Koyro Qoronttoosa 15:8y yootiyoogaadan, PHawuloosi hagaadan giis: “Ubbaappe wurssettan, wodee gakkennan yelettida taassikka qoncciis.” PHawuloosi saluwan deˈiya Yesuusa ajjuutan beˈido wodiyaabaa yootennan aggenna giidi nuuni kase qonccissida. Qassi, I tiyettidaageetu denddoy doommanaappe daro xeetu layttaa kasetidi ayyaana mereta gididi yelettiis woy denddiis giyoogaa mala giidi akeekida. SHin ha xiqisiyaa loytti xannaˈi simmin, ha xiqisiyaa qonccissuwaa laammiyoogee bessiyaaba milatiis.

PHawuloosi ha sohuwan I laamettido wode hanidabaa yootiiddi deˈiyoogee qoncce. SHin I ‘wodee gakkennan yelettaas’ giido wode woyganawu koyidee? Hegawu daro gaasoti deˈana danddayoosona.

I qoppennan laamettidoogee awu keehi metiyaaba. Darotoo issi naˈi wodee gakkennan yelettiyoogee maalaalissiyaaba. Saaˈooli (guyyeppe PHawuloosa geetettidaagee) Damasqqon deˈiya Kiristtaaneta yedettanawu yaa biyo wode, hayquwaappe denddida Yesuusa ajjuutan beˈana giidi qoppibeenna. PHawuloosi qoppennan laamettidoogee A xallaa gidennan, I yedettanawu halchchido Damasqqon deˈiya Kiristtaanetakka maalaalissiis. Hegaa bollikka, amarida wodiyawu A ayfee xeellennan ixxidoogee, hanotay keehi metanaadan oottiis.—Oos. 9:1-9, 17-19.

I “bessenna wodiyan” laamettiis. ‘Wodee gakkennan yelettiis’ geetettidi koyro birshshettida Giriiketto qaalay “bessenna wodiyan yelettiis” geetettidikka birshshettana danddayees. Ha qofaa issi Geeshsha Maxaafaa birshshettay hagaadan gees: “Taani ooninne yelettana giidi naagenna wodiyan yelettaas.” PHawuloosi laamettido wode Yesuusi saluwan deˈees. Xiqisiyan kasetiya paydotun odettida asatuppe dummatiya hanotan, hayquwaappe denddida Yesuusi saluwaa baanaappe kase PHawuloosi A beˈibeenna. (1 Qor. 15:4-8) Yesuusi PHawuloosawu qoppennan qonccidoogee “bessenna wodiyaana” milatikkonne, I hayquwaappe denddida Yesuusa beˈana danddayiis.

I bana ziqqi oottiyoogaa bessiya hanotan haasayiis. Issi issi eranchchati yootidoogaadan, ha sohuwan PHawuloosi goˈettido qaalay boriyoogaa bessiyaaba milatana danddayees. PHawuloosi qoppidobay hegaa gidikko, kiitettidaagaa gidiyoogee awu bessennaba gidiyoogaa I akeekiis. I hagaadan giis: “Yesuusi kiittido ubbaappe taani laafa; taani Xoossaa woosa keettaa waissido gishshau, Yesuusi kiittidoogaa geetettada xeesettanaukka bessikke. SHin Xoossaa aaro kehatettan taani tanakka.”—1 Qor. 15:9, 10.

Yaatiyo gishshawu, PHawuloosi Yesuusi awu qoppennan qonccidoogaabaa yootiyo wode, I qoppibeenna wodiyan laamettidoogaa woy he maalaalissiya ajjuutay bawu qonccana bessiyo asa giidi bana qoppibeennaagaa yootiiddi deˈennan aggenna. Hanotay ayba gidikkonne, PHawuloosi hegaa loytti nashshiis. Hegee Yesuusi hayquwaappe denddidoogaa I sirennaadan oottiis. I Yesuusa dendduwaabaa haratussi sabbakiyo wode, ha qoppennan hanidabaa darotoo yootidoogee qoncce.—Oos. 22:6-11; 26:13-18.