1. Yihoowayyo loytti haggaazanawu daroti ay keena baaxetiyoonaa?

 HA ALAMEE xayiyo wodee matattido gishshawu, nuussi daro oosoy deˈees. (Maa. 24:14; Luq. 10:2; 1 PHe. 5:2) Nuuni ubbay nuussi danddayettida keenan Yihoowawu loytti haggaazanawu koyoos. Daroti kaseegaappe aaruwan haggaaziiddi doosona. Amaridaageeti aqinye gididi haggaazanawu qoppoosona. Harati qassi Beeteelen oottanawu woy Yihoowa dirijjitee goˈettiyo keettata keexxiyoogan maaddanawu qoppoosona. Qassi gubaaˈiyawu oottiyaagaa woy cima gidanawu halchchidi daro ishantti minnidi oottoosona. (1 Xim. 3:1, 8, 9) Yihooway ba asay awu haggaazanawu eeno giyoogaa beˈiyo wode keehi ufayttees!—Maz. 110:3; Isi. 6:8.

2. Yihoowawu nuuni haggaazanawu halchchido issi issibata polana xayikko waanana danddayiyoo?

² SHin nuuni Yihoowawu haggaazanawu halchchido issi issibata daro wodee aadhdhi simminkka polana xayikko, azzanana danddayoos. Woy qassi nuuni cimidoogaa gaasuwan woy hara gaasuwan Yihoowa dirijjitiyan issi issibata oottana danddayennaba gidikko, hidootaa qanxxana danddayoos. (Lee. 13:12) Meeliso hegaa malabay gakkiis. * A Beeteelen haggaazanawu woy Kawotettaa Mishiraachchuwaa Yootiyaageetu Timirtte Keettan tamaaranawu koyaasu; shin hagaadan gaasu: “Taani cimidoogaa gaasuwan he maataa demmana danddayabeykke. Issi issitoo hidootaa qanxxays.”

3. Yihoowawu haggaaziyoogan hara aawatettaa demmanawu amaridaageeti waatana koshshii?

³ Yelaganne payya gidida amaridaageeti hara aawatettaa ekkanaappe kase kayma gidananne issi issi eeshshata bessana koshshees. Leemisuwawu, amaridaageeti gooba, eesuwan kuuyiyaageetanne oottanawu eeno giyaageeta gidana danddayoosona.  SHin eti kaseegaappe aaruwan danddayanchcha, bantta oosuwaa akeekan oottiyaageetanne harata loytti bonchchiyaageeta gidana koshshees. Neeni koshshiya eeshshati deˈiyoogaa gidanawu loytta baaxetikko, ishantti ne qoppabeenna wodiyan neessi aawatettaa immana danddayoosona. Niika hanotaa qoppa. Ayyo layttay 20 gidido wode, I gubaaˈiyawu oottiyaagaa gididi sunttettibeenna gishshawu keehi azzaniis. I, “Taani mooridobay deˈiyaabadan tawu siyettiis” yaagiis. Gidoppe attin, Niiki koshshiya eeshshati deˈiyoogaa gidanawu baaxetiyoogaa aggibeenna. Gubaaˈiyaaninne sabbakiyoogan bawu danddayettidabaa oottiis. Ha wodiyan, I Macara Biiruwaa Kontte gididi haggaazees.

4. Ha huuphe yohuwan nuuni ay beˈanee?

⁴ Neeni Yihoowayyo haggaazanawu halchchidobaa polabeennaagaa gaasuwan hidootaa qanxxadii? Yaatikko, neeyyo siyettiyaabaa Yihoowayyo yoota. (Maz. 37:5-7) Qassi neeni Xoossaayyo kaseegaappe aaruwan waata haggaazana danddayiyaakko kayma ishantta zoriyaa oychchana danddayaasa; yaatada eti zoridobaa oosuwan peeshshanawu loytta baaxeta. Neeni yaatikko, he halchchidobaa polana danddayaasa. SHin Meelisiigaadan, Yihoowayyo neeni oottanawu koyiyoobay haˈˈi neeyyo danddayettennaba gidana danddayees. Yaatin neeni waana ufayttana danddayay? He oyshaa zaaranawu, ha huuphe yohoy (1) neeni ufayttanaadan oottiyaabay aybakko, (2) waata loytta ufayttanaakko, qassi (3) neeni kaseppe aaruwan ufayttanaadan maaddiya ayba halchchota halchchana danddayiyaakko qonccissana.

5. Nuuni ufayttanawu qoppana koshshiyaabay aybee? (Eranchchaa 6:9)

⁵ Eranchchaa 6:9y nuuni ufayttanaadan maaddana danddayiyaabaa yootees. (Nabbaba.) ‘Ayfiyan beˈiyooban’ xeelaa wottiya uri bawu deˈiyaaban hegeekka, haˈˈi I deˈiyo hanotan ufayttees. SHin demmana danddayennabaa ubbatoo amottiya uri mule ufayttenna. Yaatin, nuuni hegaappe ay tamaariyoo? Nuuni ufayttanawu nuuyyo deˈiyaabaanne tumuppe nu demmana giidi hidootan naagana danddayiyoobaa ubbatoo qoppana koshshees.

6. Nuuni xannaˈana leemisoy awugee? Qassi hegaappe nuuni ay tamaariyoo?

⁶ Neeyyo deˈiyaaban ufayttiyoogee tumuppe danddayettiyaabee? Oorattabaa oottiyo ogiyaa nuuni ubbatoo tamaaranawu koyiyo gishshawu, daro asay hegee danddayettennaba giidi qoppees. SHin, hegee tumuppe danddayettiyaaba. Nuuni nuuyyo haˈˈi deˈiyaaban tumuppe ufayttana danddayoos. Waani ufayttana danddayiyoo? Hegaa eranawu, Yesuusi Maatiyoosa 25:14-30n yootido taalanttiyaa * leemisuwaa ane beˈoos. Ufayttana danddayiyo ogiyaanne haˈˈi nu deˈiyo hanotan waanidi loytti ufayttanaakko tamaarana.

7. Yesuusi taalanttiyaabaa yootido leemisuwaa qanttan qonccissa.

⁷ Leemisuwan odettida bitanee oge baanawu giigi uttiis. Baanaappe kase, I ba ashkkarata xeesidi eti zalˈˈana mala etawu huuphiyan huuphiyan taalanttiyaa immiis. * Bitanee ba ashkkaratu abbiyaa eriyo gishshawu, issuwawu ichchashu taalanttiyaa, issuwawu naaˈˈu taalanttiyaa, qassi heezzanttuwawu issi taalanttiyaa immiis. Koyro odettida naaˈˈu ashkkarati bantta godaassi miishshaa worissanawu minnidi oottidosona. SHin heezzantto ashkkaray bawu imettida miishshan aybanne oottibeenna gishshawu, goday A yedettiis.

8. Leemisuwan odettida koyro ashkkaray ufayttidoy aybissee?

 ⁸ Koyro ashkkaray goday ayyo ichchashu taalanttiyaa immido gishshawu keehi ufayttiis. Hegee keehi daro miishsha gidiyo gishshawu, goday A keehi ammanettidoogaa bessiyaaba! Naaˈˈantto ashkkaray shin? Koyro ashkkarawu imettida taalanttiyaa keenay ayyo imettibeenna gishshawu hidootaa qanxxana danddayees. SHin I waatidee?

9. Yesuusi naaˈˈantto ashkkaraa xeelliyaagan yootibeennabay aybee? (Maatiyoosa 25:22, 23)

⁹ Maatiyoosa 25:22, 23 nabbaba. Naaˈˈantto ashkkaray naaˈˈu taalantte xallaa ekkido gishshawu lancciis woy yiillotiis giidi Yesuusi yootibeenna. He ashkkaray hagaadan giidi zuuzummiis giidikka Yesuusi yootibeenna: ‘Ta goday tawu guuttaa immidoy aybissee? Ichchashu taalanttiyaa ekkida ashkkaraagaadan taani loytta oottaas! Ta goday tana gooba oosanchchadan xeellana xayikko, taani A miishshaa moogada taayyo minna oottana koshshees.’

10. Naaˈˈantto ashkkaray bawu imettida taalanttiyaa waatidee?

¹⁰ Koyro ashkkaraagaadan naaˈˈantto ashkkaraykka ba goday awu gita aawatettaa immidoogaa akeekido gishshawu, ba godawu minnidi oottiis. Hegaappe denddidaagan, goday immido taalanttiyaa I naaˈˈu kushe worissiis. Goday he ashkkaray minnidi oottido gishshawu A woytiis. Goday A sabbiis; qassi ayyo hara aawatettaakka immiis!

11. Nuuni waani loytti ufayttana danddayiyoo?

¹¹ Hegaadan, nuuni Yihoowayyo haggaaziyo wode nuuyyo imettida ay oosonne nuussi danddayettidaagaa keenaa minnidi oottikko keehi ufayttana danddayoos. Loytta sabbaka, qassi gubaaˈiyankka minna ootta. (Oos. 18:5; Ibr.  10:24, 25) Minttettiya qofaa shiiquwan yootanawu loytta giigetta. Saaminttawu gidduwan shiiqiyo shiiquwan neeyyo imettiya tamaaretu kifileta xoqqu ootta xeella. Gubaaˈiyan issi oosuwaa maaddana mala nena oychchikko, bessiya wodiyan oottiyoogan ammanettiyaagaa gida. He oosuwaa keehi koshshennabadan xeellada, hegaa oottiyoogan daro wodiyaa wurssana koshshenna gaada qoppoppa. Ne oosuwan keehi gooba gidanawu baaxeta. (Lee. 22:29) Neeni Yihoowayyo minna oottikko, kaseegaappe aaruwan aara dabbotananne keehi ufayttana. (Gal. 6:4) Qassi neeni demmanawu yeemottiyo aawatettaa harati demmiyo wode, etaara ufayttanawu metootakka.—Roo. 12:15; Gal. 5:26.

12. Meelisanne Niiki keehi ufayttanaadan aybi maaddidee?

¹² Beeteelen haggaazanawu woy Kawotettaa Mishiraachchuwaa Yootiyaageetu Timirtte Keettan tamaaranawu koyiyoogaa yootida michchiyo Meeliso hassayay? Hegee iyyo danddayettennaba gidikkonne, A hagaadan gaasu: “Taani aqinye gidada haggaazanawu tawu danddayettida ubbabaa oottays, qassi dumma dumma ogiyan sabbakanawu baaxetays. Yaatiyoogee tana keehi ufayssees.” Qassi Niiki gubaaˈiyawu oottiyaagaa gididi sunttettibeenna gishshawu, azzaniyoogaa waati aggidee? I hagaadan giis: “Sabbakiyoogaanne minttettiya qofaa shiiqotun yootiyoogaa mala, taani oottana danddayiyooban xeelaa wottaas. Qassi taani Beeteelen oottanawu qitsiyaa kunttada kaalliya laytti gelaas.”

13. Neeni haˈˈi oottiyo oosuwaa minna oottikko ayba ayfe demmanee? (Eranchchaa 2:24)

¹³ Neeni haˈˈi oottiyo oosuwaa minna oottikko, sinttappe hara aawatettaa demmanee? Niikaagaadan neenikka demmana danddayaasa. SHin neeni demmana xayikkokka, Meelisiigaadan keehi ufayttana danddayaasa, qassi Yihoowawu ne oottaydda deˈiyooban keehippe ufayttana. (Eranchchaa 2:24 nabbaba.) Hegaa bollikka, neeni nu Godaa Yesuus Kiristtoosa ufayssiyoogaa eriyo gishshawukka kaseppe aaruwan ufayttana.

14. Nuuni Yihoowawu haggaazanawu halchchido halchchuwaa qoppiyo wode ubbatoo ay hassayana koshshii?

¹⁴ Yihoowawu haggaaziyoogan nuussi danddayettida ubbabaa ha wodiyan oottiyoogee nuuni ayyo gujjidi oottanawu baaxetana koshshenna giyoogee? CHii gidenna! Nuuni sabbakiyoogaaninne tamaarissiyoogan gooba gidanaadan maaddiya, qassi nu ishanttanne michchontta goˈˈiya halchchuwaa halchchana koshshees. Nuuni nubaa xallaa qoppiyoogaa aggidi, harata maaddiyaabaa ashkketettaaninne akeekan qoppikko, he halchchuwaa polana.—Lee. 11:2; Oos. 20:35.

15. Neeni kaseppe aaruwan ufayttanaadan maaddana danddayiya amarida halchchoti awugeetee?

¹⁵ Neeni halchchana danddayiyoobati aybee? Neeni halchchada polana danddayiyoobata eranaadan maaddana mala Yihoowa woossa. (Lee. 16:3; Yaaq. 1:5) Kafiyaa aqinye woy ubba wode aqinye gidiyoogaa, Beeteelen oottiyoogaa woy Yihoowa dirijjitee goˈettiyo keettata keexxiyoogaa mala, ha huuphe yohuwan  koyro menttuwan odettida halchchotuppe issuwaa halchchada polanawu baaxetay? Woy qassi neeni mishiraachchuwaa yootanawu hara qaalaa tamaarana, woykko hara heeri baada sabbakana danddayaasa. Yihoowa SHeniyaa Oottanawu Giigettidaageeta (Amaarattuwaa) giyo maxaafaa shemppo 10 neeni nabbabiyoogaaninne ne gubaaˈiyaa cimata haasayissiyoogan he halchchotuppe amaridaageeta loytta erana danddayaasa. * Neeni he halchchota gakkanawu  baaxetiyo wode, ayyaanaaban ne dicciyoogaa harati akeekananne neeni kaseppe aaruwan ufayttana.

16. Neeni issibaa halchchada ha wodiyan polana danddayennaba gidikko waatana danddayay?

¹⁶ Qommoora odettida halchchotuppe issuwaa halchchada neeni ha wodiyan polana danddayennaba gidikko shin? Neeni polana danddayiyoobaa halchchanawu mala. Kaallidi deˈiyaabata ane qoppa.

17. Koyro Ximootiyoosa 4:13, 15y yootiyoogaadan, issi ishay gooba asttamaare gidanawu ay oottana danddayii?

¹⁷ Koyro Ximootiyoosa 4:13, 15 nabbaba. Neeni xammaqettida isha gidikko, haasayaa loytta haasayanawu woy loytta tamaarissanawu baaxetana danddayaasa. Ayssi giikko, neeni nabbabiyoogan, haasayaa haasayiyoogaaninne tamaarissiyoogan gooba gidanawu baaxetikko, ne yootiyoobaa siyiyaageeta loytta maaddana danddayaasa. Haasayaa haasayiyo hanotaa xeelliyaagan Nabbabanawunne Tamaarissanawu Keehippe Minna giyo brooshuriyan odettida ubbabaa xannaˈanawunne oosuwan peeshshanawu halchcha. Haasayaa haasayiyo hanotaa xeelliyaagan issi eeshshaa xannaˈada son loytta meezeta, qassi neeni haasayaa haasayiyo wode eridobaa oosuwan peeshsha. “Qaalaa yootiyoogaaninne tamaarissiyoogan” minnidi oottiya zoriyoogan maaddiyaagaa woy hara cimata zoriyaa oychcha. * (1 Xim. 5:17) Brooshuriyaappe tamaaridobaa oosuwan peeshshiyoogaa xalla gidennan, ne yootiyoobaa siyiyaageeti bantta ammanuwaa minttanaadan woy eti tamaaridobaa oosuwan peeshshanaadan maaddiyoogaakka loytta qoppa. Yaatiyoogan, neeninne eti kaseppe aaruwan ufayttana.

18. Haggaazuwaa xeelliyaagan nuuni halchchidobaa polanawu aybi maaddana danddayii?

 ¹⁸ Sabbakiyoonne erissiyo ashkkara oottiyo aawatettay nuuyyo ubbawu deˈees. (Maa. 28:19, 20; Roo. 10:14) Ha keehi koshshiya oosuwaa oottiyoogan kaseppe gooba gidanawu koyay? Tamaarissanawu giyo brooshuriyaa xannaˈa, yaatada neeni eridobaa oosuwan peeshshanaadan maaddiya halchchota halchcha. Kiristtaanetu Deˈuwaanne Haggaazuwaa—Xannaˈiyo Xuufiyaappenne saaminttawu gidduwan shiiqiyo shiiqotun asaa haasayissanawu beˈiyo biidotuppe maaddiya qofaa demmana danddayaasa. Asaa haasayissiyoogaa xeelliyaagan maaddiya hiillaa eranawu dumma dumma qofaa mala. Neeni he qofaa oosuwan peeshshiyo wode, kaseppe gooba asttamaare gidananne keehi ufayttana.—2 Xim. 4:5.

19. Xoossaa ufayssiya eeshshati neeyyo deˈanaadan waatana danddayay?

¹⁹ Xoossaa ufayssiya eeshshati neeyyo deˈanaadan halchchiyoogee ne halchchana danddayiyo keehi koshshiyaabaappe issuwaa gidiyoogaa dogana bessenna. (Gal. 5:22, 23; Qol. 3:12; 2 PHe. 1:5-8) He halchchidobaa polanawu waatana danddayay? Leemisuwawu, neeni ne ammanuwaa kaseppe minttanawu koyana danddayaasa. Ne ammanuwaa minttanawu maaddiya zoriyaa nu xuufetuppe nabbabana danddayaasa. Dumma dumma metoy deˈishinkka ishanttinne michchontti mino ammanuwaa waati bessidaakko qonccissiya biidota JW Brodkastingiyaappe beˈiyoogan neeni keehi goˈettana. Yaatada neeni ammanuwan eta leemisuwaa kaallana danddayiyo ogeta qoppa.

20. Nuuni keehi ufayttanawunne hidootaa qanxxennan agganawu waatana danddayiyoo?

²⁰ Nuuni ha wodiyan oottana danddayiyoogaappe aaruwan Yihoowayyo oottanawu koyiyoogee qoncce. Xoossay ehiyo ooratta alamiyan nuuni ayyo loytti haggaazana. He wodee gakkanaashin, nuuyyo danddayettida ubbabaa ha wodiyan oottikko, nuuni keehi ufayttana danddayoos, qassi hidootaa qanxxokko. Ubbaappe aaruwan, ‘ufayttiya nu Xoossaa’ Yihooway bonchchettanaadaaninne sabettanaadan oottana. (1 Xim. 1:11, NW) Yaatiyo gishshawu, nuuyyo deˈiya maatan ufayttiyaageeta gidoos!