YERUSALAAMEN, Baybil Landis Muuzemiyan, Kiristtoosi yelettanaappe kase 700 layttaappenne 600 layttaappe gidduwan wocetti xaafettida issi shuchchay deˈees. He shuchchay Israaˈeelan Kebroona katamaappe darin haakkennaasan deˈiya mooganawu goˈettiyo gonggoluwaappe beettiis. Woocetti xaafettidabay hagaadan gees: “Yahweh Sabaˈoti Hagava naˈaa Hagafa qanggiis.” Ha woocetti xaafettidabay Geeshsha Maxaafay yootiyoobaara waani maayettii? He shuchchay Xoossaa sunttay Yihoowa woy Yahweh gidiyoogaa bessees; Ibraawettuwan xaafettida YHWH giyo pitalee beni wode loytti erettiyaabanne galla galla goˈettiyooba. Asay demmidi he gonggolotun qosido woocetti xaafettida harabatikka deˈoosona. Xoossaa sunttay godaa bolli xaafettido ogiyaa gujjin A buzo sunttaa eti darotoo xaafidosona.

Jorjjiyan deˈiya Yuniversttiyaa dottoriyaa Rachela Naabalsa he woocetti xaafettidabaa xeelliyaagan hagaadan gaasu: “Ha woocetti xaafettidabatun YHWH giyo sunttay daro sohuwan deˈees. Hegee nuna darobaa tamaarissees. . . . [Geeshsha Maxaafay] yootiyoobatinne wocetti xaafettidabati yootiyoobati Israaˈeela asaynne Yihudaa asay YHWH giyo sunttaa bantta deˈuwan xoqqu ootti xeelliyoogaa bessoosona.” Ibraawetto pitaliyan xaafettida YHWH giyo Xoossaa sunttay shaˈan qoodettiya sohotun Geeshsha Maxaafan deˈees. Darotoo buzo sunttay Xoossaa sunttaa bessiyaaba.

Woocettida shuchchan “Yahweh Sabaˈot” giyo qaalaa birshshettay “olanchchatu Xoossaa Yihoowa” giyoogaa. Yaatiyo gishshawu, beni wodiyan asay Xoossaa sunttaanne “olanchchatu Xoossaa Yihoowa” giyo qonccissuwaa darotoo goˈettidaba milaatees. Hegee koyro Ibraawettuwan Xaafettida Geeshsha Maxaafan 283 sohuwan “olanchchatu Xoossaa Yihoowa,” giya qofaara maayettees; hegaappe dariya baggay Isiyaasa, Ermmaasanne Zakkaariyaasa maxaafan deˈees.