1. Ammanettiya asa aybin erana danddayiyoo?

 AMMANETTIYA asi ba gelido qaalaa naaganawunne tumaa haasayanawu baaxetees. (Maz. 15:4) I ammanettiya asa gidiyoogaa asay erees. Nubaa xeelliyaagankka nu ishanttussinne michchonttussi hegaadan siyettanaadan koyoos. Eti nunan ammanettanaadan nuuni ay oottana danddayiyoo?

2. Nuuni harati nunan ammanettiyo asa gidiyoogaa aybin bessana danddayiyoo?

² Harati nunan ammanettiyo asa gidiyoogaa nuuni oottiyooban bessana koshshees. Ammanettiyoogaa miishshan leemisana danddayoos. Miishshaa minjjiyoogee metiyaaba; shin xayssiyoogee metenna. Yihooway ammanettiyaagaa. “I oottiyo ooso ubbai ammanettiyaagaa” gidiyo gishshawu, nuuni ubbatoo an ammanettana danddayoos. (Maz. 33:4) Qassi nuuni A milatanaadan I koyees. (Efi. 5:1) Saluwan deˈiya bantta aawaa milatidanne ammanettiyaageeta gidiyoogaa bessida amarida Yihoowa ashkkaratu leemisuwaa ane beˈoos. Qassi nuuni ammanettiya asa gidanaadan maaddiya ichchashu eeshshata beˈana.

3-4. Hananabaa yootiya Daaneeli ammanettiya asa gidiyoogaa aybin bessidee, qassi hegee nuuni nuna ayba oyshata oychchanaadan denttettana koshshii?

³ Ammanettiya asa gidiyoogan hananabaa yootiya Daaneeli keehi loˈˈo leemiso. I omoodettidi Baabiloonen deˈiyaaba gidikkonne, loˈˈo sunttay deˈiyo ammanettiya asa gidiyoogaa bessiis. I Yihooway maaddin Baabiloona Kawuwaa Naabukadanaxoora  aymuwaa birshshido wode, asay kaseegaappe aaruwan an ammanettiis. Issi wode, Yihooway kawuwan ufayttibeennaagaa Daaneeli awu yootiis; hegee kawoy siyanawu koyiyooba gidenna. Naabukadanaxoori hanqqettiya asa gidiyo gishshawu Daaneeli he kiitaa yootanawu xala gidana koshshiis. (Dane. 2:12; 4:20-22, 25) Daro layttappe guyyiyan, Daaneeli Baabiloone kawo keettaa godaa bollan xaafettida xuurabaa suure birshshiyoogan ammanettida asa gidiyoogaa zaarettidi bessiis. (Dane. 5:5, 25-29) Guyyeppe, Meedoona asa gidida Daariyoosinne sunttettida A oosanchchati Daaneelan ‘dumma’ ayyaanay deˈiyoogaa akeekidosona. Eti Daaneeli ‘ammanettiya asa gidido gishshawu, A bolli ayba balanne demmibookkona.’ (Dane. 6:3, 4) Ee, eeqawu goynniya deriyaa haariyaageetikka Yihoowawu goynniya Daaneeli ammanettiya asa gidiyoogaa akeekidosona!

⁴ Nuuni Daaneela hanotaa wotti dentti qoppiyo wode, nuna hagaadan oychchana danddayoos: ‘Yihoowa Markka gidenna asatu sinttan tawu ay mala sunttay deˈii? Taani ta aawatettaa poliyaanne ammanettiya asa gidiyoogan erettiyaanaa?’ Nuuni ha keehi koshshiya oyshata nuna oychchana bessiyoy aybissee? Nuuni ammanettiya asa gidiyo wode Yihooway sabettanaadan oottiyo gishshataassa.

5. Hanaanee ammanettiya asa gididoy aybissee?

⁵ Biittaa Haariya Nahimee 455 K.K., Yerusalaame dirssaa gimbbiyaa zaaretti gimbbi simmidi, katamaa naagana danddayiya ammanettiya asata koyiis. Nahimee qatuwaa gadaawaa  Hanaaniyaanne harata dooriis. Geeshsha Maxaafay Hanaanee “hara ubbaappe aadhdhida ammanettiyaanne Xoossaassi yayyiya asa” gidiyoogaa yootees. (Nah. 7:2, NW) Hanaanee Yihoowa siiqiyoogeenne A azzanttenna mala yayyiyoogee I bawu imettida ay oosuwaakka minni oottanaadan maaddiis. He eeshshati Xoossaa haggaazuwan ammanettiyaageeta gidanaadan nunakka maaddana.

6. Tikiqoosi kiitettida PHawuloosawu ammanettida lagge gidiyoogaa waatidi bessidee?

⁶ Kiitettida PHawuloosi ammanettido, Tikiqoosa giyo ishaa hanotaa beˈa. PHawuloosi issi keettan qashettido wode Tikiqoosan ammanettiis; qassi I ‘ammanettida ashkkara’ gidiyoogaa yootiis. (Efi. 6:21, 22) I Efisoonaaninne Qolasiyaasan deˈiya ishanttussi dabddaabbiyaa gattiyoogaa xalla gidennan, eta minttettana danddayiyoogaakka PHawuloosi ammanettiis. Ha wodiyan nuussi ayyaanaaban koshshiyaabaa kunttiya ammanettida asatubaa Tikiqoosa hanotay nuna hassayissees.—Qol. 4:7-9.

7. Ammanettiya asa gidiyoogaa xeelliyaagan ne gubaaˈe cimatuppenne gubaaˈiyawu oottiyaageetuppe ay tamaarana danddayay?

⁷ Ha wodiyan ammanettida cimatanne gubaaˈiyawu oottiyaageeta wozanappe galatoos. Daaneelaagaadan, Hanaaniyaagaadaaninne Tikiqoosaagaadan eti banttawu imettida oosuwaa minnidi oottoosona. Leemisuwawu, nuuni saaminttawu gidduwan shiiqiyo shiiquwaa wode, ubba kifiletikka asawu imettidoogaa eroos. Kifiliyaa ekkida ishanttinne michchontti bantta kifiliyaa giigettidi shiishshiyo wode cimati keehi galatoosona! Qassi nu xinaateta Woggaa galla shiiquwawu shoobbiyo wode issi uri dere haasayaa haasayanaagaa ammanettoos. Haggaazuwawu koshshiya xuufetikka deˈanaagaa ammanettoos. Ha ammanettida ishantti nuussi koshshiyaabaa kunttiyo gishshawu Yihoowa keehippe galatoos! SHin nuuni ayba ogetun ammanettiya asa gidiyoogaa bessana danddayiyoo?

8. Nuuni xuuraa naagiyoogan haratussi qoppiyoogaa waati bessiyoo? (Leemiso 11:13)

⁸ Nuuni nu ishanttanne michchontta siiqiyo gishshawu, eta payyatettaabawu qoppoos. Gidikkonne, nuuni eta xuuraa naagana koshshees. Koyro xeetu layttaa Kiristtaane gubaaˈiyan deˈiya amaridaageeti ‘banttawu bessennabaa haasayiiddi, zigiroosonanne yohon coo geloosona.’ (1 Xim. 5:13) Nuuni eta mala gidanawu mule koyokko. SHin issi uri xuurabaa nuussi yootidi, nuuni hegaa hara asawu odennaadan yootiis gaada qoppa. Leemisuwawu, issi michchiyaa ba sahuwaabaa woy bana gakkida hara metuwaabaa nuussi yootada, hegaa nuuni ooyyoonne odennaadan oychchana danddayawusu. Nuuni A oychchidoogaadan oottana koshshees. * (Leemiso 11:13 nabbaba.) Xuuraa naagiyoogee keehi koshshiyaaba gidido hara daro hanotata ane beˈoos.

9. So asaa yarati ammanettiyaageeta gidiyoogaa waati bessana danddayiyoonaa?

⁹ Intte soo asay ammanettiyo ura gida. So asa yara ubbay bantta soo asaa xeelliyaagan xuura gididabaa naagana koshshees. Leemisuwawu, issi Kiristtaane maccaaseessi I keettaaway eriyo loˈˈo gidenna meezee iyyo deˈana danddayees. I hegaabaa haratuyyo yootiyoogan A yeellatanaadan oottii? I hegaadan mule oottennaagee qoncce! I ba machchiyo siiqiyo gishshawu, O azzanttiya aybanne oottanawu  koyenna. (Efi. 5:33) Naati harati banttana bonchchanaadan koyoosona. Yelidaageeti hegaa hassayiyoogee keehi koshshiyaaba. Yelidaageeti bantta naatu balaa haratussi yootiyoogan eti yeellatanaadan oottana koshshenna. (Qol. 3:21) Naati ammanettiyaageeta gidananne so asaa yarata yeellayana danddayiyaabaa haratussi yootana koshshennaagaa erana bessees. (Zaa. 5:16) So asaa yara gidida ubbay bantta soo asaa xuuraa naagikko, eta dabbotay minnees.

10. Tumu lagge gidanawu waatana koshshii? (Leemiso 17:17)

¹⁰ Ne laggeti ammanettiyo ura gida. Issi issitoo, nuuppe daroti nu laggiyawu xuuraa yootana koshshiyo wodee deˈees. Hegee issi issitoo wayssiyaaba gidana danddayees. Nuussi siyettiya ubbabaa issi urawu yootiyoogee metiyaaba gidana danddayees; qassi nu laggee nu xuuraa hara urawu yootidoogaa nuuni guyyeppe erikko keehi azzanana. SHin nu xuuraa naagiya uraa nuuni keehippe nashshoos. He uri nuussi tumu ‘lagge.’—Leemiso 17:17 nabbaba.

11. (a) Cimatinne eta machchoti ammanettiyaageeta gidiyoogaa waati bessiyoonaa? (b) Gubaaˈiyaa oosuwaara gayttidaagan xuurabaa siyidanne guyyeppe ba soo asawu hegaa yootenna cimaappe ay tamaarana danddayiyoo? (Misiliyaa xeella.)

¹¹ Ne ishanttinne michchontti ammanettiyo ura gida. Xuuraa naagiya cimati bantta ishanttuyyo ‘carkkuwaappe geemmiyoonne gotiyaappe baqatiyo soho.’ (Isi. 32:2) Cimati xuuraa naagiyoogaa nuuni ammanettiyo gishshawu etawu aybakka yootana danddayoos. Eti hara asawu yootana bessennabaa nuussi yootanaadan nuuni eta iisettana koshshenna. Cimatu machchoti harata xeelliyaagan xuurabaa bantta azinati yootanaadan oychchenna gishshawu eta bonchchoos. Gubaaˈe cimaa machchiyaa ba ishanttunne michchenttu xuuraa haratuyyo yootennaagee keehi ufayssiyaaba. Issi gubaaˈe cimaa machchiyaa hagaadan gaasu: “Eta sunttaa gujjin, cimatu maadoy koshshido asatubaa aybanne ta  azinay tawu yootenna gishshawu taani keehi galatays. Ta azinay xuuraa naagiyo gishshawu taani keehi galatays. Hegee taani aynne oottana danddayenna metuwawu hirggennaadan tana maaddiis. Hegaappe denddidaagan, gubaaˈiyan deˈiya ubbatuura laˈatettan haasayana danddayays. Qassi ta keettaaway taani tawu siyettiyaabaa woy ta metuwaabaa yootiyo wodekka xuuraa naagiyoogaa ammanettana danddayays.” Nuuni ubbay ammanettiyaageeta gidiyoogan loˈˈo sunttay deˈiyoogeeta gidanawu koyoos. Yaatanawu maaddiya eeshshati awugeetee? Hegeetuppe ichchashata ane beˈoos.

12. Siiqoy ammanettiyaageeta gidanawu keehi maaddiya eeshsha gididoy aybissee? Leemisuwaa yoota.

¹² Siiqoy ammanettiyaageeta gidanawu keehi maaddiya eeshsha. Yesuusi ubbaappe gitatiya naaˈˈu azazoti Yihoowa siiqiyoogaanne nu shooruwaa siiqiyoogaa gidiyoogaa yootiis. (Maa. 22:37-39) Nuuni Yihoowa siiqiyo gishshawu ammanettiyoogaara gayttidaagan A milatana koyoos. Leemisuwawu, nuuni nu ishanttanne michchontta siiqiyoogee eta xuuraa haratussi yootennaadan oottees. Nuuni eta qohiyaabaa, yeellayiyaabaa woy azzanttiyaabaa mule oottanawu koyokko.—Yoh. 15:12.

13. Nuuni ammanettiyaageeta gidanaadan nuna ziqqi oottiyoogee ayba ogiyan maaddii?

¹³ Ammanettiyaageeta gidanawu nuna ziqqi oottiyoogee maaddees. Bana ziqqi oottiya Kiristtaanee issibaa haratuppe kasetidi yootiyoogan harati bana sabbanaadan oottanawu baaxetenna. (Pili. 2:3) I haratussi yootanawu bessenna xuurabaa eriyaabadan harati qoppanaadan oottanawu baaxetenna. Nuna ziqqi oottiyoogee nuuni Geeshsha Maxaafan woy nu xuufetun qonccibeenna issi allaalliyaa xeelliyaagan nu qofaa daro asawu yootiyoogaappe naagettanaadan maaddees.

14. Ammanettiyaageeta gidanawu akeekanchcha gidiyoogee nuna waati maaddii?

¹⁴ Akeekay issi Kiristtaanee ‘coˈˈu gaanawunne haasayanawu’ bessiya wodee awudekko eranaadan maaddees. (Era. 3:7) Issi issi wogatun “Cincca kanay ulo giddon boccees” giyo haasayay meeze gididaba. Hegaa giyoogee haasayiyoogaappe coˈˈu giyoogee loˈˈo gidiyo wodee deˈees giyoogaa. Leemiso 11:12y, “akeekanchcha urai co77u gees” giidi zoriyoy hegaassa. Issi leemisuwaa beˈa. Meezee deˈiyo issi cimay gita metoy merettido hara gubaaˈiyaa darotoo maaddiis. Abaa hara cimay yootidobaa akeeka. “I hara gubaaˈiyaa xeelliyaagan xuura gididabaa haratussi mule yooti erenna.” He cimay akeekanchcha gidiyo gishshawu, A gubaaˈiyan deˈiya hara cimati A bonchchoosona. I bantta xuuraa haratussi yootennaagaa eti ammanettoosona.

15. Neeni gawaa geeshsha gidikko harati nenan ammanettiyoy aybissakko bessiya leemisuwaa yoota.

¹⁵ Ammanettiya asa gidanawu koshshiya harabay gawaa geeshsha gidiyoogaa. Gawaa geeshsha uri ubbatoo tumubaa haasayiyo gishshawu nuuni an ammanettoos. (Efi. 4:25; Tii. 2:10) Leemisuwau, neeni tamaarissiyoogan qara gidanawu qoppadasa. Yaatiyo gishshawu, issi uri ne haasayaa siyidi neeni ay giigissana koshshiyaakko maaddiya qofaa yootanaadan oychchaasa. Qoncciyan zorana danddayiya neeni ammanettiyo uri oonee? Neeni siyanawu koyiyoobaa xallaa yootiya ureeyye, tumubaa yootiya uree? Zaaroy qoncce. Geeshsha Maxaafay hagaadan gees: “Geemmida siiquwaappe baliyo wode qoncciyan seeriyoogee keha. . . . Siiqoi nena dechchiyoogee keha.” (Lee. 27:5, 6) Nu laggee  qoncciyan yootiyoobay koyro heeran siyanawu ufayssennaba gidikkonne, guyyeppe nuna maaddana.

16. Nu huuphiyaa naagana koshshiyoogaa Leemiso 10:19y waati qonccissii?

¹⁶ Harati nunan ammanettanaadan koyikko, nuuni nu huuphiyaa naagiyoogee keehi koshshiyaaba. He eeshshay nuuni xuura gididabaa yootanaadan paacettiyo wode coˈˈu gaanaadan maaddees. (Leemiso 10:19 nabbaba.) Nuuni sooshal miidiyaa goˈettiyo wode nu huuphiyaa naagiyoogee metiyaaba gidana danddayees. Nuuni naagettana xayikko, xuura gididabaa akeekennan daro asawu yootana danddayoos. Nuuni xuura gididabaa issitoo elektronike miishshaa goˈettidi yeddiichchikko, hegaa harati waati goˈettiyaakko naagana woy hegee daro qohuwaa gattennaadan teqqana danddayokko. Qassi nu huuphiyaa naagiyoogee eqettiyaageeti nu ishanttanne michchontta qohiyaabaa yootanaadan nuna cimmiyo wode coˈˈu gaanaadan maaddees. Nu oosoy teqettido woy muleera digettido biittatun polisee nuna qoriyo wode hegaa malabay hanana danddayees. Nu “doonaa barana” giya maaraa hagaaninne hara hanotatun oosuwan peeshshana danddayoos. (Maz. 39:1) Nuuni nu soo asaa, laggeta, ishanttanne michchontta woy hara oonanne gidin, asa ubbawu ammanettiyaageeta gidana koshshees. Qassi nuuni ammanettiyaageeta gidanawu nu huuphiyaa naagana koshshees.

17. Gubaaˈiyan deˈiyaageeti issoy issuwawu ammanettanaadan nuuni waatana danddayiyoo?

¹⁷ Siiqiyaanne ammanettiya ishanttu maabaraa yame gidanaadan Yihooway nuna ehiido gishshawu, A keehi galatoos! Nu ishanttinne michchontti ammanettiyo ura gidiyo aawatettay nu ubbawu deˈees. Nuuni siiqiyaageeta, nuna ziqqi oottiyaageeta, akeekanchchata, gawaa geeshshatanne nu huuphiyaa naagiyaageeta gidiyo wode, gubaaˈiyan deˈiyaageeti issoy issuwaa ammanettanaadan oottoos. Nuuni ubbatoo ammanettiya asa gididi deˈanawu baaxetana koshshees. Nu Xoossaa Yihoowa milatiyaageetanne awudenne ammanettiyaageeta gidoos.