1. Yaaqoobantta soo asay ay mala asee?

 YESUUSA ishay Yaaqoobi ayyaanaaban mino gidida keettan dicciis. * A yelidaageeti, Yooseefinne Mayraama Yihoowa keehi siiqoosonanne awu haggaazanawu banttawu danddayettida ubbabaa oottidosona. Yaaqoobi harabankka anjjettiis. A bayra ishay Mase gidiis. He soo asa gidiyoogee Yaaqoobawu gita maata!

2. Yaaqoobi ba ishaa bonchchanaadan oottiya gaasoti aybee?

² Yaaqoobi ba bayra ishaa bonchchanaadan oottiya daro gaasoy deˈees. (Maa. 13:55) Leemisuwawu, Yesuusawu layttay 12 gidido wode, I Geeshsha Maxaafaa loytti eriyo gishshawu, Yerusalaamen deˈiya asttamaareti keehi maalaalettidosona. (Luq. 2:46, 47) Yaaqoobi Yesuusaara anaaxetetta oosuwaa oottennan waayi aggenna. I aara oottidaba gidikko, ba ishaa loytti erana danddayees. Naatan Noori, “Neeni issi uraara oottiyo wode abaa darobaa eraasa” giidi darotoo yootees. * ‘Yesuusi aadhdhida eratettaaninne geesan dicciiddi Xoossaaninne asan sabettidoogaakka’ Yaaqoobi akeekennan waayi aggana. (Luq. 2:52) Hegaa gishshawu, Yaaqoobi Yesuusi erissiyo ashkkara gidida koyroogeetuppe issuwaa giidi qoppana danddayoos. SHin hanidabay hegaa mala gidenna.

3. Yesuusi haggaazuwaa doommido wode Yaaqoobi waanibeennee?

³ Yesuusi saˈan haggaaziyo wode Yaaqoobi I erissiyo ashkkara gidibeenna. (Yoh. 7:3-5) Yaaqoobi Yesuusi ‘Gooyiis’ giidi qoppida dabbotuppe issuwaa gidennan waayi aggana. (Mar.  3:21) Qassi Yesuusi mittaa bolli barchchetidi hayqqiyo wode Yaaqoobi bantta aayee Mayraamiira deˈiyoogaa bessiyaabi baawa.—Yoh. 19:25-27.

4. Nuuni ay tamaaranee?

⁴ Guyyeppe, Yaaqoobi Yesuusa ammaniisinne Kiristtaane gubaaˈiyan bonchchettida cima gidiis. Ha huuphe yohuwan nuuni Yaaqoobappe tamaarana danddayiyo naaˈˈubata beˈana: (1) Nuuni nuna ubbatoo ziqqi oottana koshshiyoy aybissee? (2) Waanidi gooba asttamaare gidana danddayiyoo?

5. Yesuusi hayquwaappe denddi simmidi Yaaqoobawu qonccido wode Yaaqoobi waanidee?

⁵ Yaaqoobi Yesuusa ammanettidi kaalliyaagaa gididoy awudee? Yesuusi hayquwaappe denddi simmidi, “Yaaqoobassi qoncciis; guyyeppe ba kiittido ubbatussi, qoncciis.” (1 Qor. 15:7) Yaaqoobi Yesuusaara gaytti simmidi I erissiyo ashkkara gidiis. Kiitettidaageeti Yerusalaamen deˈiya issi pooqiyan geeshsha ayyaanaa ekkanawu naagiyo wode Yaaqoobikka yan deˈees. (Oos. 1:13, 14) Guyyeppe, Yaaqoobi bolla gididi heemmiyaagaa yara gididi haggaaziis. (Oos. 15:6, 13-22; Gal. 2:9) Qassi 62 M.Lppe, guutta kasetidi ayyaanay kaalettin tiyettida Kiristtaanetussi dabddaabbiyaa I xaafiis. Nu hidootay saluwan woy saˈan gidin ha wodiyan he dabddaabbee nuna maaddees. (Yaaq. 1:1) Ayhuda Qeese Ubbatu Halaqaa Haanna naˈay Hanaanee azazin Yaaqooba woridoogaa Ayhudatu taarikiyaa eranchchay Josefesi xaafiis. Yaaqoobi saˈaa deˈuwaa wurssana gakkanaashin Yihoowawu ammanettidi deˈiis.

6. Yaaqoobi ba wodiyan deˈiya haymaanootiyaa kaalettiyaageetuppe ayba ogiyan dummatii?

⁶ Yaaqoobi bana ziqqi oottiis. Nuuni hegaadan gaana danddayiyoy aybissee? Yaaqoobi wurssettan Yesuusaara gayttidaagan oottidobaa giddooninne haymaanootiyaa kaalettiya daroti oottidobaa giddon deˈiya dummatettaa qoppa. Yesuusi Xoossaa Naˈa gidiyoogaa bessiya qoncce naqaashaa Yaaqoobi akeekido wode, bana ziqqi oottidi hegaa ammaniis. SHin Yerusalaamen deˈiya qeese halaqati hegaadan oottibookkona. Leemisuwawu, Yesuusi Alˈˈaazara hayquwaappe denttidoogaa eti kashi gaana danddayokkona. SHin Yesuusi Yihooway kiittin yiidoogaa eti ammanibookkona. Qassi eti Yesuusakka Alˈˈaazarakka woranawu malidosona. (Yoh. 11:53; 12:9-11) Guyyeppe, Yesuusi hayquwaappe denddido wode eti hegaa asaappe qosanawu  malidosona. (Maa. 28:11-15) Haymaanootiyaa kaalettiyaageeti otorettiyo gishshawu eti Masiyaa ammanibookkona.

7. Nuuni otorettennaadan naagettana koshshiyoy aybissee?

⁷ Nuuni ay tamaariyoo? Otorettennan aggiyoogaanne Yihoowappe tamaaranawu eeno giyoogaa. Harggee issi ura wozanay maaraa oottennaadan diggana danddayiyoogaadan, otoroy nuuni Yihoowa kaaletuwaa kaallennaadan diggana danddayees. Parisaaweti keehi otorettiyo gishshawu, Yesuusa bolli Xoossaa ayyaanay deˈiyoogaanne I Xoossaa Naˈa gidiyoogaa bessiya qoncce naqaashaa ammanibookkona. (Yoh. 12:37-40) Otoroy eti merinaa deˈuwaa demmennaadan diggido gishshawu hegee keehi iitaba. (Maa. 23:13, 33) Xoossaa Qaalaynne A ayyaanay nu eeshshaa, nu qofaanne nu kuuyiyoobaa laammanaadan ubbatoo eeno giyoogee keehi koshshiyaaba! (Yaaq. 3:17) Yaaqoobi bana ziqqi oottido gishshawu, Yihoowappe tamaaranawu eeno giis. Qassi nuuni kaallidi beˈanaagaadan, I bana ziqqi oottiyo gishshawu gooba asttamaare gidiis.

8. Nuuni gooba asttamaare gidanaadan nuna aybi maaddanee?

⁸ Yaaqoobi darin tamaaribeenna asa. A wodiyan deˈiya haymaanootiyaa kaalettiyaageeti kiitettida PHeexiroosadaaninne Yohaannisadan Yaaqoobikka “tamaaribeenna coo asa” giidi qoppennan aggokkona. (Oos. 4:13) SHin Yaaqoobi gooba asttamaare gidiis. Nuuni Geeshsha Maxaafan A sunttan xeegettiya maxaafaa nabbabiyo wode hegaa akeekoos. Yaaqoobadan nuunikka loytti tamaaribeennaageeta gidana danddayoos. Gidikkonne, Yihoowa ayyaanaa maaduwaaninne A dirijjitiyaappe demmiyo maaddiya loohissuwan nuunikka gooba asttamaare gidana danddayoos. Yaaqoobi asttamaare gidiyoogan leemiso gidiyoogaanne nuuni hegaappe tamaarana danddayiyoobaa ane beˈoos.

9. Yaaqoobi tamaarissido ogiyaa qonccissa.

⁹ Yaaqoobi akeekanawu metiya woy qonccissanawu waayissiya qaalata goˈettibeenna. Hegaappe denddidaagan, I xaafidobaa nabbabiyaageeti ay oottana koshshiyaakko, qassi hegaa waati oottanaakko eridosona. Leemisuwawu,  Kiristtaaneti naaqoy gakkiyo wode yiillotennan genccana koshshiyoogaa Yaaqoobi akeekanawu metenna ogiyan tamaarissidoogaa qoppa. I hagaadan giis: “Danddayidi genccidaageeta nuuni anjjettidaageeta geettees. Iyyooba genccaa intte siyideta; qassi Godai ayyo wurssettan immidoogaakka be7ideta. Aissi giikko, Godai maarotainne qaretai kumidoogaa.” (Yaaq. 5:11) Yaaqoobi ba ishantta Geeshsha Maxaafaappe tamaarissidoogaa akeeka. Yihooway Iyyoobadan bawu ammanettiyaageeta ubbatoo anjjiyoogaa I xaafidobaa nabbabiyaageeti akeekanaadan maaddanawu I Xoossaa Qaalaa goˈettiis. Yaaqoobi akeekanawu metenna qaalata goˈettiyoogaaninne geliya ogiyan qonccissiyoogan he timirttiyaa tamaarissiis. Yaatiyoogan, asay xeelaa A bollan gidennan, Yihoowa bolli wottanaadan oottiis.

10. Nuuni tamaarissiyo wode Yaaqooba milatana danddayiyo issi ogee aybee?

¹⁰ Nuuni ay tamaariyoo? Geliya ogiyan yoota; qassi Xoossaa Qaalaappe tamaarissa. Nuuni harata tamaarissiyo wode, nu ay keena eriyaakko eta bessana koshshenna; shin Yihooway eta loytti eriyoogaanne I etassi loytti qoppiyoogaa nuuni qonccissana koshshees. (Roo. 11:33) Nuuni ubbatoo Geeshsha Maxaafaappe tamaarissiyoogan hegaadan oottana danddayoos. Leemisuwawu, nuuni Geeshsha Maxaafaa xannaˈissiyoogeetussi nu oottanabaa yootiyoogaappe Geeshsha Maxaafan etabay odettidoogeetubaa eti qoppanaadaaninne Yihoowa qofaanne awu siyettiyaaba akeekanaadan nuuni eta maaddana koshshees. Yaatikko eti nuna gidennan, Yihoowa ufayssanawu koyiyo gishshawu tamaaridobaa oosuwan peeshshana.

11. Yaaqooba wode deˈida amarida Kiristtaanetussi deˈiya metoy aybee, qassi I eta zorido zoree aybee? (Yaaqooba 5:13-15)

¹¹ Yaaqoobi hanotaa akeekiya asa. Yaaqoobi ba mala Kiristtaaneta gakkiiddi deˈiya metuwaa akeekidoogaa I xaafido dabddaabbee qonccissees; qassi eti waanana koshshiyaakko qoncce zoriyaa zoriis. Leemisuwawu, amarida Kiristtaaneti zoriyaa sohuwaara oosuwan peeshshokkona. (Yaaq. 1:22) Harati dureta dummayidi xeelloosona. (Yaaq. 2:1-3) Harati qassi bantta inxxarssaa naaganawu metootoosona. (Yaaq. 3:8-10) He Kiristtaanetussi gita metoy deˈikkonne, eti laamettana danddayiyoogaa Yaaqoobi ammanettiis. I kehatettan qoncce zoriyaa zoriis; qassi laamettanawu maadoy koshshiyoogeeti cimata maaduwaa oychchanaadan I minttettiis.—Yaaqooba 5:13-15 nabbaba.

12. Nuuni nu xinaateta maaddiyo wode ubbatoo loˈˈobaa qoppiyaageeta waani gidana danddayiyoo?

¹² Nuuni ay tamaariyoo? Haratu hanotaa akeekikkonne, etabaa loˈˈobaa qoppiyoogaa. Nuuni Geeshsha Maxaafaa xannaˈissiyo daroti ha zoriyaa oosuwan peeshshanawu metootana danddayoosona. (Yaaq. 4:1-4) Iita meezeta aggiyoogeenne loˈˈo eeshshati deˈiyoogeeta gidiyoogee etawu wode ekkiyaaba gidana danddayees. Nuuni xannaˈissiyoogeeti giigissana koshshiyoobata yootanawu Yaaqoobadan xala gidana koshshees. Qassi nuuni ubbatoo loˈˈobaa qoppiyaageeta gidana koshshees, banttana ziqqi oottiya asata Yihooway baakko ehaanaagaanne eti bantta deˈuwan laamettanaadan eta maaddanaagaa ammanettoos.—Yaaq. 4:10.

13. Yaaqooba 3:2n qonccidaagaadan, Yaaqoobi ay akeekidee?

¹³ Yaaqoobi babaa ubbatoo bessiyaagaadan xeelliis. Yaaqoobi Yesuusa isha gidiyo gishshawu woy gita aawatettay awu deˈiyo gishshawu hara Kiristtaanetuppe aadhdhiyaabadan qoppibeenna. I ba mala Kiristtaaneta “ta siiqo ishatoo” giidi xeesiis. (Yaaq. 1:16, 19; 2:5) I harati bana wottiyoobi baynna asa giidi qoppanaadan oottanawu  malibeenna. Yaaqoobi, “Nuuni ubbaikka daroban baleettees” giidi banakka gujjidi yootiis.—Yaaqooba 3:2 nabbaba.

14. Nuuni baliyoogaa yootana koshshiyoy aybissee?

¹⁴ Nuuni ay tamaariyoo? Nu ubbay nagaranchcha gidiyoogaa hassaya. Nuuni nu tamaarissiyoogeetuppe aadhdhiyaabadan qoppana koshshenna. Aybissi? Nuuni balennabadan nu xinaatee qoppanaadan nuuni oottikko, I wottiyoobi baynna ogiyan Xoossawu azazettana mule danddayikke giidi qoppana danddayiyo gishshawu hidootaa qanxxana danddayees. SHin, Geeshsha Maxaafay yootiyo maarata kaallanawu nuuni metootido wodee deˈiyoogaanne nu deˈuwan nuuni laamettanaadan Yihooway nuna waati maaddidaakko yootiyoogee nuuni Geeshsha Maxaafaa xannaˈissiyo urikka Yihoowawu haggaazana danddayiyoogaa akeekanaadan maaddana.

15. Yaaqoobi ay mala leemisota goˈettidee? (Yaaqooba 3:2-6, 10-12)

¹⁵ Yaaqoobi loˈˈo leemisota goˈettiis. Geeshsha ayyaanay A maaddidoogee qoncce gidikkonne, I ba bayra ishay Yesuusi goˈettido leemisota xannaˈiyoogan waati tamaarissanaakko darobaa tamaarennankka aggenna. Yaaqoobi ba dabddaabbiyan goˈettido leemisoti akeekanawu metennaageetanne etappe tamaariyoobay qoncce.—Yaaqooba 3:2-6, 10-12 nabbaba.

16. Nuuni loˈˈo leemisota goˈettana koshshiyoy aybissee?

¹⁶ Nuuni ay tamaariyoo? Loˈˈo leemisota goˈettiyoogaa. Neeni loˈˈo leemisota goˈettiyo wode, asay ne tamaarissiyoobaa beˈiyaabadan qoppanaadan maaddaasa. Yaatiyoogee ne tamaarissiyoobaa siyiyaageeti Geeshsha Maxaafaa tumaa hassayanaadan maaddees. Loˈˈo leemisota goˈettiyoogan Yesuusi keehi gooba; qassi A ishay Yaaqoobi A leemisuwaa kaalliis. Yaaqoobi goˈettido leemisotuppe issuwaa ane pilggoos; qassi hegee loˈˈo gididoy aybissakko beˈoos.

17. Yaaqooba 1:22-25n deˈiya leemisoy keehi loˈˈo gidiyoy aybissee?

¹⁷ Yaaqooba 1:22-25 nabbaba. Yaaqoobi heregaa leemisuwaa goˈettidoogee loˈˈo gidiyo daro gaasoy deˈees. I issibaa tamaarissiis; hegeekka nuuni Xoossaa Qaalaappe goˈettanawu, nabbabiyoogaappe aarobaa oottana koshshees; nuuni nabbabidobaa oosuwan peeshshana koshshees. Yaaqoobi I xaafidobaa nabbabiyaageeti sohuwaara akeekanaadan heregan bana xeelliya uraa leemisuwaa yootiis.  I tamaarissidobay aybee? Issi uri bana heregan xeelliyo wode giigissana danddayiyoobaa akeekidi hegaa giigissennan aggiyoogee eeyyatetta. Hegaadankka, nuuni Xoossaa Qaalaa nabbabiyo wode nu eeshshan laammana koshshiyaabay deˈiyoogaa akeekidi, hegaa laammana xayikko hegee eeyyatetta.

18. Nuuni leemisuwawu goˈettiyo wode oottana koshshiya heezzubay aybee?

¹⁸ Neeni leemisuwaa goˈettiyo wode heezzubaa oottiyoogan Yaaqooba milatana danddayaasa: (1) Leemisoy neeni tamaarissiyoobaa qonccissanawu maaddiyaakkonne akeeka. (2) Ne tamaarissiyoobaa ezggiyaageeti sohuwaara akeekana danddayiyo leemisuwaa goˈetta. (3) He leemisuwaappe tamaariyoobay qoncce gidanaadan ootta. Neeni loˈˈo leemisota demmanawu metootiyaaba gidikko, Wach Tawur Pablikeeshins Indeksiyan (Inggilizettuwaa) beˈa. “Ilastreshins,” giyaagaa giddon neeni goˈettana danddayiyo daro leemisota demmaasa. Maykiraafoonee cenggurssay loytti siyettanaadan oottiyoogaadan, leemisoti timirttee loytti qonccanaadan oottiyoogaa hassaya. Hegaa gishshawu ne goˈettiyo leemisoy neeni tamaarissanawu koyiyo waannaba xalla qonccissiyaagaa gidana koshshees. Tamaarissiyoogan nuuni gooba gidanawu koyiyo waanna gaasoy asay xeelaa nu bolli wottanaadan gidennan, danddayettida keenan daro asay ufayttiya Yihoowa soo asaappe issuwaa gidanaadan maaddanaassa.

19. Nuuni nu ishanttanne michchontta siiqiyoogaa waati bessiyoo?

¹⁹ Yaaqoobawu nagaranchcha gidenna bayra ishay deˈees; shin nuussi baawa. Gidoppe attin, so asa gidida Kiristtaane ishanttuuranne michchonttuura Yihoowawu haggaaziyo gita maatay nuussi deˈees. Etaara wodiyaa aattiyoogaaninne etappe tamaariyoogan, qassi sabbakiyoonne tamaarissiyo oosuwaa ammanettidi etaara issippe oottiyoogan eta siiqiyoogaa bessoos. Nu qoppiyooban, nu eeshshaaninne tamaarissiyo hiillan Yaaqooba milatanawu baaxetiyo wode Yihoowa bonchchissoos; qassi ashkke asay saluwan deˈiya siiqiya nu Aawaakko shiiqanaadan maaddoos.