1. Ooso sohuwan woy timirtte keettan harati nuna aybaa xeelliyaagan oychchana danddayiyoonaa?

 NENAARA oottiyaagee woy nenaara tamaariyaagee ne ammanuwaabaa oychchiyo wode ne waanuutii? Neeni yayyay? Nuuppe daroti yayyoos. SHin hegaa mala oyshay he uri qoppiyoobaa woy ammaniyoobaa akeekanaadan nuna maaddana danddayees, qassi hegee metootennan nuuni mishiraachchuwaa awu yootanaadan oottees. Gidikkonne, issi uri nunaara maayettenna gishshawu woy nunaara palamettanawu koyiyo gishshawu issi issitoo oychchana danddayees. Nuuni hegan maalaalettana koshshenna. Ayssi giikko, amarida asay nu ammaniyoobaa xeelliyaagan balabaa siyiis. (Oos. 28:22) Qassi nuuni deˈiyo ‘wurssetta gallassatun’ issi issitoo daroti ‘sigettokkona,’ ubba qassi ‘kehokkona.’—2 Xim. 3:1, 3.

2. Nuuni ashkke gidana koshshiyoy aybissee?

² Neeni hagaadan qoppana danddayaasa, ‘Ta ammaniyoobaa xeelliyaagan issi uri tanaara palamettanawu koyiyaaba milatikko taani kehanne hiillanchcha waana gidana danddayiyaanaa?’ Ashkketettay nena maaddana. Ashkke asi harati A yiilloyiyaabaa oottiyo wode, woy I woygi zaaranaakko erenna wode ubbatoo woppu gees. (Lee. 16:32) SHin hegaadan oottiyoogee haasayiyoogaadan metennaba gidenna gaada qoppana danddayaasa. Yaatin neeni kaseegaappe aaruwan waana ashkke gidana danddayay? Ne ammaniyoobaa xeelliyaagan issi uri nenaara palamettanawu koyikko, neeni ashkketettan waata zaarana danddayay? Qassi neeni aawa woy aayo gidikko, ne naati ashkketettan bantta ammanuwawu exatanaadan waata maaddana danddayay? Ane beˈoos.

3. Ashkke uri minoppe attin, shugo gidenna gaana danddayiyoy aybissee? (2 Ximootiyoosa 2:24, 25)

³ Ashkke uri minoppe attin, shugo gidenna. Waayissiyaabay gakkiyo wode woppu gaanawu minotettay koshshees. Ashkketettay ‘ayyaanaa ayfiyaa’ macaratuppe issuwaa. (Gal. 5:22, 23) “Ashkketettaa” geetetti birshshettida Giriiketto qaalay loohida paraa qonccissanawu issi issitoo goˈettiyo qaala. Ane loohida paraa qoppa. Paray loohidaba gidikkonne, I haˈˈikka keehi mino. SHin nuuni kaseegaappe aaruwan ashkkenne mino waani gidana danddayiyoo? Nuuni nu baaxiyan hegaa mala asa gidana danddayokko. Ha loˈˈo eeshshay nuussi deˈanaadan Xoossay nuna maaddana mala A ayyaanaa demmanawu nuuni woossana koshshees. Hegee danddayettiyaaba gidiyoogaa darotu hanotay bessees. Leemisuwawu, nu ishanttuppenne michchonttuppe daroti asay etaara palamettanawu maliyo wode ashkke gidiyoogaa bessidosona. Qassi hegee harati Yihoowa Markkatubaa loˈˈobaa qoppanaadan maaddiis. (2 Ximootiyoosa 2:24, 25 nabbaba.) Neeni kaseegaappe aaruwan waana ashkke gidana danddayay?

4. Ashkketettaa xeelliyaagan Yisaaqappe nuuni ay tamaarana danddayiyoo?

⁴ Geeshsha Maxaafay ashkketettay keehi koshshiya eeshsha gidiyoogaa bessiya daro taarikiyaa yootees. Ane Yisaaqa taarikiyaa beˈa. Garaara giyo Pilisxxeematu moottan I deˈiyo wode, qanaatiya A shooroti A aawaa ashkkarati bookkido ollata biittaa zaaridi baridosona. I ba ollaa barennaadan digganawu olettiyoogaappe, ba soo asaa ekkidi haahosaa biisinne hara ollaa bookkiis. (Doo. 26:12-18) SHin Pilisxxeemati he sohuwan deˈiya haattaa ollaakka nuugaa giidosona. Hegaa mala hanotay deˈishinkka, Yisaaqi sarotettan deˈanawu baaxetiis. (Doo. 26:19-25) Harati A yiilloyiyaabaa oottanawu murttidaba milatiyo wodekka, I ashkke gididi deˈanaadan maaddidabay aybee? I ba aawaanne aayee leemisuwaa kaallidoogee tuma; qassi sarotettan deˈida Abrahaamappenne ‘ashkkenne woppu giida ayyaanay’ deˈiyo Saarippe darobaa tamaaridoogee qoncce.—1 PHe. 3:4-6; Doo. 21:22-34.

5. Yelida Kiristtaaneti ashkketettay keehi koshshiya eeshsha gidiyoogaa naata tamaarissana danddayiyoogaa bessiya leemisoy aybee?

⁵ Yelida Kiristtaanetoo, ashkketettay keehi koshshiya eeshsha gidiyoogaa inttekka intte naata tamaarissana danddayiyoogaa ammanettite. Layttay 17 gidido Makisaanasa hanota beˈa. I timirtte keettaaninne haggaazuwan hanqqettiya asaara gayttees. A yelidaageeti I ashkke gidanaadan danddayan maaddidosona. Eti hagaadan giidosona, “Yiillotiyoogee woy hanqqettiyoogee metennaba gidikkonne, woppu giya uri keehi mino gidiyoogaa Makisaanasi haˈˈi akeekiis.” Makisaanasi ashkke gidiis.

6. Kaseegaappe aaruwan ashkke gidanaadan woosay nuna waati maaddana danddayii?

⁶ Yihoowabaa iitabaa haasayiyoogaa woy Geeshsha Maxaafaa boriyoogaa mala harati nuna yiilloyiyaabaa oottiyo wode nuuni waatana danddayiyoo? Nuuni ashkketettan zaaranawu Yihooway ba ayyaanaanne aadhdhida eratettaa immanaadan woossana koshshees. Nuuni bessiya ogiyan zaaribeennaagaa guyyeppe akeekikko shin? He hanotaa xeelliyaagan zaarettidi woossananne haroode hegaappe kehiya ogiyan waati zaarana danddayiyaakko qoppana danddayoos. Yaatikko, Yihooway nuuni hanqqettiyoogaa agganaadaaninne ashkketettaa bessanaadan ba geeshsha ayyaanaa nuussi immana.

7. Xiqiseta hassayiyoogee waayissiya hanotan nuna waati maaddana danddayii? (Leemiso 15:1, 18)

⁷ Ashkketettan haasayanawu nuuni metootiyo wode daro Geeshsha Maxaafaa xiqiseti nuna maaddana danddayoosona. Xoossaa ayyaanay nuuni he xiqiseta hassayanaadan oottana  danddayees. (Yoh. 14:26) Leemisuwawu, nuuni ashkke gidanaadan maaddana danddayiya maarata Leemiso Maxaafay yootees. (Leemiso 15:1, 18 nabbaba.) Leemiso Maxaafay unˈˈissiya hanotan nuuni woppu giidi deˈiyoogee nuussi keehi loˈˈo gidiyoogaakka yootees.—Lee. 10:19; 17:27; 21:23; 25:15.

8. Issi uri nu ammaniyoobaa xeelliyaagan oyshaa nuna oychchanaadan oottida gaasuwaa nuuni akeekana koshshiyoy aybissee?

⁸ Akeekanchcha gidiyoogeekka nuna maaddana danddayees. (Lee. 19:11) Akeekanchcha uri ba ammanuwaa xeelliyaagan issi asi aara palamettanawu koyiyo wode bana naagees. Darotoo asay nuna oyshaa oychchiyo wode hegaa oychchido gaasuwaa nuuyyo yootenna. Hegaa gishshawu eti oychchanaadan oottida gaasuwaa nuuni erana danddayennaagaa zaaruwaa yootanaappe kasetidi akeekiyoogee loˈˈo.—Lee. 16:23.

9. Geedooni Efireema asaara haasayiyo wode akeekanchchanne ashkke gidiyoogaa waati bessidee?

⁹ Geedooni Efireema asatuyyo woygi zaaridaakko beˈa. Israaˈeela asaa morkketuura olettanawu biiddi kasetidi eta xeesibeennay aybissakko eti hanqqettidi A oychchidosona. SHin eti keehi hanqqettanaadan oottida gaasoy aybee? Otoruwaa gidana danddayees. Hanotay ayba gidikkonne, Geedooni akeekanchcha gidiyoogaa  bessiis. I eti keehi hanqqettido gaasuwaa akeekiisinne etawu ashkketettan zaariis. ‘I hegaadan zaarin eti hanqquwaappe zarbbidoogaa’ Geeshsha Maxaafay yootees.—Daan. 8:1-3.

10. Nu ammanuwaabaa oychchiyaageetuyyo waati zaaranaakko eranaadan nuna aybi maaddanee? (1 PHeexiroosa 3:15)

¹⁰ Geella nunaara oottiya woy tamaariya uri Geeshsha Maxaafay yootiyo maarata nuuni kaalliyoy aybissakko oychchana danddayees. Geeshsha Maxaafay yootiyoobay aybippenne aadhdhees giidi ammaniyo gaasuwaa qonccissanawu nuussi danddayettida ubbabaa oottoos. Qassi he uraa qofaa bonchchiyoogaa bessoos. (1 PHeexiroosa 3:15 nabbaba.) Yaatiyo gishshawu, he uri nena boranawu oychchees gaada qoppiyoogaappe, I oychchiyoobay I xoqqu ootti xeelliyoobaa eranaadan nena waati maaddiyaakko loytta qoppa. Issi uri oyshaa oychchanaadan oottida gaasoy ayba gidikkonne, nuuni awu ashkketettan zaariyoogee loˈˈo. Nu zaaroy I ba qofaa laammanaadan oottana danddayees. I iitabaa woy qohiyaabaa haasayikkokka, nuuni ubbatoo ashkketettan zaaranawu koyoos.—Roo. 12:17.

11-12. (a) Nuuni deexxiya oyshawu zaaruwaa yootanaappe kasetidi ay qoppana danddayiyoo? (Misiliyaakka xeella.) (b) Oyshaa oychchiyoogee loytti haasayanaadan waati maaddana danddayiyaakko bessiya leemisuwaa yoota.

¹¹ Leemisuwawu, nunaara oottiya uri nuuni yeletaa gallassaa bonchchenna gaasuwaa oychchikko, hagaa qoppa: I nuuni issippe loˈˈo wodiyaa aattanawu nuussi paqqadetiyaakkonne qoppideeshshaa? Woy yeletaa gallassaa nuuni bonchchenna gishshawu issippe oottiyaageetuura deˈiya sarotettay moorettana giidi qoppidee? Nuuni nunaara oottiya uray haratuyyo qoppiyo gishshawu A kasetidi galatana danddayoos; qassi nuunikka ooso sohuwan sarotettay deˈanaadan koyiyoogaa yootana danddayoos. Hegee Geeshsha Maxaafay yeletaa gallassaa xeelliyaagan yootiyoobaa nuuni aara loytti haasayanaadan oottana danddayees.

¹² Issi uri hara deexxiya oyshata nuna oychchiyo wode hegaadan oottana danddayoos. Nenaara tamaariya issi uri Yihoowa Markkati attumay attumaara maccay maccaara mattumaa gayttiyoogaa xeelliyaagan qoppiyoobaa laammana koshshees giidi palamettana danddayees. Hegee I Yihoowa Markkatubaa balabaa siyidoogaa bessiyaabee? Woy qassi mattuman issi mala gidida uraara mattumaa gayttiya laggee woy dabboy awu deˈiyoogaa bessiyaabee? Hegaa mala asa nuuni ixxiyaabadan qoppidee? Nuuni ubba asaa siiqiyoogaanne issi uri ba koyidobaa dooriyo maataa bonchchiyoogaa awu yootana koshshees. b (1 PHe. 2:17) Nuuni Geeshsha Maxaafay yootiyoobaanne hegaa kaalliyoogee ufayssiya deˈuwaa deˈanaadan waati maaddidaakko yootana danddayoos.

13. Xoossan ammaniyoogee eeyyatetta giya uraa waata maaddana danddayay?

¹³ Issi uri nunaara palamettikko nuuni I ammaniyoobaa erida giidi eesuwan qoppana koshshenna. (Tii. 3:2) Leemisuwawu, nenaara tamaariya uri Xoossan ammaniyoogee eeyyatetta giidi yootiyaakko shin? I lodda laamiyaa loytti ammaneesinne hegaabaa loytti erees gaada qoppana koshshii? I hegaabaa loytti erennan aggana danddayees. Nenaara tamaariyaagaara lodda laamiyaabaa tobbanawu maliyoogaappe, I guyyeppe qoppanaadan amarida xuufeta immana woy oyshaa oychchana danddayaasa. Geella meretaabaa yootiya jw.org saytiyan deˈiyaabata bessana danddayaasa. I guyyeppe, hegan deˈiya xuufiyan woy biiduwan tobbanawu eeno gaana danddayees. Nuuni A bonchchuwan haasayissiyoogee Geeshsha Maxaafay yootiyoobaa kaseegaappe aaruwan tamaaranawu koyana mala oottana danddayees.

14. Neeli banaara tamaariyaagee Yihoowa Markkatubaa balabaa qoppiyoogaa agganaadan maaddanawu nu websaytiyaa waati loytti goˈettidee?

 ¹⁴ Neela giyo yelagay amarida asay Yihoowa Markkatubaa yootiyoobay tuma gidennaagaa qonccissanawu nu websaytiyaa goˈettiis. I hagaadan giis, “Tanaara tamaariya naˈay taani saynisee yootiyoobaa ammanennay tuma geetettiya ubbabaa gidennan, Geeshsha Maxaafay yootiyooban ammanettiyo gishshaassa giidi tawu darotoo yootiis.” Neeli ba ammanuwaabaa qonccissennaadan aara tamaariya naˈay diggido wode, I jw.org saytiyan “Saynisiyaanne Geeshsha Maxaafaa” giyaagaa garssan deˈiyaabaa banaara tamaariya naˈawu bessiis. Guyyeppe, Neeli banaara tamaariya naˈay hegaa nabbabidoogaanne deˈuwaa doomettaabaa aara haasayanawu koyiyoogaa akeekiis. Neenikka hegaa mala ayfiyaa demmana danddayaasa.

15. Naati etaara tamaariyaageeti eta ammanuwaabaa oychchiyo wode ashkketettan zaaranaadan yelidaageeti waati maaddana danddayiyoonaa?

¹⁵ Naati bantta ammanuwaa xeelliyaagan issi uri palamettanawu koyiyo wode ashkketettan waati zaaranaakko yelidaageeti loytti tamaarissana danddayoosona. (Yaaq. 3:13) Yelida amaridaageeti so asaa goynuwaa wode issippe meezetoosona. Eti timirtte keettan harati oychchana danddayiyo oyshata tobboosonanne waati zaaranaakko meezetoosona, qassi bantta naati ashkketettaaninne ufayssiya ogiyan waati haasayanaakko tamaarissoosona.—“ Issippe Meezetiyoogee Intte So Asaa Maaddana Danddayees” giya saaxiniyaa xeella.

16-17. Issippe meezetiyoogee yelagata waati maaddana danddayii?

¹⁶ Issippe meezetiyoogee yelagati bantta ammanuwaa minttanaadaaninne bantta ammanuwaabaa haraatuyyo yootanaadan maaddees. “Yelagati Oychchiyo Oyshaa” giya jw.org saytiyan  kaalli kaalli kiyiyaabay yelagati bantta ammanuwaa minttana mala maaddanaassi giigiis. So asaara issippe hegeeta xannaˈiyoogan nuuni ubbay ashkketettaaninne ufayssiya ogiyan nu ammanuwawu waati exatanaakko tamaarana danddayoos.

¹⁷ Maatiwu giyo yelagay issippe meezetiyoogee A waati maaddidaakko yootiis. Maatiwinne A yelidaageeti darotoo bantta so asaa goynuwan timirtte keettan denddana danddayiya huuphe yohota pilggoosona. I hagaadan giis: “Harati oychchana danddayiyo oyshata qoppoosinne nuuni pilggidoogaa maaran waati zaaranaakko meezetoos. Taani ammananaadan oottidabaa loytta eriyo wode, xala gidiyo gishshawu haratuura ashkketettan haasayanawu metootikke.”

18. Qolasiyaasa 4:6y aybaa xeelliyaagan loytti qonccissii?

¹⁸ Nuuni issibaa qonccenne ammanttiya ogiyan yootiyo wodekka ubba asay hegaa ammanennan aggana danddayees. SHin nuuni hiillaaninne ashkketettan yootiyoogee maaddana danddayees. (Qolasiyaasa 4:6 nabbaba.) Nuuni ammaniyoobaa issi urawu yootiyoogaa kuwaasiyaa awu oliyoogan leemisana danddayoos. Nuuni kuwaasiyaa leddan woy wolqqan olana danddayoos. Nuuni leddan olikko nunaara kaaˈiyaagee kuwaasiyaa oyqqidi loytti kaaˈana danddayees. Hegaadankka, nuuni hiillaaninne ashkketettan yootiyaaba gidikko, asay nu yootiyoobaa siyanawunne aggennan haasayanawu eeno gaana danddayees. Issi uri nunaara palamettanawu woy nuna boranawu koyikko, nuuni aara haasayiyoogaa aggana koshshees. (Lee. 26:4) SHin daro asay hegaa mala gidennan aggana danddayees. Daroti nu yootiyoobaa siyana danddayoosona.

19. Nuuni nu ammanuwawu exatiyo wode ashkke gidanaadan maaddiyaabay aybee?

¹⁹ Nuuni ashkke gidiyo wode loytti goˈettiyoogee qoncce. Palamettanawu koyiya uri oyshaa oychchiyo wode woy boriyo wode ubbatoo ashkketettan zaaranawu koshshiya minotettaa demmanawu Yihoowa woossa. Neeni ashkke gidiyoogee qofaa dummatettay deˈiyo wode palamay merettennaadan oottana danddayiyoogaa hassaya. Qassi neeni ashkketettaaninne bonchchuwan zaariyoogee nuuni yootiyoobaa siyiya amaridaageeti nubaanne Geeshsha Maxaafay yootiyo tumaabaa qoppiyo ogiyaa laammanaadan oottana danddayees. Ne ammanuwaabaa ‘zaaro immanawu ubba wode giiga utta’, qassi ‘hegaa ashkketettaaninne yashshatettan ootta.’ (1 PHe. 3:15) Ee, ashkke gidiyoogan minotettaa bessa!