1-2. (a) Nu siiqiyo hayqqida uraa loytti hassayiyoy awudee? (b) Yesuusi hayqqanaappe kase qammi waatidee?

 NUUNI siiqiyo asati hayqqoosappe daro wodee aadhdhikkokka, nuuni eta hassayoos. Nuuni eti hayqqido gallassan, ubba etabaa loytti qoppoos.

² Nuuni loytti siiqiyo Yesuus Kiristtoosi hayqqido gallassaa hassayanawu layttan layttan kumetta saˈan deˈiya miilooniyan qoodettiya asaara issippe shiiqoos. (1 PHe. 1:8) Nuna nagaraappenne hayquwaappe laˈa kessanawu ba shemppuwaa wozo oottidi immidaagaa hassayanawu shiiqoos. (Maa. 20:28) Yesuusi ba hayquwaa bana kaalliyaageeti hassayanaadan koyiis. I hayqqanaappe kase qammi, dumma kahuwaa giigissidi hagaadan azaziis: “Hagan tana hassayite.”—Luq. 22:19.

3. Nuuni ha huuphe yohuwan ay beˈanee?

³ Kiristtoosa hayquwaa hassayanawu shiiqiyaageetuppe amaridaageeti saluwaa biyo hidootay deˈiyoogeeta. SHin saˈan deˈanawu hidootiya miilooniyan qoodettiyaageetikka shiiqoosona. Ha huuphe yohuwan, naaˈˈu citatikka layttan layttan Godaa Kahuwaa wode shiiqanawu yeemottiyoy aybissakko beˈana. Nuuni shiiqiyoogan waani goˈettiyaakkokka pilggana. Tiyettidaageeti shiiqiyo amarida gaasota pilggiyoogan ane doommoos.

4. Tiyettidaageeti Godaa Kahuwaa wode oyttaappe miyoynne woyniyaappe uyiyoy aybissee?

⁴ Tiyettidaageeti layttan layttan Godaa Kahuwaa bonchchanawu shiiqiyo wode oyttaappe moosonaanne woyniyaappe uyoosona. Eti oyttaappe miyoogeenne woyniyaappe uyiyoogee bessiyaaba gidiyoy aybissee? Hegaa zaaranaayyo, Yesuusi saˈan deˈido wurssetta qammi hanidabaa ane beˈoos. Paasikaa baalaappe simmin, Yesuusi Godaa Kahuwaa geetettiya baalaa essiis. Yesuusi oyttaanne woyniyaa I kiittido ammanettida 11tussi immiis, yaatidi eti maanadaaninne uyanaadan yootiis. Yesuusi etawu naaˈˈu maachchatubaa yootiis, hegeekka oorattaa maachchaanne Kawotettaa maachchaa. * (Luq. 22:19, 20, 28-30) Ha maachchati he kiitettidaageetinne hara amaridaageeti saluwan kawonne qeese gidanaadan oottidosona. (Ajj. 5:10; 14:1) Godaa Kahuwaa wode oyttaappe maananne woyniyaappe uyana danddayiyaageeti, ha naaˈˈu maachchan deˈiya tiyettidaageetuppe attidaageetu xalla. *

5. Tiyettidaageeti banttawu imettida hidootaabaa ay eriyoonaa?

⁵ Tiyettidaageeti Godaa Kahuwawu shiiqanawu yeemottiyo hara gaasoy hagaa: Ha baalaa bonchchiyoogee eti bantta hidootaa wotti dentti qoppanaadan maaddees. Yihooway etawu maalaalissiya hidootaa immiis; eti saluwan hayqqennanne musenna deˈuwaa demmana. Qassi hayquwaappe denddida Yesuus Kiristtoosaaranne eta cita gidida 144,000tuura ubba qassi Xoossaa Yihooway deˈiyoosan awu haggaaziyo maatay etawu deˈees! (1 Qor. 15:51-53; 1 Yoh. 3:2) Tiyettidaageeti he maalaalissiya maataa saluwan demmanawu shoobettidoogaa eroosona. SHin eti saluwaa gelanawu, hayqqana gakkanaashin ammanettidi deˈana bessees. (2 Xim. 4:7, 8) Tiyettidaageeti saluwaa biyo bantta hidootaa wotti dentti qoppiyoogee eti keehi ufayttanaadan oottees. (Tii. 2:13) ‘Hara dorssatubaa’ shin? (Yoh. 10:16) Eti Godaa Kahuwaa bonchchanawu shiiqiyo hara gaasoti aybee?

6. Hara dorssati Godaa Kahuwawu shiiqiyoy aybissee?

⁶ Hara dorssati Godaa Kawuwan oyttaappe maana woy woyniyaappe uyana xayikkonne, shiiqiyoogan eti ufayttoosona. Saˈan deˈanawu hidootiyaageeti Godaa Kahuwawu shiiqanaadan koyro shoobettidoy 1938. Laappune 1, 1938 Wochchiyo Keelay, hagaadan gees: “[Hara dorssati] he shiiquwaa shiiqiyoogeenne hegan haniyaabaa beˈiyoogee bessiyaaba. . . . Yaatiyoogee koshshiyaaba, qassi hegee etikka ufayttiyo wode.” Issi bullachchaa shoobettida imattati issippe shiiqiyoogan ufayttiyoogaadan, hara dorssati Godaa Kawuwan oyttaappe maana woy woyniyaappe uyana xayikkonne, shiiqiyoogan ufayttoosona.

7. Hara dorssati Godaa Kahuwaa haasayaa siyanawu yeemuwan naagiyoy aybissee?

⁷ Hara dorssatikka bantta hidootaa wotti dentti qoppoosona. Eti Godaa Kahuwaa haasayaa yeemuwan naagoosona, ha haasayaappe dariya baggay Kiristtoosinne aara issippe haariya 144,000 ammanettida asawu SHaˈu Layttaa Haaruwaa wode oottanabaa qonccissees. Eta Kawoy Yesuus Kiristtoosi  haariyo wode, saluwan uttidi haariyaageeti saˈaa gannate oottiyo oosuwan, qassi asay wottiyoobi baynnaagaa gidanaadan maaddana. Godaa Kahuwaa bonchchanawu shiiqiya miilooniyan qoodettiyaageeti Isiyaasa 35:5, 6; 65:21-23ninne Ajjuutaa 21:3, 4n deˈiyaagaa mala Geeshsha Maxaafaa hiraagati polettiyo wodiyaa qoppiyoogan keehi ufayttoosona. Etinne eti siiqiyoogeeti ooratta alamiyan deˈiyaabadan qoppiyoogan, bantta sinttana hidootaanne Yihoowayyo aggennan haggaazanawu murttido murttiyaa yaa minttoosona.—Maa. 24:13; Gal. 6:9.

8. Hara dorssati Godaa Kahuwawu shiiqiyo hara gaasoy aybee?

⁸ Hara dorssati Godaa Kahuwawu shiiqiyo hara gaasuwaa ane beˈoos. Eti tiyettidaageeta siiqiyoogaanne eta maaddiyoogaa bessanawu koyosona. Tiyettidaageetinne saˈan deˈanawu hidootiyaageeti hashetidi issippe oottanaagaa Xoossaa Qaalay kasetidi yootiis. Waati oottiyoonaa? Ane amarida leemisota beˈoos.

9. Zakkaariyaasa 8:23n deˈiya hiraagay tiyettidaageeta xeelliyaagan hara dorssatuyyo siyettiyaabaa ay qonccissii?

⁹ Zakkaariyaasa 8:23 nabbaba. Tiyettida bantta ishanttanne michchontta xeelliyaagan hara dorssatuyyo siyettiyaabaa ha hiraagay loytti qonccissees. “Issi Aihuda” giyaageenne “inttenaara” giyaagee issi citaa qonccissees, hegeekka tiyettidaageetuppe attidaageetubaa. (Roo. 2:28, 29) ‘Dumma qaalan haasayiya kawotettatu ubbaappe yiida tammu asati’ hara dorssata qonccissoosona. Eti ‘mintti oyqqiyoogee’ tiyettidaageetuura issippe tumu goynuwaa ammanettidi goynniyoogaa bessiyaaba. Hegaa gishshawu, Godaa Kahuwaa bonchchiyo omarssi hara dorssati tiyettidaageetuura issippe shiiqiyoogan etaara hashetiyoogaa bessoosona.

10. Hizqqeela 37:15-19, 24, 25n deˈiya hiraagay polettanaadan Yihooway waatidee?

¹⁰ Hizqqeela 37:15-19, 24, 25 nabbaba. Tiyettidaageetinne hara dorssati loytti hashetidi oottanaadan oottiyoogan Yihooway ha hiraagaa poliis. Ha hiraagay naaˈˈu gatimatubaa yootees. Saluwaa biyo hidootay deˈiyoogeeti ‘Yihudaa’ gatima mala (Israaˈeela kawoti doorettiyo yara), qassi saˈan deˈanawu hidootiyaageeti ‘Efireema’ gatima mala. * Eti ‘issi gatima’ gidanaadan Yihooway naaˈˈu citata issuwaa oottana. Hegaa giyoogee eti bantta Kawuwaa Yesuus Kirsttoosa haaruwan issippetettan haggaazana giyoogaa. Tiyettidaageetinne hara dorssati Godaa Kahuwawu naaˈˈu dumma dumma citadan gidennan, ‘issi heemmiyaagee’ deˈiyo ‘issi wudedan’ layttan layttan shiiqoosona.—Yoh. 10:16.

11. Maatiyoosa 25:31-36, 40n odettida ‘dorssati’ Kirsttoosa ishantta maaddiyoogaa waati bessiyoonaa?

¹¹ Maatiyoosa 25:31-36, 40 nabbaba. Yesuusi yootido ‘dorssati’ saˈan deˈanawu hidootiya wurssetta wodiyan deˈiya xillota bessiyaaba. Kumetta saˈan sabbakiyoonne erissiyo ashkkara oottiyo gita aawatettaa Kirsttoosa ishanttuppe attidaageeti polanaadan hara dorssati eta maaddiyoogan ammanettidi oottoosona.—Maa. 24:14; 28:19, 20.

12-13. Hara dorssati Kiristtoosa ishantta maaddiyo hara ogeti awugeetee?

¹² Layttan layttan Godaa Kahuwaappe kasetiya saaminttatun, hara dorssati kumetta saˈan asaa Godaa Kahuwawu shoobbiyo zamachchan minnidi oottiyoogan Kiristtoosa  ishantta maaddoosona. (“ Neeni Godaa Kahuwaa Wodiyaassi Giigettaydda Deˈay?” giya saaxiniyaa xeella.) Eti bantta gubaaˈiyan tiyettida uri baynnaba gidikkonne, Godaa Kahuwawu koshshiya ubbabaakka giigissoosona. Hara dorssati Kiristtoosa ishantta hegaa mala ogetun maaddiyoogan keehi ufayttoosona. Yesuusi he dorssati tiyettida ba ishanttuyyo oottiyoobaa bawu oottidobadan xeelliyoogaa eti eroosona.—Maa. 25:37-40.

¹³ Nu hidootay ayba gidikkonne, nuuni ubbay Godaa Kahuwawu shiiqiyo hara gaasoti aybee?

14. Yihoowaynne Yesuusi nuna keehi siiqiyoogaa waati bessidonaa?

¹⁴ Yihoowaynne Yesuusi nuuyyo bessido siiquwaa gishshawu nuuni eta galatoos. Yihooway nuna siiqiyoogaa bessido daro ogeti deˈikkonne, I siiquwaa bessido issi ogee hara ubbaappe aadhdhees. Nu Xoossay ba alˈˈo Naˈay nu gishshawu waayettanaadaaninne hayqqanaadan kiittiyoogan I nuna keehi siiqiyoogaa bessiis. (Yoh. 3:16) Yesuusikka ba deˈuwaa nuuyyo aatti immanawu eeno giyoogan nuna keehi siiqiyoogaa bessiis. (Yoh. 15:13) Yihoowaynne Yesuusi nuussi bessido siiquwaa gishshawu nuuni mule kushe zarana danddayokko. Gidikkonne, nu galla galla deˈuwan galatiyoogaa bessana danddayoos. (Qol. 3:15) Qassi eti nuna siiqiyo siiquwaa wotti dentti qoppanawunne nuuni eta siiqiyoogaa bessanawu koyiyo gishshawu Godaa Kahuwaa bonchchanawu shiiqoos.

15. Tiyettidaageetinne hara dorssati wozuwaa imotaa keehi nashshiyoy aybissee?

¹⁵ Wozuwaa imotaa gishshawu nuuni keehi galatoos. (Maa. 20:28) Wozoy tiyettidaageetuyyo maalaalissiya hidootay deˈanaadan oottiyo gishshawu etawu keehi alˈˈoba. Eti Kiristtoosa yarshshuwan ammaniyo gishshawu, Yihooway eta xillodaaninne ba naatudan xeellees. (Roo. 5:1; 8:15-17, 23) Wozuwaa gishshawu hara dorssatikka galatoosona. Eti Kiristtoosa yarshshuwan ammaniyo gishshawu, Xoossaa sinttan geeshsha, ayyo geeshsha goynuwaa goynnana danddayoosona, qassi etawu ‘gita waayiyaappe’ paxa attiyo hidootay deˈees. (Ajj. 7:13-15) Tiyettidaageetinne hara dorssati layttan layttan Godaa Kahuwawu shiiqiyoogee eti wozuwaa gishshawu galatiyoogaa bessiyo issi oge.

16. Nuuni Godaa Kahuwawu shiiqiyo hara gaasoy aybee?

¹⁶ Nuuni Godaa Kahuwawu shiiqiyo hara gaasoy Yesuusawu azazettanawu koyiyo gishshataassa. Nu hidootay awan gidikkonne, nuuni ubbay Yesuusi Godaa Kahuwaa essido qammi immido azazuwa azazettanawu koyoos: “Hagan tana hassayite.”—1 Qor. 11:23, 24.

17. Godaa Kahoy nuuni Yihoowakko loytti shiiqanaadan waati maaddii?

¹⁷ Nuuni Yihoowakko loytti shiiqoos. (Yaaq. 4:8) Nuuni beˈidoogaadan, Godaa Kahoy Yihooway nuuyyo immido hidootaanne I nuuyyo bessido gita siiquwaa wotti dentti qoppanaadan nuna maaddees. (Erm. 29:11; 1 Yoh. 4:8-10) Nuuni ammanttiya nu hidootaanne Xoossay nuna siiqiyo mino siiquwaa wotti dentti qoppiyo wode, nuuni Yihoowa siiqiyo siiqoynne aara dabbotido dabbotay keehi minnees.—Roo. 8:38, 39.

18. Yesuusa leemisuwaa wotti dentti qoppiyoogee ay oottanaadan nuna denttettii?

 ¹⁸ Nuuni Yesuusa leemisuwaa kaallanaadan maaddees. (1 PHe. 2:21) Godaa Kahuwaa wode, Yesuusi saˈan deˈido wurssetta saaminttabaa, A hayquwaabaanne A dendduwaabaa yootiya Geeshsha Maxaafaa taariketa nabbaboos. Qassi Godaa Kahuwaa bonchchiyo omarssi siyiyo haasayay Yesuusi nuna siiqiyo siiquwaa hassayissees. (Efi. 5:2; 1 Yoh. 3:16) Nuuni Yesuusi ba goˈˈaa aggibayidoogaabaa nabbabiyoogeenne hagaa wotti dentti qoppiyoogee ‘I deˈidoogaadan deˈanaadan’ nuna denttettees.—1 Yoh. 2:6.

19. Nuuni Xoossaa siiquwan waani deˈana danddayiyoo?

¹⁹ Nuuni Xoossaa siiquwan deˈanawu murttido murttiyaa yaa minttees. (Yih. 20, 21) Nuuni Xoossawu azazettanawu A sunttay geeyanaadan oottanawunne A wozanaa ufayssanawu nuuyyo danddayettida ubbabaa oottiyoogan A siiquwan deˈoos. (Lee. 27:11; Maa. 6:9; 1 Yoh. 5:3) Nuuni Godaa Kahuwawu shiiqiyoogee Yihoowassi, ‘Taani ne siiquwan merinawu deˈanawu koyays,’ giyoogaa bessiya ogiyan galla galla deˈanawu kaseppe aaruwan murttanaadan nuna denttettees.

20. Nuuni Godaa Kahuwawu shiiqanaadan oottiya gaasoti aybee?

²⁰ Nuuni merinawu deˈanawu hidootiyoy saluwan woy saˈan gidin, Godaa Kahuwawu shiiqanaadan oottiya gaasoti deˈoosona. Layttan layttan he gallassi nuuni issippe shiiqiyo wode nu siiqiyo Yesuus Kiristtoosa hayquwaa hassayoos. Ubbappe aaruwan, Yihooway ba Naˈaa wozo ootti immiyoogan nuuyyo bessido aybippenne aadhdhiya siiquwaa hassayoos. Ha laytti, Godaa Kahuwaa Arbba, Hosppune 15, 2022 omarssan bonchchana. Nuuni Yihoowanne A Naˈaa siiqiyo gishshawu, Yesuusa hayquwaa hassayiyo baalaa bonchchanawu shiiqiyoogaappe aadhdhiya aybinne nuuyyo deˈenna.