1. Milkkiyaasa 3:16y yootiyoogaadan, Yihooway xaafido maxaafay aybee, qassi he maxaafan xaafettidabay aybee?

 YIHOOWAY daro shaˈu layttawu issi dumma maxaafaa xaafiiddi takkiis. Ammanettida markka gidida Aabeela sunttaappe doommidi daro sunttay he maxaafan deˈees. * (Luq. 11:50, 51) He wodeppe doommidi Yihooway he maxaafan daro asaa sunttaa xaafiis; qassi ha wodiyan miilooniyan qoodettiya asaa sunttay he maxaafan deˈees. (Milkkiyaasa 3:16 nabbaba.) Geeshsha Maxaafan he maxaafay ‘deˈo maxaafaa’ geetettees.—Ajj. 3:5; 17:8.

2. Deˈo maxaafan eta sunttay xaafettidoogeeti oonee, qassi nu sunttay he maxaafan xaafettanaadan nuuni waatana koshshii?

² Yihoowa wozanappe bonchchiyaageetunne A sunttaa siiqiyaageetu sunttay ha dumma maxaafan deˈees. Eti merinaa deˈuwaa demmana danddayoosona. He maxaafan nu sunttay xaafettanaadan koyikko, A Naˈaa Yesuus Kiristtoosa wozuwaa yarshshuwaa baggaara nuuni Yihoowaara dabbotaa minttana koshshees. (Yoh. 3:16, 36) Nu hidootay saluwan gidin woy saˈan, nuuni ubbay nu sunttay he maxaafan xaafettanaadan koyoos.

3-4. (a) Deˈo maxaafan nu sunttay haˈˈi xaafettikko, nuuni merinawu deˈana danddayiyoo? Qonccissa. (b) Ha huuphe yohuwaaninne kaalliyaagan nuuni ay beˈanee?

³ Eta sunttay ha maxaafan xaafettido ubbay merinaa deˈuwaa demmoosona giyoogee? Kessaabaa 32:33n Yihooway Muusessi yootidobaappe ha oyshaa zaaruwaa demmana  danddayoos. Yihooway hagaadan giis: “Taani ta mazggabaappe quccanaagee ta bolli nagaraa oottida asatu sunttaa.” Hegaa gishshawu, haˈˈi he maxaafan xaafettida sunttay qucettana danddayees. Hegee Yihooway koyro eta sunttaa qucettana danddayiya irssaasiyan xaafidoogaa mala. (Ajj 3:5) Nu sunttay qucettana danddayenna biiriyan he maxaafan xaafettidi ubbatoo deˈanaakkonne nuuni shaakki erana koshshees.

⁴ Hagee issi issi oyshata nuuni oychchanaadan oottana danddayees. Leemisuwawu, eta sunttay he maxaafan xaafetidoogeeta xeelliyaagan Geeshsha Maxaafay woygii, qassi eta sunttay xaafettibeennaageetubaa shin woygii? He maxaafan eta sunttay xaafettido asati merinaa deˈuwaa demmiyoy awudee? Yihoowa eranaappe kase hayqqida asatubay shin? He maxaafan eta sunttay xaafettana danddayii? Ha oyshatu zaaruwaa ha huuphe yohuwaaninne kaalliyaagan beˈana.

HE MAXAAFAN ETA SUNTTAY XAAFETTIDOOGEETI OONEE?

5-6. (a) Piliphphisiyuusa 4:3y yootiyoogaadan, deˈo maxaafan eta sunttay xaafetti uttidoogeeti oonee? (b) Deˈo maxaafan xayenna hanotan eta sunttay xaafettanay awudee?

⁵ Deˈo maxaafan eta sunttay xaafettidoogeeti oonee? Ha oyshaa zaaranawu ichchashu dumma dumma citan deˈiya asatubaa beˈana. Hegeetuppe amaridaageetu sunttay deˈo maxaafan xaafettiis, qassi haratuugee xaafettibeenna.

⁶ Koyro citan deˈiyaageeti Yesuusaara saluwan haaranawu doorettidaageeta. Deˈo maxaafan eta sunttay haˈˈi xaafetti uttidee? Ee. Kiitettida PHawuloosi Piliphphisiyuusan deˈiya, ‘banaara issippe oottiyaageetussi’ yootidoogaadan, Yesuusaara haaranawu doorettida, tiyettidaageetu sunttay deˈo maxaafan xaafetti uttiis. (Piliphphisiyuusa 4:3 nabbaba.) SHin eta sunttay he maxaafaappe  qucettenna mala eti ubbatoo ammanettidi deˈana koshshees. Eta bolli wurssetta maatafay wodhdhi simmin, he maxaafan eta sunttay xayenna hanotan xaafettana; hagee eti hayqqanaappe kase woy gita waayee doommanaappe kase haniyaabaa.—Ajj. 7:3.

7. Hara dorssa gidida zawi baynna daro asaa sunttay deˈo maxaafan xayenna hanotan xaafettiyo wodiyaa xeelliyaagan Ajjuutaa 7:16, 17​ppe ay akeekiyoo?

⁷ Naaˈˈantto citan deˈiyaageeti hara dorssaa gidida zawi baynna daro asata. Eta sunttay deˈo maxaafan haˈˈi xaafetti uttidee? Ee. Eti Armmageedoona olaappe aadhdhi simminkka deˈo maxaafan eta sunttay xaafetti uttanee? Ee. (Ajj. 7:14) Dorssa mala gididaageeti “merinaa de7uwau” baanaagaa Yesuusi yootiis. (Maa. 25:46) Gidikkonne, Armmageedoonappe attiyaageeti sohuwaara merinaa deˈuwaa demmokkona. Eta sunttay deˈo maxaafan irssaasiyan xaafetti uttidoogaadan takkees. SHaˈu Layttaa Haaruwaa wode, Yesuusi ‘eta heemmananne deˈo haattaa pulttuwaakko kaalettana.’ Kiristtoosa kaaletuwawu azazettiyaageetunne wurssetta pirddaa wode Yihoowawu ammanettidaageeta geetettidaageetu sunttay deˈo maxaafan xayenna hanotan xaafettana.—Ajjuutaa 7:16, 17 nabbaba.

8. Deˈo maxaafan eta sunttay xaafettibeennaageeti oonee, qassi eta bolli aybi gakkanee?

⁸ Heezzantto citan deˈiyaageeti Armmageedoona olan xayana deeshsha geetettidaageeta. Eta sunttay deˈo maxaafan xaafettibeenna. Eti “merinaa qaxxayuwau” baanaagaa Yesuusi yootiis. (Maa. 25:46) PHawuloosi ayyaanay kaalettin eti “merinaa bashshan” qaxxayettanaagaa yootiis. (2 Tas. 1:9; 2 PHe. 2:9) Qassi asi deˈido wode ubban geeshsha ayyaanaa bolli nagaraa oottidaageeti merinawu xayanappe attin merinawu deˈokkona. Eti hayquwaappe denddennaagee qoncce. (Maa. 12:32; Mar. 3:28, 29; Ibr. 6:4-6) Haˈˈi qassi, saˈan hayquwaappe denddana naaˈˈu citata ane beˈoos.

HAYQUWAAPPE DENDDANAAGEETA

9. Oosuwaa 24:15y yootiyoogaadan, saˈan hayquwaappe denddana naaˈˈu citati awugeetee, qassi he naaˈˈu citatu giddon deˈiya dummatettay aybee?

⁹ Saˈan merinawu deˈanawu hidootay deˈiyo hayquwaappe denddiya naaˈˈu citatubaa, hegeetikka ‘xillotubaanne’ ‘worddotubaa’ Geeshsha Maxaafay yootees. (Oosuwaa 24:15 nabbaba.) ‘Xillota’ geetettidaageeti paxa deˈiyo wode ammanettidi Yihoowawu haggaazidaageeta. Qassi ‘worddota’ geetettidaageeti hayqqanaappe kase Yihoowawu haggaazibeennaageeta. Dariya bagga asay oottiyoobay xilloba gidenna. Naaˈˈu citatikka hayquwaappe denddiyo gishshawu, eta sunttay deˈo maxaafan xaafetti uttiis gaana danddayiyoo? Ha oyshaa zaaranawu naaˈˈu citata ane kayan kayan beˈoos.

10. Xilloti hayquwaappe denddanay aybissee, qassi etappe amaridaageeti demmana maatay aybee? (Saˈan hayquwaappe denddiyaageetuura gayttidaagan ha maxeetiyan “Nabbabiyaageetu Oyshaa” giyaagaakka xeella.)

¹⁰ Oyddantta citan deˈiyaageeti ‘xillota.’ Eti hayqqanaappe kase, deˈo maxaafan eta sunttay xaafetti uttiis. Eti hayqqiyo wode he maxaafaappe eta sunttay qucettii? CHii, Yihooway eta haˈˈikka paxa deˈiya asadan xeellees. Yihooway “merinau de7iyaageetu Xoossaa gidiyoogaappe attin, haiqqidaageetu Xoossaa gidenna.” (Luq. 20:38) Hegaa giyoogee, xilloti saˈan hayquwaappe denddiyo wode eta sunttay xayenna hanotan xaafettibeennaba gidikkonne, deˈo maxaafan eta sunttay xaafetti uttiis giyoogaa. (Luq. 14:14) Hayquwaappe denddiya amaridaageeti, daanna gididi “biitta ubbaa bollan” oottiyo maataa demmana.—Maz. 45:16.

11. ‘Worddota’ geetettidaageeti deˈo maxaafan eta sunttay xaafettanaadan waatana koshshii?

 ¹¹ Ichchashantta citan deˈiyaageeti ‘worddota.’ Geella, eti Yihoowa higgiyaa eribeenna gishshawu hayqqanaappe kase xillotettaa deˈuwaa deˈibookkona. Hegaa gishshawu eta sunttay deˈo maxaafan xaafettibeenna. Gidikkonne, eta sunttay he maxaafan xaafettana mala, Xoossay eta hayquwaappe denttana. ‘Worddota’ geetettidaageetussi daro maadoy koshshees. Etappe amaridaageeti hayqqanaappe kase keehi iitabaa oottidosona. Yaatiyo gishshawu, eti Yihooway kessido xillotettaa maaraadan waani deˈanaakko tamaarana koshshees. Yaatanawu, saˈan hanno gakkanawu oosettibeenna, awudeegaappenne aadhdhiya tamaarissiyo oosuwaa Xoossaa Kawotettay kaalettana.

12. (a) Worddota geetettidaageeta tamaarissanay oonee? (b) Tamaaridobaa oosuwan peeshshennaageetu bolli gakkanabay aybee?

¹² Worddota geetettidaageeta tamaarissanay oonee? Zaway baynna daro asatanne hayquwaappe denddida xillo asata. Worddota geetettidaageeti eta sunttay deˈo maxaafan xaafettanaadan eti Yihoowaara dabbotaa minttananne banttana awu sheedhdhana koshshees. Yesuus Kiristtoosinne tiyettidaageeti worddoti tamaaridobaa waati oosuwan peeshshiyaakko saluwan uttidi loytti xeellana. (Ajj. 20:4) Azazettanawu koyennaageeti eta layttay 100 xalla gidikkonne xayana. (Isi. 65:20) Yihoowaynne Yesuusi asaa wozanan deˈiyaabaa erana danddayiyo gishshawu, ooratta alamiyaa ooninne mooranaadan paqqadokkona.—Isi. 11:9; 60:18; 65:25; Yoh. 2:25.

DEˈUWAWUNNE PIRDDAWU DENDDIYAAGEETA

13-14. (a) Yohaannisa 5:29n Yesuusi yootido qofaa kase nuuni waatidi akeekidoo? (b) Yesuusi yootidobaa xeelliyaagan nuuni akeekana koshshiyaabay aybee?

¹³ Ha saˈan hayquwaappe denddiyaageetubaakka Yesuusi yootiis. Leemisuwawu I hagaadan giis: “Duufuwan de7iyaageeti a cenggurssaa siyiyo wodee yees. Siyidi eti  duufuwaappe gaxi kiyana; lo77obaa oottidaageeti de7anau denddana; qassi iitabaa oottidaageeti pirddettanau denddana.” (Yoh. 5:28, 29) Yesuusi woyganawu koyidee?

¹⁴ Yesuusi yootidobaa, hayquwaappe denddiyaageeti denddi simmidi oottana oosuwaabaa qonccissiyaaba giidi nuuni kase akeekida; hegee amaridaageeti denddidi loˈˈobaa oottana, harati qassi iitabaa oottana giyoogaa. SHin duufuwaappe denddanaageeti loˈˈobaa oottana woy iitabaa oottana giidi Yesuusi yootibeennaagaa akeeka. Hegaa Yesuusi polettiichchidabadan yootiis. I ‘loˈˈobaa oottidaageetubaanne iitabaa oottidaageetubaa’ yootiis. Hagee eti hayqqanaappe kase oottidobaa bessiyaaba. Hegee likke milatees. Ayssi giikko, ooratta alamiyan iitabaa oottanaadan ooyyoonne paqqadettenna. Worddo geetettidaageeti hayqqanaappe kase iitabaa oottidaageeta. Yaatiyo gishshawu ‘deˈanawu denddiyoogaanne pirddettanawu denddiyoogaa’ xeelliyaagan Yesuusi yootidobay woygiyoogee?

15. ‘Deˈanawu denddiyaageeti’ oonee, qassi aybissi?

¹⁵ Hayqqanaappe kase ‘loˈˈobaa oottida’ xilloti eta sunttay deˈo maxaafan xaafetti uttido gishshawu, eti ‘deˈanawu denddana.’ Hegaa giyoogee, Yohaannisa 5:29n ‘loˈˈobaa oottidaageeta’ geetettidaageetinne Oosuwaa 24:15n ‘xillota’ geetettidaageeti issi mala asata giyoogaa. Nuuni akeekidobay Roome 6:7n deˈiya qofaara maayettiyaaba. Xiqisee hagaadan gees: “Issi urai haiqqiyo wode nagaraa wolqqai a haarenna.” Yaatiyo gishshawu, he xilloti hayqqiyo wode Yihooway eta nagaraa atto gees, shin eti hayqqanaappe kase ammanetti oottido ubbabaa I dogenna. (Ibr. 6:10) Hayquwaappe denddana he xilloti, eta sunttay deˈo maxaafan xaafettidi deˈanaadan eti ubbatoo ammanettidi deˈana koshshiyoogee qoncce.

16. ‘Pirddettanawu denddiyoogaa’ giyoogee woygiyoogee?

¹⁶ Hayqqanaappe kase ‘iitabaa oottidaageetubaa’ shin? Eti hayqqiyo wode eta nagaray atto geetettikkonne, eti paxa deˈiyo wode Yihoowawu haggaazibookkona. Eta sunttay deˈo maxaafan xaafettibeenna. Yaatiyo gishshawu, iitabaa oottidaageeti Oosuwaa 24:15n ‘worddota’ geetettidaageetuura issi mala. Eti “pirddettanau denddana.” * Hegaa giyoogee, worddota geetettidaageetu hanotaa Yesuusi akeekan qorana giyoogaa. (Luq. 22:30) Amarida wodiyaappe guyyiyan eta sunttay deˈo maxaafan xaafettana bessiyaakkonne Yesuusi erana. Worddo geetettidaageeti eti kase oottido iita oosuwaa aggidi banttana Yihoowawu sheedhdhiyo wode xallan eta sunttay deˈo maxaafan xaafettana.

17-18. Saˈan deˈanawu denddanaageeti ubbay ay oottana koshshii, qassi Ajjuutaa 20:12, 13n “oosuwaadan” geetettidabay aybee?

¹⁷ Kase xillota woy worddota gidin, hayquwaappe denddanaageeti 1,000 layttaa wode dooyettana ooratta xaattaa maxaafan deˈiya higgeta azazettana koshshees. Kiitettida Yohaannisi ajjuutan beˈidobaa hagaadan giidi yootiis: “Haiqqidaageeti, gitatinne guuttati araataa sinttan eqqidaageeta taani be7aas. Maxaafati dooyettidosona; hara maxaafai, de7o maxaafaikka dooyettiis. Haiqqidaageeti bantta oosuwaadan, maxaafatun xaafetti uttidaagaadankka pirddettidosona.”—Ajj. 20:12, 13.

 ¹⁸ Hayquwaappe denddanaageeti pirddettiyoy awude oottidobaanee? Eti hayqqanaappe kase oottidobaanee? CHii! Eti hayqqiyo wode eti kase oottido nagaray atto geetettidoogaa hassaya. Ha sohuwan “bantta oosuwaadan” geetettidaagee eti kase oottidobaa gidana danddayenna. Hegee eti ooratta alamiyan tamaariyoobaa oosuwan peeshshiyoogaa bessiyaaba. Noha, Sameela, Daawitanne Daaneela mala ammanettida asatikka Yesuus Kiristtoosabaa tamaaridi wozuwan ammanana koshshees. Ha asati darobaa tamaarana koshshikko, worddo geetettidaageeti keehi darobaa tamaarana koshshiyoogee qoncce!

19. Ha keehi ufayssiyaabaa oosuwan peeshshennaageeta gakkanabay aybee?

¹⁹ Ha keehi ufayssiyaabaa oosuwan peeshshennaageeta gakkanabay aybee? Ajjuutaa 20:15y hagaadan gees: “De7o maxaafan ba sunttai xaafettibeenna asi ooninne tama abban yegettiis.” Ee, eti merinawu xayana. Yaatiyo gishshawu, nu sunttay deˈo maxaafan xayenna hanotan xaafettidaakkonne shaakki eriyoogee keehi koshshiyaaba!

20. SHaˈu Layttaa Haaruwaa wode oosettana keehi ufayssiya oosoy aybee? (Koyro sinttan deˈiya misiliyaa xeella.)

²⁰ SHaˈu Layttaa Haaruwaa wodee keehi ufayssiyaagaa gidana. He wode ha saˈan Xoossaa asay mule ootti erenna awudeegaappenne aadhdhiya tamaarissiyo oosoy oosettana. SHin, he wodee xillotanne worddota geetettidaageetu oosuwaa qoriyo wodekka gidana. (Isi. 26:9; Oos. 17:31) He tamaarissiyo oosoy waani oosettanee? He keehi ufayssiya oosuwaabaa eranaadaaninne nashshanaadan kaalliya huuphe yohoy nuna maaddana.