1-2. (a) Yesuusa deˈuwaabaanne haggaazuwaabaa wotti dentti qoppiyoogee nuuni waananaadan oottana danddayii? (b) Nuuni ha huuphe yohuwan ay beˈanee?

 NUUNI siiqiyo uri hayqqiyo wode, he uraa keehi laamotoos! Nu siiqiyo uri keehi waayettidi hayqqidaba gidikko, I hayqqanaappe kase hanidabaa qoppidi koyro heeran keehi azzanana danddayoos. Amarida wodiyaappe guyyiyan, he uri nuna tamaarissidobaa woykko I nuna minttettanawu woy miichchanawu oottidobaa woy giidobaa qoppidi zaarettidi ufayttana danddayoos.

² Hegaadankka, Yesuusa waayiyaabaanne hayquwaabaa nabbabiyoogee nuuni azzananaadan oottees. Yesuusa wozuwaa yarshshoy ay keena alˈˈobakko Godaa Kahoy bonchchettanaappe kasenne bonchchetti simmin deˈiya saaminttatun wotti dentti qoppoos. (1 Qor. 11:24, 25) SHin Yesuusi saˈan deˈiyo wode yootidonne oottido ubbabata wotti dentti qoppiyo wode nuuni keehi ufayttoos. Qassi I haˈˈi nuussi oottiiddi deˈiyoobaanne sinttappe oottanabaa qoppiyoogee nuna minttettees. Nuuni ha huuphe yohuwan beˈanaagaadan, hegeetanne I nuna siiqido siiquwaabaa wotti dentti qoppiyoogee nuuni nashshiyoogaa oosuwan bessanaadan oottana danddayees.

3. Nuuni wozuwaa gishshawu galatanaadan oottiyaabati awugeetee?

³ Nuuni Yesuusa deˈuwaabaanne hayquwaabaa qoppiyo wode Yihoowa keehi galatoos. Yesuusi saˈan haggaazido wode, Xoossaa Kawotettay ehaana anjjotubaa asaa tamaarissiis. Geeshsha Maxaafay tamaarissiyo wozuwaabaanne hegee nuussi demissiyo loˈˈobaa keehi nashshoos. Wozoy nuuni Yihoowaaranne Yesuusaara mata dabbo gidanaadan oottido  gishshawu, Yihoowa keehi galatoos. Yesuusan ammaniyaageetussi merinawu deˈiyoonne hayqqida bantta siiqiyoogeetuura zaarettidi gayttiyo hidootaykka deˈees. (Yoh. 5:28, 29; Roo. 6:23) He anjjota nuuni demmanay nu oottidobaa gishshataassa gidenna; woy Xoossaynne Kiristtoosi nuussi oottidobawu nuuni mule qanxxana danddayokko. (Roo. 5:8, 20, 21) SHin nuuni hegaa ay keena nashshiyaakko bessana danddayoos. Waatidi?

4. Magddala giyo katamaappe yiida Mayraama Yesuusi iyyo oottidobawu nashshiyoogaa bessanawu ay oottadee? (Misiliyaa xeella.)

⁴ Magddala giyo katamaappe yiida Mayraamo giyo Ayhuda maccaasee hanotaa akeekite. Laappun xalaheti iini gelidi O tuggayido gishshawu A keehi waayettaasu. A bana ooninne maaddana danddayennabadan qoppennan aggukku. Yaatiyo gishshawu, Yesuusi he xalaheta ippe kessido wode A ay keena galatidaakko qoppite! Nashshiyoogee A Yesuusa kaallanaadan, qassi ba wodiyaa, ba wolqqaanne bawu deˈiyaabaa A maaddanawu goˈettanaadan oottiis. (Luq. 8:1-3) Mayraama, Yesuusi iyyo oottidobaa keehippe nashshidaba gidikkonne, I sinttappe hegaappe aadhdhiyaabaa iyyo oottanaagaa waaya erana. An “ammaniya ubbai” merinaa deˈuwaa demmanaadan, I ba shemppuwaa asaa gishshawu aattidi immana. (Yoh. 3:16) Gidikkonne, Mayraama nashshiyoogaa Yesuusawu ammanettiyoogan bessaasu. Yesuusi kaqettidi waayettiyo wode A Yesuusa matan eqqada anne harata minttettaasu. (Yoh. 19:25) Mayraamanne hara naaˈˈu maccaasati, Yesuusi hayqqi simmin A anhaa tiyanawu shittuwaa ehiidosona. (Mar. 16:1, 2) Mayraama Yesuusawu ammanettido gishshawu, Yihooway O keehippe anjjiis. Hayquwaappe denddi simmidi Yesuusi iira gayttidi haasayiis. Erissiyo ashkkaratuppe amaridaageetu xallay he maataa demmidosona.—Yoh. 20:11-18.

5. Yihoowaynne Yesuusi nuussi oottido ubbabawu nashshiyoogaa waati bessana danddayiyoo?

⁵ Nuunikka nu wodiyaa, wolqqaanne miishshaa Yihoowa oosuwawu goˈettiyoogan,  Yihoowaynne Yesuusi nuussi oottidobawu nashshiyoogaa bessana danddayoos. Leemisuwawu, Yihoowa goynuwawu goˈettiyo keettata keexxiyoogaaninne bottokoniyoogan maaddana danddayoos.

6. Wozoy nuussi huuphiyan huuphiyan imettida imota gididoy aybissee?

⁶ Yihoowaynne Yesuusi nuna ay keena siiqidaakko qoppiyoogee, nuunikka eta siiqanaadan oottees. (1 Yoh. 4:10, 19) Nuuni Yesuusi nuussi huuphiyan huuphiyan hayqqidoogaa eriyo wode, ubba eta kaseegaappe aaruwan siiqoos. Kiitettida PHawuloosi hegaa akeekiis, qassi ‘Xoossaa Naˈay tana siiqidi, ta gishshawu ba huuphiyaa immiis’ giidi Galaatiyan deˈiyaageetussi xaafido wode, nashshiyoogaa qonccissiis. (Gal. 2:20) Yihooway neeni A dabbo gidanaadan wozuwaa baggaara nena baakko ehiis. (Yoh. 6:44) Yihooway nenan loˈˈobaa beˈidi, neeni A dabbo gidanaadan keehi alˈˈobaa qanxxidoogaa eriyoogee neeni keehi ufayttanaadan oottennee? Hegee neeni Yihoowanne Yesuusa kaseegaappe aaruwan siiqanaadan oottennee? Yaatiyo gishshawu, nuuni nuna hagaadan oychchana koshshees: ‘He siiqoy taani ay oottanaadan giddii?’

7. Misiliyan qonccidaagaadan, nuuni ubbay Yihoowanne Yesuusa siiqiyoogaa waati bessana danddayiyoo? (2 Qoronttoosa 5:14, 15; 6:1, 2)

⁷ Xoossaanne Kiristtoosa siiqiyoogee, nuuni harata siiqanaadan oottees. (2 Qoronttoosa 5:14, 15; 6:1, 2 nabbaba.) Nuuni siiqiyoogaa bessiyo issi ogee minnidi sabbakiyoogaa. Nuuni nunaara gayttiya asa ubbawu sabbakoos. Issi uri nuuppe zariyan woy yaran dummatiyo gishshawu, nuuni awu yootiyoogaa aggokko. Qassi dure, tamaaridaagaa, hiyyeesaa woy tamaaribeennaagaa gidin, ubbawu sabbakoos. Yaatiyo wode, nuuni Yihoowa halchchuwaara maayettiyaabaa oottoos;  I, “asai ubbai attanaadaaninne tumatettaa eranaadan” koyees.—1 Xim. 2:4.

8. Nu ishanttanne michchontta siiqiyoogaa waati bessana danddayiyoo?

⁸ Nuuni nu ishanttanne michchontta siiqiyoogankka, Xoossaanne Kiristtoosa siiqiyoogaa bessoos. (1 Yoh. 4:21) Metoy eta gakkiyo wode, nuuni etawu koshshiyaabaa kunttoosinne eta maaddoos. Eti siiqiyo uri hayqqiyo wode eta minttettoos, sahettiyo wode eta oychchoos, qassi hidootaa qanxxiyo wode eta minttettoos. (2 Qor. 1:3-7; 1 Tas. 5:11, 14) “Xillo asa woosai wolqqaama oosuwaa” oottiyoogaa nuuni eriyo gishshawu, etawu ubbatoo woossoos.—Yaaq. 5:16.

9. Nuuni nu ishanttanne michchontta siiqiyoogaa bessana danddayiyo hara ogee aybee?

⁹ Nuuni nu ishanttuuranne michchonttuura sarotettan deˈanawu baaxetiyoogankka, eta siiqiyoogaa bessana danddayoos. Nuuni atto giyoogan Yihoowa leemisuwaa kaallanawu baaxetoos. Yihooway nu nagaraa gishshawu ba Naˈay hayqqanaadan eeno giis. Yaatiyo gishshawu, nuunikka nu ishanttinne michchontti nuna naaqqiyo wode atto gaanawu eeno gaana koshshees. Yesuusi yootido leemisuwan qonccida iita ashkkaraa mala gidanawu koyokko. A goday ayyo keehi daro acuwaa maarikkokka, I ba mala ashkkaraa guutta acuwaa maarennan ixxiis. (Maa. 18:23-35) Neeni gubaaˈiyan issi uraara maayettabeennabay deˈikko, Godaa Kahoy bonchchettanaappe kase, neeni kasetada sarotettaa medhdhana danddayay? (Maa. 5:23, 24) Neeni yaatikko, Yihoowanne Yesuusa keehi siiqiyoogaa bessaasa.

10-11. Cimati Yihoowanne Yesuusa siiqiyoogaa waati bessana danddayiyoonaa? (1 PHeexiroosa 5:1, 2)

¹⁰ Cimati Yihoowanne Yesuusa siiqiyoogaa waati bessana danddayiyoonaa? Yaatiyo waanna ogee Yesuusa dorssatuyyo qoppiyoogaa. (1 PHeexiroosa 5:1, 2 nabbaba.) Yesuusi kiitettida PHeexiroosawu ha qofaa loytti qonccissiis. PHeexiroosi Yesuusa heezzutoo kaddi simmidi, Yesuusa siiqiyoogaa qonccissanawu keehi koyiis. Yesuusi hayquwaappe denddi simmidi PHeexiroosa, “Yoona na7au Simoonaa, tana siiqai?” yaagidi oychchiis. PHeexiroosi ba Godaa siiqiyoogaa bessanawu bawu danddayettida ubbabaa oottidoogaa ammanettana danddayoos. Yesuusi PHeexiroosawu hagaadan giis: “Ta dorssata heemma.” (Yoh. 21:15-17) PHeexiroosi ba deˈo laytta ubban Godaa dorssatuyyo wozanappe qoppiyoogan, Yesuusa siiqiyoogaa qonccissiis.

¹¹ Cimatoo, Godaa Kahoy bonchchettanaappe kasenne bonchchetti simmin deˈiya saaminttatun, Yesuusi PHeexiroosawu yootidobaa intte xoqqu ootti xeelliyoogaa waati bessana danddayeetii? Ishanttanne michchontta ubbatoo minttettiyoogaaninne ayyaanaaban shuggidaageeti Yihoowakko simmanaadan maaddiyoogan, Yihoowanne Yesuusa keehi siiqiyoogaa bessana danddayeeta. (Hiz. 34:11, 12) Godaa Kahuwaa bonchchanawu yiida, Geeshsha Maxaafaa xinaatetanne tumaa siyanawu koyiya harata minttettanawu baaxetana danddayeeta. Etikka Yesuusa kaalliyaageeta gidana giidi nuuni hidootiyo gishshawu, eta mokki ekkanawu koyoos.

12. Yesuusi hayqqanaappe kase qammi haasayidobaa wotti dentti qoppiyoogee nuuni xalanaadan maaddiyoy aybissee? (Yohaannisa 16:32, 33)

¹² Yesuusi hayqqanaappe kase qammi erissiyo ashkkaratussi hagaadan giis: “Sa7an intte waayettana. SHin minnite; taani sa7aa xoonaas.” (Yohaannisa 16:32, 33 nabbaba.) Yesuusi ba morkketi yashissido wode xalanaadaaninne hayqqana gakkanaashin ammanettidi deˈanaadan maaddidabay aybee?  I Yihoowan ammanettiis. Yesuusi bana kaalliyaageetakka hegaa mala paacee gakkanaagaa eridi, Yihooway eta naaganaadan oychchiis. (Yoh. 17:11) Hegee nuuni xala gidanaadan maaddiyoy aybissee? Yihooway nu morkketu ubbaappe mino gidiyo gishshataassa. (1 Yoh. 4:4) Yihooway ubbabaa beˈees. Nuuni Yihoowan ammanettikko, yashshaa xoonidi xala gidanaadan I maaddanaagaa ammanettoos.

13. Armmaatiyaasa Yooseefi xala gidiyoogaa waati bessidee?

¹³ Armmaatiyaasa Yooseefa leemisuwaa qoppite. Ayhudatu giddon I keehi bonchchettida asa. I Ayhuda xoqqa pirdda keettan, Sanhedirina yame. Gidikkonne, Yesuusi saˈan haggaaziyo wode Yooseefi xala gidenna. I “Aihudatuyyo yayyido gishshau, asi erennan Yesuusa kaalliyaagaa” gidiyoogaa Yohaannisi yootiis. (Yoh. 19:38) Yooseefi Kawotettaa mishiraachuwaa siyanawu koyikkonne, I Yesuusa ammaniyoogaa harati eranaadan koyibeenna. I Yesuusi erissiyo ashkkara gidiyoogaa harati erikko, eti bana bonchchiyoogaa aggana giidi yayyennan waayi aggana. Gaasoy aybakka gidin, Yesuusi hayqqi simmin “Yooseefi xalidi PHilaaxoosakko biidi, Yesuusa a[n]haa ekkanau” oychchidoogaa Geeshsha Maxaafay yootees. (Mar. 15:42, 43) Haˈˈi Yooseefi Yesuusi erissiyo ashkkara gidiyoogaa haratuppe genttanawu malibeenna.

14. Neeni asawu yayyiyoogaa agganawu ay oottana koshshii?

¹⁴ Yooseefaagaadan neeni asawu yayya eray? Timirtte keettan woy ooso sohuwan neeni Yihoowa Markka gidiyoogaa haratuyyo yootanawu issi issitoo yayyay? Harati nebaa woyganaakko ga hirggada aassiyaagaa gidanawu woy xammaqettanawu mammottay? Hegaa mala qofay neeni loˈˈobaa oottiyoogaa digganaadan oottoppa. Wozanappe Yihoowa woossa. Neeni A sheniyaa oottanawu xalatettaa immanaadan A oychcha. Neeni Yihooway ne woosaa zaariyoogaa beˈiyo wode, kaseppe aaruwan xalanne mino gidana.—Isi. 41:10, 13.

15. Yesuusi ba erissiyo ashkkaratussi qoncci simmin, eta ufayssay eti ay oottanaadan maaddidee? (Luqaasa 24:52, 53)

¹⁵ Yesuusi hayqqido wode erissiyo ashkkarati keehi azzanidosona. He hanotay inttena gakkidabadan ane qoppite. Eti siiqiyo laggee hayqqidoogaa xalla gidennan, eta hidootaykka xayidabadan etawu siyettiis. (Luq. 24:17-21) SHin, Yesuusi etawu qonccido wode, I Geeshsha Maxaafaa hiraagaa waati polidaakko  eti akeekanaadan maaddanawu wodiyaa bazziis. Qassi I etawu keehi koshshiya oosuwaa immiis. (Luq. 24:26, 27, 45-48) Yesuusi saluwaa bin 40 gallassaappe guyyiyan erissiyo ashkkarati azzaniyoogaa aggidi keehi ufayttidosona. Yesuusi paxa deˈiyoogaanne etawu imettida oosuwaa polanaadan I eta maaddanaagaa eriyoogee eti ufayttanaadan oottiis. Eta ufayssay eti aggennan Yihoowa sabbanaadan maaddiis.—Luqaasa 24:52, 53 nabbaba; Oos. 5:42.

16. Yesuusi erissiyo ashkkaratu leemisuwaa nuuni waati kaallana danddayiyoo?

¹⁶ Yesuusi erissiyo ashkkaratu leemisuwaa waati kaallana danddayiyoo? Godaa Kahuwaa bonchchanaappe kasenne bonchchi simmin deˈiya saaminttatu xallan gidennan, laytta kumettaa Yihoowawu goynniyoogan ufayttana danddayoos. Yaatanawu, Xoossaa Kawotettaa nu deˈuwan kaseyana koshshees. Leemisuwawu, daroti haggaazanawu, shiiqota shiiqanawunne so asaa goynuwaa ubbatoo goynnanawu bantta ooso prograamiyaa giigissidosona. Issoti issoti gubaaˈiyan loytti maaddanawu woy aassiyaageeti keehi koshshiyoosan haggaazanawu, harati keehi koshshiyaabadan qoppiyo aquwaabaa aggibayidosona. Nuuni ubbatoo Yihoowawu haggaazanawu genccana koshshikkokka, nu deˈuwan Kawotettaabaa kaseyikko, I nuna anjjanawu qaalaa geliis.—Lee. 10:22; Maa. 6:32, 33.

17. Ha laytti Godaa Kahoy bonchchettiyo wodiyan ay oottanawu murttadii? (Misiliyaa xeella.)

¹⁷ Masqqaynno, Hosppune 4n Godaa Kahuwaa bonchchanawu yeemuwan naagoos. Gidikkonne, Yesuusa deˈuwaabaanne hayquwaabaa, qassi inne Yihooway nuussi bessido siiquwaabaa wotti dentti qoppanawu he gallassay gakkanaashin naagoppite. Godaa Kahoy bonchchettanaappe kasenne bonchchetti simmin deˈiya saaminttatun intteyyo danddayettida keenan hegaabaa darotoo qoppite. Leemisuwawu, “Xoossaa Qaalaa Xannaˈanawu Maaddiyaabaa” giya bukleetiyan 16ttan deˈiya charttiyaa goˈettidi, “Yesuusi Saˈan Deˈido Wurssettaa Saaminttaa” giya huuphe yohuwaa garssan deˈiyaabata nabbabanawunne wotti dentti qoppanawu wodiyaa bazzite. Intte Yesuusa deˈuwaabaa nabbabiyo wode, kaseegaappe aaruwan nashshanawu, siiqanawu, xala gidanawunne ufayttanawu maaddiya qofaa Geeshsha Maxaafaappe demmanawu baaxetite. Yaatidi, intte wozanappe nashshiyoogaa bessanawu danddayiyo ogeta qoppanawu malite. Godaa Kahuwaa bonchchanaappe kasenne bonchchi simmin deˈiya saaminttatun, intte A hassayanawu oottiyo ubbabaa Yesuusi xoqqu ootti xeelliyoogaa ammanettana danddayeeta.—Ajj. 2:19.