Yihooway aqo laggeti ufayttanaadaaninne issoy issuwaara duuxxenna dabbotaa dabbotanaadan koyiyoogee qoncce. (Maa. 19:4-6) Neeni aqo lagge demmanawu koyikko, loˈˈo aqo lagge waata demmana danddayay? Yihooway nuna Medhdhidaagaa gidiyo gishshawu, nuuni ufayssiya aqo deˈuwaa deˈanawu waatana koshshiyaakko erees. Yaatiyo gishshawu, I yootiyo maarata oosuwan peeshshikko, neeni tumuppe ufayttana. He maaratuppe amaridaageeta beˈa.

Koyruwan, nu “wozani ubbabaappe aadhdhi cimmiyaabaanne keehi daro iita” gidiyoogaa nuuni akeekana koshshees. (Erm. 17:9) Aqo oyqqanawu koyiya naaˈˈu asati loytti erettanawu gayttiyo wode, issoy issuwaa siiqiyoogaa eesuwan doommana danddayoosona. Hegaadan haniyo wode, eti loˈˈobaa kuuyanawu metootoosona. Issoy issuwaa siiqiyoogaa xallaa qoppidi asay aqo oyqqanawu kuuyiyaaba gidikko, guyyeppe hidootaa qanxxana danddayees. (Lee. 28:26) Naaˈˈu asay issoy issuwaa loytti eranaappe kase, bantta wozanaabaa issoy issuwawu yootiyoogee woy qaalaa geliyoogee loˈˈo gidennay hegaassa.

Leemiso 22:3y hagaadan gees: “Cincca asi iitaa be7idi, qosetti aattees; shin akeeki paccido asi metuwan gelidi qohettees.” Aqo lagge demmanawu koyiyaageeti issoy issuwaara erettanaadan labawu giigissido websayteta goˈettiyoogee aybin qohana danddayii? Issi issi asay aqo oyqqanawu koyidi interneetiyan erennaageetuura gayttidi issoy issuwaara loytti erettiyoogaa doommi simmidi cimettidoogaa akeekidoogee azzanttiyaaba. Qassi iita asati loˈˈo asata cimmanawunne etappe miishshaa wuuqqanawu worddo akawunttiya dooyoosona. Issi issitoo, he cimmiya asati banttana Yihoowa Markka giidi yootoosona.

Hara qohuwaakka akeeka. Aqo lagge demmanawu koyiyaageeti issoy issuwaara erettanaadan labawu giigissido amarida websayteti issoy issuwawu haniya asa giidi eti qoppiyoogeeta gattanawu komppiyuteriyaa prograameta goˈettoosona. SHin, he hiillay tumuppe maaddiyoogaa bessiya naqaashi baawa. Loˈˈo aqo lagge demmiyoogaa mala gitabaa kuuyanawu asi giigissido komppiyutere prograameti maaddoosona giidi ammanettiyoogee eeyyatetta. Komppiyutere prograameti Geeshsha Maxaafay yootiyo maaratudan ammanttiyaageeta mule gidokkona.—Lee. 1:7; 3:5-7.

Leemiso 14:15n deˈiya maaray hagaadan gees: “Eeyya asi ubbabaa ammanees; shin cinccai akeekidi tanggees.” Neeni neeyyo haniya aqo lagge dooranaappe kase, he izaawa loyttada erana koshshees.  SHin aqo lagge demmanawu koyiyaageeti issoy issuwaara erettanaadan labawu giigissido websaytetun hegaadan loytti eriyoogee metana danddayees. Intte issoy issuwaabaa qonccissiya amaridabaa eriyaabanne Interneettiyan issoy issuwaara daro saatiyaa haasayiyaaba gidikkokka, he izaawa tumuppe erays gaana danddayeetii? Tumuppe siiqiya aqo lagge demmidabadan qoppiya amaridaageeti wurssettan he izaawuura baazzan gayttidi abaa eriyo wode keehi dagammoosona.

Mazamuraawee hagaadan giis: “Taani cimmiya asatuura issippe uttikke; lo77o milatiya iitatu maabaran gelikke.” (Maz. 26:4) Issi uri aqo oyqqanawu koyidi interneetiyan hara uraara erettanawu babaa yootiyo wode daro asay dosiyo asa milatanawu worddotiyoogee wottin deˈiyaaba giidi daroti qoppoosona. Eti bantta iita eeshshaa qottana danddayoosona woy haratuyyo kiitaa xaafiyo wode eta iita eeshshay geemmana danddayees. Ha oyshatu zaaruwaa qoppiyoogee keehi koshshiyaaba: Issooti issooti banttana Yihoowa Markka giidi yootikkonne, tumuppe eti xammaqettida Kiristtaanetee? Eti ayyaanaaban minoo? Etawu Yihoowaara mino dabbotay deˈii? Eti gubaaˈiyan deˈiyaageeti bonchchiyo aseeyye, haratuyyo loˈˈo leemiso gidennabadan, woy ubba ‘iita laggetudan’ xeelliyo asee? (1 Qor. 15:33; 2 Xim. 2:20, 21) Geeshsha Maxaafay yootiyo maaraadan eti aqo oyqqana danddayiyoonaa? Ha oyshatu zaarota neeni erana bessees. SHin neeni he izaawa loytti eriya Yihoowa Markkaara haasayennan, hegeetu zaaruwaa eriyoogee nena metana danddayees. (Lee. 15:22) Ammanettidi Yihoowawu oottiya uri ammanenna asa gelanawu woy ekkanawu qoppennaageenne he uraara ‘zuppetennaagee’ qoncce.—2 Qor. 6:14; 1 Qor. 7:39.

Aqo lagge demmanawu koyiyaageeti issoy issuwaara erettanaadan labawu giigissido websayteta goˈettiyoogee qohiyo gishshawu, neeni neeyyo aqo lagge gidana danddayiya uraa demmanawunne aara erettanawu maaddiya loˈˈo ogeti deˈoosona. Neeyyo haniya aqo lagge neeni awuppe demmana danddayay? Nuuni gubaaˈe shiiqota, gita shiiqotanne hara shiiqota issippe shiiqiyo wode haratuura loytti erettana danddayoos.

Ubbasaa gakkiya ha korona harggiyaa wodiyan hegaa mala shiiqota nuuni issippe shiiqana daddayenna gishshawu, gubaaˈe shiiqota shiiqanawu elektiroonike miishshata goˈettoos; aqo oyqqibeenna Yihoowa Markkatuura he shiiqotun erettana danddayoos. Eti shiiqotun haasayata haasayiyo wodenne qofaa yootiyoogan bantta ammanuwaa qonccissiyo wode siyana danddayaasa. (1 Xim. 6:11, 12) Intte gubaaˈee shiiqota zuumiyan shiiqiyaaba gidikko, shiiquwaappe simmin intte hegan dummasan (birek awut rumiyan) issoy issuwaara haasayanakka danddayeeta. Intterneetiyaa goˈettidi Yihoowa Markkati wodiyaa aattanawu issippe shiiqiyo wode, ne dosiyo uri harata waati oyqqiyaakko akeekana danddayaasa. Yaatiyoogan, iyyo woy ayyo ay mala eeshshay deˈiyaakko erana danddayaasa. (1 PHe. 3:4) Guyyeppe, he uraa neeni loytta eriyo wode, ne halchchoy aagaara issi malakko, qassi intte naaˈˈay issoy issuwawu haniya aqo laggekkonne akeekana danddayaasa.

Aqo oyqqibeennaageeti aqo lagge demmanawu banttana maaddanaadan Geeshsha Maxaafay yootiyo maarata kaalliyo wode, eta aqo deˈoy ufayssiyaagaa gidana danddayees. Leemiso maxaafaykka hegaara issi malabaa yootees: “Machcho [woy azina] demmida asi lo77obaa demmiis; he urai GODANKKA nashettees.”—Lee. 18:22.