1. Daawita ayba metoy gakkidee?

 DAAWITI issi uri A woranawu koyido gishshawu baqatiis. Israaˈeela kawoy Saaˈooli A woranawu murttiis. Daawitawu qumay koshshido wode, Nooba katamaa biidi ichchashu oytta xalaalaa oychchiis. (1 Sam. 21:1, 3) Guyyeppe inne A asay gonggoluwan qosettidosona. (1 Sam. 22:1) Daawiti ay mala hanotan deˈii?

2. Saaˈooli oottido keehi iitabay aybee? (1 Sameela 23:16, 17)

² Daawiti daro olan xoonidoogaa gaasuwan daro asay A dosido gishshawunne sabbido gishshawu Saaˈooli Daawita bolli keehi qanaatiis. Qassi Saaˈooli Yihoowawu azazettibeenna gishshawu Yihooway A koyibeennaagaanne Daawiti sinttappe kawo gidanaadan Yihooway dooridoogaa Saaˈooli erees. (1 Sameela 23:16, 17 nabbaba.) SHin Saaˈooli he wodekka Israaˈeela kawo, qassi awu daro olanchchatinne A bagga gidiya daroti deˈiyo gishshawu Daawiti ba shemppuwawu baqatiis. Xoossay Daawita kawo oottennaadan Saaˈooli diggana danddayiyaabadan qoppidee? (Isi. 55:11) Geeshsha Maxaafay hegaabaa yootennaba gidikkonne, nuuni issibaa ammanettana danddayoos: Saaˈooli keehi iitabaa oottiis. Xoossaa eqettiyaageeti ubbatoo xoonettoosona!

3. Daawita metiyaabay gakkikkonne A xeelay aybee?

³ Daawiti bana ziqqi oottiya asa. I Israaˈeela kawo gidanawu koyibeenna. Yihooway I kawo gidanaadan dooriis. (1 Sam. 16:1, 12, 13) Saaˈooli Daawita keehi ixxees. SHin Daawiti bana gakkida metuwaa gaasuwan Yihoowa amassalibeenna. Qassi Daawiti baayyo guutta qumay deˈiyo wodenne I gonggoluwan qosettana koshshido wode amassalibeenna. Ha huuphe yohuwawu  denddo gidida xiqisiyaa gujjin ufayssiya sabaa mazamuriyaa I xaafidoy he gonggoluwan qosettido wode gidennan waayi aggana: ‘Yihoowa koyiyaageetussi loˈˈobi aybinne paccenna.’—Maz. 34:10.

4. Nuuni beˈana oyshati awugeetee, qassi he oyshati keehi koshshiyoy aybissee?

⁴ Ha wodiyan Yihoowa ashkkaratuppe daroti gidiya qumaa woy deˈuwaassi koshshiya harabaa issi issitoo demmokkona. * Ubba qassi mata wodeppe ha simmin ubbasaa gakkida harggiya wodiyan hegaadan haniis. Qassi ‘gita waayee’ mati mati biyo wode hanotay yaa iitana. (Maa. 24:21) He hanotaa qoppiiddi ane oyddu oyshata zaaroos: Daawitawu ‘loˈˈobi aybinne paccibeennay’ ayba ogiyaanee? Nuuni nuussi deˈiyaabay gidana giyoogaa tamaarana koshshiyoy aybissee? Yihooway nuussi koshshiyaabaa kunttanaagaa nuuni ammanettiyoy aybissee? Qassi sinttappe gakkanabawu nuuni haˈˈi waani giigettana danddayiyoo?

5-6. Daawiti Xoossaa ashkkaratuyyo “lo77obi aibinne paccenna” giido wode woyganawu koyidaakko akeekanaadan Mazamure 23:1-6y nuna waati maaddii?

⁵ Daawiti Yihoowa ashkkaratuyyo “lo77obi aibinne paccenna” giido wode woyganawu koyidee? Daawiti Mazamure 23 xaafido wode hegaa mala qofaa goˈettiis. Yaatiyo gishshawu I gaana koyidobaa nuuni akeekanaadan he mazamure nuna maaddana danddayees. (Mazamure 23:1-6 nabbaba.) Daawiti he mazamuriyaa hagaadan giidi doommiis: “GODAI ta henttanchchaa; taayyo aibinne paccenna.” Daawiti he mazamuriyan kaalliya paydotun keehi koshshiyaabata, hegeekka I Yihoowa ba Henttanchchaadan xeellido gishshawu Yihooway awu immido loˈˈobata yootiis. Yihooway A “xillotettaa ogiyan” kaalettees, qassi loˈˈo wodetuuninne iita wodetun I Daawita ubbatoo maaddees. Daawiti Yihoowa “aaca qooruwan” deˈikkonne bana metoy gakkanaagaa I erees. I “haiquwaa milatiya xumaa giddoora” biido gishshawunne ayyo morkketi deˈiyo  gishshawu, I issi issitoo hidootaa qanxxennan waayi aggana. SHin Yihooway A Henttanchchaa gidiyo gishshawu ‘iitabawu yayyibeenna.’

⁶ Yaatiyo gishshawu hagee Daawitawu ‘loˈˈobi aybinne paccibeennay’ ayba ogiyaanee giya oyshawu zaaro. I Yihoowaara dabbotido dabbotaa naagidi deˈanawu koshshiya ubbabay awu deˈees. A ufayssay assi deˈiyaabaara gayttidaba gidenna. Daawiti Yihooway immidoban ufayttidi deˈiis. Yihooway A anjjidoogaanne naagidoogaa I xoqqu ootti xeelliis.

7. Luqaasa 21:20-24y yootiyoogaadan, koyro xeetu layttan Yihudan deˈiya Kiristtaaneta gakkida metoy aybee?

⁷ Nuuni aquwaa bessiyaagaadan xeelliyoogee keehippe koshshiyaaba gidiyoogaa Daawiti yootidobaappe akeekana danddayoos. Nuussi deˈiya aqoy ayba gidikkonne, nuuni ufayttana danddayoos; shin nuuni nu deˈuwan hegaa xoqqu ootti xeellana bessenna. Koyro xeetu layttan Yihudan deˈiya Kiristtaaneti he tumaa akeekidosona. (Luqaasa 21:20-24 nabbaba.) Yerusalaame katamay ‘wotaaddaran direttana’ wode yaanaagaa Yesuusi etawu yootiis. Hegee haniyo wode eti ‘deriyaakko baqatana’ koshshiis. Eti he katamappe kiyikko bantta shemppuwa ashshana, shin eti darobaa aggi baana. Amarida layttappe kase, Wochchiyo Keelay hegaabaa hagaadan giis: “Eti gadiyaanne keettaa aggi biidosona, ubba qassi bantta son deˈiyaabaa shiishshanawu guyye simmibookkona. Eti Yihooway banttana naaganaagaanne maaddanaagaa ammanettidosona, qassi eti koshshees giidi qoppiyo aybippenne aaruwan A goynuwaa kaseyidosona.”

8. Koyro xeetu layttan Yihudan deˈiya Kiristtaaneta gakkidabaappe keehi koshshiyaabaa ay tamaarana danddayiyoo?

⁸ Koyro xeetu layttan Yihudan deˈiya Kiristtaaneta gakkidabaappe keehi koshshiyaabaa ay tamaarana danddayiyoo? Qommoora odettida Wochchiyo Keelay hagaadan giis: “Nuuni aquwaa xeelliyo ogiyaara gayettidaagan sinttaappe nuna paacciyaabay gakkana danddayees; Nuussi keehi koshshiyay aqooyye, Xoossaa bagga gididaageeti demmana atotettee? Wurssettay gakkiyo wode nuuni metiyaabata gencciyoogeenne issi issibata aggi bayiyoogee koshshana danddayees. Yihudaappe baqatida Kiristtaanetudan koshshiyaabaa aybanne oottanawu nuuni eeno gaana bessees.” *

9. PHawuloosi Ibraawe Kiristtaaneta zorido zoree nena waati minttettii?

⁹ He Kiristtaaneti banttawu deˈiya ubbabaa aggi bayiyoogeenne deˈuwaa wotti yeggi doommiyoogee etawu ay keena deexxiyaabaakko qoppana danddayay? Banttawu koshshiyaabaa Yihooway kunttanaagaa eti ammanettana koshshiis. SHin eta maaddana danddayiya issibay deˈees. Roomati Yerusalaame katamaa dooddanaappe ichchashu laytta kasetidi kiitettida PHawuloosi Ibraawe Kiristtaaneta maaddiya zoriya zoriis: “Miishsha siiqoppe inttena naagite; intteyyo de7iyaagee intteyyo gido. Aissi giikko, Xoossai ba huuphen, ‘Taani nena mulekka yeggikke woikko aggikke’ yaagiis. Hegaa gishshau, nuuni xalidi, ‘Godai tana maaddiyaagaa; taani yayyikke. Asi tana ai oottii?’ yaagoos.” (Ibr. 13:5, 6) Roomati woraajjanaappe kase PHawuloosa zoriyaa oosuwan peeshshidaageetuyyo ooratta heeran sima deˈuwaa meezetanaagee metennaba gidiyoogee qoncce. Etawu koshshiyaabaa Yihooway kunttanaagaa eti ammanettidosona. Yihooway nuussi koshshiyaabaa kunttanaagaa nuunikka ammanettana danddayiyoogaa PHawuloosi yootidobay qonccissees.

10. PHawuloosi tamaaridobay aybee?

¹⁰ PHawuloosi Ximootiyoosakka hegaa mala zoriyaa zoriis, qassi he zoree nuussikka hanees. I hagaadan giis: “SHin miyoobainne maayiyoobai de7ikko, hegee nuuyyo gidana.” (1 Xim. 6:8) Hegaa giyoogee nuuni malˈˈiya qumaa maana, loˈˈiya keettan deˈana woy issi issitoo ooratta maayuwaa shammana koshshenna giyoogee? PHawuloosi yootana koyidobay hegaa gidenna. Nuussi deˈiyaabay ayba gidikkonne, hegee gidana giidi nuuni deˈana koshshiyoogaa PHawuloosi yootiis. (Pili. 4:12) PHawuloosi tamaaridobay hegaa. Nuussi deˈiya aquwaappe keehi alˈˈobay nuuni Xoossaara dabbotido dabbotaa.—Imb. 3:17, 18.

11. Nuuni nuussi deˈiyaabay gidana giidi deˈiyoogaa xeelliyaagan Muusee Israaˈeelatussi yootidobaappe ay tamaariyoo?

¹¹ Nuussi koshshiyaabaa xeelliyaagan nuuni qoppiyoobaynne Yihooway qoppiyoobay dummatana danddayees. Israaˈeelati bazzuwan 40 layttawu takki simmin Muusee etawu yootidobaa qoppa: “GODAI intte Xoossai intte oottidobaa ubbaa anjjiis; intte ha gooba bazzuwan hemettiyo wode, inttena naagiis. Ha oitamu laitta ubban GODAI intte Xoossai inttenaara de7iis. Aibanne intteyyo pacissibeenna.” (Zaa. 2:7) He 40 layttatun, Israaˈeelati maanaadan Yihooway mannaa immiis. Yihooway eta maayoy wurennaadan oottiis. Yaatiyo gishshawu, eti Gibxxeppe kiyo wode maayido maayuwaa he wodekka goˈettoosona. (Zaa. 8:3, 4) Amaridaageeti hegee guuttaba  giidi qoppennan waayi aggana, shin Israaˈeelatussi koshshiya ubbabay deˈiyoogaa Muusee eta hassayissiis. Nuuni nuussi deˈiyaabay gidana giidi deˈiyo wode Yihooway ufayttana. I nuussi immido guuttabaa gishshawukka nuuni A galatanaadaaninne hegaa immidaagee A gidiyoogaa nuuni akeekanaadan I koyees.

12. Daawiti banan gidennaan, Yihoowan ammanettiyoogaa bessiyaabay aybee?

¹² Yihooway A siiqiyaageetuyyo ammanettiyoogaanne koshshiyaabaa kunttiyoogaa Daawiti erees. Daawiti 34ta Mazamuriyaa xaafido wode, hirggissiya hanotan deˈiyaaba gidikkonne, “GODAA kiitanchchai” ba “yuushuwan” deˈiyoogaa eriyo gishshawu I Yihoowan ba ammanuwaa minttiis. (Maz. 34:7) Daawiti Yihoowa kiitanchchaa olaa dembban morkkiya ubbatoo wochchiya wotaaddaraara geeddarssennan waayi aggana. Daawiti gooba wotaaddara, qassi I kawo gidanaagaa Yihooway yootiis, shin Daawiti morkkiya xoonanawu yambbarshshaa yambbariyo woy bisuwaa goˈettiyo meeziyan ammanettibeenna. (1 Sam. 16:13; 24:12) Yihoowa yayyiyaageeta ‘A kiitanchchay ashshiyoogaa’ eriyo gishshawu Daawiti Xoossan ammanettiis. Nuuni ha wodiyan maalaalissiya ogiyan naaguwaa demmana giidi qoppennaagee qoncce. SHin nuuni Yihoowan ammanettiya ooninne merinawu xayennaagaa eroos.

13. Maagooga Googi qohuwaa gattiyo wode nuuni naagiyaabi baynnaba milatiyoy aybissee, shin nuuni yayyana koshshennay aybissee? (Koyro sinttan deˈiya misiliyaa xeella.)

¹³ Mata wode, Yihooway nuna naagana danddayiyoogaa xeelliyaagan nuuni an ammanettiyoogee paacettana. Maagooga Googi, hegeekka issippe denddiya kawotettati Xoossaa asaa qohiyo wode, eti nuna worana danddayoosona giidi nuuni qoppana danddayoos. Yihooway nuna ashshana danddayiyoogaanne ashshanaagaa nuuni ammanettana koshshees. Kawotettatu xeelan nuuni naagiyaabi baynna dorssa mala. (Hiz. 38:10-12) Nuuyyo ola miishshati baa, qassi olettanawu loohibookko. He kawotettati nuna metoottennan xoonana giidi qoppana. Yihoowa kiitanchchati nuna naaganawu giigetti uttidoogaa eti erokkona. SHin nuussi ammanoy deˈiyo gishshawu nuuni hegaa eroos. He kawotettati Xoossaa ammanokkona. Saluwaa olanchchati nu gishshawu olettiyo wode eti keehi dagammana!—Ajj. 19:11, 14, 15.

14. Sinttappe gakkanabawu nuuni haˈˈi giigettanawu ay oottana danddayiyoo?

¹⁴ Sinttappe gakkanabawu nuuni haˈˈi giigettanawu ay oottana danddayiyoo? Nuuyyo deˈiyaabay issi galla xayana danddayoogaa akeekiyo gishshawu, nuuni aquwaa bessiyaagaadan xeellana koshshees. Qassi nuuni nuussi deˈiyaabay gidana giidi deˈiyaageetanne nuuni Yihoowaara dabbotidoogan keehi ufayttiyaageeta gidana koshshees. Nuuni nu Xoossaa loytti erikko, Maagooga Googi qohuwaa gattiyo wode I nuna naagana danddayiyoogaa mintti ammanoos.

15. Daawiti bana Yihooway maaddanaagaa qoppanaadan oottiya, yelagatettan A gakkidabay aybee?

¹⁵ Daawita maaddida harabaanne nuuni paaciyawu giigettanaadan nuna maaddana danddayiyaabaa qoppa. Daawiti hagaadan giis: “GODAI keha gidiyoogaa xeelli be7ite. Akko baqatiya asi anjjettidaagaa.” (Maz. 34:8) He qofay Daawiti Yihoowa maaduwaa ammanettana danddayidoy aybissakko eriyoogaa qonccissees. Daawiti ubbatoo Yihoowan ammanettiis, qassi A Xoossay ubbatoo A maaddiis. Daawiti yelagatettan, wogga wolqqaama  asa gidida Pilisxxeemiyaa Gooliyaadaara olettiis; qassi he gooba olanchchawu hagaadan giis: “Hachchi GODAI nena ta kushiyan aatti immana.” (1 Sam. 17:46) Guyyeppe, Daawiti Saaˈoolawu haggaaziyo wode Saaˈooli A woranawu darotoo maliis. SHin ‘Yihooway Daawitaara deˈees.’ (1 Sam. 18:12) Daawiti Yihoowa maaduwaa kase demmido gishshawu, bana gakkiya metuwan Yihooway maaddanaagaa erees.

16. Yihoowa loˈˈotettaa nuuni ‘xeelli beˈana’ danddayiyo ogeti awugeetee?

¹⁶ Nuuni ha wodiyan Yihoowa kaaletuwan mintti ammanettikko I nuna sinttappe ashshana danddayiyoogaa loytti ammanettana. Nuuni gita shiiqota shiiqanawu nuna ootissiyaagaa piqaadiyaa oychchiyoogee, woy gubaaˈe shiiqota ubbaa shiiqanawunne kaseegaappe aaruwan haggaazanawu nu oosuwaa prograamiyaa laammanaadan nuna ootissiyaagaa oychchiyoogee koshshana danddayees. Yaatanawu nuuni ammanoy deˈiyoogeetanne Yihoowan ammanettiyaageeta gidana koshshees. Nuna ootissiyaagee nuuyyo paqqadibeennabadaaninne nuuni nu oosuwaappe yedetettidabadan qoppa. Yihooway nuna mule yeggennaagaa woy aggennaagaanne I nuussi koshshiyaabaa ubbatoo kunttiyoogaa ammanettiyoo? (Ibr. 13:5) Ubba wode haggaaziya darotuyyo keehi maadoy koshshido wode, Yihooway eta waati maaddidaakko eti yootana danddayoosona. Yihooway ammanettiyaagaa.

17. Layttaa xiqise 2022gee aybee, qassi hegee bessiyaaba gididoy aybissee?

¹⁷ Yihooway nunaara deˈiyo gishshawu sinttanaabaa nuuni yayyiyo gaasoy baa. Nuuni nu deˈuwan A Kawotettaabaa kaseyikko, Xoossay nuna mule aggenna. Sinttappe yaana metiya gallassatussi nuuni haˈˈi giigettananne Yihooway nuna mule aggennaagaa ammanettana koshshiyoogaa nuna hassayissanawu, Bolla Gididi Heemmiyaagee Mazamure 34:10y, 2022 layttaa xiqise gidanaadan dooriis: ‘Yihoowa koyiyaageetussi loˈˈobi aybinne paccenna.’