1-2. Neeni haˈˈikka xammaqettanawu giigettabeennaba gidikko, hidootaa qanxxana koshshennay aybissee? (Koyro sinttan deˈiya misiliyaa xeella.)

 NEENI xammaqettanawu koyikko, ne deˈuwan keehi loˈˈobaa oottanawu halchchadasa. Neeni haˈˈi xammaqettanawu giigettadii? Neeninne cimati maayettikko, kaalliya wodiyan xammaqettanawu murtta. Neeni hegaadan oottikko, Yihoowa haggaazuwan keehi ufayttana.

² SHin, neeni xammaqettanaappe kase ayyaanaaban loytta diccana koshshiyoogaa issi uri neessi yootidee? Woy hegaa neeni akeekadii? Yaatikko, hidootaa qanxxoppa. Neeni yelaga woy cima gidin, ayyaanaaban diccada xammaqettana danddayaasa.

3. Toophphiyaa biittaa suntta gidida bitanee Piliphphoosa ay oychchidee, qassi denddiya hara oyshay aybee? (Oosuwaa 8:36, 38)

³ Oosuwaa 8:36, 38 nabbaba. Toophphiyaa biittaa suntta gidida bitanee wonggeliyaa mishiraachchuwaa yootiya Piliphphoosa hagaadan oychchiis: “Xammaqettiyoogaa tana diggiyai aibee?” Toophphiyaa bitanee xammaqettanawu keehi koyiis, shin I tumuppe xammaqettanawu giigettidee?

4. Toophphiyaa bitanee ubbatoo tamaaranawu murttidoogaa waatidi bessidee?

⁴ Toophphiyaa bitanee “goinnanau Yerusalaame biis.” (Oos. 8:27) Hegaa gishshawu, I Ayhuda haymaanootiyawu laamettida asa gidennan aggenna. I Yihoowaabaa Ibraawettuwan xaafettida Geeshsha Maxaafaappe tamaaridoogee qoncce. Gidikkonne, I gujjidi tamaaranawu koyiis. Piliphphoosi Toophphiyaa bitaniyaara gayttiyo wode he bitanee ay oottiiddi deˈii? I hananabaa yootiya Isiyaasa xaatta maxaafaa nabbabiiddi deˈees. (Oos. 8:28) Hegee mino ayyaanaabaa quma. Toophphiyaa  bitanee Geeshsha Maxaafaa koyro timirttetu xallay gidana gibeenna; I ubbatoo tamaaranawu koyiis.

5. Toophphiyaa bitanee ba tamaaridobaa waatidee?

⁵ He bitanee Hinddake giyo Toophphiyaa Kaweessi oottiya suntta; I iyyo ‘miishsha ubbaa naagiyaagaa.’ (Oos. 8:27) Yaatiyo gishshawu, I daro aawatettay deˈiyo oosoy darido asa gidennan aggenna. SHin, I Yihoowawu goynnanawu wodiyaa bazziis. I tumaa tamaariyoogaa xallay gidana giidi uttiiggibeenna; tamaaridobaa oosuwan peeshshiis. Yaatiyo gishshawu, I Toophphiyaappe keehi haakkiya, Yerusalaamen deˈiya beetamaqidasiyan Yihoowawu goynnanawu biis. Hegaadan manddaranawu daro wodiyaanne miishshaa koshshikkonne, he bitanee aybakka oottanawu koyiis.

6-7. Toophphiyaa bitanee Yihoowa siiqiyo siiquwaa minttanawu ay oottidee?

⁶ Toophphiyaa bitanee Piliphphoosappe keehi koshshiya amarida tumaa tamaariis; hegeetuppe issoy Yesuusi Mase gidiyoogaa. (Oos 8:34, 35) He bitanee Yesuusi assi oottidobaa ufayttidi tamaariis. I hegaa tamaari simmidi ay oottidee? I Ayhuda haymaanootiyawu laamettida, bonchchettida asa gididi deˈana danddayees shin. Gidikkonne, I kaseegaappe aaruwan Yihoowanne A Naˈaa siiqiis. I ba deˈuwan keehi koshshiyaabaa kuuyidi xammaqettiyoogan, Yesuus Kiristtoosa kaalliyaagaa gidiis. Bitanee xammaqettanawu giigettidoogaa Piliphphoosi beˈidi A xammaqiis.

⁷ Neeni Toophphiyaa bitaniyaa leemisuwaa kaallikko, xammaqettanawu giigettana danddayaasa. Neenikka ammanettada, “Xammaqettiyoogaa tana diggiyay aybee?” gaana danddayaasa. Toophphiyaa bitanee oottidoogaadan neeni waata oottana danddayiyaakko ane beˈoos: I tamaariyoogaa aggibeenna, tamaaridobaa oosuwan peeshshiis, qassi ubbatoo Xoossaa siiqiis.

8. Yohaannisa 17:3y neeni ay oottana koshshiyoogaa yootii?

⁸ Yohaannisa 17:3 nabbaba. Ha xiqisiyan Yesuusi yootidobay neeni Geeshsha Maxaafaa xannaˈanawu koyanaadan oottennee? Nuuppe daroti hegaadan oottida. SHin ha xiqisee nuuni aggennan tamaarana bessiyoogaakka yootii? Ee. Nuuni ‘issi Xoossaa eriyoogaa’ mule aggokko. (Era. 3:11) Nuuni meri merinawu tamaarana. Nuuni loyttidi tamaariyo wode, kaseegaappe aaruwan Yihoowakko shiiqana.—Maz. 73:28.

9. Nuuni Geeshsha Maxaafaa koyro timirtteta eri simmidi ay oottana koshshii?

⁹ Nuuni Yihoowaabaa tamaariyoogaa doommiyo wode, Geeshsha Maxaafaa koyro timirttetu xallaa tamaarida. Kiitettida PHawuloosi  Ibraawe Kiristtaanetussi xaafido dabddaabbiyan, hegee ‘koyro timirtte’ gidiyoogaa yootiis. I ‘biron doommiyo’ wode tamaariyoobay maaddenna giidi yootibeenna; shin I hegee guutta naˈay diccanaadan maaddiya maattaa mala gidiyoogaa yootiis. (Ibr. 5:12; 6:1) SHin ubba Kiristtaaneti koyro timirttetuppe aadhdhiya Xoossaa Qaalan deˈiya ciimma tumaa ubbatoo tamaaranaadan I minttidi yootiis. Neeni Geeshsha Maxaafaa koyro timirtteta tamaaranawu keehi koyay? Neeni Yihoowabaanne A halchchuwaabaa ubbatoo tamaaranawu koyay?

10. Issoti issoti xannaˈanawu metootiyoy aybissee?

¹⁰ SHin nuuppe daroti xannaˈanawu metootoos. Neeni shin? Timirtte keettan neeni loytti nabbabiyoogaanne xannaˈiyoogaa tamaaradii? Neeni xannaˈiyoogan ufayttay, qassi hegaappe darobaa tamaariyaabadan qoppay? Woy, xannaˈiyoogan taani gooba gidikke gaada qoppay? Yaatikko, hegaadan qoppiyay ne xalla gidakka. Yihooway nena maaddana. I wottiyoobi baynna ooppenne aadhdhiya asttamaare.

11. Yihooway Gita ‘Asttamaare’ gidiyoogaa qonccissiyaabay aybee?

¹¹ Yihooway Gita ‘Asttamaare’ gidiyoogaa Geeshsha Maxaafay yootees. (Isi. 30:20, 21) I danddayanchcha, kehanne nubaa akeekiya Asttamaare. I ba tamaaretussi deˈiya loˈˈobaa xeellees. (Maz. 130:3) Qassi I nuuni oottana danddayiyoogaappe aarobaa mule naagenna. Maalaalissiya imota gidida ne guuggiyaa I medhdhidoogaa hassaya. (Maz. 139:14) Nuuni ubbay tamaaranawu keehi koyoos. Nuna Medhdhidaagee nuuni merinawu tamaaranaadaaninne hegan ufayttanaadan koyees. Yaatiyo gishshawu, haˈˈi nuuni Geeshsha Maxaafaa tumaa ‘laamotiyoogee’ eratetta. (1 PHe. 2:2) Neeni polana danddayiyoobaa halchcha; qassi ubbatoo Geeshsha Maxaafaa nabbabanne xannaˈa. (Yaas. 1:8) Yihooway maaddin, neeni nabbabiyoogan keehi ufayttananne kaseegaappe aaruwan abaa tamaarana.

12. Nuuni Yesuusa deˈuwaabaanne haggaazuwaabaa xannaˈana koshshiyoy aybissee?

¹² Yesuusa deˈuwaabaanne haggaazuwaabaa ubbatoo wotta dentta qoppanawu wodiyaa bazza. Nuuni ha wayssiya wodiyan Yihoowayyo haggaazanawu Yesuusa leemisuwaa mintti kaalliyoogee keehi koshshiyaaba. (1 PHe. 2:21) Yesuusi bana kaalliyaageeta metoy gakkanaagaa yootiis. (Luq. 14:27, 28) Gidikkokka, A tumuppe kaalliyaageeti aagaadan Xoossaayyo ammanettidi deˈanaagaa siribeenna. (Yoh. 16:33) Yesuusa deˈuwaabaa loytta xannaˈa, qassi ne galla galla deˈuwan A leemisuwaa kaallanawu halchcha.

13. Neeni aybaa xeelliyaagan Yihoowa ubbatoo oychchana koshshii, qassi aybissi?

¹³ Era xallay gidenna. Eratettay neessi koshshiyo waanna gaasoy neeni Yihoowaabaa eranaadan maaddiyoogaa, qassi A siiqiyoogaanne an ammaniyoogaa mala eeshshati neessi deˈanaadan oottiyoogaa. (1 Qor. 8:1-3) Neeni aggennan tamaariyo wode, Yihooway neessi ammanuwaa gujjanaadan ubbatoo A oychcha. (Luq. 17:5) I hegaa mala woosaa kehatettan zaarees. Nu Xoossaa xeelliyaagan tumu eratettay neessi ammanoy deˈanaadan oottiyoogan ayyaanaaban diccanaadan maaddees.—Yaaq. 2:26.

14. Nuuni tamaaridobaa oosuwan peeshshiyoogee keehi koshshiyaaba gidiyoogaa kiitettida PHeexiroosi waati qonccissidee? (Misiliyaakka xeella.)

¹⁴ Kiristtoosa kaalliyaageeti tamaaridobaa oosuwan peeshshiyoogee keehi koshshiyaaba gidiyoogaa kiitettida PHeexiroosi qonccissiis. Geeshsha Maxaafan abay odettido Nohebaa I yootiis. Yihooway he wode deˈiya iita  asaa bashshaa haattan xayssanaagaa Noheyyo yootiis. Bashshaa haattay yaanaagaa eriyoogaa xallay Noheenne A soo asay attanaadan oottenna. PHeexiroosi Bashshaa Haattay yaanaappe kase ‘markkabee keexettiiddi deˈiyo’ wodiyaabaa yootidoogaa akeeka. (1 PHe. 3:20) Ee, Noheenne A soo asay gita markkabiyaa keexxanaadan Xoossay yootidobaa oosuwan peeshshidosona. (Ibr. 11:7) Hegaappe simmin, PHeexiroosi Nohee oottidobaa xinqqatiyaara geeddarissidi hagaadan giis: “Hegee xinqqatiyau leemiso gididi, inttena ha77i ashshees.” (1 PHe. 3:21) Yaatiyo gishshawu, neeni xinqqatiyawu giigettanawu haˈˈi oottaydda deˈiyoobaa, Noheenne A soo asay markkabiyaa keexxanawu daro layttawu oottidobaara geeddarssana danddayoos. Neeni xinqqatiyawu giigettanawu oottana koshshiyaabay aybee?

15. Nuuni nu nagaraappe wozanappe simmidoogaa waati bessana danddayiyoo?

¹⁵ Nuuni oottana koshshiya koyrobay nu nagaraappe wozanappe simmiyoogaa. (Oos. 2:37, 38) Wozanappe nagaraappe simmiyoogee wozanappe laamettanaadan oottees. Neeni pokkobaa oottiyoogaa, tambbuwaa cuwayiyoogaa woy iita haasayaa haasayiyoogaa mala, Yihoowa ufayssennabaa oottiyoogaa aggadii? (1 Qor. 6:9, 10; 2 Qor. 7:1; Efi. 4:29) Neeni hanno gakkanawu hegaadan oottabeennaba gidikko, laamettanawu ubbatoo baaxeta. Maaduwaanne kaaletuwaa demmanawu nena Geeshsha Maxaafaa xannaˈissiyaagaa woy gubaaˈe cimata oychcha. Neeni so asaara issippe deˈiya yelaga gidikko, neeni xammaqettennaadan diggana danddayiya iita eeshshata xoonanaadan maaddana mala nena yelidaageeta ubbatoo oychcha.

16. Nuuni ubbatoo Yihoowawu goynnana koyikko ay oottana koshshii?

¹⁶ Neeni ayyaanaaban loˈˈobaa meeze oottiyoogee keehi koshshiyaaba. Ayyaanaabaa meezetuppe issoy Kiristtaane shiiqota shiiqiyoogaanne shiiquwan qofaa yootiyoogaa. (Ibr. 10:24, 25) Qassi, neeni sabbakiyoogaa doommiyo wode, hegaa ubbatoo ootta. Neeni kaseegaappe aaruwan sabbakiyo wode, keehi ufayttana. (2 Xim. 4:5) Neeni so asaara deˈiya yelaga gidikko, nena hagaadan oychcha: Taani shiiqota shiiqanaadan woy haggaazanaadan tana yelidaageeti hassayissana  koshshiiyye, tarkka hegaadan oottiyaanaa? Neeni hegeeta nerkka oottiyoogan neessi ammanoy deˈiyoogaa qonccissaasa, qassi Xoossaa Yihoowa siiqiyoogaanne A galatiyoogaa bessaasa. Hageeti neeni Yihoowawu immana danddayiyo ‘Xoossaa milatiyoogaa’ bessiya oosota. (2 PHe. 3:11; Ibr. 13:15) Nuuni nu dosan Yihoowawu immiyo imota ubbay A ufayssees. (2 Qoronttoosa 9:7ra gatta xeella.) Nuuni danddayido keenaa Yihoowawu immiyo wode ufayttiyo gishshawu, hegeeta oottoos.

17-18. Neeni ayyaanaaban diccada xammaqettanawu keehi koshshiya eeshshay aybee, qassi hegee nena waati maaddii? (Leemiso 3:3-6)

¹⁷ Neeni xammaqettanawu koyada ayyaanaaban dicciyo wode nena paacee gakkana. Ne ooratta ammanuwaa gishshawu issoti issoti nena qilliiccana danddayoosona; ubba qassi eti nena eqettana woy yedettana danddayoosona. (2 Xim. 3:12) Neeni iita meezeta agganawu baaxetiyo wode, haˈˈikka issi issitoo hegeeta oottanawu paacettana danddayaasa. Woy neeni halchchidobay eesuwan polettennaba milatido gishshawu yiillotananne unˈˈettana danddayaasa. Neeni genccanaadan aybi maaddanee? Keehi koshshiya eeshsha gidida, Yihoowa siiqiyo siiquwaa.

¹⁸ Neeni Yihoowa siiqiyoogee, neessi deˈiya aybippenne aadhdhiya ufayssiya eeshsha. (Leemiso 3:3-6 nabbaba.) Neeni Xoossaa mintta siiqiyoogee nena gakkiya metuwaa genccanaadan maaddees. Yihooway ba ashkkaratussi aggenna siiquwaa bessiyoogaa Geeshsha Maxaafay darotoo yootees. Aggenna siiquwaa giyoogee, Yihooway ba ashkkarata mule aggenna woy eta siiqiyoogaa aggenna giyoogaa. (Maz. 100:5) Neeni Xoossaa leemisuwan merettadasa. (Doo. 1:26) Neeni aggenna siiquwaa waata bessana danddayay?

19. Neeni Yihooway neessi oottido ubbabaa gishshawu A keehippe galatiyoogaa waata bessana danddayay? (Galaatiyaa 2:20)

¹⁹ Ubba wode Yihoowa galata. (1 Tas. 5:18) Galla galla nena hagaadan oychcha: ‘Yihooway tana siiqiyoogaa waati bessidee?’ Yaatada Yihooway neessi oottidobaa dummaya qonccissada woosan A galata. Kiitettida PHawuloosi Yihoowaabaa akeekidoogaadan, Yihooway nena siiqiyo gishshawu, neessi loˈˈobaa oottiyoogaa akeeka. (Galaatiyaa 2:20 nabbaba.) Nena hagaadan oychcha: ‘Taanikka A siiqiyoogaa bessanawu koyiyaanaa?’ Yihoowa  siiqiyoogee neeni paaciyaa eqettanaadaaninne metuwaa genccanaadan maaddana. He siiqoy neeni ne Aawaa ubba galla siiqiyoogaa bessiyo, ayyaanaabaa meezeta ubbatoo oottanaadan maaddana.

20. Neeni nena Yihoowawu sheedhdhanawu ay oottana koshshii, qassi ha kuushshay keehi koshshiyoy aybissee?

²⁰ Neeni Yihoowa siiqiyo siiqoy wurssettan neeni dumma woosaa woossanaadan oottana. Neeni nena Xoossawu sheedhdhana. Neeni nena Yihoowawu sheedhdhiyo wode, neessi ha maalaalissiya hidootay deˈanaagaa hassaya: Neeni merinawu abaa gidana. Neeni nena Yihoowawu sheedhdhiyo wode, loˈˈo wodiyankka iita wodiyankka awu haggaazanawu qaalaa gelaasa. Neeni he qaalaa zaarettada mule gelana koshshenna. Nuuni nuna Yihoowawu sheedhdhiyoogee gita kuushsha gidiyoogee qoncce. SHin hagaa qoppa: Neeni ne deˈuwan darobaa kuuyadasa, hegeetuppe amaridaageeti keehi loˈˈo, shin nena Yihoowawu sheedhdhiyoogaappe aadhdhiyaabi mule baa. (Maz. 50:14) Seexaanay neeni ne Aawawu ammanettada deˈennaadan oottanawu qoppidi, neeni A siiqiyo siiquwaa shugissanawu baaxetees. Seexaanan mule xoonettoppa! (Iyy. 27:5) Neeni Yihoowa mintta siiqiyoogee, awu merinawu haggaazanawu gelido qaalaa naaganaadaaninne saluwan deˈiya ne Aawaakko kaseegaappe aaruwan shiiqanaadan maaddana.

21. Xinqqatee doomettappe attin wurssetta gidenna giyoy aybissee?

²¹ Nena Yihoowawu sheedhdha simmada, keehi koshshiyaabaa oottanawu ne gubaaˈe cimatussi yoota. SHin, xammaqettiyoogee doomettappe attin wurssetta gidennaagaa ubbatoo hassaya. Xinqqatee merinawu Yihoowawu haggaaziyoogawu doometta. Yaatiyo gishshawu, haˈˈi ne Aawaa mintta siiqa. Ubba galla ne siiquwaa minttanawu halchcha. Yaatiyoogee neeni xammaqettanaadan oottana. Hegee keehi ufayssiya gallassa gidana. SHin hegee doometta xalla. Neeni Yihoowanne A Naˈaa siiqiyo siiqoy merinawu gujji gujji baanaadan amottoos!