1-2. Ooratta alamiyaa naagiiddi nuuni ay oottana koshshii?

 YIHOOWAY ha iita alamiyaa xayssidi xillotettay kumido ooratta alamiyaa ehaanawu qaalaa gelido gishshawu, nuuni A keehi galatoos. (2 PHe. 3:13) Ooratta alamee awude yaanaakko nuuni erennaba gidikkonne, wodee wuridoogaa naqaashati qonccissoosona.—Maa. 24:32-34, 36; Oos. 1:7.

² Nuuni tuman takkido wodee ay keena gidikkonne, Yihooway gelido qaalaa nuuni ubbay mintti ammanana koshshees. Aybissi? Mino ammanoykka shuggana danddayiyo gishshataassa. Kiitettida PHawuloosi ammanoy pacciyoogaa, “baqqi oiqqiya nagaraa” yaagiis. (Ibr. 12:1) Nuuni nu ammanoy shuggennaadan, ooratta alamee matan yaanaagaa qonccissiya naqaashata ubbatoo loytti qoppana koshshees.—Ibr. 11:1.

3. Nuuni ha huuphe yohuwan ay beˈanee?

³ Ha huuphe yohuwan, Yihooway ooratta alamiyaa ehaanawu qaalaa gelidobaa nuuni mintti ammananaadan maaddiya heezzubata beˈana: (1) wozuwaabaa loytti qoppiyoogaa, (2) Yihoowa wolqqaabaa loytti qoppiyoogaa, qassi (3) Yihoowakko shiiqanawu maaddiyaabata oottiyoogaa. Kaallidi, Yihooway Imbbaaqoomawu yootidobay ha wodiyan nu ammanuwaa waati minttana danddayiyaakko beˈana. SHin kasetidi, ooratta alamee yaanaagaa nuuni ammaniyoogee metanaadan oottiya ha wodiyan nuna gakkiya amarida hanotata ane beˈoos.

 NUUSSI MINO AMMANOY KOSHSHIYO HANOTATA

4. Kuuyiyoobaara gayttidaagan mino ammanoy koshshiyo hanotati awugeetee?

⁴ Ubba galla nuuni kuuyiyoobaara gayttidaagan nuussi mino ammanoy koshshees. Leemisuwawu, nuuni laggeta, allaxxiyoobaa, timirttiyaa, aqo deˈuwaa, naatanne oosuwaa xeelliyaagan kuuyana koshshees. Nuuni nuna hagaadan giidi oychchana koshshees: ‘Taani dooriyoobay ha iita alamee xayin Xoossay gelido ooratta alamee matan yaanaagaa taani ammaniyoogaa bessii? Woy taani dooriyoobay merinawu deˈana danddayiyoogaa ammanenna asatu wogaara issi malee?’ (Maa. 6:19, 20; Luq. 12:16-21) Nuuni ooratta alamee keehi matidoogaa mintti ammanikko, loˈˈobaa kuuyana.

5-6. Nuna metoy gakkiyo wode nuussi mino ammanoy koshshiyoy aybissee? Leemisuwaa yoota.

⁵ Nuna gakkiya paaceta genccanawu nuussi mino ammanoy koshshees. Nuuni yedetaa, caddi oyqqiya sahuwaa, woy hidootaa qanxxanaadan oottiya harabata genccana koshshees. Koyro heeran, nuuni nu metuwaa genccana danddayiyaabadan qoppana danddayoos. SHin, hegaa mala metoti daro wodiyawu takkikko, genccanawunne aggennan ufayssan Yihoowawu haggaazanawu nuussi mino ammanoy koshshees.—Roo. 12:12; 1 PHe. 1:6, 7.

⁶ Nuna metoy gakkiyo wode, Yihooway qaalaa gelido ooratta alamee mule yeenna giidi qoppana danddayoos. Hegaa giyoogee nu ammanoy shuggiis giyoogee? Gidennan aggana danddayees. Ane issi leemisuwaa beˈa. Daro saaminttawu iray bukkikko, away mule kiyennaba nuussi milatana danddayees. SHin away kiyiyoogee attenna. Hegaadankka, nuuni hidootaa qanxxiyo wode, ooratta alamee mule yeenna giidi qoppana danddayoos. SHin nuussi mino ammanoy deˈikko, Xoossay gelido qaalay polettanaagaa eroos. (Maz. 94:3, 14, 15; Ibr. 6:17-19) Nuuni hegaa ammanettiyo gishshawu, nu deˈuwan ubbatoo Yihoowa goynuwaa kaseyoos.

7. Nuuni ay mala qofaappe naagettana koshshii?

⁷ Sabbakiyo oosuwaa oottanawukka nuussi mino ammanoy koshshees. Xoossay ehaana ooratta alamiyaa xeelliyaagan nuuni yootiyo ‘mishiraachchuwaa’, daro asay hegee hanana danddayennaba giidi qoppees. (Maa. 24:14; Hiz. 33:32) Nuuni etaagaadan Yihooway tamaarissiyoobaa siriyoogaappe naagettana koshshees. Hegee hanennaadan naagettanawu, nuuni nu ammanuwaa ubbatoo minttana koshshees. Nuuni yaatana danddayiyo heezzu ogeta ane beˈoos.

WOZUWAABAA LOYTTA QOPPA

8-9. Wozuwaabaa loytti qoppiyoogee nu ammanuwaa waati minttii?

⁸ Nuuni nu ammanuwaa minttana danddayiyo issi ogee, wozuwaabaa loytti qoppiyoogaa. Wozoy Xoossay gelido qaalay polettanaagaa nuuni ammanettanaadan oottees. Wozoy nuussi koshshido gaasuwaanne hegawu Yihooway oottidobata loytti qoppiyo wode, ooratta alamiyan nuuni merinawu deˈanaagaa Xoossay gelido qaalay polettanaagaa ammanettana danddayoos. Nuuni hegaadan giyoy aybissee?

⁹ Wozuwaara gayttidaagan Yihooway oottidobay aybee? Yihooway banaara daro wodiyawu takkida, I keehi siiqiyo A bayra naˈay saluwaappe yiidi saˈan wottiyoobi baynna asa gididi yelettanaadan oottiis. Yesuusi saˈan deˈiyo wode daro metota gencciis. Hegaappe simmin, I keehi waayettidi hayqqiis. Yihooway alˈˈo waagaa qanxxiis. Nuuni guutta wode xallawu loˈˈo deˈuwaa deˈanaadan, nu siiqo Xoossay ba naˈay tuggatidi hayqqanaadan mule  oottenna. (Yoh. 3:16; 1 PHe. 1:18, 19) Yihooway nuna maaddanawu ba alˈˈo naˈaa immiyoogan, nuuni ooratta alamiyan merinawu deˈanaagaa ammanettanaadan oottiis.

YIHOOWA WOLQQAABAA LOYTTA QOPPA

10. Efisoona 3:20y yootiyoogaadan, Yihooway ay oottana danddayii?

¹⁰ Nuuni nu ammanuwaa minttana danddayiyo naaˈˈantto ogee, Yihoowa wolqqaabaa loytti qoppiyoogaa. I qaalaa gelido ubbabaa polanawu awu wolqqay deˈees. Ha wodiyan daro asay ooratta alamiyan merinawu deˈanaagee danddayettennaba giidi qoppees. SHin, Yihooway darotoo qaalaa gelidobay asay oottana danddayennaba. I Ubbaa Danddayiya Xoossaa gidiyo gishshawu, hegaa oottana danddayees. (Iyy. 42:2; Mar. 10:27) Yaatiyo gishshawu, I maalaalissiyaabata oottanawu qaalaa geliyo wode nuuni garamettokko.—Efisoona 3:20 nabbaba.

11. Xoossay qaalaa gelido hanana danddayennaba milatiyaageetuppe issi leemisuwaa yoota. (“ Hanana Danddayennaba Milatikkonne Yihooway Qaalaa Gelido Polettidabata” giya saaxiniyaa xeella.)

¹¹ Beni wode, Yihooway ba asawu qaalaa gelido hanana danddayennaba milatiya amarida hanotata beˈa. Abrahaaminne Saara cimatettaa layttan naˈaa yelanaagaa Yihooway etawu yootiis. (Doo. 17:15-17) Qassi Yihooway Abrahaamawu, A zareti Kanaane biittaa laattanaagaa yootiis. Abrahaama zare gidida Israaˈeelati daro layttawu Gibxxen aylle gididi deˈido wode, Yihooway qaalaa gelidobay polettennaba milatana danddayees. SHin polettiis. Guyyeppe, Elssaabeexa cimikkokka, naˈaa yelanaagaa Yihooway yootiis. Qassi, geelaˈiyaa Mayraama Yihoowa naˈaa yelanaagee iyyo odettiis. Hegee, daro layttaappe kase Yihooway Edene gannatiyan qaalaa gelidobay polettanaadan oottiis!—Doo. 3:15.

12. Yaasa 23:14ynne Isiyaasa 55:10, 11 Yihoowa wolqqaabaa ay yootii?

¹² Yihooway qaalaa gelido ubbabatanne I hegeeta waati polidaakko nuuni loytti qoppiyo wode, A gita wolqqaa akeekoos. Yaatiyo wode, Yihooway ooratta alamiyaa ehaanawu qaalaa gelidobaa mintti ammanoos. (Yaasa 23:14; Isiyaasa 55:10, 11 nabbaba.) Hegee, Xoossay ehaanawu qaalaa gelido ooratta alamee yaanaagee attennaagaa harati eranaadan maaddanawu giigettanaadan oottees. Yihooway ooratta saluwaanne ooratta saˈaa xeelliyaagan yootido wode hagaadan giis: “Taani haasayiyoogee ammanettiyaagaanne tuma.”—Ajj. 21:1, 5.

YIHOOWAKKO SHIIQANAWU MAADDIYAABATA OOTTA

13. Gubaaˈe shiiqoti nu ammanoy minnanaadan waati maaddana danddayiyoonaa? Qonccissa.

¹³ Nuuni nu ammanuwaa minttanawu maaddiya heezzantto ogee, Yihoowakko shiiqanawu maaddiyaabata oottiyoogaa. Leemisuwawu, gubaaˈe shiiqoti nuna waati maaddiyaakko beˈa. Daro layttawu dumma dumma qommo ubba wode haggaazuwaa haggaazida Aana, hagaadan gaasu: “SHiiqoti ta ammanoy mino gidanaadan maaddidosona. Haasayaa haasayiyaagee gooba asttamaare gidana xayikko, woy aynne oorattabaa yootana xayikkonne, taani Geeshsha Maxaafaa loytta akeekanaadan maaddiyaanne ta ammanuwaa minttiyaabaa darotoo siyays.” b SHiiquwan ishanttinne michchontti qofaa yootiyo wode siyiyoogeekka nu ammanuwaa minttees.—Roo. 1:11, 12; 10:17.

14. Haggaazoy nu ammanoy minnanaadan waati maaddii?

¹⁴ Nuuni haggaaziyo wodekka nu ammanoy minnees. (Ibr. 10:23) Yihoowawu 70  layttaappe daruwaa haggaazida Barbaara hagaadan gaasu: “Sabbakiyoogee ammanuwaa minttiyoogaa taani darotoo akeekaas. Yihooway qaalaa gelido maalaalissiyaabata taani haratussi yootido paydo ubban, ta ammanoy yaa minnees.”

15. Buzo xinaatee nu ammanuwaa minttanawu waati maaddii? (Misiliyaakka xeella.)

¹⁵ Nu ammanuwaa minttanawu maaddiya harabay buzo xinaatiyaa. Suuzaana buzo xinaatiyawu prograamiyaa kessiyoogee maaddiyoogaa akeekaasu. A hagaadan gaasu: “Taani Woggaa gallassi, kaalliya saaminttan xannaˈana Wochchiyo Keelaa giigettays. Saynnonne Masqqaynno, saaminttawu gidduwan shiiqiyo shiiquwawu giigettays. Attida gallassatun taani harabaa xannaˈays.” Suuzaana xannaˈanawu kessido prograamiyaa ubbatoo kaalliyo gishshawu, I ammanoy minniis. Daro layttawu waanna biiruwan haggaazida Ayriina, Geeshsha Maxaafaa hiraagaa xannaˈiyoogee ammanuwaa minttiyoogaa akeekaasu. A hagaadan gaasu: “Yihooway qaalaa gelidobay aybinne attennan ubbabay polettidoogee taani maalaalettanaadan oottees.” c

‘TUMUPPE POLETTANA’

16. Yihooway Imbbaaqoomawu yootidobay ha wodiyan nuna waati maaddii? (Ibraawe 10:36, 37)

¹⁶ Yihoowa ashkkaratuppe amaridaageeti daro wodiyawu ha iita alamiyaa wurssettaa naagiiddi takkidosona. Asa xeelan, Xoossay ba gelido qaalaa polanawu takkiyaaba milatana danddayees. Yihooway ba ashkkaratussi siyettiyaabaa akeekees. I hananabaa yootiya Imbbaaqoomawu hagaadan giis: “Ajjuutan beettidabai ba keerettida wodiyaa naagees. He ajjuutai polettiyo wodee eesuwan gakkana; worddo gididi attenna. Takkiyaabaa milatikkokka naaga; aissi giikko, i tumuppe yaana;  gam77enna.” (Imb. 2:3) Yihooway hegaa yootidoy Imbbaaqooma xallaa maaddanaasseeyye, ha wodiyan nunakka maaddanaassee? Kiitettida PHawuloosi, ooratta alamiyaa yeemuwan naagiya Kiristtaanetussi he qofaa yootanaadan Yihooway azaziis. (Ibraawe 10:36, 37 nabbaba.) Yaatiyo gishshawu, Yihooway nuna ashshanawu gelido qaalay polettanawu keehi takkees giidi nuuni qoppikkokka, ‘tumuppe polettanaagaanne gamˈˈennaagaa’ ammanettana danddayoos.

17. Yihooway Imbbaaqoomawu yootidobaa issi michchiyaa waata oosuwan peeshshadee?

¹⁷ Yihoowa ashkkaratuppe daroti “naaga” giidi I azazidobaa azazettidosona. Etappe amaridaageeti daro layttawu hegaadan oottidosona. Leemisuwawu, Luweza 1939n Yihoowawu haggaaziyoogaa doommaasu. A hagaadan gaasu: “He wode, taani naaˈˈantto xekkaa timirttiyaa wurssanaappe kase Armmageedooni doommana gaada qoppaas. SHin hegaadan hanibeenna. Yihooway ba gelido qaalaa polanaashin naagida, Geeshsha Maxaafan etabay odettido cora asatubaa daro layttawu nabbabidoogee taanikka Yihooway ba gelido qaalaa polana gakkanaashin naaganaadan maaddiis. Taani Nohebaa, Abrahaamabaa, Yooseefabaanne Yihooway etawu immana giidobaa ekkanaappe kase daro wodiyaa naagida hara asatubaa nabbabaas. Xoossay qaalaa gelidobati polettanaagaa naagiyoogee taaninne harati ooratta alamee mata wode yaanaagaa ammanettanaadan maaddiis.” Yihoowawu daro layttaa haggaazida haratikka hegan maayettoosona!

18. Meretaa akeekan xeelliyoogee ooratta alamee yaanaagaa mintti ammanaadan waati maaddii?

¹⁸ Ooratta alamee yiichchibeeenagee tuma. SHin neeni beˈana danddayiyo xoolintteta, mittata, mehetanne ne mala asata qoppa. Hegeeti ubbay beettenna wodekka, eti tumuppe deˈiyoogaa siriya asi baawa. Hegeeti deˈana danddayidoy Yihooway eta medhdhido gishshataassa. (Doo. 1:1, 26, 27) Nu Xoossay ooratta alamiyaa ehaanawu qaalaa geliis. I hegaa polana. Ooratta alamiyan ubba asay wottiyoobi baynna hanotan payya gididi merinawu deˈana. Xoossay keerido wodiyan ooratta alamee yaanaagaa ammanettana danddayoos.—Isi. 65:17; Ajj. 21:3, 4.

19. Ne ammanuwaa waata minttana danddayay?

¹⁹ He wodee gakkanaashin, ne ammanuwaa minttanawu neessi danddayettida ubbabaa ootta. Wozuwaa gishshawu ubbatoo Yihoowa galata. Yihoowa wolqqaabaa loytta qoppa. Yihoowakko shiiqanawu maaddiyaabata ootta. Yaatiyoogan, “Xoossai immana giidoogaa ammanuwaaninne genccan [laattiyaageetuppe]” issuwaa gidana danddayaasa.—Ibr. 6:11, 12; Roo. 5:5.