Geeshsha Maxaafay ha oyshata waati zaariyaakko beˈa.

Oosuwaa 24:15y “worddoikka xilloikka haiquwaappe” denddanaagaa yootees. Xilloti hayqqanaappe kase Xoossawu azazettidaageeta gidiyo gishshawu, eta sunttay deˈo maxaafan xaafetti uttiis. (Mil. 3:16) Worddoti Yihoowaabaa erennan hayqqido gishshawu eta sunttay deˈo maxaafan xaafettibeenna.

Yohaannisa 5:28, 29n odettida naaˈˈu citati Oosuwaa 24:15n odettidaageetuura issi mala. Yesuusi “lo77obaa oottidaageeti de7anau denddana; qassi iitabaa oottidaageeti pirddettanau denddana” giidi yootiis. Xilloti hayqqanaappe kase loˈˈobaa oottidaageeta. Eta sunttay deˈo maxaafan xaafetti uttido gishshawu eti deˈanawu denddana. SHin, worddoti hayqqanaappe kase iitabaa oottidaageeta. Eti pirddettanawu denddana. Eta sunttay deˈo maxaafan xaafettiichchibeenna, qassi eti pirddettana woy eta oosoy paacettana. He wode, eti Yihoowaabaa tamaarananne eta sunttay deˈo maxaafan xaafettanaadan oottana danddayoosona.

Ajjuutaa 20:12, 13y hayquwaappe denddana ubbay ‘maxaafatun xaafettida,’ ooratta alamiyan Xoossay nuuyyo immana ooratta higgiyawu azazettana koshshiyoogaa yootees. Azazettennaageeta Yihooway xayssana.—Isi. 65:20.

Daaneela 12:2y hayqqidaageetuppe “baggati merinaa de7uwau, baggati qassi yeellaunne merinaa kaushshau” denddanaagaa kasetidi yootiis. Ha xiqisee hayquwaappe denddanaageetussi wurssetta pirddaa yootees; eti ‘merinawu deˈana’ woy ‘merinawu kawuyyana.’ Yaatiyo gishshawu, 1,000 layttaa wurssettan amaridaageeti merinaa deˈuwaa demmana; harati qassi merinawu xayana.—Ajj. 20:15; 21:3, 4.

Issi leemisuwaa beˈa. Hayquwaappe denddana naaˈˈu citatu hanotaa hara biittan deˈanawu koyiya asatu hanotaara geeddarssana danddayoos. Xilloti, kawotettay paqqadidi oosuwaa viizaa woy deˈanawu imettiya viizaa immido asatu mala. Worddoti amarida wode xallawu woy heeraa xomoosiya urawu imettiya viizaa kawotettay immido asatu mala. Hegaa mala asati hara biittan deˈanawu paqqadettana danddayiyo asa gidiyoogaa bessana koshshees. Hegaadan, hayquwaappe denddana worddoti Yihoowa higgiyawu azazettananne Gannatiyan deˈana danddayiya xillo gidiyoogaa bessana koshshees. Hara biittaa geliyaageetussi koyro imettiya viizay ayba gidikkonne, issoti issoti guyyeppe he biittaa asa gidiyo maataa demmana danddayoosona; harati qassi he biittaappe goodettana danddayoosona. Eti he biittan deˈanaadan oottiya waannabay eta eeshshaanne eta oosuwaa. Hegaadankka, hayquwaappe denddana ubbay ooratta alamiyan deˈanaadan oottiyay eti ammanettidi deˈiyoogaanne eta oosuwaa.

Yihooway siiqiya Xoossaa xalla gidennan, suure pirddiyaagaa. (Zaa. 32:4; Maz. 33:5) I xillotakka worddotakka hayquwaappe denttiyoogan ba siiquwaa bessana. SHin eti ubbay likke gididabaanne gidennabaa xeelliyaagan I kessido xillotettaa maaraa azazettanaadan koyees. A siiqiyaageetunne I kessido maaraa azazettiyaageetu xallay ooratta alamiyan merinawu deˈana.