1. SHaˈu Layttaa Haaruwaa wode nuna naagiya keehi ufayssiyaabay aybee?

 ASAY Kiristtoosa SHaˈu Layttaa Haaruwaa wode ha saˈan hayquwaappe denddanaagee ayba ufayssiyaaba gidanee! Siiqiyo uri hayqqidoogeeti etaara zaarettidi gayttanawu yeemuwan naagoosona. Yihoowaykka yeemuwan naagees. (Iyy. 14:15) Saˈan deˈiya ubbay eti siiqiyo hayqqidaageeti denddiyo wode ay keena ufayttanaakko qoppa. Kasetiya huuphe yohuwan beˈidoogaadan, eta sunttay deˈo maxaafan xaafettido ‘xilloti’ “de7anau denddana.” (Oos. 24:15; Yoh. 5:29) Nuuni siiqiyo hayqqidaageetuppe daroti Armmageedoonappe simmin sohuwaara denddennan waayi aggana. * Hegaa bollikka, hayqqanaappe kase Yihoowaabaa tamaaribeenna woy awu haggaazibeenna ‘worddota’ geetettidaageeti “pirddettanau denddana.”

2-3. (a) Isiyaasa 11:9, 10n odettida hanno gakkanawu oosettibeenna awudeegaappenne aadhdhiya tamaarissiyo oosoy aybee? (b) Nuuni ha huuphe yohuwan beˈanabay aybee?

² Hayquwaappe denddiya ubbay tamaarana koshshees. (Isi. 26:9; 61:11) Yaatiyo gishshawu, hanno gakkanawu oosettibeenna awudeegaappenne aadhdhiya tamaarissiyo oosoy oosettana. (Isiyaasa 11:9, 10 nabbaba.) Aybissi? Hayquwaappe denddiya worddoti Yesuus Kiristtoosabaa,  Xoossaa Kawotettaabaa, wozuwaabaa, qassi Yihoowa sunttay keehi koshshiyoogaabaanne haariyo maatay awu deˈiyoogaabaa tamaarana koshshiyo gishshataassa. Xillotikka Yihooway saˈawu halchchidobaa xeelliyaagan ba asaa loddan loddan tamaarissidobaa erana koshshees. Ha ammanettidaageetuppe amaridaageeti kumetta Geeshsha Maxaafay xaafettanaappe daro wodiyaa kasetidi hayqqidosona. Worddotikka xillotikka darobaa tamaarana koshshees.

³ Ha huuphe yohuwan nuuni kaallidi deˈiya oyshata beˈana: Ha awudeegaappenne aadhdhiya tamaarissiyo oosoy waani oosettanee? He wode tamaariyoobawu asay azazettiyoogee woy aggiyoogee eta sunttay deˈo maxaafan xayenna hanotan xaafettanaadan woy xaafettennaadan waati oottii? Ha oyshatu zaaruwaa eriyoogee ha wodiyan nuussi keehi koshshiyaaba. Nuuni beˈanaagaadan, Daaneelanne Ajjuutaa maxaafan odettida ufayssiya amarida hiraagati hayqqidaageeti denddiyo wode hananabaa xeelliyaagan nuuni kase akeekido ogiyaa laammanaadan maaddana. Koyruwan, Daaneela 12:1, 2n kasetidi odettida hanana ufayssiyaabata ane beˈoos.

4-5. Wurssetta wodiyaa xeelliyaagan Daaneela 12:1y qonccissiyoobay aybee?

⁴ Daaneela 12:1 nabbaba. Daaneela maxaafay wurssetta wodiyan kayan kayan hanana ufayssiyaabata yootees. Leemisuwawu, Mikaaˈeela geetettida Yesuus Kiristtoosi ‘Xoossaa asaa heemmanawu denddanaagaa’ Daaneela 12:1y yootees. He hiraagay Yesuusi Xoossaa Kawotettaa Kawo gididi saluwan haariyoogaa doommido 1914n polettiyoogaa doommiis.

⁵ Qassi “kawotetti doommoosappe doommin, he wode gakkanaashin, be7i erenna meto” wode Yesuusi ‘denddanaagaa’ Daaneeli yootiis. He “meto wodee” Maatiyoosa 24:21n odettida ‘gita waayiyaara’ issi mala. He meto wodiyaa wurssettan hegeekka Armmageedoona olaa wode Yesuusi denddana woy Xoossaa asaa ashshana. Ajjuutaa maxaafay hegeeta “daro waayiyaa waayidi” yiida “zawai bainna daro asaa” giidi qonccissees.—Ajj. 7:9, 14.

6. Zawi baynna daro asay gita waayiya aadhdhi simmin hananabay aybee? Qonccissa. (Saˈan denddiyaageetubaa loytta eranawu, ha maxeetiyan “Nabbabiyaageetu Oyshaa” xeella.)

⁶ Daaneela 12:2 nabbaba. Zawi baynna daro asay he meto wodiyaa aadhdhi simmin hananabay aybee? Daaneela 12:2y saluwan deˈanawu denddiyoogaa woy eqettiyaageeti sabbakiyo oosuwaa essanawu matido 1918ppe simmin nu oosoy kaseegaappe aaruwan oosettidoogaa bessiyaabadan kase qoppida. * SHin ha xiqisee yaana ooratta alamiyan hayqqidaageeti denddanaagaa yootiyoogaa haˈˈi nuuni akeekida. He denddoy wurssetta wodee wuri simmin, qassi Armmageedoona olaappe guyyiyan hanana.

7. (a) Amaridaageeti “merinaa de7uwau” denddana giyoogee woygiyoogee? (b) Hegee ‘kehiya denddo’ gididoy aybiinee?

⁷ SHin Daaneela 12:2y yootiyoogaadan “merinaa de7uwau” amaridaageeti hayquwaappe denddana giyoogee woygiyoogee?  Hegaa giyoogee 1,000 layttaa wode hayquwaappe denddanaageeti Yihoowanne Yesuusa eriyoogan woy aggennan eriyoogaaninne azazettiyoogan merinaa deˈuwaa demmana giyoogaa. (Yoh. 17:3) Hagee kase hayqqidi denddida amaridaageetuugaappe ‘kehiya denddo.’ (Ibr. 11:35) Aybissi? He nagaranchcha asati zaarettidi hayqqido gishshataassa.

8. Amaridaageeti “yeellaunne merinaa kaushshau” denddiyoy ayba ogiyaanee?

⁸ SHin Yihoowappe tamaaranawu koyiyaageeti hayquwaappe denddida ubbata gidokkona. Amaridaageeti “yeellaunne merinaa kaushshau” denddanaagaa Daaneela hiraagay yootees. Eti makkaliyo gishshawu eta sunttay deˈo maxaafan xaafettenna, qassi eti merinaa deˈuwaa demmokkona. Eti ‘merinawu kawuyyana’ woy xayana. Yaatiyo gishshawu, hayquwaappe denddana ubbaa wurssettan gakkanabay eti hayquwaappe denddi simmidi oottiyoobaara gayttidaba gidiyoogaa Daaneela 12:2y yootees. * (Ajj. 20:12) Amaridaageeti merinaa deˈuwaa demmana; shin harati demmokkona.

9-10. Gita waayiyaappe simmin hanana harabay aybee, qassi “Saluwaa poo7uwaadan” pooˈanaageeti oonee?

⁹ Daaneela 12:3 nabbaba. Yaana ‘meto wodiyaappe’ simmin hanana harabay aybee? Daaneela 12:2y yootiyoogaa bolli, paydo 3y gita waayiyaappe simmin hananabaa yootees.

¹⁰ “Saluwaa poo7uwaadan” pooˈanaageeti oonee? Maatiyoosa 13:43n Yesuusi yootido qofaappe hegaa akeekana danddayoos: “He wode xilloti bantta aawaa kawotettan awa aifiyaadan poo7ana.” Ha sohuwan Yesuusi banaara saluwan haarana tiyettida ishantta gidida “kawotettaa asaa” woy Kawotettaa naata xeelliyaagan yootiis. (Maa. 13:38) Yaatiyo gishshawu, Daaneela 12:3y tiyettidaageetubaanne SHaˈu Layttaa Haaruwaa wode eti oottanabaa qonccissiyaaba gidana danddayees.

11-12. SHaˈu layttaa wode tiyettidaageeti oottanabay aybee?

¹¹ Tiyettidaageeti “darota xillotettaa ogiyaa” waati kaalettanee? SHaˈu layttaa wodiyan tiyettidaageeti tamaarissiyo oosuwaa Yesuus Kiristtoosaara hashetidi kaalettana. Qassi eti kawo gididi haariyoogaa xalla gidennan, qeese gididikka oottana. (Ajj. 1:6; 5:10; 20:6) Hegaa gishshawu, eti asa “ubbaa harggiyaappe” pattana, qassi loddan loddan zaarettidi wottiyoobi baynnaageeta oottana. (Ajj. 22:1, 2; Hiz. 47:12) Tiyettidaageeta hegee keehi ufayssana!

¹² Xillotettaa ogiyaa kaallida ‘darotu’ giddon deˈanay oonee? Hegeeti hayquwaappe denddana asata, Armmageedoona olaappe attiya asatanne ooratta alamiyan yelettana naata. Saˈan deˈiya ubbay 1,000 layttaa wurssettan wottiyoy baynnaagaa gidana. Yaatin, eta sunttay deˈo maxaafan xayenna hanotan xaafettiyoy awudee?

13-14. Saˈan deˈiya wottiyoobi baynna asay ubbay merinaa deˈuwaa demmanawu ay oottana koshshii?

¹³ Issi uri wottiyoobi baynna asa gidees giyoogee merinaa deˈuwaa demmees giyoogaa gidennaagaa nuuni hassayana  koshshees. Addaamebaanne Hewaanibaa qoppa. Eti wottiyoy baynna asa gidikkonne merinaa deˈuwaa demmanaappe kase Xoossaa Yihoowawu azazettana koshshees. SHin eti awu azazettibeennaagee azzanttiyaaba.—Roo. 5:12.

¹⁴ SHaˈu layttaa wurssettan saˈan deˈiyaageetu hanotay ay mala gidanee? Eti ubbaykka wottiyoobi baynnaageeta gidana. He wottiyoobi baynna asay ubbay Yihoowa haaruwau merinawu exatanee? Woy amaridaageeti, wottiyoobi baynna asa gidikkonne ammanettibeenna Addaamenne Hewaani mala gidanee? Ha oyshatussi zaaruwaa demmana koshshees, shin waatidi?

15-16. (a) Ubba asay Yihoowawu ammanettiyoogaa bessanay awudee? (b) He wurssetta paaciyaappe guyyiyan hananabay aybee?

¹⁵ Seexaanay 1,000 layttawu qashettana. He wode, oonanne balettana danddayenna. SHin Seexaanay 1,000 layttaa wurssettan qashuwaappe birshshettana. He wode I wottiyoobi baynna asaa cimmanawu malana. He paaciyaa wode saˈan deˈiya wottiyoobi baynna asa ubbay Xoossaa sunttaaranne A haaruwaara gayttidaagan eti Yihoowawu exatanaakko agganaakko qoncciyan bessana danddayoosona. (Ajj. 20:7-10) He wode eti dooriyoobay eta sunttay deˈo maxaafan xayenna hanotan xaafettanaadan woy xaafettennaadan oottana.

 ¹⁶ Amarida asay Addaameegaadaaninne Hewaaniigaadan Yihoowa haaruwawu azazettennan ixxana. Eta bolli gakkanabay aybee? Ajjuutaa 20:15y hagaadan gees: “De7o maxaafan ba sunttai xaafettibeenna asi ooninne tama abban yegettiis.” Ee, ha makkalanchchati muleera xayana. SHin wottiyoobi baynna asatuppe daroti he wurssetta paaciyaappe aadhdhana. Hegaappe simmin, eta sunttay xayenna hanotan deˈo maxaafan xaafettana.

17. Nu wodiyan hananabaa xeelliyaagan Daaneelawu kiitanchchay yootidobay aybee? (Daaneela 12:4, 8-10)

¹⁷ Ha sinttappe hananabaa qoppiyoogee ayba ufayssiyaabee! Gidikkokka, nu wodiyaa, ‘wurssetta wodiyaa’ xeelliyaagan Daaneelawu issi kiitanchchay keehi koshshiyaabaa yootiis. (Daaneela 12:4, 8-10 nabbaba; 2 Xim. 3:1-5) He kiitanchchay Daaneelawu tumu ‘eray daranaagaa’ yootiis. Ee, Daaneela maxaafan odettida hiraagaa Xoossaa asay loytti akeekana. He wode “iitati iitabaa” oottanaagaanne “iitatuppe issi urinne” akeekennaagaa kiitanchchay gujjidi yootiis.

18. Mata wode iitatu bolli aybi gakkanee?

¹⁸ Iitabaa oottiyaageeti ha wodiyan qaxxayettennaba nuussi milatana danddayees. (Mil. 3:14, 15) SHin mata wode Yesuusi  deeshshan leemisettidaageeta pirddanawu, dorssan leemisettidaageetuppe eta shaakkana. (Maa. 25:31-33) Ha iitati gita waayiyaappe paxa attokkonanne ooratta alamiyan deˈanawu denddokkona. Milkkiyaasa 3:16n qonccida ‘hassayissiya maxaafan’ eta sunttay deˈenna.

19. Nuuni ha wodiyan waatana koshshii, qassi aybissi? (Milkkiyaasa 3:16-18)

¹⁹ Ha wodiyan nuuni iitatu bagga gidennaagaa nu oottiyooban bessana koshshees. (Milkkiyaasa 3:16-18 nabbaba.) Yihooway ‘baassi dummatida asadan’ xeelliyo hegeekka, awu alˈˈo gididaageeta shiishshiiddi deˈees. Nuuni etappe issuwaa gidanawu koyiyoogee qoncce.

20. Yihooway Daaneelawu wurssettan yootidobay aybee, qassi hegee polettin beˈanawu neeni yeemottiyoy aybissee?

²⁰ Nuuni keehi ufayssiya wodiyan deˈoos. SHin hagaappe aaruwan ufayssiyaabay hanana. Mata wode iitati ubbay xayishin nuuni beˈana. Hegaappe simmin, Yihooway Daaneelawu yootidobay polettiyoogaa nuuni beˈana: “Gallassatu wurssettan nena gakkiya laataa ekkanau denddana.” (Dane. 12:13) Daaneelinne ne siiqiyo harati “denddana” wodiyaa yeemuwan naagay? Yaatikko, ha wodiyan ammanettada deˈanawu neeyyo danddayettida ubbabaa ootta; qassi Yihoowa deˈo maxaafan ne sunttay xayenna hanotan xaafettanaagaa ammanettana danddayaasa.