XANNAˈIYO HUUPHE YOHUWAA 4
Nuuni Godaa Kahuwaa Bonchchanawu Oottiyoobaa Yihooway Anjjees
“Hagan tana hassayite.”—LUQ. 22:19.
MAZAMURE 19 Godaa Kahuwaa
HA XINAATIYAN a
1-2. Nuuni layttan layttan Godaa Kahuwaa bonchchanawu shiiqiyoy aybissee?
YESUUSI 2,000 gidiya layttaappe kase, nuuni merinaa deˈuwaa demmanaadan nu gishshawu ba deˈuwaa immiis. Yesuusi hayqqanaappe kase qammi, baalaa bonchchanawu guutta oyttaanne woyniyaa goˈettiyoogan, I siiquwan oottidobaa hassayanaadan bana kaalliyaageeta azaziis.—1 Qor. 11:23-26.
2 Nuuni Yesuusa keehippe siiqiyo gishshawu awu azazettoos. (Yoh. 14:15) Layttan layttan, Godaa Kahuwaa bonchchanaappe kasenne bonchchi simmin deˈiya saaminttatun, Yesuusa hayqoy asaa waati maaddiyaakko wotti dentti qoppanawunne woossanawu wodiyaa bazziyoogan I nuussi oottidobawu nashshiyoogaa bessoos. Qassi, ha dumma baalan asay nunaara shiiqanaadan shoobbanawu kaseegaappe aaruwan ufayssan haggaazoos. Hegaa bollikka, nuuni Godaa Kahuwaa bonchchanawu shiiqiyoogaa aybinne diggennaadan oottanawu murttida.
3. Nuuni ha huuphe yohuwan ay beˈanee?
3 Yihoowa asay Yesuusa hayquwaa hassayanawu banttawu danddayettida ubbabaa oottiyo heezzu ogeta nuuni ha huuphe yohuwan beˈana: (1) Yesuusi eta tamaarissidoogaadan Godaa Kahuwaa bonchchiyoogan, (2) harata Godaa Kahuwaa Baalawu shoobbiyoogan, qassi (3) metiya hanotati deˈishinkka Godaa Kahuwaa bonchchiyoogan.
YESUUSI TAMAARISSIDOOGAADAN GODAA KAHUWAA BONCHCHIYOOGAA
4. Layttan layttan Godaa Kahuwaa bonchchiyo wode nuuni tamaariyo tumay aybee, qassi nuuni he tumaa xaasayi xeellana bessennay aybissee? (Luqaasa 22:19, 20)
4 Layttan layttan Godaa Kahuwaa bonchchiyo wode, daro oyshatuyyo qoncce zaaruwaa yootiya Geeshsha Maxaafaappe shiiqiya haasayaa ezggoos. Wozoy asawu aybissi koshshidaakko, qassi issi ura hayqoy daro asaa nagaraa waati atto giissiyaakko tamaaroos. He haasayay oyttaynne woynee aybiyyo leemisokko, qassi oyttaa maananne woyniyaa uyana koshshiyaageeti oonakko nuna hassayissana. (Luqaasa 22:19, 20 nabbaba.) Qassi, saˈan merinawu deˈanawu hidootiyaageeti sinttappe demmana ufayssiya hidootaabaa nuuni loytti qoppanaadan maaddana. (Isi. 35:5, 6; 65:17, 21-23) Nuuni ha tumaa xaasayi xeellana koshshenna. Daro biiloone asati hegaa erokkona, qassi Yesuusa yarshshoy ay keena koshshiyaabakko akeekokkona. Hegaa bollikka, eti I tamaarissidoogaadan A hayquwaa Hassayiyo Baalaa bonchchokkona. Aybissi?
5. Kiitettidaageetuppe daroti hayqqi simmin, asay Yesuusa hayquwaa ayba ogiyan bonchchiyoogaa doommidee?
5 Yesuusi kiittidoogeetuppe daroti hayqqi simmin sohuwaara, worddo Kiristtaaneti gubaaˈiyaa gelidosona. (Maa. 13:24-27, 37-39) Eti Yesuusa “kaalliyaageetakka bantta geeduwaa kaalettanau wordduwaa” haasayidosona. (Oos. 20:29, 30) Worddo Kiristtaaneti tamaarissido ‘worddo timirttetuppe’ issoy, Geeshsha Maxaafay yootiyoogaadan Yesuusi “daro asaa nagaraa xayssanawu issitoo” yarshshettibeenna, I darotoo yarshsho gididi hayqqana bessees giidi tamaarissiyoogaa. (Ibr. 9:27, 28) Ha wodiyan daro asay he worddo timirttiyaa ammanees. Eti saaminttan saaminttan, ubba issi issitoo galla galla, Yesuusa yarshshuwaa bonchchanawu woosa keetti boosona; hegee Kaatolike haymaanootiyan, “Qurbbaanaa Siraataa” b geetettees. Hara haymaanoote dirijjitiyan deˈiyaageeti Yesuusa hayquwaa Hassayiyo Baalaa bonchchanawu shiiqiyoy darotoo gidenna; shin Yesuusa yarshshoy eta waati goˈˈiyaakko akeekokkona. Issoti issoti, ‘Yesuusa hayqoy tumuppe ta nagaraa atto giissana danddayii?’ giidi oychchana danddayoosona. Eti hegaadan oychchiyoy aybissee? Yesuusa hayquwan nagaray atto geetettana danddayenna giidi daro asay yootiyoobaa eti ammaniyo gishshataassa. Hegaara gayttidaagan tumuppe Yesuusa kaalliyaageeti waatidonaa?
6. Geeshsha Maxaafaa tamaareti 1872n akeekidobay aybee?
6 Geeshsha Maxaafaa tamaareti, CHarles Tez Raasili kaalettin 1870n Geeshsha Maxaafaa loytti pilggiyoogaa doommidosona. Eti Yesuusa yarshshoy tumuppe asaa waati maaddiyaakko, qassi A hayquwaa waati bonchchanaakko eranawu koyidosona. Yesuusi asa ubbaa ashshanawu wozo gididi hayqqidoogaa eti 1872n akeekidosona. Eti hegaabaa bantta xallawu eridi aggiigibookkona; shin eti maxaafatu, gaazeexatunne maxeetetu baggaara harati hegaabaa eranaadan oottidosona. Hegaappe simmin daro takkennan, koyro xeetu layttan deˈida Kiristtaanetuugaadan eti Godaa Kahuwaa bonchchanawu layttan issitoo shiiqiyoogaa doommidosona.
7. Kase deˈida Geeshsha Maxaafaa Tamaareti pilggidobaappe nuuni goˈettiyoy ayba ogiyaanee?
7 Daro layttaappe kase he Kiristtaaneti pilggidobaappe ha wodiyan nuuni goˈettana danddayoos. Waanidi? Yesuusa yarshshuwaabaa, qassi hegee nuussinne asa ubbawu ay oottanaakko akeekanaadan Yihooway nuna maaddiis. (1 Yoh. 2:1, 2) Xoossaa ufayssiya asawu naaˈˈu hidootay deˈiyoogaa, hegeekka amaridaageeti saluwan hayqqenna deˈuwaa deˈanaagaa, qassi hara daro miiloone asay saˈan merinawu deˈanaagaa Geeshsha Maxaafaappe nuuni akeekida. Yihooway nuna ay keena siiqiyaakko, qassi nuuni ubbay Yesuusa yarshshuwaappe ay keena goˈettiyaakko akeekiyo wode, Yihoowakko kaseegaappe aaruwan shiiqoos. (1 PHe. 3:18; 1 Yoh. 4:9) Yaatiyo gishshawu, kase deˈida ammanettida ishanttuugaadan, Yesuusi bana kaalliyaageeta tamaarissido maaran Godaa Kahuwaa nunaara bonchchanaadan harata shoobboos.
HARATA GODAA KAHUWAWU SHOOBBIYOOGAA
Neeni Godaa Kahuwawu shoobbiyo zamachchan loytta oottanawu waatana danddayay? (Mentto 8-10 xeella) e
8. Yihoowa asay harata Godaa Kahuwawu shoobbanawu ay oottidee? (Misiliyaa xeella.)
8 Yihoowa asay daro layttawu Godaa Kahuwawu asaa shoobbiis. Amarkkan deˈiya ishanttinne michchontti 1881 doometta heeran Penssilvaaniyan, Alegenin, issi ishaa son he baalawu shiiqanaadan Wochchiyo Keelan erissoy kiyiis. Guyyeppe ubba gubaaˈeti Godaa Kahuwaa bantta gubaaˈiyan gubaaˈiyan bonchchidosona. Laappune 1940n, aassiyaageeti bantta moottan deˈiya siyanawu koyiya oonanne shoobbana danddayiyoogee etawu odettiis. Beeteelen deˈiyaageeti koyro wodiyawu, attamettida shoobe woraqataa 1960n gubaaˈetussi giigissidosona. He wodeppe doommidi daro biiloone shoobe woraqatay asawu imettiis. Nuuni harata shoobbanawu hegaa keenaa baaxetiyoy aybissee?
9-10. Nuuni harata Godaa Kahuwawu shoobbiyoogan goˈettiyaageeti oonee? (Yohaannisa 3:16)
9 Harati nunaara Godaa Kahuwaa bonchchanaadan nuuni shoobbiyo issi gaasoy, he baalaa bonchchanawu koyro wodiyawu shiiqiyaageeti Yihoowaynne Yesuusi nuussi oottido ubbabaa eranaadan nuuni koyiyo gishshataassa. (Yohaannisa 3:16 nabbaba.) Godaa Kahuwaa bonchchiyo wode eti beˈiyoobaynne siyiyoobay, gujjidi tamaaranaadaaninne Yihoowa ashkkara gidanaadan eta maaddana giidi hidootoos. SHin haratikka loytti goˈettoosona.
10 Nuuni Yihoowawu haggaaziiddi aggidaageetakka shoobboos. Xoossay eta haˈˈikka siiqiyoogaa eta hassayissanawu nuuni hegaadan oottoos. Daroti shoobettidi yoosona, qassi nuuni eta beˈiyoogan keehi ufayttoos. Eti Godaa Kahuwaa bonchchanawu shiiqiyoogee, kase Yihoowawu haggaaziyo wode eti ay keena ufayttidaakko hassayanaadan oottees. Moniki hanotaa beˈa. c Koronaa harggiyaa wode A zaarettada sabbakiyoogaa doommaasu. Godaa Kahuwaa A 2021n bonchcha simmada hagaadan gaasu: “Ha Godaa Kahuwaa Baalay tawu keehi dumma. Taani 20 layttaappe simmin koyro wodiyawu asawu sabbakaasinne eti Godaa Kahuwaa bonchchanaadan shoobbaas. Yihoowaynne Yesuusi tawu oottidobawu eta nashshiyoogaa bessanawu koyido gishshawu, harata shoobbanawu tawu danddayettida ubbabaa oottaas.” (Maz. 103:1-4) Asay nu shoobiyaa ekkin aggin, Yihooway nu oottiyoobaa nashshiyoogaa eriyo gishshawu, eta shoobbanawu nuussi danddayettida ubbabaa oottoos.
11. Nuuni asaa Godaa Kahuwawu shoobbanawu oottidobaa Yihooway waati anjjidee? (Hagga 2:7)
11 Nuuni asaa Godaa Kahuwawu shoobbanawu oottidobaa Yihooway keehi anjjiis. Koronaa harggiyaa gaasuwan darobay teqettikkokka, 2021n shiiqida asaa qooday 21,367,603. Hagee kumetta saˈan deˈiya Yihoowa Markkatu qoodaappe naaˈˈu kushenne bagga gidiyaagaa darees. Yihooway ufayttiyoy daro asay shiiqidoogaa xallaana gidennaagee qoncce. I shiiqida asa ubban ufayttees. (Luq. 15:7; 1 Xim. 2:3, 4) Nuuni harata shoobbiyo wode, siyanawu koyiyaageeta demmanaadan Yihooway nuna maaddanaagaa ammanettana danddayoos.—Hagga 2:7 nabbaba.
METIYAABATI DEˈISHINKKA GODAA KAHUWAA BONCHCHIYOOGAA
Nuuni Godaa Kahuwaa bonchchanawu oottiyoobaa Yihooway anjjees (Mentto 12 xeella) f
12. Nuuni Godaa Kahuwaa bonchchanawu metootanaadan oottana danddayiya hanotati aybee? (Misiliyaa xeella.)
12 Wurssettaa gallassatun so asay eqettiyoogaa, yedetaa, olaanne ubbasaa gakkiya harggiya mala metiyaabati nuna gakkanaagaa Yesuusi kasetidi yootiis. (Maa. 10:36; Mar. 13:9; Luq. 21:10, 11) Ha hanotati nuuni issi issitoo Yesuusa hayquwaa Hassayiyo Baalaa bonchchanawu metootanaadan oottana danddayoosona. Nu ishanttinne michchontti he metota xoonanawu ay oottidonaa, qassi Yihooway eta waati maaddidee?
13. Artemi qasho keettan deˈiiddi Godaa Kahuwaa bonchchanawu xalidoogaanne murttidoogaa Yihooway waati anjjidee?
13 Qashuwaa. Bantta ammanuwaa gaasuwan qashettida nu ishantti Yesuusa hayquwaa Hassayiyo Baalaa bonchchanawu banttawu danddayettida ubbabaa oottidosona. Artema hanotaa beˈa. I 2020n Godaa Kahoy bonchchettanaappe kasenne bonchchetti simmin deˈiya saaminttatun, ichchashu asay deˈiyo issi guutta kifiliyan he wode qashettiis. I qashuwan deˈiyaaba gidikkonne, Godaa Kahuwawu goˈettiyoobata demmiis; qassi Godaa Kahuwaa haasayaa bawu haasayanawu halchchiis. SHin aara issi kifiliyan qashettida harati tambbuwaa cuwayoosonanne cayettoosona. Yaatin I waatidee? Eti cayettiyoogaanne tambbuwaa cuwayiyoogaa issi saate xallawu agganaadan I eta oychchiis. Godaa Kahuwaa bonchchiyo wode aara qashettidaageeti tambbuwaa cuwayiyoogaa woy cayettiyoogaa agganawu maayettidoogee Artema keehi garamissiis. Artemi hagaadan giis: “Taani etawu Godaa Kahuwaabaa yootaas.” Eti hegaabaa siyanawu koyennaagaa yootikkonne, Artemi Godaa Kahuwaa bonchchiyoogaa beˈidinne siyi simmidi hegaa xeelliyaagan ubbabaa A oychchidosona.
14. Yihoowa asay kooronay deˈishinkka Godaa Kahuwaa bonchchanawu ay oottidee?
14 Koronaa. Koronaa gaasuwan Yihoowa asay issippe gayttidi Godaa Kahuwaa bonchchanawu danddayibeenna. SHin hegee eti Godaa Kahuwaa bonchchennaadan diggibeenna. d Intternneetiyaa demmana danddayiya gubaaˈeti Godaa Kahuwaa biiduwan gayttidi bonchchidosona. Gidikkonne, Intternneetiyaa demmana danddayenna daro miiloone asay shin? Issi issi biittatun asay haasayaa televizhiiniyan beˈanaadan woy eraadooniyan ezgganaadan macara biiroy hanotaa giigissiis. Hegaa bollikka, gaxare heeran deˈiyaageeti Godaa Kahuwaa bonchchanaadan macara biiroy 500ppe dariya doonatun haasayay duuqettanaadan oottiis. Qassi duuqettida biiduwaa, ishantti hegee koshshiyo heeran deˈiya ishanttussi immidosona.
15. Geeshsha Maxaafaa xannaˈiya Suu hanotaappe ay tamaaray?
15 So asay eqettiyoogaa. Issoti issoti Godaa Kahuwaa bonchchennaadan diggiya wolqqaama metoy so asay eqettiyoogaa. Geeshsha Maxaafaa xannaˈiya Suu hanotaa beˈa. Suu 2021n Godaa Kahoy bonchchettiyo gallassaappe kasetada, so asay eqettiyo gishshawu Godaa Kahuwaa bonchchanawu shiiqana danddayennaagaa bana xannaˈissiyaarissi yootaasu. O xannaˈissiyaara Luqaasa 22:44 iyyo nabbabaasu. A yaata simmada, nuna paacee gakkiyo wode Yihoowa woossiyoogaaninne kumetta wozanaappe an ammanettiyoogan Yesuusa leemisuwaa kaallana koshshiyoogaa iyyo qonccissaasu. Kaalliya gallassi, Suu oyttaanne woyniyaa giigissaasu; qassi jw.org saytiyan kiyida maallado goynuwawu giigida prograamiyaa beˈaasu. A he qammi barkka silkkiyan Godaa Kahuwaa baalawu shiiqaasu. Hegaappe simmin, Suu bana xannaˈissiyaarissi hagaadan xaafaasu: “Neeni zino tana keehi minttettadasa. Godaa Kahuwaa bonchchanawu taani tawu danddayettida ubbabaa oottido gishshawu, Yihooway tana maaddiis. Taani keehi ufayttaas, qassi Yihoowa keehi galatays.” Nenakka hegaa malabay gakkikko, Yihooway nena maaddana danddayees gaada qoppay?
16. Nuuni Godaa Kahuwaa bonchchanawu oottiyoobaa Yihooway anjjanaagaa ammanettiyoy aybissee? (Roome 8:31, 32)
16 Nuuni Yesuusa hayquwaa hassayanawu oottiyoobaa Yihooway keehi nashshees. I nuussi oottidobaa nuuni nashshiyo wode, I nuna anjjanaagaa ammanettana danddayoos. (Roome 8:31, 32 nabbaba.) Simmi yaakko, ha laytti Godaa Kahuwaa bonchchanawunne Godaa Kahoy bonchchettanaappe kasenne bonchchetti simmin deˈiya saaminttatun Yihoowawu kaseegaappe aaruwan oottanawu murttidaageeta gidoos.
MAZAMURE 18 Wozuwaa Gishshawu Galatiyoogaa
a Masqqaynno, Hosppune 4, 2023n kumetta saˈan deˈiya daro miiloone asay Kiristtoosa hayquwaa Hassayiyo Baalaa bonchchana. Daroti koyro wodiyawu shiiqana. Yihoowawu haggaaziyoogaa aggidanne daro layttawu Hassayiyo Baalaa bonchchibeenna haratikka shiiqana. Issoti issoti keehi metiya hanotata xoonidi shiiqana. Ne hanotay ayba gidikkonne, shiiqanawu neeni baaxetiyo baaxiyan Yihooway ufayttanaagaa ammanettana danddayaasa.
b He haymaanootiyaa kaalliyaageeti ha baalaa bonchchiyo wode oyttaynne woynee laamettidi Kiristtoosa ashuwaanne suuttaa gidees giidi ammanoosona. Eti issi uri hegaappe miidonne uyido wode ubban Yesuusa ashoynne suuttay yarshshettees giidi qoppoosona.
c Issi issi asatu sunttay laamettiis
d Qassi jw.org saytiyan, “2021n Godaa Kahuwaa Bonchchido Ogiyaa” (Amaarattuwaa) giya huuphe yohuwaa xeella.
