XANNAˈIYO HUUPHE YOHUWAA 31
“Qaaxxennan Minnidi Eqqite”
“Taani siiqiyo ta ishatoo, . . . qaaxxennan minnidi eqqite.”—1 QOR. 15:58.
MAZAMURE 122 Qaaxxennan Minni Eqqite!
HA XINAATIYAN a
1-2. Issi Kiristtaanee keehi adussa pooqe mala gidana danddayiyoy ayba ogiyaanee? (1 Qoronttoosa 15:58)
JAAPPAANEN Tookkiyon, 1978n keehi adussa pooqee gimbbettiis. He kataman darotoo biittay qaaxxiyo gishshawu asay hegee kunddennan waani minni eqqide giidi qoppees. Kunddennan minni eqqanaadan oottidabay aybee? He pooqee biittay qaaxxiyo wode kunddenna mala keehi minonne hegaa mala wodetun aynne hanennaadan oottidi manddiiseti gimbbidoogaa. Kiristtaaneti he pooqiyaa mala. Aybin?
2 Issi Kiristtaanee minni eqqidaagaanne hanotaadan haniyaagaa gidana bessees. I mino gidana koshshees, qassi Yihoowa higgetanne I kessido maarata ubbatoo azazettanawu murttidaagaa gidana bessees. (1 Qoronttoosa 15:58 nabbaba.) I ‘ero giyaagaanne’ Yihoowawu ammanettiyaagaa. Hara baggaara qassi danddayettiyo woy koshshiyo wode I ‘ashkke’ woy hanotaadan haniyaagaa gidana bessees. (Yaaq. 3:17) Bessiyaagaadan qoppiya issi Kiristtaanee zozza gidenna woy maaraa xaasayi xeellenna. Nuuni waani minni eqqana danddayiyaakko ha huuphe yohuwan pilggana. Qassi nuuni ubbatoo azazettanawu metootanaadan Seexaanay goˈettiyo ichchashu hiillatanne nuuni A eqettana danddayiyo ogiyaa beˈana.
NUUNI MINNIDI EQQANAWU WAATANA DANDDAYIYOO?
3. Higgiyaa Kessanawu Ubbaappe Aadhdhiya Maatay Deˈiyoogee Oosuwaa 15:28, 29n yootido higgeti awugeetee?
3 Higgiyaa kessanawu ubbaappe aadhdhiya maatay Yihoowawu deˈees, qassi I kessido higgeta ba asay akeekanawu metootennaadan oottees. (Isi. 33:22) Leemisuwawu, koyro xeetu layttan deˈida oosuwaa kaalettiya citay Kiristtaaneti minnidi eqqana koshshiyo heezzu ogeta qonccissiis: (1) eeqa goynuwaa ixxidi Yihoowa xallawu goynniyoogaa, (2) suuttay geeshsha gidiyoogaa yootiya Yihoowa higgiyaa azazettiyoogaa, qassi (3) pokkobaappe haakkanaadan Geeshsha Maxaafay yootiyo zoriyaa azazettiyoogaa. (Oosuwaa 15:28, 29 nabbaba.) Ha wodiyan deˈiya Kiristtaaneti ha heezzu ogetun waani minni eqqana danddayiyoonaa?
4. Nuuni Yihoowa xalaalawu goynnanawu waatana danddayiyoo? (Ajjuutaa 4:11)
4 Nuuni eeqa goynuwaa ixxidi Yihoowa xallawu goynnoos. Israaˈeelati A xalaalawu goynnanaadan I azaziis. (Zaa. 5:6-10) Qassi Yesuusi Dabloosan paacettido wode, nuuni Yihoowa xalaalawu goynnana bessiyoogaa geeshshidi yootiis. (Maa. 4:8-10) Yaatiyo gishshawu, nuuni eeqawu goynnokko. Haymaanootiyaa kaalettiyaageeta, polotikan alamiyaa haariyaageeta gidin woy ispporttiyaaninne haraban hayttatidaageeta gidinkka xoossadan xeellidi ay asawunne goynnokko. Nuuni Yihoowawu exatoos, qassi ‘ubbabaa medhdhida’ A xalaalawu goynnoos.—Ajjuutaa 4:11 nabbaba.
5. Nuuni deˈuwaanne suuttaa bonchchiyoogaara gayttidaagan Yihoowa higgiyawu azazettiyoy aybissee?
5 Nuuni deˈuwaanne suuttaa bonchchiyoogaara gayttidaagan Yihoowa higgiyawu azazettoos. Aybissi? Suuttay Yihooway immido alˈˈo imota gidida deˈuwaa qonccissiyoogaa I yootido gishshataassa. (Wog. 17:14) Asay ashuwaa maanaadan Yihooway koyro paqqadido wode eti suuttaa meennaadan azaziis. (Doo. 9:4) I Israaˈeelatuyyo Muuse Higgiyaa immido wode ha azazuwaa zaarettidi yootiis. (Wog. 17:10) Qassi ubba Kiristtaaneti ‘suuttaappe haakkanaadan’ kaaletuwaa immana mala koyro xeetu layttan deˈida oosuwaa kaalettiya citaa I azaziis. (Oos. 15:28, 29) Nuuni akkamuwaara gayttidaagan kuuyiyo wode ha azazuwaa mintti kaalloos. b
6. Pokkobaappe haakkanaadan Yihooway azazidobaa mintti kaallanawu waatana danddayiyoo?
6 Pokkobaappe haakkanaadan Yihooway azazidobaa mintti kaalloos. (Ibr. 13:4) Kiittida PHawuloosi nuuni nu bollaa qommota ‘woranaadan’ zoriis; hegaa giyoogee iita amo ubbaa agganawu nuussi danddayettida ubbabaa oottana koshshees giyoogaa. Nuuni pokkobaa oottanaadan denttettana danddayiya aybanne beˈiyoogaappe woy oottiyoogaappe naagettoos. (Qol. 3:5; Iyy. 31:1) Nuuni iitabaa oottanaadan paacettiyo wode, Xoossaara dabbotido nu dabbotaa moorana danddayiya aybanne qoppiyoogaappe woy oottiyoogaappe naagettoos.
7. Nuuni ay oottanawu murttana koshshii, qassi aybissi?
7 Yihooway nuuni ‘kumetta wozanaappe azazettanaadan’ koyees. (Roo. 6:17) Nuuni oottanaadan I yootiyoobay ubbatookka nuussi loˈˈo, qassi A higgeta laammana danddayokko. (Isi. 48:17, 18; 1 Qor. 6:9, 10) Nuuni Yihoowa ufayssanawunne, hagaadan giida Mazamuraawiyaagaadan qoppanawu baaxetoos: “Taani merinau, wurssettaa gakkanau ne awaajjuwaadan oottanau qachchaas.” (Maz. 119:112) Gidikkonne, Seexaanay nuuni minnidi eqqanawu metootanaadan oottanawu baaxetees. I goˈettiyo hiillati awugeetee?
NUUNI MINNI EQQENNAADAN SEEXAANAY WAATII?
8. Nuuni minni eqqennaadan oottanawu Seexaanay yedetaa waati goˈettii?
8 Yedetaa. Dabloosi nuuni minni eqqennaadan qohuwaa gatteesinne iisettees. A halchchoy nuna ‘mittiyoogaa,’ hegeekka nuuni Yihoowaara dabbotido dabbotaa mooriyoogaa. (1 PHe. 5:8) Koyro xeetu layttan deˈida Kiristtaaneti minni eqqanawu murttido gishshawu, eqettiyaageeti eta yashissidosona, shocidosonanne woridosona. (Oos. 5:27, 28, 40; ) Seexaanay ha wodiyankka yedetaa gattees. Eqettiyaageeti Ruusiyaaninne hara biittatun Yihoowa Markkatuyyo meqettaa iitiyoogee woy nu ishanttanne michchontta hara ogetun qohiyoogee hegaa bessees. 7:54-60
9. Geeman gakkiya paaciyaa akeekana koshshiyoy aybissakko leemisuwaa yoota.
9 Geeman gakkiya paaciyaa. Seexaanay yedetaa goˈettiyoogaa bolli ‘iita cimuwaakka’ goˈettees. (Efi. 6:11) SHuhettanawu hosppitaaliyaa gelida Booba giyo ishaa gakkidabaa qoppa. I suuttaa mule ekkennaagaa dottoretuyyo yootiis. SHukkiya dottoree I kuuyidoogaadan oottanawu maayettiis. Gidoppe attin, Boobi shuhettanaappe kase qammi, A soo asay soo bi simmin hara dottoree A beˈanawu yiis. Dottoreti geella suuttaa goˈettennaba gidikkokka, koshshikko goˈettanawu giigissi wottanaagaa I Boobawu yootiis. So asay matan deˈenna gishshawu Boobi ba qofaa laammana giidi dottoree qoppennan aggenna. SHin Boobi aybi hanikkokka suuttaa mule ekkennaagaa yootiyoogan ba qofaa laammennan ixxiis.
10. Yihoowa higgeta sheneho giyaageetu qofay qohiyoy aybissee? (1 Qoronttoosa 3:19, 20)
10 Yihoowa higgeta sheneho giyaageetu qofaa. Yihoowa higgeta sheneho giya asaadan qoppikko, nuunikka Yihoowanne A higgeta xaasayi xeelliyoogaa doommana danddayoos. (1 Qoronttoosa 3:19, 20 nabbaba.) “Ha sa7aa aadhdhida eratettai” darotoo asay Xoossawu azazettennaadan oottees. PHerggaamoonaaninne Tiyaaxiroonan deˈiya amarida Kiristtaaneti pokkobaa oottiyaanne eeqawu goynniya asatu oosuwaa kaallidosona. He naaˈˈu gubaaˈetikka pokkobaa oottiyoogaa coˈˈu giidi xeellido gishshawu Yesuusi eta seeriis. (Ajj. 2:14, 20) Ha wodiyan deˈiya asati nuuni bala qofaa kaallanaadan oottanawu malana danddayoosona. So asaynne nuna eriyaageeti nuuni zozza gididabadaaninne Yihoowa higgiyawu azazettanawu koshshennabadan ammanttanawu malana danddayoosona. Leemisuwawu, nuuni kandduwan geeshsha gididi deˈiyoogee keehi koshshennabadaaninne Geeshsha Maxaafay yootiyo kandduwaa maarati wodee aadhdhiichchidobadan yootana danddayoosona.
11. Nuuni minnidi eqqanawu aybippe naagettana koshshii?
11 Yihooway immiyo kaaletoy keehi qoncce gidenna giidi issi issitoo nuuni qoppana danddayoos. Nuuni “Xoossaa maxaafan xaafettidaagaa” bolli harabaa gujjanawu paacettana danddayoos. (1 Qor. 4:6) Yesuusa wode deˈida haymaanootiyaa kaalettiyaageeti hegaa mala nagaraa oottidosona. Eti Muuse Higgiyaa bolli bantta wogaa gujjido gishshawu, coo asay hegaa azazettanawu metootiis. (Maa. 23:4) Yihooway ba Qaalaa baggaaranne ba dirijjitiyaa baggaara nuussi qoncce kaaletuwaa immees. Nuuni I immido kaaletuwan haraa gujjiyo gaasoy baawa. (Lee. 3:5-7) Hegaa gishshawu, Geeshsha Maxaafan xaafettidaagaa bolli haraa gujjokko, woykko Geeshsha Maxaafan odettibeennabaa xeelliyaagan nu mala Kiristtaanetuyyo higge kessokko.
12. Seexaanay ‘mela cimuwaa’ waati goˈettii?
12 Cimuwaa. Seexaanay asaa balettanawunne shaahotettaa medhdhanawu ‘mela cimuwaanne’ ‘ha saˈaa timirttiyaa’ goˈettees. (Qol. 2:8) Qassi asaappe yiida eratettaa, Geeshsha Maxaafan baynna Ayhudatu timirttiyaanne Kiristtaaneti Muuse Higgiyaa kaallana bessees giya timirttiyaa koyro xeetu layttan goˈettiis. Hegeeti tumu eratettawu pultto gidida Yihoowappe asay haakkanaadan oottido gishshawu asay cimettiis. Ha wodiyan Seexaanay polotikan ha alamiyaa haariya asatu baggaara naqaashi baynnabaanne worddo oduwaa aassanawu eraadoone malabaanne Intternneetiyaa goˈettees. Koronaa harggiyaa wode hegaa mala daro oduwaa akeekida. c Yihoowa dirijjitee immiyo kaaletuwaa siyida Yihoowa Markkati worddo oduwaa siyidaagetuugaadan unˈˈettiyoogaappe naagettidosona.—Maa. 24:45.
13. Nu qofay shaahettennaadan nuuni naagettana koshshiyoy aybissee?
13 Qofay shaahettiyoogaa. Nuuni ‘loˈˈobaa’ woy keehi koshshiyaabaa ubbatoo qoppana koshshees. (Pili. 1:9, 10) Nu qofay shaahettiyo wode nu wodiyaanne nu wolqqaa coo wurssoos. Miyoogaa, uyiyoogaa, allaxxiyoogaanne oosuwaa oottiyoogaa mala ubbatoo oottiyoobata nu deˈuwan keehi koshshiyaabadan xeellikko nu qofay shaahettana danddayees. (Luq. 21:34, 35) Hegaa bollikka, nuuni ubba galla deretettaaranne polotikaara gayttida allaalliyaa siyoosinne nabbaboos. He allaalletun nu qofay shaahettennaadan naagettana koshshees. Naagettana xayikko, nu qofaaninne nu wozanan issi baggawu exatana danddayoos. Nuuni suurebaa oottanaayyo murttido murttiyaa agganaadan oottanawu Seexaanay qommoora qonccida hiillata ubbaa goˈettees. Nuuni I gattiyo paaciyaa xoonidi minni eqqanawu waatana danddayiyaakko ane pilggoos.
NUUNI MINNI EQQANAWU WAATANA DANDDAYIYOO?
Minna eqqanawu nena Yihoowawu sheedhdhidonne xammaqettido gaasuwaa wotta dentta qoppa, Xoossaa Qaalaa xannaˈanne hegaa wotta dentta qoppa, ne wozanaa mintta, qassi Yihoowan ammanetta (Mentto 14-18 xeella)
14. Yihoowa bagga gididi deˈanaadan nuna maaddana danddayiya issibay aybee?
14 Nena Yihoowawu sheedhdhidonne xammaqettido gaasuwaa wotta dentta qoppa. Neeni Yihoowa bagga gidanawu koyido gishshawu hegaadan oottadasa. Neeni tumaa demmidoogaa ammanettanaadan oottidabaa qoppa. Yihoowa loytta erido gishshawu saluwan deˈiya ne Aawadan A siiqiyoogaanne bonchchiyoogaa doommadasa. Ne ammanuwaa minttadasanne nagaraappe simmadasa. Yihooway ixxiyoobaa oottiyoogaa aggada A ufayssiyaabaa oottiyoogaa doommadasa. Xoossay neeyyo atto giidoogaa erada woppu gaadasa. (Maz. 32:1, 2) Neeni shiiqota shiiqadasanne ne tamaarido ufayssiyaabaa haratuyyo yootiyoogaa doommadasa. Neeni nena Yihoowawu sheedhdhada xammaqettida Kiristtaane gidiyo gishshawu, deˈuwawu efiya ogiyan haˈˈi hemettaydda deˈaasa; qassi ubbatoo hemettanawu neeyyo danddayettida ubbabaa oottaasa.—Maa. 7:13, 14.
15. Xannaˈiyoogeenne wotti dentti qoppiyoogee waati maaddii?
15 Xoossaa Qaalaa xannaˈanne hegaa wotta dentta qoppa. Mittay xaphuwaa loytti yeddikko minni eqqana danddayiyoogaadan, nuuni Yihoowa mintti ammanikko qaaxxennan minni eqqana danddayoos. Issi mittay dicciyo wode xaphuwaa duge loytti yeddeesinne daro sohuwaa yeddees. Nuuni xannaˈiyo wodenne wotti dentti qoppiyo wode, nu ammanoy minneesinne Xoossaa ogee ubbaappe aadhdhiyoogaa mintti ammanoos. (Qol. 2:6, 7) Yihooway immido kaaletoy, zoreenne I naagidoogee beni wode deˈida A ashkkarata waati maaddidaakko wotta dentta qoppa. Leemisuwawu, issi kiitanchchay beetamaqidasiyaa likkiyo wode Hizqqeeli ajjuutan loytti beˈiis. He ajjuutan Hizqqeeli minettiis, qassi hegee Yihooway geeshsha goynuwawu kessido maarata nuuni waati azazettana danddayiyaakko eranaadan maaddiyaabaa yootees. d (Hiz. 40:1-4; 43:10-12) Nuunikka Xoossaa Qaalan deˈiya alˈˈobata wodiyaa bazzidi xannaˈiyoonne wotti dentti qoppiyo wode goˈettoos.
16. Booba wozanay mino gididoogee A waati maaddidee? (Mazamure 112:7)
16 Ne wozanaa mintta. Kawuwaa Daawiti, “Abeet Xoossau, ta wozanai minnidi de7ees” yaagidi yexxido wode Yihoowa siiqiyoogaa mule aggennaagaa yootiis. (Maz. 57:7) Nuussikka Yihoowan mintti ammanettiya mino wozanay deˈana danddayees. (Mazamure 112:7 nabbaba.) Qommoora abay odettido Booba hegee waati maaddidaakko beˈa. Geella suuttay koshshikko goˈettanawu giigissi wottanaagaa I erido wode suuttaa immanaadan oottiya ay hanotaykka deˈikko, takkennan hosppitaaliyaa aggidi baanaagaa sohuwaara yootiis. Guyyeppe Boobi hagaadan giis: “Taani aynne mammottabeykkenne hirggabeykke.”
Nuuyyo mino ammanoy deˈikko, nuna gakkana danddayiya paacee ayba gidikkokka minnidi eqqana danddayoos (Mentto 17 xeella)
17. Boobappe ay tamaarana danddayiyoo? (Misiliyaakka xeella.)
17 Boobi suuttaa mule goˈettennaagaa hosppitaaliyaa gelanaappe adussa wodiyaappe kase kuuyido gishshawu minni eqqiis. Koyruwan, I Yihoowa ufayssanawu keehi koyiis. Naaˈˈanttuwan, deˈuwaanne suuttaa geeshshatettaa xeelliyaagan Geeshsha Maxaafaynne Geeshsha Maxaafaa qofay deˈiyo nu xuufeti yootiyoobaa loytti xannaˈiis. Heezzanttuwan, Yihoowa kaaletuwaa kaalliyoogee merinawu goˈˈiyoogaa ammaniis. Nuna gakkana danddayiya paacee ayba gidikkonne nuussikka mino wozanay deˈana danddayees.
Baaraaqinne A asay Sisaara olanchchata xalatettan yedettidosona (Mentto 18 xeella)
18. Yihoowan ammanettiyoogaa xeelliyaagan Baaraaqi oottidobaappe ay tamaariyoo? (Koyro sinttan deˈiya misiliyaa xeella.)
18 Yihoowan ammanetta. Yihooway immido kaaletuwan ammanettido gishshawu Baaraaqawu waani injjetidaakko beˈa. He wode Israaˈeelati olawu giigettibookkona, etawu olaa miishshaykka baawa, shin Yihooway daro olaa miishshay deˈiyo Kanaane olanchchatu halaqaa Sisaarakkonne A olanchchatukko biidi olettanaadan Baaraaqawu yootiis. (Daan. 5:8) Baaraaqi Sisaaraaranne 900 A para gaaretuura olettanawu deriyaappe duge dembbaa wodhdhanaadan hananabaa yootiya Deboora odaasu. Keehi eesotiya para gaaretuura dembban olettiyoogee Israaˈeelatussi keehi wayssiyaaba gidana danddayees. Baaraaqi hegaa eriyaaba gidikkokka azazettiis. Wotaaddarati Taaboora deriyaappe wodhdhiyo wode, Yihooway wolqqaama iray bukkanaadan oottiis. Sisaara paraa gaareta urqqay oyqqin Baaraaqi xoonanaadan Yihooway oottiis. (Daan. 4:1-7, 10, 13-16) Hegaadankka, nuuni Yihoowaaninne I ba dirijjitiyaa baggaara immiyo kaaletuwan ammanettikko, nu xoonanaadan I maaddana.—Zaa. 31:6.
MINNA EQQA DEˈANAWU MURTTA
19. Neeni minna eqqa deˈanawu koyiyoy aybissee?
19 Nuuni ha alamiyan deˈido wode ubban minni eqqanawu aggennan baaxetana koshshees. (1 Xim. 6:11, 12; 2 PHe. 3:17) Yedetan, geeman gakkiya paaciyan, Yihoowa higgeta sheneho giyaageetu qofan, cimuwaaninne qofay shaahettanaadan oottiyaaban yashshan maashennan agganawu murttidaageeta gidoos. (Efi. 4:14) Qassi minni eqqidaageeta, ubbatoo Yihoowa siiqiyaageetanne A azazota azazettiyaageeta gidoos. Hegaa bollikka, nuuni hanotaadan haniyaageeta gidana koshshees. Yihoowaynne Yesuusi hanotaadan haniyoogan wottiyoobi baynna leemiso gidiyoy aybiinakko kaalliya huuphe yohuwan beˈana.
MAZAMURE 129 Nuuni Genccana Bessees
a Seexaanay Addaamenne Hewaani wodiyaappe doommidi, asay likkenne likke gidennabaa bawu kuuyana bessees giidi ammanttanawu baaxetees. Yihoowa higgetuuranne A dirijjitee immiyo kaaletotu ubbaara gayttidaagan nuuni hegaadan qoppanaadan I koyees. Seexaanaa kaalliyaageetugaadan, nuuni Yihoowa higgiyaa xaasayi xeellenna mala ha huuphe yohoy nuna maaddana. Qassi ubba wode Yihoowawu azazettanawu murttanaadan maaddana.
b Issi Kiristtaanee suuttaa xeelliyaagan Xoossay yootidobaa waati azazettanaakko gujjada eranawu, Merinawu Ufayttada Deˈa! giya maxaafan timirtte 39 xeella.
c “Worddo Oduwaappe Naagetta” giya bootta saleeda biiduwaa jw.org saytiyan xeella.
d Gujjada eranawu Yihoowa Geeshsha Goynoy Zaarettidi Eqqiis! (Amaarattuwaa) giya maxaafan shemppo 13nne 14 xeella.