XANNAˈIYO HUUPHE YOHUWAA 39
Nuuni Siiqiyo Uri Yihoowawu Haggaaziyoogaa Aggiyo Wode
“Eti . . . A darotoo qohidosona!”—MAZ. 78:40, NW.
MAZAMURE 102 ‘Daafuranchata Maaddite’
HA XINAATIYAN *
1. Siiqiyo uri bohettiyoogee issi ura waati qohana danddayii?
NEENI siiqiyo uri gubaaˈiyaappe bohetti erii? Hegee keehi azzanttiyaaba gidana danddayees! Hildo giyo michchiyaa hagaadan gaasu: “Nuuni aqo oyqqoosappe 41 layttappe guyyiyan ta azinay hayqqidoogee tana gakkida aybippenne keehi iitaba gaada qoppaas. * SHin ta naˈay, A machchiyaanne A naati gubaaˈiyaa aggidoogee tawu hegaappekka ubba yaa iitaba.”
Neeni siiqiyo uri Yihoowawu haggaaziyoogaa aggiyo wode ne ay keena azzaniyaakko Yihooway erees (Mentto 2-3 xeella) *
2-3. Mazamure 78:40, 41 yootiyoogaadan, Yihooway ba ashkkarati awu haggaaziyoogaa aggiyo wode waanii?
2 Yihoowa so asa yara gidida kiitanchchatuppe amaridaageeti A bolli makkalido wode I ay keena azzanidaakko qoppa! (Yih. 6) Qassi I siiqiyo Israaˈeelati A bolli darotoo makkalido wode I ay keena azzanidaakko qoppa. (Mazamure 78:40, 41 nabbaba. *) Neeni siiqiyo uri awu haggaaziyoogaa aggiyo wode saluwan deˈiya siiqiya Aawaykka azzaniyoogee qoncce. Nena azzanttiyaabaa Yihooway akeekees. I neessi qarettidi koshshiya minttettuwaanne maaduwaa immana.
3 Nuuni siiqiyo uri Yihoowawu haggaaziyoogaa aggiyo wode, Yihooway nuna maaddanaadan nu waatana danddayiyaakko ha huuphe yohuwan beˈana. Dabboy bohettidoogeeti gubaaˈiyan deˈikko, nuuni eta waati maaddana danddayiyaakkokka pilggana. SHin nuuni aggana koshshiyo amarida qofata koyro beˈana.
NENA MOORANCHCHADAN XEELLOPPA
4. Issi naˈay woy naˈiyaa Yihoowawu haggaaziyoogaa aggiyo wode yelida darotussi aybi siyettii?
4 Yelidaageeti darotoo siiqiyo naˈay woy naˈiyaa Yihoowawu haggaaziyoogaa aggiyo wode bantta naˈi Yihoowawu haggaaziyoogaa aggennaadan loytti maaddana koshshi shin attiis giidi qoppoosona. Luka giyo ishay ba naˈay bohetti simmin hagaadan giis: “Hegee ta bala gaada qoppaas. Ubba qassi hegaabaa taani iitabaa aymottaas. Issi issitoo taani yeekkaysinne azzanays.” I naˈaykka bohettido Elzabet giyo michchiyaa darotoo hagaadan qoppawusu: “Taani aayo gidiyoogaadan darobaa moorennan aggikke. Ta naˈay Yihoowa siiqanaadan taani loytta tamaarissabeennabadan tawu siyettiis.”
5. Issi uri Yihoowawu haggaaziyoogaa aggiyo wode oyshettiyay oonee?
5 Yihooway nuussi ubbawu koyidobaa dooriyo maataa immidoogaa nuuni hassayana koshshees. Hegaa giyoogee nuuni Yihoowawu azazettanawu woy azazettennan agganawu doorana danddayoos giyoogaa. Issi issi naatussi loˈˈo leemiso gidiya aawi woy aaya baynnaba gidikkonne, eti Yihoowawu haggaazanawunne awu ammanettidi deˈanawu kuuyidosona. Qassi harati Yihoowa siiqanaadan eta yelidaageeti minni tamaarissidoogeeta gidikkonne, eti guyyeppe Yihoowawu haggaaziyoogaa aggidosona. Yaatiyo gishshawu, Yihoowawu haggaazanawu woy agganawu nuuni ubbay kuuyana koshshees. (Yaas. 24:15) Hegaa gishshawu, intte naˈi Yihoowawu haggaaziyoogaa aggido gishshawu azzaniya yelidaageetoo, hegee intte mooro giidi qoppoppite!
6. Yelida uri Xoossawu haggaaziyoogaa aggiyo wode issi yelagawu aybi siyettana danddayii?
6 Issi issitoo, aaway woy aayyiyaa Yihoowawu haggaaziyoogaa aggana danddayoosona, ubba qassi I woy A so asaa aggi bayana danddayoosona. (Maz. 27:10) Hegee banttana yelidaageeta bonchchiyaanne eta nashshiya naatussi keehi azzanttiyaaba gidana danddayees. Aaway bohettido Estera hagaadan gaasu: “I tumaappe haakkidoogaa taani akeekido gishshawu darotoo yeekkays. I Yihoowawu haggaaziyoogaa agganawu kuuyiis. Taani ta aawaa siiqiyo gishshawu I bohettido wode, A payyatettaabay tana ubbatoo qofissees. Ubba qassi yashshan maashays.”
7. Aaway woy aayyiyaa bohettido yelaga xeelliyaagan Yihoowawu aybi siyettii?
7 Yelagatoo, intte aaway woy aayyiyaa bohettidaba gidikko, nuuni intteyyo keehi azzanoos! Hegee inttena keehi qohidoogaa Yihooway eriyoogaa intte ammanettana danddayeeta. I inttena siiqeesinne ammanettidi intte ayyo haggaaziyoogan ufayttees. Qassi nuunikka, gubaaˈiyan deˈiya intte ishanttinne michchontti ufayttoos. Inttena yelidaageeti kuuyiyooban oyshettiyay inttena gidennaagaakka hassayite. Qommoora qonccidaagaadan, Yihoowawu haggaazanawu woy haggaazennan agganawu koyidobaa dooriyo maataa Yihooway ubba asawu immiis. Qassi bana Yihoowawu sheedhdhidi xammaqettida ubbay “ba toohuwaa tookkanau bessees.”—Gal. 6:5.
8. Eti siiqiyo uri Yihoowakko simmana giidi naagiiddi deˈiya ammanettida so asay ay oottana danddayii? (“ Yihoowakko Simma” giya saaxiniyaakka xeella.)
8 Neeni siiqiyo uri Yihoowa aggiyo wode, I akko simmana gaada hidootan naagiyoogee wottin deˈiyaaba. Neeni I Yihoowakko simmana gaada naagaydda ay oottana danddayay? Ammanuwan minnada deˈanawu neessi danddayettida ubbabaa ootta. Yaatikko neeni, son deˈiya haratuyyo, ubba qassi bohettida urawu loˈˈo leemiso gidana danddayaasa. Qassi neeni azzanuwaa genccanawu maaddiya minotettaa demmana koshshees. Yaatiyo gishshawu, ammanuwan mino gidada deˈanawu waatana danddayay?
AMMANUWAN MINNADA DEˈANAWU NEENI WAATANA DANDDAYAY?
9. Ammanuwan minnada deˈanawu neeni waatana danddayay? (“ Ne Siiqiyo Uri Yihoowawu Haggaaziyoogaa Aggiyo Wode Minttettiya Xiqiseta” giya saaxiniyaakka xeella.)
9 Ammanuwan minnada deˈanawu neessi danddayettida ubbabaa ootta. Neeni nenanne son deˈiya harata ubbatoo minttettiyoogee keehi koshshiyaaba. Neeni hegaadan waata oottana danddayay? Ubbatoo Xoossaa Qaalaa nabbabiyoogaaninne hegaa wotta dentta qoppiyoogan, qassi gubaaˈe shiiqota shiiqiyoogan Yihoowappe minotettaa demmana danddayaasa. Aawaynne I michchiyaa tumaa aggido Joˈaana hagaadan gaasu: “Geeshsha Maxaafan etabay odettido Abigaalibaa, Asttiribaa, Iyyoobabaa, Yooseefabaanne Yesuusabaa nabbabiyo wode taani keehi woppu gays. Eta taarikee tana minttetteesinne taani loˈˈobaa qoppanaadan keehi maaddees. Biiduwan giigida mazamuretikka tana keehi minttettoosona.”
10. Mazamure 32:6-8y azzanttiyaabaa nuuni genccanaadan waati maaddii?
10 Nena qofissiya ubbabaa Yihoowawu yoota. Neeni azzaniyo wode A woossiyoogaa aggoppa. Siiqiya nu Xoossay issibaa qoppiyoogaadan neeni qoppanaadan nena maaddana malanne I “nena erissananne neeni baanau bessiya ogiyaa nena tamaarissana” mala aggennan woossa. (Mazamure 32:6-8 nabbaba.) Neeyyo tumuppe siyettiyaabaa Yihoowawu yootiyoogee keehi deexxiyaaba gidana danddayees. Gidoppe attin, ne azzaniyoogaa Yihooway loytti akeekees. I nena keehi siiqiyo gishshawu ne wozanaabaa ayyo yootanaadan minttettees.—Kes. 34:6; Maz. 62:7, 8.
11. Ibraawe 12:11 yootiyoogaadan, Yihooway siiquwan seeriyo seeraa nuuni ammanettana koshshiyoy aybissee? (“ Bohiyoogee Yihooway Nuna Siiqiyoogaa Bessees” giya saaxiniyaakka xeella.)
11 Cimati kuuyidobaa maayetta. Bohiyoogee Yihoowa giigissotuppe issuwaa. A siiqo zoree Yihoowawu haggaaziyoogaa aggida ura aybippenne aaruwan maaddees; qassi hara ubba asawukka loˈˈo. (Ibraawe 12:11 nabbaba.) Cimati issi ura bohanawu kuuyidoogee likke gidenna giidi gubaaˈiyan issoti issoti haasayana danddayoosona. SHin, hegaa mala asati moorobaa oottida uraabaa iitabaa haasayanawu darotoo koyennaagaa hassaya. Nuuni ubbabaa erokko. Hegaa gishshawu, pirdda konttiyan oottiya cimati Geeshsha Maxaafay yootiyoobaa mintti kaalliyoogaanne ‘Yihoowawu’ pirddiyoogaa ammanetta.—2 Odi. 19:6.
12. Bohettidaageetuura gayttennaadan yootiyo azazuwaa ammanettidi mintti kaalliyo gishshawu amaridaageeti demmido goˈˈay aybee?
12 Ne siiqiyo uri bohettiyo wode, cimati kuuyidobaa maayettiyoogan, I Yihoowakko simmanaadan maaddana danddayaasa. Qommoora ibaa denttido Elzabeta hagaadan gaasu: “Nu bayra naˈaara aynne gayttennaagee keehi deexxiyaaba. SHin I Yihoowakko simmi makkidi, I bohettidoogee bawu bessiyaaba gidiyoogaa yootiis. Loˈˈo gidida darobaa tamaaridoogaa I guyyeppe yootiis. Yihoowa seeray awudenne likke gidiyoogaa akeekaas.” I azinay Marki hagaadan giis: “Nuuni nu naˈaara mule gayttenna gishshawu, I simmanawu koyiyoogaa daro wodiyaappe guyyiyan nuuyyo yootiis. Nuuni azazettanaadan Yihooway maaddido gishshawu taani keehi ufayttays.”
13. Azzanttiyaabaa genccanaadan nena aybi maaddana danddayii?
13 Neeyyo siyettiyaabaa akeekiya laggetussi yoota. Neeni ubbatoo loˈˈobaa qoppanaadan maaddana danddayiya kayma Kiristtaanetuura laggeta. (Lee. 12:25; 17:17) Qommoora ibay odettido Joˈaana hagaadan gaasu: “Taani tarkka attidabadan siyettees. SHin ammanettiya laggetussi yootiyoogee taani genccanaadan maaddiis.” Gidoppe attin, gubaaˈiyan deˈiya amaridaageeti hanotay neeyyo yaa iitanaadan oottiyaabaa haasayiyaakko neeni waatana danddayay?
14. Nuuni ‘issoy issuwaabaa danddayananne issoy issuwawu atto gaana’ koshshiyoy aybissee?
14 Ne ishanttubaanne michchonttubaa danddaya. Ubba asay muletoo likkebaa haasayana giidi nuuni qoppana danddayokko. (Yaaq. 3:2) Nuuni nagaranchcha gidiyo gishshawu, issoti issoti woyganaakko erana xayikko, woy eti qoppennan haasayiyoobay nena qohikko garamettoppa. Kiitettida PHawuloosi yootido zoriyaa hassaya: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago.” (Qol. 3:13) Dabboy bohettido issi michchiyaa hagaadan gaasu: “Tana qohennan minttettanawu baaxetiya ishanttussi atto gaanaadan Yihooway tana maaddiis.” Ammanettida so asaa gubaaˈee waati maaddana danddayii?
GUBAAˈEE MAADDANA DANDDAYEES
15. Siiqiyo uri mata wode bohettido so asaa maaddanawu waatana danddayay?
15 Ammanettida so asawu kehitenne qarettite. Miriyamo giyo michchiyaa I ishay bohetti simmin shiiqota biyoogee O hirggissidoogaa yootaasu. “Asay woyganaakko gaada taani yayyaas. SHin hanidaban daro ishanttinne michchontti azzanidosona. Qassi eti ta ishaabaa iitabaa aybanne haasayibookkona. Eti tanaara azzanido gishshawu taani eta galatays.” Hara michchiyaa hagaadan gaasu: “Nu naˈay bohetti simmin ishanttinne michchontti nuna minttettanawu yiidosona. Issoti issoti woyganaakko erennaagaa yootidosona. Amaridaageeti tanaara yeekkidosonanne harati minttettiya dabddaabbiyaa xaafidosona. Eti oottidobay tana keehi maaddiis!”
16. Dabboy bohettidoogeeta gubaaˈee ubbatoo waati minttettananne maaddana danddayii?
16 Ammanettida so asaa ubbatoo maadda. Awudeegaappenne aaruwan haˈˈi etawu ne siiqoynne minttettoy koshshees. (Ibr. 10:24, 25) Bohettida uraa so asaakka bohettidabadan qoppidi gubaaˈiyan deˈiya amaridaageeti eta haasayissennaagaa issi issitoo eti akeekidosona. Nuuni etawu hegaadan siyettanaadan koyokko! Yelidaageeti Yihoowawu haggaaziyoogaa aggido yelagata nuuni galatananne minttettana koshshees. Azinay bohettidonne so asaa aggidi biido Mariya hagaadan gaasu: “Amarida laggeti ta soo yiidi qumaa kattidosonanne ta naata xannaˈissiyoogan maaddidosona. Eti tanaara azzanidosonanne yeekkidosona. Asay tabaa worddobaa haasayiyo wode eti tawu exatidosona. Eti tana keehi minttettidosona!”—Roo. 12:13, 15.
Gubaaˈiyan deˈiya ishanttinne michchontti bohettida uraa soo asaa maaddiyoogan siiqiyoogaa bessana danddayoosona (Mentto 17 xeella) *
17. Unˈˈettidaageeta minttettanawu cimati waatana danddayiyoonaa?
17 Cimatoo, ammanettida so asaa minttettanawu intteyyo danddayettida ubbabaa oottite. Siiqiyo uri Yihoowawu haggaaziyoogaa aggido so asaa minttettiyo dumma aawatettay intteyyo deˈees. (1 Tas. 5:14) Eta minttettanawu, gubaaˈiyaappe kasenne gubaaˈiyaappe simmin eta haasayissite. Eta soo biidi eta oychchite, qassi etaara woossite. Etaara sabbakite, woy intte soo asaa goynuwan eta issi issitoo shoobbite. Cimati unˈˈettidaageetussi koshshiyaabaa kunttana bessees, qassi etawu qarettananne eta siiqana koshshees.—1 Tas. 2:7, 8.
HIDOOTAA QANXXOPPA, QASSI UBBATOO YIHOOWAN AMMANETTA
18. Naaˈˈantto PHeexiroosa 3:9y yootiyoogaadan, Xoossawu haggaaziyoogaa aggidaageeti waananaadan I koyii?
18 Yihooway “ooninne ba nagaraappe simmanaadan koyeesippe attin, ooninne xayana mala koyenna.” (2 PHeexiroosa 3:9 nabbaba.) Issi uri gita nagaraa oottikkokka, A deˈuwaa Xoossay haˈˈikka alˈˈobadan xeellees. Yihooway nu ubbaa gishshawu keehi alˈˈo waagaa, hegeekka I siiqiyo Naˈaa deˈuwaa qanxxidoogaa hassaya. Yihooway bana aggidaageeti baakko simmanaadan siiquwan maaddanawu malees. Eti simmanaagaa I hidootees, Yesuusi yootido bayida naˈaa leemisuwaappe nuuni hegaa akeekana danddayoos. (Luq. 15:11-32) Tumaa aggida daroti saluwan deˈiya siiqiya bantta Aawaakko guyyeppe simmidosona. Qassi ishanttinne michchontti eti simmiyo wode keehi ufayttidi mokki ekkoosona. Qommoora ibaa denttido Elzabeta ba naˈay simmido wode keehi ufayttaasu. A hagaadan gaasu: “Nuuni hidootaa qanxxennaadan minttettida ubbaa wozanappe galatays.”
19. Nuuni ubbatoo Yihoowan ammanettana danddayiyoy aybissee?
19 Nuuni ubbatoo Yihoowan ammanettana danddayoos. A zoree nuna ubbatoo maaddees. Yihooway A siiqiyaanne awu goynniya ubbaa wozanappe siiqiya kehanne qarettiya Aawa. Neeni waayettiyo wode Yihooway nena aggennaagaa ammanetta. (Ibr. 13:5, 6) Qommoora abaa denttido Marki hagaadan giis: “Yihooway mulekka nuna yeggibeenna. Nuuni metootiyo wode I nuna ubbatoo maaddana.” Yihooway ‘ubbaappe aadhdhiya wolqqaa’ muletoo nuussi immees. (2 Qor. 4:7) Neeni siiqiyo uri Yihoowawu haggaaziyoogaa aggiyo wodekka ammanettada deˈananne hidootan naagana danddayaasa.
MAZAMURE 44 Unˈˈettida Ura Woosaa
^ MENT. 5 Nuuni siiqiyo uri Yihoowawu haggaaziyoogaa aggiyo wode keehi azzanoos! Hegaadan haniyo wode Xoossawu aybi siyettiyaakko ha huuphe yohuwan nuuni beˈana. Sooppe issi uri bohettiyo wode he soo asay minettanawunne bantta ammanuwan minnidi deˈanawu waatana danddayiyaakko nuuni tamaarana. Qassi gubaaˈiyan deˈiya ubbati so asaa waati minttettananne maaddana danddayiyaakko ha huuphe yohuwan beˈana.
^ MENT. 1 Ha huuphe yohuwan issi issi asatu sunttay laamettiis.
^ MENT. 2 Mazamure 78:40, 41 (NW) : “Eti bazzon A bolli woqqutoo makkalidonaa! Mela bazzon A darotoo qohidosona! Eti zaari zaaridi, Xoossaa paaccidosona; Israaˈeela Geeshshaa keehi azzanttidosona.”
^ MENT. 80 MISILIYAA QONCCISSUWAA: Issi ishay ba soo asaanne Yihoowa aggidi biyo wode, A keettaayyiyaanne A naati metootoosona.
^ MENT. 82 MISILIYAA QONCCISSUWAA: Gubaaˈiyan deˈiya issi keettaa asaa naaˈˈu cimati minttettoosona.
