1-2. Mazamure 34:8y yootiyoogaadan, Yihooway loˈˈo gidiyoogaa eranawu nuuni waatana koshshii?

NEENI kase ma erenna qumaa maanaadan issi uri nena shoobbiis gaada qoppa. Hegaa beˈiyoogan, singgiyoogan, aybaappe kaˈˈiyaakko shaakkiyoogan woy he qumaa dosiya harata oychchiyoogan hegaabaa erana danddayaasa. Gidoppe attin, neeni hegaa dosiyoogaa aggiyoogaa eriyo issi ogee he qumaa ma beˈiyoogaa xallaana.

² Nuuni Geeshsha Maxaafaanne nu xuufeta nabbabiyoogan, banttawu Yihooway oottido loˈˈobaa xeelliyaagan harati haasayiyoobaa siyiyoogan Yihooway loˈˈo gidiyoogaa erana danddayoos. Nuuni Yihoowa loˈˈotettaa ‘xeelli beˈiyo’ wode I keehi loˈˈo gidiyoogaa loytti akeekana. (Mazamure 34:8 nabbaba.) Nuuni yaatana danddayiyo issi hanotaa ane beˈa. Nuuni aqinye gididi Yihoowawu haggaazanawu koyana danddayoos; shin qoppidobaa polanawu nu deˈuwaa sima oottana koshshees. Nuuni Kawotettaabaa kaseyikko, nuussi koshshiyaabaa Yihooway kunttanaagaa Yesuusi qaalaa gelidoogaa darotoo nabbabennan waayi aggana; gidikkonne Yihooway hegaa nuussi oottishin mule beˈi erokko. (Maa. 6:33) SHin, Yesuusi qaalaa gelidobaa nuuni ammaniyo gishshawu, daro miishshaa kessennan agganawu, oosuwaa oottiyo hanotaa laammanawunne mishiraachchuwaa yootanawu nuussi danddayettida ubbabaa oottanawu baaxetoos. Nuuni yaatiyo wode, Yihooway nuussi koshshiyaabaa kunttiyoogaa akeekoos. Yihooway nuussi loˈˈo gidiyoogaa ‘xeelli beˈoos.’

3. Mazamure 16:1, 2 maaran, Yihoowa loˈˈotettaappe goˈettiyay oonee?

³ Yihooway A erennaageeta gujjin, “ubbau keha” woy loˈˈo. (Maz. 145:9; Maa. 5:45) Yihooway A siiqiyaageetussinne banttawu danddayettida ubban ayyo oottiyaageetussi loˈˈo gidida darobaa  oottees. (Mazamure 16:1, 2 nabbaba.) Yihooway nuuyyo oottido loˈˈobatuppe amaridaageeta ane tobboos.

4. Yihooway akko shiiqiyaageetussi ba loˈˈotettaa waati bessii?

⁴ Nuuni Yihoowappe tamaariyoobaa oosuwan peeshshiyo wode ubban, hegee nuna ay keena maaddiyaakko akeekoos. Leemisuwawu, nuuni abaa loytti tamaarido wodenne A siiqiyoogaa doommido wode, Yihoowa ufayssennabaa qoppiyoogaanne oottiyoogaa agganaadan I nuna maaddiis. (Qol. 1:21) Nuuni nuna Yihoowawu sheedhdhidi xammaqettido wode, nuussi geeshsha kahay deˈanaadaaninne assi mata dabbo gidanaadan oottiyoogan nuuyyo loˈˈo gidida darobaa I immiis.—1 PHe. 3:21.

5. Haggaaziyo wode Yihoowa loˈˈotettaa waati akeekiyoo?

⁵ Nuuni haggaaziyo wode Yihoowa loˈˈotettaa ubbatoo akeekoos. Neeni yayyiya asee? Yihoowa asaappe dariya baggay yayyees. Neeni Yihoowa Markka gidanaappe kase, ne erenna asa so baada Geeshsha Maxaafaabaa yootanawu mule waaya qoppa erana. SHin, hegee neeni ha wodiyan ubbatoo oottiyooba. Ubba qassi sabbakiyo oosuwan ufayttanaadan Yihooway nena maaddees! Yihooway nena hara ogetunkka maaddees. Haggaazuwan eqettiya uri gayttiyo wode woppu gaanaadan I nena maaddees. Neeni yootiyoobaa issi uri siyanawu koyiyo wode, haniya xiqisiyaa hassayada goˈettanaadankka I nena maaddees. Asay neeni yootiyoobaa siyanawu koyenna wodekka aggennan sabbakanaadan I neessi minotettaa immees.—Erm. 20:7-9.

6. Yihooway loohissiyoogee A loˈˈotettaa waati bessii?

⁶ Nuuni haggaazanaadan loohissiyoogankka Yihooway ba loˈˈotettaa nuussi bessees. (Yoh. 6:45) Asawu sabbakiyo wode yootiyoobaanne haggaazuwan nuuni he qofaa waati goˈettana danddayiyaakko saaminttawu gidduwan shiiqiyo shiiquwan tamaaroos. Oorattabaa maliyoogee koyro yashshana danddayees; shin nuuni meezetiyo wode he qofay keehi loˈˈo gidiyoogaa akeekana danddayoos. Qassi nuuni kase mule sabbaki erenna ogetun sabbakanaadan gubaaˈe shiiqotuninne gita shiiqotun tamaaroos. Hageekka nuuni yayyanaadan oottana danddayees, shin nuuni tamaaridoogaadan oottiyo wode Yihooway nuna anjjana. Nu hanotay ayba gidikkonne, nuuni Yihoowan ammanettiyo wodenne nuussi deˈiya keehi loˈˈobaa ayyo immanawu ooratta ogiyaa maliyo wode Yihooway nuussi immana loˈˈobatuppe amaridaageeta ane beˈoos. Yaatidi nuuni nu haggaazuwaa aassana danddayiyo ogeta tamaarana.

7. Nuuni haggaazuwaa aassanawu minni oottiyo wode ayba anjjo demmanee?

⁷ Kaseegaappe aaruwan Yihoowakko shiiqoos. Ba keettaayeera Kolombbiyaa biittan haggaaziya Samuˈel * giyo cimaa hanotaa beˈa. He azinaynne machchiyaa bantta gubaaˈiyan ufayttidi haggaaziyaaba gidikkonne, eti aassiyaageeti keehi koshshiyo gubaaˈiyaa maaddiyoogan bantta haggaazuwaa aassanawu koyidosona. Halchchidobaa oottanawu, eti keehi dosiyo amaridabaa aggana koshshiis. Samuˈeli hagaadan giis: “Maatiyoosa 6:33 oosuwan peeshshiyoogan nuussi koshshennabaa shammiyoogaa aggida. SHin, nu keettaa aggidi biyoogee nuussi keehi deexxidaba. Hegee nuuni koyiyoogaadan keexettiis; qassi hegawu miishshaa qanxxokko.” Eti ooratta gubaaˈiyaa biidi kaseegaappe keehi guutta miishshan deˈana koshshiis. Samuˈeli hagaadan giis: “Oottiyooban Yihooway nuna waati kaalettiyaakkonne nu woosaa waati zaariyaakko akeekida. Yihooway nunan ufayttiyoogaanne kaseegaappe aaruwan nuna siiqiyoogaa akeekida.” Neeni ne  haggaazuwaa amarida ogetun aassana danddayay? Yaatikko, ne kaseppe aaruwan Yihoowakko shiiqanaagaanne neessi koshshiyaabaa I kunttanaagaa ammanettana danddayaasa.—Maz. 18:25.

8. Ivaaninne Vikitooriya yootidobaappe neeni ay tamaaray?

⁸ Nu haggaazuwan ufayttoos. Kirggistaane biittan aqinye gididi haggaaziya Ivaananne Vikitooriyo giyo azinaynne machchiyaa yootidobaa akeeka. Keexuwaa oosuwaa gujjin, eti ay oosonne bantta dosan oottanawu bantta deˈuwaa sima oottidosona. Ivaani hagaadan giis: “Nuussi imettida ooso ubbaa nuuyyo danddayettida keenan minni oottida. Oottiiddi peˈiyoogee daafurssikkonne, nuuni Yihoowawu minni oottiyoogaa eriyo gishshawu, ufayttida. Nuuni daro laggeta demmido gishshawunne ufayssiya darobaa oottido gishshawu ufayttida.”—Mar. 10:29, 30.

9. Issi michcheeyyo hanotay metiyaaba gidikkonne A haggaazuwaa aassanawu ay oottadee? Hegee ay demissidee?

⁹ Metiyaabay nuna gakkiyo wodekka Yihoowawu haggaaziyoogan ufayttoos. Leemisuwawu, Arggo Afirkkan, Meero giyo cima amˈˈiyaa dottore gidada oottaasu. A xurataa kiyada aqinye gidada haggaaziyoogaa doommaasu. Hemettanawu metootanaadan oottiya wolqqaama harggee Meero sakkiyo gishshawu, sooppe soo baada issi saateppe daro haggaazana danddayukku. SHin xuufiyaa wottiyo gaariyaa goˈettada haggaazuwan A daro wodiyaa attaasu. A zaaretta oychchiyoonne Geeshsha Maxaafaa xannaˈissiyo daro asay deˈees; hegeetuppe amaridaageetuura silkkiyan gayttawusu. Meera Yihoowawu loytta oottanawu koyidoy aybissee? A hagaadan gaasu: “Taani Yihoowanne Kiristtoos Yesuusa wozanappe siiqays. Qassi taayyo danddayettidaagaa keena Yihoowawu haggaazanaadan maaddana mala ubbatoo A woossays.”—Maa. 22:36, 37.

10. Isiyaasa 54:13y yootiyoogaadan, issibaa oottanawu baaxetiyaageeti Yihoowappe demmiyoobay aybee?

¹⁰ Yihooway nuna dumma dummabaa loohissees. Moorishen aqinye gididi haggaaziya Keeni hegee tuma gidiyoogaa akeekiis. I tumaa erido wode yuniversttiyan tamaariyoogaa aggidi xammaqettiis, yaatidi ubba wode aqinye gidiis. I, “‘Hekko, tana kiitta’ giida hananabaa yootiya Isiyaasaagaadan deˈanawu baaxetays” yaagiis. (Isi. 6:8) Keexxiyo oosuwaa Keeni daro sohuwan oottiis; qassi nu xuufeta bantta doonan birshshiya issi citaa maaddanawu birshshiyo oosuwaa etaara oottiis. Keeni, “Tawu immettida oosuwaa oottanawu koshshiya hiillay deˈanaadan loohaas” yaagiis. SHin I tamaaridoy oosuwaa oottiyo hiillaa xalla gidenna. I gujjidi hagaadan giis: “Ta oottana danddayennabaa, qassi taani Yihoowawu loˈˈo ashkkara gidanaadan taassi deˈana bessiya eeshshata xeelliyaagankka tamaaraas.” (Isiyaasa 54:13 nabbaba.) Yihooway nena dumma dumma ogiyan loohissanaadan neenikka issi issibaa laammana danddayaasa.

11. Tohossa Kooriyan deˈiya michchontti haggaazanawu ay oottidonaa, qassi ayba ayfe demmidonaa? (Koyro sinttan deˈiya misiliyaa xeella.)

¹¹ Yihoowa Markka gididi daro layttawu takkidaageetikka ooratta ogiyan haggaazanawu maliyo wode loohana koshshees. Korona harggiyaa wode, Tohossa Kooriyan deˈiya cimati hagaadan giidosona: “Sahettiyo gishshawu haggaazana danddayikke giidi kase qoppiya amaridaageeti haˈˈi biiduwan gayttidi haggaazoosona. Layttay 80ppe dariyo heezzu michchontti haggaazanawu komppiyuteriyaa waati goˈettanaakko tamaaridi ubba galla haggaazoosona gaana danddayettees.” (Maz. 92:14, 15) Ne haggaazuwaa aassanawunne kaseegaappe aaruwan Yihoowa loˈˈotettaa xeella beˈanawu koyay? Ne halchchidobaa oottanawu maaddiya amaridabata beˈa.

12. Yihooway an ammanettiyaageetuyyo waatanawu qaalaa gelidee?

¹² Yihoowan ammanetta. Yihooway nuuni an ammanettiyo wodenne nuussi deˈiya keehi loˈˈobaa ayyo immiyo wode loˈˈo gidida darobaa nuuyyo oottanawu qaalaa geliis. (Mil. 3:10) Kolombbiyaa biittan deˈiya Fabiˈola Yihooway gelido qaalaa polidoogaa ba deˈuwan beˈaasu. A xammaqetta simmada sohuwaara ubba wode aqinye gidada haggaazanawu koyaasu. Heezzu naati deˈiyo ba soo asawu koshshiyaabaa kunttanawu oottiyoogan A ba azinaa maaddana koshshiis. Yaatiyo gishshawu, A xurataa kiyiyo wodee gakkin, Yihooway maaddana mala minttada woossaasu. Hagaadan gaasu: “Darotoo asay ba xurataa ekkanaappe kase daro wodiyaa naagana koshshees, shin taani issi aginappe simmin ekkiyoogaa doommaas. Hegee keehi maalaalissiyaaba!” Naaˈˈu aginappe guyyiyan A aqinye gidada haggaaziyoogaa doommaasu. Iyyo layttay haˈˈi 70nne giyoogaa gidiis; A 20 layttappe daruwaa aqinye gidada haggaazaasu. A he wodiyan hosppun asay xammaqettanaadan maaddaasu. A hagaadan gaasu: “Issi issitoo taani daafuriyaaba gidikkonne, ubbatoo aqinye gidida haggaazanaadan Yihooway tana ubba galla maaddees.”

13-14. Nuuni Yihoowan ammanettidi baaxetanaadan maaddiya leemisoti awugeetee?

¹³ Yihoowan ammanettidaageetu taarikiyaappe tamaara. Yihoowawu minnidi haggaazida darotubaa Geeshsha Maxaafay yootees. Eti Yihoowan ammanettiyoogaa bessiyaabaa ootti simmin, Yihooway eta anjjidoogaa bessiya daro taarikee deˈees. Leemisuwawu,  Abrahaami “au biyaakkonne erennan” ba sooppe kiyi simmin, Yihooway A anjjiis. (Ibr. 11:8) Qassi Yaaqoobi kiitanchchaara baaxeti simmin Yihooway A anjjiis. (Doo. 32:24-30) Israaˈeela deree Hidootaa Biittaa gelanawu mati uttido wode, qeeseti Yorddaanoosa SHaafaa haattaa gaxaa yedhdhi simmin asay pinniis.—Yaas. 3:14-16.

¹⁴ Yihoowan ammanetti baaxetida ha wodiyan deˈiya Yihoowa Markkatu taarikiyaappekka tamaarana danddayaasa. Leemisuwawu, Payten giyo ishaynne A keettaayyiyaa Diyaana, Yihoowawu oottanawu bantta haggaazuwaa aassida, “Bantta Dosan Eeno Giidosona” * giya kaalli kaalli kiyiya huuphe yohuwan odettida ishanttubaanne michchonttubaa nabbabiyoogan ufayttoosona. Payteni hagaadan giis: “Nuuni eta deˈuwan hanidabaa nabbabiyo wode, malˈˈiya qumaa miya ura beˈiyaabadan qoppoos. Nuuni daro wodiyawu beˈidi ‘Yihooway keha gidiyoogaa xeelli beˈanawu’ keehippe koyida.” Guyyeppe, Payteninne Diyaana maadoy keehi koshshiyoosan haggaazanawu biidosona. Ha huuphe yohota nabbaba eray? Haahosan Deˈiya Heeratun Sabbakiyoogaa—Awusttiraaliyan (Amaarattuwaa) qassi, Haahosan Deˈiya Heeratun Sabbakiyoogaa—Ayerlanden (Ingilezettuwaa) giya jw.org saytiyan deˈiya biidota beˈadii? Neeni ne haggaazuwaa aassana danddayiyo ogeta koyanaadan ha biidoti maaddana danddayoosona.

15. Yihoowawu loytti oottanaadan minttettiyaageetuura laggetiyoogee nuna waati maaddii?

¹⁵ Yihoowawu loytta oottanaadan minttettiyaageetuura laggeta. Nuuni mule mi erenna qumaa haratuura miyo wode meezetanawu metootokko. Hegaadan, bantta deˈuwan Yihoowa kaseyiyaageetuura nuuni wodiyaa aattikko, Xoossawu haggaaziyo haggaazuwaa aassiyo ogiyaa loytti koyana danddayoos. Kentanne Veroniki hanotay hegaa bessees. Kenti hagaadan giis: “Nu laggetinne nu soo asay nuuni dumma dumma ogiyan haggaazanaadan minttettidosona. Kawotettaabaa sinttayiyaageetuura laggetidoogee oorattabaa malanawu xalanaadan nuna maaddidoogaa akeekida.” Kentinne Veronika dumma aqinye gididi Serbiyan ha wodiyan haggaazoosona.

16. Luqaasa 12:16-21n Yesuusi yootido leemisuwan qonccidaagaadan, nuuni nu goˈˈaa aggibayanawu eeno gaana koshshiyoy aybissee?

¹⁶ Yihoowawu oottanawu ne goˈˈaa aggabaya. Yihoowa ufayssanawu giidi nuna ufayssiya ubbabaa aggana koshshenna. (Era. 5:19, 20) Gidoppe attin, nuuni dosiyo amaridabaa agganawu koyibeennaagaa gaasuwan Yihoowawu loytti haggaazana xayikko, baayyo loˈˈo gidida darobay deˈanaadan minni oottiyaaba gidikkonne Xoossaabaa qoppibeenna leemisuwan Yesuusi odido bitaniyaagaa mala balabaa oottana danddayoos. (Luqaasa 12:16-21 nabbaba.) Paransaayen deˈiya Kirstiyan giyo ishay hagaadan giis: “Yihoowayyoonne ta soo asawu ta wodiyaanne wolqqaa loytta goˈettabeykke.” Inne A keettaayyiyaa aqinye gidanawu kuuyidosona. Gidikkonne, he halchchidobaa polanawu, eti bantta oosuwaa aggibayidosona. Eti banttawu koshshiyaabaa kunttanawu geeshshiyo oosuwaa oottiyoogaa doommidosona, yaatidi eti guutta miishshan ufayttidi deˈiyoogaa meezetidosona. Eti amaridabaa aggidi aqinye gidido gishshawu ufayttidonaa? Kirstiyani hagaadan giis, “Nuuni haˈˈi loˈˈo haggaazuwaa haggaaziyoogan, Geeshsha Maxaafaa nu xannaˈissiyoogeetinne zaarettidi oychchiyoogeeti Yihoowabaa tamaariyoogaa beˈiyoogan ufayttoos.”

17. Haggaazuwan nuuni oorattabaa malennaadan nuna metana danddayiyaabay aybee?

 ¹⁷ Ooratta ogiyan haggaazanawu eeno ga. (Oos. 17:16, 17; 20:20, 21) Amarkkaa biittan aqinye gidada haggaaziya SHirlo giyo michchiyaa korona harggiyaa wode haggaaziyo ogiyaa laammana koshshiis. Silkkiyan markkattanawu A koyro mammottaasu. SHin, SHirla woradaa xomoosiyaagee gubaaˈiyaa xomoosiyo wode looha simmada, aggennan silkkiyan markkattiyoogaa doommaasu. A hagaadan gaasu: “Silkkiyan markkattiyoogee doommiyo wode keehi yashshiyaaba gidikkonne, haˈˈi taani hegan daro ufayttays. Qassi nuuni sooppe soo biidi sabbakiyo wode demmiyoogaappe daro asaa demmoos!”

18. Nu haggaazuwaa aassennaadan issibay paace gidikko, nuna aybi maaddanee?

¹⁸ Halchchada hegaa oottanawu mala. Nuna metoy gakkiyo wode, maaduwaa demmanawu woossoos, qassi he metuwaa xeelliyaagan waatanaakko akeekan qoppoos. (Lee. 3:21) Awurooppan Romeni giyo qaalan kaalettiyo citan ubba wode aqinye gidada haggaaziya Sooniya hagaadan gaasu: “Taani halchchidobaa woraqatan xaafiyoogaa dosays, yaatada hegaa qoncce sohuwan wottays. Dumma dumma ginaa efiya naaˈˈu ogetu misilee ta xaraphpheezan deˈees. Taani kuuyana koshshiyaabay merettiyo wode, he naaˈˈu ogeta xeellays, yaatada ta kuuyiyoobay halchchidobaa oottanaadan maaddiyaakkonne woy agganaadan oottiyaakko yuushsha qoppays.” Sooniya ba metuwaa xeelliyaagan loˈˈobaa qoppanawu malawusu. A hagaadan gaasu: “Ta deˈuwan laamettiya aybanne, ta halchchidobaa gakkennaadan teqqiya godadan woy hegaa gakkanawu maaddiya zarphphedan xeellanawu woy agganawu kuuyays.”

19. Yihooway nuuyyo immido loˈˈobaa gishshawu A galatiyoogaa waati bessana danddayiyoo?

¹⁹ Yihooway nuna daro ogetun anjjees. Nu oottiyo ubbaban I sabettanaadan oottiyoogan nuussi I immidobawu keehi galatiyoogaa bessana danddayoos. (Ibr. 13:16) Nuuni Yihoowayyo haggaazanawu darobaa oottana danddayoos. Yaatikko, Yihooway nuna loyttidi anjjana. ‘Yihooway keha gidiyoogaa xeelli beˈiyo’ ogeta ubba gallassi koyiyaageeta gidoos. Yaatiyoogan, “Ta qumai tana kiittidaagee koyiyoobaa oottanaagaanne a oosuwaa polanaagaa” giida, Yesuusa mala gidoos.—Yoh. 4:34.