ibr. 13:6) Geeshsha Maxaafaabaa yootiya issi xuufee, ha xiqisiyan “maaddiyaagaa” giya qaalay maaduwaa demmanawu waassiya ura maaddanawu woxxiya ura qonccissiyaaba giidi yootees. Yihooway unˈˈettida issi ura ashshanawu woxxiyoogaa ane qoppa. Ha qonccissoy Yihooway nuna maaddanawu keehi koyiyoogaa bessiyoogaa neeni maayettanaagee qoncce. Yihoowa maaduwan nuuni metuwaa ufayssan genccana danddayoos.

3. Nuuni metuwaa ufayssan genccanaadan Yihooway nuna maaddiyo heezzu ogeti awugeetee?

³ Nuuni metuwaa ufayssan genccanaadan Yihooway nuna maaddiyo amarida ogeti awugeetee? Hegaa zaaruwaa beˈanawu, Isiyaasa maxaafaa ane beˈoos. Aybissi? Yihooway Isiyaasayyo qonccissido hiraagatuppe daroti, ha wodiyan Xoossaa ashkkaratussi haniyo gishshataassa. Qassi, nuuni metootennan  akeekana danddayiyo ogiyan Isiyaasi Yihoowaabaa darotoo qonccissiis. Isiyaasa shemppo 30y amarida leemisota yootees. He shemppuwan Yihooway ba asaa waati maaddiyaakko qonccissiya keehi loˈˈo leemisota Isiyaasi goˈettiis. Yihooway (1) nu woosaa loytti siyiyoogaaninne zaariyoogan, (2) nuna tamaarissiyoogan, qassi (3) nuna ha wodiyaaninne sinttappe anjjiyoogan maaddiyoogaa Isiyaasi yootiis. Yihooway nuna maaddiyo ha heezzu ogeta ane beˈoos.

4. (a) Isiyaasa wode deˈida Ayhudata xeelliyaagan Yihooway woygidee, qassi I aybi hananaadan oottidee? (b) Ammanettidaageetussi ayba hidootay deˈiyoogaa Yihooway yootidee? (Isiyaasa 30:18, 19)

⁴ Isiyaasa shemppo 30 doomettan, Ayhudati “nagaraa nagaraa bolli” gujjiya ‘makkalanchcha naata’ gidiyoogaa Yihooway yootiis. I gujjidi hagaadan giis: “Hageeti makkalanchcha [asata]; . . . eti GODAI yootiyoobaa siyanau koyenna naata.” (Isi. 30:1, 9) Asay siyanawu koyenna gishshawu, eti waayettanaadan Yihooway paqqadanaagaa Isiyaasi kasetidi yootiis. (Isi. 30:5, 17; Erm. 25:8-11) Qassi, Baabilooneti eta omooddidi efiido wode hegaadan haniis. SHin, Ayhudatuppe ammanettida amaridaageeti etaara deˈoosona; qassi Isiyaasi etawu yootana hidootay deˈees. Eti Yerusalaame guyye simmidi yan deˈanaadan Yihooway oottanaagaa Isiyaasi etawu yootiis. (Isiyaasa 30:18, 19 nabbaba.) Hanidabaykka hegaa. Baabiloone omooduwaappe Yihooway eta laˈa kessiis. SHin, eti sohuwaara laˈa kiyibookkona. “GODAI intteyyo kehanau naagees” giya qofay ammanettidaageeti laˈa kiyanaappe kase amarida wodee aadhdhanaagaa qonccissiyaaba. Israaˈeelati, etappe amaridaageeti Yerusalaame simmanaadan paqqadettana gakkanawu, Baabiloone omooduwan 70 layttaa takkidosona. (Isi. 10:21; Erm. 29:10) Israaˈeelati omoodettidi Baabiloonen deˈiyo wode, keehi azzanidi yeekkidosona; shin eti bantta biitti simmido wode, keehi ufayttidi yeekkidosona.

5. Isiyaasa 30:19y nuussi ay yootii?

⁵ Ha wodiyan hagaadan giya qofay nuna minttettees: “Intte waasuwan i intteyyo tumuppe qarettana.” (Isi. 30:19) Yihooway nuuni akko waassiyo wode siyanaagaanne nu woosaa eesuwan zaaranaagaa Isiyaasi yootiis. I gujjidi hagaadan giis: “I intte waasuwaa siyiyo wode, intteyyo zaaruwaa immana.” Ha minttettiya qofay, nu Aaway maaduwaa koyidi bana oychchiyaageeta maaddanawu keehi koyiyoogaa nuna hassayissees. Hegaa eriyoogee nuuni ufayssan genccanaadan maaddees.

6. Yihooway ba ashkkaratu ubbaa woosaa siyiyoogaa Isiyaasi xaafidobay waati qonccissii?

⁶ Nu woosaa xeelliyaagan ha xiqisiyaappe harabaa ay tamaariyoo? Yihooway nu ubbaa woosaa loytti siyees. Nuuni hegaadan giyoy aybissee? Koyro xaafettido doonan qonccidoogaadan, Isiyaasa shemppo 30 koyro shaahuwan Yihooway ba asaa cita xekkan qonccissido gishshawu, “intte” giya qaalay deˈees. SHin, paydo 19n odettidabay issi asawu gidiyo gishshawu, ‘nena’ giya qaalay deˈees. Isiyaasi hagaadan giis: ‘Neeni hagaappe sinttanawu yeekkakka’; ‘I neeyyo tumuppe qarettana’; ‘I neeyyo zaaruwaa immana.’ Yihooway siiqiya Aawa gidiyo gishshawu, hidootaa qanxxida ba naˈaa woy ba naˈiyo, “Neeni ne ishaadan woy ne michcheedan mino gidana koshshees” geenna. SHin, I nu ubbawu qoppees, qassi nu woosaa loyttidi siyees.—Maz. 116:1; Isi. 57:15.

7. Nuuni aggennan woossiyoogee keehi koshshiyoogaa Isiyaasinne Yesuusi waati qonccissidonaa?

⁷ Nuuni nuna qofissidabaa woosan Yihoowawu yootiyo wode, I sohuwaara nuuni hegaa genccanaadan koshshiya wolqqaa immees. Qassi, nu metoy nuuni qoppido wodiyan qaarettana xayikko, hegaa genccanawu koshshiya  wolqqaa immanaadan zaari zaaridi Yihoowa oychchana danddayoos. Nuuni yaatanaadan I shoobbees. Isiyaasi yootido ha qofay hegaa qonccissees: “[Yihoowa] shemppissoppite.” (Isi. 62:7) Hegee woygiyoogee? Nuuni Yihoowa shemppissokko giyoogaa mala hanotan, zaari zaaridi A woossana koshshees. Isiyaasi yootidobay Luqaasa 11:8-10, 13n woosaa xeelliyaagan Yesuusi yootido leemisuwaa nuna hassayissees. Ha xiqisiyan, nuuni ‘oychchiiddi waayissiyoogaa’ mala hanotan woossanaadaaninne geeshsha ayyaanaa demmanawu aggennan ‘woossanaadan’ Yesuusi nuna minttettiis. Qassi, nuuni loˈˈobaa kuuyanawu maaddiya kaaletuwaa demmanawu Yihoowa woossana danddayoos.

8. Isiyaasa 30:20, 21n deˈiya qofay beni wode waani polettidee?

⁸ Isiyaasa 30:20, 21 nabbaba. Baabiloone wotaaddarati issi layttanne baggaa Yerusalaame dooddido wode, asay keehi unˈˈettido gishshawu, hegee eti meezetido oyttaanne haattaa mala gidiis. SHin paydo 20ynne 21y yootiyoogaadan, Ayhudati bantta nagaraappe simmikko, qassi bantta eeshshaa laammikko, Yihooway eta ashshanawu qaalaa geliis. Eta Gita “Asttamaaree” Yihoowa gidiyoogaa Isiyaasi yootiis; qassi Yihoowa ufayssiya ogiyan awu waanidi goynnanaakko Yihooway he asaa tamaarissanaagaa I odiis. Ayhudati omooduwaappe laˈa kiyido wode hegee polettiis. Yihooway etawu Gita Asttamaare gidiyoogaa bessiis; qassi I kaalettin, A asay geeshsha goynuwaa zaarettidi essiis. Ha wodiyan, Yihooway nu Gita Asttamaare gidiyo gishshawu nuuni keehi ufayttoos.

9. Ha wodiyan Yihooway nuna tamaarissiyo issi ogee aybee?

⁹ He paydotun, nuuni Yihoowappe tamaariya tamaaretu mala gidiyo naaˈˈu ogeta Isiyaasi yootiis. Koyruwan, Isiyaasi hagaadan giis: “Intte aifee intte asttamaariyaa be7ana.” Ha leemisuwan, Asttamaaree ba tamaaretu sinttan eqqidoogaa Isiyaasi yootiis. Ha wodiyan, Xoossay nuna tamaarissiyoogee nuuyyo gita maata. Yihooway nuna waati tamaarissii? I ba dirijjitiya baggaara nuna tamaarissees. Hegaa gishshawu, nuuni A keehi galatoos. Nuuni gubaaˈe shiiqotuppe, gita shiiqotuppe, nu xuufetuppe, JW Brodkastingiyaappenne hara daro ogetuppe metiya wodiyaa ufayssan genccanawu maaddiyaabaa tamaaroos.

10. Nuuni ‘guyyeera cenggurssaa’ waanidi siyana danddayiyoo?

¹⁰ Yihooway nuna tamaarissiyo naaˈˈantto ogiyaa Isiyaasi hagaadan giidi yootiis: “Guyyeera  . . . cenggurssaa intte siyana.” Yihooway ba tamaaretuppe guyyeera hemettiyaanne eti baana koshshiya ogiyaa etawu yootiya gooba asttamaariyaa mala gidiyoogaa Isiyaasi yootiis. Ha wodiyan, Xoossaa cenggurssaa nuuppe guyyeera siyoos. Waatidi? Daro wodiyaappe kase Xoossaa ayyaanay denttettin xaafettidabay Geeshsha Maxaafan deˈees. Yaatiyo gishshawu, nuuni Geeshsha Maxaafaa nabbabiyo wode, nuuppe guyyeera Xoossaa cenggurssaa siyoos giyoogaa mala.—Isi. 51:4.

11. Ufayssan genccanawu nuuni oottana koshshiyaabati aybee, qassi aybissi?

¹¹ Yihooway ba dirijjitiyaanne ba Qaalaa baggaara nuna tamaarissiyoogaappe waanidi loytti goˈettana danddayiyoo? Isiyaasi naaˈˈubaa yootidoogaa akeeka. Koyruwan, “ogee hagaa.” Naaˈˈanttuwan, “an biite.” (Isi. 30:21) “Ogee” awugaakko eriyoogaa xallay gidenna. Nuuni ‘an baana’ koshshees. Yihoowa dirijjitee Geeshsha Maxaafaappe qonccissiyoobati, Yihooway nuuppe koyiyoobaa tamaarissoosona. Qassi, tamaaridobaa nuuni oosuwan waatidi peeshshanaakko tamaaroos. Nuuni Yihoowawu haggaaziyo wode metuwaa ufayssan genccanawu naaˈˈubatakka oottana koshshees. Yaatiyo wode xallan, Yihooway nuna anjjanaagaa ammanettana danddayoos.

12. Isiyaasa 30:23-26y yootiyoogaadan, Yihooway ba asaa aybin anjjidee?

¹² Isiyaasa 30:23-26 nabbaba. Baabiloona omooduwaappe Israaˈeela biitti simmida Ayhudatuura gayttidaagan ha hiraagay waani polettidee? Asatettaabaaninne ayyaanaaban Yihooway eta darissidi anjjiis. Yihooway ba asawu gidi palahiya qumaa immiyoogan eta anjjiis. SHin ubbaappe aaruwan, eti akko shiiqanaadaaninne zaarettidi A ufayssiya ogiyan goynniyoogaa doommanaadan etawu koshshiya ubbabaa immiis. Xoossaa asay he wode kaseegaappe aaruwan ayyaanaaban daro anjjuwaa demmiis. Paydo 26y yootiyoogaadan, Yihooway eti A Qaalaa loytti akeekanaadan maaddiis. (Isi. 60:2) Yihooway ba ashkkarata anjjidoogee, eti ubbatoo awu ufayssan haggaazanaadaaninne ‘wozanan ufayttiyoogaappe’ denddidaagan minnanaadan maaddiis.—Isi. 65:14.

13. Geeshsha goynoy zaarettidi eqqidoogaabaa yootiya hiraagay nu wodiyan waani polettidee?

¹³ Geeshsha goynoy zaarettidi eqqidoogaabaa yootiya hiraagay nu wodiyan polettidee? Ee! Ayba ogiyan? Worddo haymaanoote ubbaa xaaxa waaxiya Gita Baabilooni omooduwaappe daro miiloone asati 1919 M.Lppe, doommidi laˈa kiyidosona. Israaˈeelati gelido Hidootaa  Biittaappe keehi aadhdhiya sohuwaa eti gelidosona. Eti ayyaana gannatiyaa gelidosona. (Isi. 51:3; 66:8) He ayyaanaa gannatee aybee?

14. Ayyaanaa gannatee aybee, qassi ha wodiyan yan deˈiyaageeti oonee? (Qonccissido Qaalaa xeella.)

¹⁴ Tiyettidaageeti 1919 M.Lppe doommidi ayyaanaa gannatiyan b deˈoosona. Qassi, saˈan deˈanawu hidootiya ‘hara dorssati’ ha ayyaanaa gannatiyaa gelidi Yihoowa anjjuwaa demmidosona.—Yoh. 10:16; Isi. 25:6; 65:13.

15. Ayyaanaa gannatee awan deˈii?

¹⁵ Ha wodiyan ayyaanaa biittay woy gannatee awan deˈii? Yihoowawu goynniyaageeti kumetta saˈan deˈoosona. Yaatiyo gishshawu, ayyaanaa gannateekka kumetta saˈan deˈees. Hegaa gishshawu, nuuni ha wodiyan saˈan awa heeran deˈikkokka, tumu goynuwaa minnidi kaafiyo wode ubban, ayyaanaa gannatiyan deˈoos.

16. Nuuni ayyaanaa gannatiyan loˈˈiyaaba xallaa beˈanawu waatana danddayiyoo?

¹⁶ Nuuni ubbatoo ayyaanaa gannatiyan deˈanawu, kumetta saˈan deˈiya Kiristtaane gubaaˈiyaa aggennan nashshana koshshees. Waatidi hegaadan oottana danddayiyoo? Nu ishanttunne michchonttu balan gidennan, etawu deˈiya loˈˈoban xeelaa wottiyoogaana. (Yoh. 17:20, 21) Hegee keehi koshshiyaaba gidiyoy aybissee? Ha leemisuwaa qoppa. Nuuni keehi loˈˈiyaa woran dumma dumma mittaa beˈana danddayoos. Hegaadan, ha wodiyan dumma dumma asay gubaaˈiyan deˈees. (Isi. 44:4; 61:3) Nuuni ubbatoo xeelaa wottana koshshiyoy nu matan deˈiya issi ‘mittaa’ bolli deˈiya loˈˈennaban gidennan, keehi loˈˈiya ‘woran’ gidana koshshees. Nuuni woy gubaaˈiyan deˈiya harati baliyoobay, keehi loˈˈiya issippetettay deˈiyo kumetta saˈan deˈiya Kiristtaane gubaaˈiyaappe nuna shaakkanaadan paqqadokko.

17. Gubaaˈiyan issippetettay deˈanaadan nuuni ubbay waatana danddayiyoo?

¹⁷ Nuuni ubbay gubaaˈiyaa issippetettaa waati naagana danddayiyoo? Haratuura sarotettan deˈiyoogaana. (Maa. 5:9; Roo. 12:18) Nuuni ubbatoo haratuura sarotettan deˈanawu baaxetiyoogan ayyaanaa gannatee keehi loˈˈanaadan  oottoos. Yihooway ayyaanaa gannatiyan deˈiya ubbaa geeshsha goynuwawu ehiidoogaa nuuni hassayana koshshees. (Yoh. 6:44) Yihooway keehi alˈˈobadan xeelliyo A ashkkaratu giddon sarotettaynne issippetettay deˈanaadan nuuni minnidi oottiyoogaa I beˈiyo wode, ay keena ufayttiyaakko qoppa!—Isi. 26:3; Hag. 2:7.

18. Ha wodiyan nuuni ubbatoo loytti qoppana koshshiyaabay aybee, qassi aybissi?

¹⁸ Yihooway ba ashkkaratussi loˈˈo gidida darobaa immees. Yaatin, nuuni hegeetuppe loytti goˈettanawu waatana danddayiyoo? Nuuni Geeshsha Maxaafaappenne nu xuufetuppe nabbabidobaa loytti qoppana danddayoos. Hegaadan xannaˈiyoogeenne wotti dentti qoppiyoogee, gubaaˈiyan deˈiyaageetuura ‘ishanttudan minttidi siiqettanaadan’ oottiya Kiristtaanetuppe koyettiya eeshshay deˈiyoogeeta gidanaadan nuna maaddana. (Roo. 12:10) Nuuni ha wodiyan demmido anjjota wotti dentti qoppikko, Yihoowaara dabbotido dabbotaa minttana danddayoos. Qassi, Yihooway nuussi immanawu qaalaa gelido loˈˈobata qoppiyo wode, nuuni awu merinawu haggaazana hidootay qoncci beettees. Ha ubbabay nuuni ha wodiyan Yihoowawu ufayssan haggaazanaadan maaddana.

19. (a) Isiyaasa 30:18y yootiyoogaadan, nuuni ay ammanettana danddayiyoo? (b) Nuuni ufayssan genccanawu aybi maaddanee?

¹⁹ Yihooway ha alamiyaa xayssiyo wode, nuna maaddanawu ‘denddana.’ (Isi. 30:18) “Xillo pirddiya Xoossaa” Yihooway Seexaanaa alamiyaa xayssanawu qoppido wodiyaappe issi gallassaynne aadhdhanaadan mule paqqadennaagaa ammanettoos. (Isi. 25:9) Nuuni attiyo he gallassay yaanaashin, Yihoowa danddayan naagoos. He gallassay gakkanaashin nuuni woosaa maataa nashshanawu, Xoossaa Qaalaa xannaˈanawunne appe tamaaridobaa oosuwan peeshshanawu, qassi nuuni demmido anjjota wotti dentti qoppanawu murttida. Yaatikko, Yihooway nuuni awu goynniyo wode ufayssan genccanaadan maaddana.