1. Yelidaageeti bantta naati waananaadan koyiyoonaa?

 YELIDAAGEETOO, intte naati Yihoowa eranaadaaninne siiqanaadan maaddanawu intte koyiyoogaa eroos. SHin Xoossaa beˈanawu danddayokko. Yaatin, intte naati Xoossay deˈiyoogaa tumuppe ammananaadaaninne akko shiiqanaadan waati maaddana danddayeetii?—Yaaq. 4:8.

2. Yelidaageeti Yihoowa eeshshaabaa bantta naata waati tamaarissana danddayiyoonaa?

² Naati Yihoowakko shiiqanaadan maaddiyo keehi koshshiya issi ogee Geeshsha Maxaafaa etaara xannaˈiyoogaa. (2 Xim. 3:14-17) Gidoppe attin, yelagati Yihoowaabaa tamaarana danddayiyo hara ogiyaakka Geeshsha Maxaafay yootees. Leemiso maxaafan odettida issi aaway meretan qonccida Yihoowa eeshshaabaa ba naˈay dogennaadan minttidi hassayissiis. (Lee. 3:19-21) Yelidaageeti bantta naati Yihoowa eeshshaabaa eranaadan maaddanawu meretaa goˈettana danddayiyo issi issi ogeta beˈana.

3. Yelidaahgeeti bantta naata waati maaddana danddayiyoonaa?

³ Geeshsha Maxaafay hagaadan gees: ‘Beettenna A hanotay Xoossay ha saˈaa medhdhoosappe doommidi, etawu qonccidi beettiis; eti hegaa Xoossay medhdhidobaappe beˈanawu danddayoosona.’ (Roo. 1:20) Yelidaageetoo, intte naatuura issi sohuwaa biidi wodiyaa aattiyoogan ufayttennan aggekketa. Yihooway ‘medhdhidobatinne’ A eeshshati waani gayttiyaakko intte naati akeekanaadan maaddanawu he wodiyaa goˈettite. Yesuusi tamaarissido ogiyaappe yelidaageeti ay tamaarana danddayiyaakko ane beˈoos.

4. Yesuusi ba erissiyo ashkkarata tamaarissanawu meretaa waati goˈettidee? (Luqaasa 12:24, 27-30)

 ⁴ Yesuusi tamaarissanawu meretaa waati goˈettidaakko akeekite. Issi wode I ba erissiyo ashkkarati qooraasetanne ciishshata akeekan xeellanaadan yootiis. (Luqaasa 12:24, 27-30 nabbaba.) Yesuusi hara mehiyaanne doˈaa woy mittaanne maataa goˈettana danddayees; shin ba erissiyo ashkkarati loytti eriyo kafuwaanne ciishshaa goˈettiis. Erissiyo ashkkarati qooraasee saluwan paalliyaagaanne ciishshay dembban ciiyyiyaagaa beˈana danddayoosona. Yesuusi hegeetukko malaatiiddi haasayidoogaa ane qoppa. I he leemisota yooti simmidi ay oottidee? I ba erissiyo ashkkarata saluwan deˈiya eta Aawaa kehatettaa xeelliyaagan keehi maaddiyaabaa tamaarissiis. Yihooway qooraasiyawunne dembban deˈiya ciishshawu oottiyoogaadan, ammanettida ba ashkkarata mizananne mayzzana.

5. Yelidaageeti bantta naata Yihoowaabaa tamaarissanawu meretaa waati goˈettana danddayiyoonaa?

⁵ Yelidaageetoo, intte naata tamaarissiyo wode Yesuusa leemisuwaa waati kaallana danddayeetii? Intte dosiyo mehiyaa woy doˈaa woy ciishshaa xeelliyaagan intte naˈaassi yootana danddayeeta. Hegaabaa yootiyo wode, hegee Yihoowabaa ay tamaarissiyaakko intte naˈaassi qonccissana koshshees. Yaatidi, intte naˈay dosiyo mehiyaabaa woy doˈaabaa woy ciishshaabaa A oychchana danddayeeta. Intte naˈay dosiyo issibaa xeelliyaagan intte haasayikko, intte Yihoowabaa tamaarissiyo wode I kaseegaappe aaruwan loyttidi ezggana danddayees.

6. Kiristtoofera aayyiyaa oottidobaappe ay tamaarana danddayiyoo?

⁶ Yelidaageeti issi meretay Yihoowabaa ay qonccissiyaakko bantta naatuura haasayanaappe kase, he meretaabaa pilggiiddi daro wodiyaa wurssana koshshii? Hegaadan oottana koshshenna. Qooraasee waatidi qumaa miyaakko woy ciishshay waani dicciyaakko Yesuusi darobaa qonccissibeenna. Intte naˈay Yihoowa meretaabaa darobaa eranawu koyikkokka, issi issitoo qantta qofay woy oyshay intte yootanawu koyidobaa I akeekanaadan maaddana danddayees. Kiristtoofera giyo ishay I naatettan deˈiyo wodiyaabaa hassayidi hagaadan giis: “Nu aayyiyaa nuuni nu matan deˈiya meretaa nashshanaadan, akeekanawu metenna ogiyan yootawusu. Leemisuwawu, nuuni deriyaa mataara biyo wode A hagaadan gawusu: ‘Ha deree ay keena gitakko, qassi ayba loˈˈiyaakko beˈite! Yihoowa oosoy maalaalennee?’ Woy nuuni abbaa mati biyo wode A hagaadan gawusu: ‘Abbaa beetaa wolqqaa beˈite! Xoossay wolqqaama gidennee?’” Kiristtooferi hagaadan giis: “A yootiyo akeekanawu metenna loˈˈo qonccissoy nuuni Yihoowabaa qoppanaadan oottiis.”

7. Intte naˈay meretaabaa loytti qoppanaadan waati loohissana danddayeetii?

⁷ Intte naati dicci dicci biyo wode, meretaabaa kaseegaappe aaruwan qoppanaadaaninne Yihoowabaa eranaadan eta loohissana danddayeeta. Xoossay medhdhidoobaappe issibaa ayyo yooti simmidi, “Hagee Yihoowabaa nena ay tamaarissii?” yaagidi oychchana danddayeeta. Intte naˈay giyoobaa siyidi intte maalaalettana danddayeeta.—Maa. 21:16.

8. Israaˈeelati “ogiyan hemettiyo wode” bantta naatussi ay yootana danddayiyoonaa?

⁸ Israaˈeelati “ogiyan hemettiyo wode” bantta naata Yihoowa higgiyaabaa tamaarissanaadan etawu odettiis. (Zaa. 11:19) Israaˈeela biittan ogee gaxare giddoora efees. Eti dumma dumma mehetanne doˈata, kafotanne, ciishshata beˈana danddayoosona. Israaˈeelati manddariyo wode, yelidaageeti Yihoowa meretaabaa bantta naatuyyo yootana danddayoosona. Yelidaageetoo, inttekka intte  naata tamaarissanawu hegaadan meretaa goˈettana danddayeeta. Yelidaageetuppe issoti issoti waatidi hegaadan oottidaakko akeekite.

9. Puniitippenne Kaatiyippe intte ay tamaarana danddayeetii?

⁹ Hindden issi gita kataman deˈiya Punito giyo aayyiyaa hagaadan gaasu: “Nuuni gaxariyan deˈiya nu dabbota oychchanawu biyo wodiyaa nu naata maalaalissiya Yihoowa meretaabaa tamaarissana danddayiyo loˈˈo injjedan xeelloos. Ta naati asaynne kaamee dariyo katamaappe gaxariyaa biyo wode meretaabaa loytti akeekoosona gaada qoppays.” Yelidaageetoo, intte naati inttenaara loˈˈiya sohuwan aattido wodiyaa awudenne dogokkona. Molddoovan deˈiya Kaatiyo giyo issi michchiyaa hagaadan gaasu: “Naatettaabaappe taani dogenna keehi ufayssiya wodee nu soo asaara gaxariyan aattido wodiyaa. Eti naatettaappe doommidi taani Yihoowa meretaabaa akeekanaadaaninne I medhdhidobaappe abaa eranaadan tana tamaarissido gishshawu eta keehippe galatays.”

10. Yelidaageeti katamaappe harasaa baana danddayennaba gidikko, ay oottana danddayiyoonaa? (“ Yelidaageeta Maaddiyaabaa” giya saaxiniyaa xeella)

¹⁰ Intte gaxariyaa baana danddayennaba gidikko shin? Hindden deˈiya Amoli hagaadan giis: “Taani deˈiyo heeran, yelidaageeti daro saatiyaa oottoosona; qassi gaxariyaa baanawu daro miishshay koshshees. Gidoppe attin, asay allaxxiyo ufayssiya sohuwaa biidi woy pooqe keettaa baranddaa malaban kiyidi Yihoowa meretaa beˈananne A eeshshaabaa haasayana danddayoos.” Intte loyttidi xeelliyaaba gidikko, intte naata bessana danddayiyo daro meretata intte heerankka demmana danddayeeta. (Maz. 104:24) Intte kafota, paalliya guuttabata, mittaa maataanne hegaa mala darobaa akeekana danddayeeta. Jarmanen deˈiya Kaarina hagaadan gaasu: “Ta aayyiyaa ciishshaa keehi dosawusu; yaatiyo gishshawu taani naatettan deˈiyo wode, nuuni issisaa biyo wode awudenne loˈˈiya ciishshaa  tana bessawusu.” Yelidaageetoo, intte naata tamaarissanawu nu dirijjitee giigissido meretaabaa qonccissiya daro biidotanne xuufetakka goˈettana danddayeeta. Intte awan deˈikkonne, Xoossay medhdhidobaa akeekanaadan intte naata maaddana danddayeeta. Intte intte naatuyyo qonccissana danddayiyo Yihoowa eeshshatuppe amaridaageeta ane haˈˈi beˈoos.

11. Yelidaageeti bantta naati Yihoowa siiquwaa akeekanaadan waati maaddana danddayiyoonaa?

¹¹ Intte naati Yihoowa siiquwaabaa akeekanaadan maaddanawu daro mehetinne doˈati bantta maratussi qarettiyoogaa qonccissana danddayeeta. (Maa. 23:37) Meretatun nuuni beˈiyo maalaalissiya dumma dummabatakka qonccissana danddayeeta. Qommoora ibaa beˈido Kaarina hagaadan gaasu: “Nuuni heeran hemettiyo wode, ta aayyiyaa ubba ciishshati dumma dumma gidiyoogaanne eta puulay Yihoowa siiquwaa qonccissiyoogaa taani qoppanaadaaninne akeekanaadan minttettawusu. Daro layttay aadhdhi simmin, haˈˈikka taani ciishshatu meraynne eti giigido hanotay waani dummatiyaakko akeekan xeellays. Yihooway nuna ay keena siiqiyaakko hegeeti ubbatoo tana hassayissoosona.”

12. Yelidaageeti bantta naati Xoossaa aadhdhida eratettaa akeekanaadan waatidi maaddana danddayiyoonaa? (Mazamure 139:14) (Misiliyaakka xeella.)

¹² Intte naati Yihoowa aadhdhida eratettaa akeekanaadan maaddite. Yihooway nuuppe aaruwan aadhdhida eranchcha gidiyoogee qoncce. (Roo. 11:33) Leemisuwawu, haattay waanidi shaara gidiyaakko, qassi he shaaray haattaa issisaappe harasaa waatidi efiyaakko intte naˈaassi yootana danddayeeta. (Iyy. 38:36, 37) Maalaaliya ogiyan merettida asaa bollaabaakka yootana danddayeeta. (Mazamure 139:14, nabbaba.) Bilaadmiira giyo issi aaway waatidi hegaadan oottidaakko akeekite. I hagaadan giis: “Issi gallassi nu naˈay ba bishkkiliitiyaappe kunddidi qohettiis. Amarida gallassaappe simmin he qohettida sohoy paxiis. Nu bollay bana barkka pattanaadan oottidi Yihooway medhdhidoogaa taaninne ta keettaayyiyaa ayyo qonccissida. Asi medhdhido aybinne hegaadan oottennaagaa nuuni ayyo yootida. Leemisuwawu, kaamee daafaban qohettikko, bana barkka giigissenna. Ha hanotay nu naˈay Yihoowa aadhdhida eratettaa akeekanaadan maaddiis.”

13. Yelidaageeti bantta naati meretaabaa akeekanaadan waati maaddana danddayiyoonaa? (Isiyaasa 40:26)

 ¹³ Yihooway nuuni nu ayfiya xoqqu oottidi saluwaa xeellanaadaaninne maalaalissiya A wolqqay xoolintteti bantta sohuwan deˈanaadan waatidi oottidaakko qoppanaadan nuna shoobbees. (Isiyaasa 40:26 nabbaba.) Intte naati saluwan deˈiya xoolintteta xeellanaadaaninne beˈiyoobaa takki giidi qoppanaadan eta minttettana danddayeeta. Taywaanen deˈiya, Tishitishin giyo michchiyaa naatettan A deˈiyo wode hanidabaa hassayada hagaadan gaasu: “Issi wode dembban dunkkaaniyan aqanawu ta aayyiyaa tana ekkada baasu, qassi yan katamaagaadan korinttiyaa pooˈoy baynna gishshawu qamman saluwan daro xoolintteta beˈida. He wode tanaara tamaariya naati taani Yihoowayyo azazettiyoogee metanaadan oottiyo gishshawu, ayyo ammanettada deˈana danddayennabadan qoppada unˈˈettaas. He ubba xoolintteta medhdhanawu Yihooway goˈettido wolqqaanne tana gakkiya ay metonne genccanaadan maaddanawu I he wolqqaa goˈettiyoogaa taani qoppanaadan ta aayyiyaa tana minttettaasu. Hegaappe simmin taani meretaa akeekada Yihoowa loytta eraas; qassi kaseegaappe aaruwan awu haggaazanawu murttaas.”

14. Yelidaageeti meretaa goˈettidi Yihooway ufayttiya Xoossa gidiyoogaa bantta naati akeekanaadan waati maaddana danddayiyoonaa?

¹⁴ Yihooway medhdhidobati I ufayttiya Xoossaa gidiyoogaanne nuunikka ufayttanaadan I koyiyoogaa bessees. Kafotanne moleta gujjin, mehiyaa doˈaappe daroti kaaˈiyoogaa saynisiyaa eranchchati akeekidosona. (Iyy. 40:20) Mehetinne doˈati kaaˈishin beˈidi intte naati ufayttidi miicci eriyoonaa? Eti kanaa maray issoy issuwaara warettishin woy gawaraa maray kuwaase malabaa baqqi baqqi kaaˈishin beˈennan aggokkona. Kaalliya wodiyan intte naati mehee doˈay kaaˈishin beˈidi ufayttidi miicciyo wode nuuni ufayttiya Xoossawu haggaaziyoogaa yootana danddayeeta.—1 Xim. 1:11, NW.

15. Yelidaageeti bantta naatu qofaa eranawu aybi maaddana danddayii? (Leemiso 20:5) (Misiliyaakka xeella.)

¹⁵ Issi issitoo naati banttana gakkiya metuwaabaa yelidaageetuura haasayanawu metootana  danddayoosona. Ne hanotaykka hegaa mala gidikko, ne naati qoppiyoobaa eranawu koyennan aggakka. (Leemiso 20:5 nabbaba.) Yelida issoti issoti bantta naatuura meretaa beˈiiddi ufayttiyo wode yaatiyoogee metennaagaa akeekidosona. Aybissi? Issi gaasoy he wodiyan naatu qofaanne yelidaageetu qofaa shaakkiyaabi darenna gishshataassa. Taywaanen deˈiya Masahika giyo issi aaway hara gaasuwaa hagaadan giis: “Nuuni nu naatuura deretiya sohuwaa kiyo wode woy abbaa doonan hemettiyo wode darotoo nu naati kaseegaappe aaruwan ufayttoosona. Yaatiyo gishshawu, he wodiyan eta haasayissidi eta qofaa eriyoogee metennaagaa akeekida.” Qommoora ibaa denttido Kaatiya hagaadan gaasu: “Taani timirtte keettaappe simmiyo wode ta aayyiyaa tana darotoo asay allaxxiyo keehi loˈˈiyaasaa ekkada bawusu. Hegaa mala wodiyan, timirtte keettan hanidabaa woy tana unˈˈissidabaa iyyo yootanawu metootikke.”

16. So asay Yihoowa meretaa beˈiyoogan waani ufayttana danddayii?

¹⁶ So asay Yihooway medhdhidobata beˈiiddi issippe wodiyaa aattiyoogan ufayttana danddayoosona. Hegee eti kaseegaappe aaruwan issoy issuwaa siiqanaadan maaddees. Geeshsha Maxaafay, ‘miiccanawu wodee deˈiyoogaa,’ qassi “ufaittidi yexxanaukka wodee” deˈiyoogaa yootees. (Era. 3:1, 4) Nuuni dosiyoobata oottanaadan Yihooway saˈan loˈˈiya sohota medhdhiis. Daro so asay gaxariyan, deretiya sohuwan woy abbaa doonan issippe meretaa beˈiiddi ufayttiyoogaa dosees. Issi issi naati asay allaxxiyo loˈˈiya sohuwan woxxiyoogaanne kaaˈiyoogaa, mehiyaa doˈaa beˈiyoogaanne shaafan woy abban haattaa wadhdhiyoogaa dosoosona. Nuuni Yihooway medhdhidobata beˈiiddi wodiyaa aattananne allaxxana danddayoos!

17. Yelidaageeti bantta naati Xoossay medhdhidobata beˈiiddi ufayttanaadan maaddana koshshiyoy aybissee?

¹⁷ Xoossay ehaana ooratta alamiyan yelidaageetinne naati Yihooway medhdhidoban awudeegaappenne aaruwan ufayttana. He wode, nuuni mehiyawu doˈawu yayyokko woy eti nuuyyo yayyokkona. (Isi. 11:6-9) Nuuni Yihooway medhdhidoban merinawu ufayttana. (Maz. 22:26) SHin yelidaageetoo, intte naati meretan ufayttanaadan maaddanawu he wodee gakkanaashin naagoppite. Intte intte naata Yihoowaabaa tamaarissanawu meretaa goˈettiyo wode, eti Kawuwaa Daawiti giidoogaadan, ‘Abeet Yihoowawu, ne oosuwaa mala oosoy baawa’ gaana danddayoosona.—Maz. 86:8.