XANNAˈIYO HUUPHE YOHUWAA 34
‘Tuman Deˈa’
“Ta naati tumatettan de7iyoogaa siyiyoogaappe aadhdhidi, tana ufaissiyaabi baawa.”—3 YOH. 4.
MAZAMURE 111 Nu Ufayttanaadan Oottiyaabaa
HA XINAATIYAN *
1. Nuuni Yihoowa Markka waani gididaakko haratussi yootiyoogan waani goˈettiyoo?
“NEENI tumaa waata siyadii?” Ha oyshaa neeni darotoo zaaridoogee qoncce. Nuuni nu mala Kiristtaaniyaara loytti erettanawu koyidi koyro oychchiyo oyshatuppe issoy hagaa. Nu ishanttinne michchontti Yihoowa waati eridaakkonne A siiqidaakko siyiyoogaa dosoos, qassi nuuni Yihoowa Markka gidiyoogaa dosiyoy aybissakko etawu yootiyoogan ufayttoos. (Roo. 1:11) Hegaadan haasayiyoogee, nuuni Yihoowa Markka gidiyoogaa dosiyoy aybissakko ubbatoo qoppanaadan maaddees. Qassi Yihoowa anjjuwaa demissiyaanne an sabettanaadan oottiya ogiyan ubbatoo deˈanawu murttidaageeta nuuni gidanaadan maaddana.—3 Yoh. 4.
2. Nuuni ha huuphe yohuwan ay beˈanee?
2 Nuuni tumaa dosiyo amarida gaasota ha huuphe yohuwan beˈana. Yaatidi, nuuni ha alˈˈo imotaa siiqiyoogaa ubbatoo waati bessana danddayiyaakko beˈana. Yihooway nuna tumaakko ehiido gishshawu, nuuni A keehi galatanaadan ha huuphe yohoy maaddanaagee qoncce. (Yoh. 6:44) Qassi, nuuni haratussi Geeshsha Maxaafan deˈiya tumaa yootanawu keehi koyanaadankka maaddana.
NUUNI ‘TUMAA’ SIIQIYOY AYBISSEE?
3. Nuuni tumaa siiqiyo waanna gaasoy aybee?
3 Nuuni tumaa siiqiyo daro gaasoy deˈees. Ubbaappe aaruwan, tumawu Pultto gidida Xoossaa Yihoowa nuuni siiqoos. I saluwaanne saˈaa Medhdhida wolqqaama Xoossaa xalla gidennan, saluwan deˈiya nuussi qoppiya siiqo Aawaa gidiyoogaa A Qaalaa, Geeshsha Maxaafaappe erida. (1 PHe. 5:7) Nu Xoossay “qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa” gidiyoogaa eroos. (Kes. 34:6) Yihooway suure pirddaa dosees. (Isi. 61:8) Nuuni waayettiyoogaa I beˈiyo wode azzanees, qassi I meto ubbaa xayssanawu keerido wodiyaa yeemuwan naagees. (Erm. 29:11) Hegee ayba ufayssiyaabee! Nuuni Yihoowa keehi siiqiyo gaasotuppe issoy hagaa.
Geeshsha Maxaafaa Tumaa Aybin Leemisana Danddayiyoo? . . . Markkabiyaa Oyqqiya Qaaxxenna Biratan
He biratay markkabee qaaxxennaadan maaddiyoogaadan, Geeshsha Maxaafay yootiyo nu hidootay metoy gakkishinkka nuuni woppu gaanaadan maaddees. Geeshsha Maxaafaa tumay nuuni nu sinttanaa hidootaabaa haratussi yootanaadan nuna denttettana (Mentto 4-7 xeella)
4-5. Kiitettida PHawuloosi nu hidootaa markkabiyaa oyqqiya qaaxxenna birataara geeddarssidoy aybissee?
4 Nuuni tumaa siiqiyo hara gaasoy aybee? Tumay nuna keehi goˈˈees. Ane issi leemisuwaa beˈa. Geeshsha Maxaafay yootiyo tumay nu hidootaara gayttidaba. Kiitettida PHawuloosi nu hidootay keehi alˈˈo gidiyoogaa qonccissanawu hagaadan giis: “Nuuni demmana giidi ufaissan naagi uttidoogee, nu shemppuwaayyo markkabiyaa oiqqiya qaaxxenna birata mala; he nuuni demmana giidi, ufaissan naagi uttidoogee erettida mino.” (Ibr. 6:19) He biratay markkabee qaaxxennaadan maaddiyoogaadan, Geeshsha Maxaafay yootiyo nu hidootay metoy gakkishinkka nuuni woppu gaanaadan maaddees.
5 Ha sohuwan, PHawuloosi tiyettida Kiristtaaneti demmana saluwaa hidootaabaa yootiiddi deˈees. SHin ha xiqisee, gannate gidida saˈan merinawu deˈanawu yeemuwan naagiya Kiristtaanetussikka hanees. (Yoh. 3:16) Merinaa deˈuwaa hidootaabaa eriyoogee keehi ufayssiyaaba.
6-7. Evona sinttanaabaa xeelliyaagan tumaa eridoogee O waati maaddidee?
6 Evono giyo michchee hanotaa beˈa. A tuman diccabeykku, qassi A naatettan deˈiyo wode hayquwaa yayyawusu. A, “Wontto giyoobi deˈenna wodee deˈana” giya issi qofaa nabbabidoogaa hassayawusu. A hagaadan gaasu: “Ha qofay taani sinttanaabaa qoppaydda qammi qammi xiskkennan aqanaadan oottiis. Taani, ‘Deˈoy hagaa xalla waayi gidana. Taani deˈiyoy aybissee?’ gaada qoppaas. Taani hayqqanawu koyabeykke!”
7 Guyyeppe, Evona Yihoowa Markkatuppe amaridaageetuura gayttaasu. A hagaadan gaasu: “Taani saˈan Gannatiyan merinawu deˈana danddayiyoogaa ammaniyoogaa doommaas.” Tumaa eridoogee nu michchiyo waati maaddidee? A gujjada hagaadan gaasu: “Taani sinttanaabaa woy hayquwaabaa qoppaydda xiskkennan aqiyoogaa aggaas.” Evona Geeshsha Maxaafaa tumaa siiqiyoogee qoncce; qassi A ba sinttanaa hidootaabaa haratussi yootiyoogan keehi ufayttawusu.—1 Xim. 4:16.
Geeshsha Maxaafaa Tumaa Aybin Leemisana Danddayiyoo? . . . Alˈˈoban
Ha wodiyan Yihoowawu haggaaziyoogeenne A Kawotettaa haaruwan merinawu awu haggaazanawu hidootiyoogee alˈˈobaa mala. Hegee nuuni aggi bayiyo aybippekka aadhdhiyaaba (Mentto 8-11 xeella)
8-9. (a) Yesuusi yootido issi leemisuwan issi bitanee ba demmido alˈˈobaa xoqqu ootti xeelliyoogaa waati bessidee? (b) Neessi tumay ay keena alˈˈobee?
8 Geeshsha Maxaafaa tumay Xoossaa Kawotettaa mishiraachchuwaarakka gayttidaba. Yesuusi Kawotettaa tumaa moogido keehi alˈˈobaara geeddarssiis. Maatiyoosa 13:44n Yesuusi hagaadan giis: “Saluwaa kawotettai goshshan moogido miishsha milatees; issi bitanee he miishshaa demmidi, zaarettidi moogiis; daro ufaittiiddi biidi, baayyo de7iyaabaa ubbaa baizzidi, he goshshaa shammiis.” Bitanee he alˈˈobaa woy he miishshaa koyiiddi deˈennaagaa akeeka. SHin I demmido wode, hegaa babaa oottanawu darobaa aggi bayiis. I bawu deˈiya ubbabaa bayzziis. Aybissi? He miishshay keehi alˈˈoba gidiyoogaa I eriyo gishshataassa. I bawu deˈiya ubbabaa aggi bayidoogee bessiyaaba.
9 Tumaa xeelliyaagan neeyyookka hegaadan siyettii? Hegaadan siyettiyoogee qoncce! Ha alamee immiyoobay nuuni ha wodiyan Yihoowawu haggaaziyoogan demmiyo ufayssaaranne Xoossaa Kawotettaa haaruwan demmana merinaa deˈuwaara mule laggetennaagaa nuuni eroos. Yihoowaara dabbotidoogee nuuni aggi bayiyo aybippekka aadhdhiyaaba. “Ubba wode a ufaissiyaabaa” oottiyoogee nuna keehi ufayssees.—Qol. 1:10.
10-11. Mikaaˈeeli ba deˈuwan laamettanaadan A maaddidabay aybee?
10 Nuuppe daroti Yihoowan sabettanawu darobaa aggi bayida. Amaridaageeti ha alamiyan hayttatanaadan oottiya oosuwaa aggidosona. Harati dure gidanawu baaxetiyoogaa aggidosona. Harati qassi Yihoowabaa erido wode bantta deˈuwaa hanotaa muleera laammidosona. Mikaaˈeeli oottidobaykka hegaa. I tuman diccibeenna. Yelagatettan deˈiyo wode I kaaraatiyaa loohiis. I hagaadan giis: “Taani asatettan mino gidada deˈiyoogee tawu keehi koshshiyaaba. Issi issitoo, tana ooninne xoonana danddayennabadan tawu siyettees.” SHin Mikaaˈeeli Geeshsha Maxaafaa xannaˈiyoogaa doommido wode makkalaa Yihooway waati xeelliyaakko eriis. (Maz. 11:5) I bana Geeshsha Maxaafaa xannaˈissida Yihoowa Markka gidida azinaabaanne machcheebaa hagaadan giis: “Taani kaaraatiyaa aggana koshshiyoogaa eti tawu mule yooti erokkona; eti ubbatoo tana Geeshsha Maxaafaa tumaa tamaarissidosona.”
11 Mikaaˈeeli Yihoowabaa loyttidi erido wode, A kaseegaappe aaruwan siiqiis. Yihooway baayyo goynniyaageetussi qarettiyoogaa akeekidoogee A keehi maaddiis. Guyyeppe Mikaaˈeeli ba deˈuwan laamettana koshshiyoogaa akeekiis. I hagaadan giis: “Kaaraatiya aggiyoogee taani kuuyido aybippenne aaruwan tawu deexxiyaaba gidiyoogaa erays. SHin hegee Yihoowa ufayssiyogaakka erays, qassi awu haggaaziyoogee taani agga bayiyo aybippenne aadhdhiyaaba gidiyoogaa ammanaas.” Mikaaˈeeli I demmido tumay keehi alˈˈoba gidiyoogaa eriis, qassi I ba deˈuwan laamettidoy hegaassa.—Yaaq. 1:25.
Geeshsha Maxaafaa Tumaa Aybin Leemisana Danddayiyoo? . . . Xomppiyan
Loytti pooˈiya xomppee xuman hemettiyo wode nuuni baana koshshiyoosaa eranaadan maaddees. Hegaadankka, nuuni Seexaanaa iita alamiyan deˈikkokka loˈˈobaa kuuyanaadan Xoossaa Qaalay nuna maaddees (Mentto 12-13 xeella)
12-13. Geeshsha Maxaafaa tumay Maylo waati maaddidee?
12 Geeshsha Maxaafay tumay keehi alˈˈo gidiyoogaa qonccissanawu, tumaa xuman pooˈiya xomppiyaara geeddarssees. (Maz. 119:105; Efi. 5:8) Azerbaajanen deˈiya Mayla, Xoossaa Qaalaappe eridobaa keehi nashshawusu. A haymaanootiyan issi mala gidenna keettan diccaasu. I aaway Isilaama, qassi I aayyiyaa Ayhuuda haymaanootiyaa kaallawusu. A hagaadan gaasu: “Taani Xoossay deˈiyoogaa sirana xayikkonne, taayyo daro oyshati deˈoosona. Taani hagaadan qoppaas: ‘Xoossay asaa medhdhidoy aybissee, qassi issi uri ba deˈo laytta ubban tuggatiyoynne hegaappe simmin siˈooliyan taman merinawu xuugettiyoy aybissee?’ Hegaa bollikka, asay ubbabay Xoossaa sheniyan hanees giyo gishshawu taani hagaadan qoppaas: ‘Asay waayettiyoogaa beˈiyoogan Xoossay ufayttii?’”
13 Mayla ba oyshatuyyo zaaruwaa koyiyoogaa aggabeykku. Guyyeppe, A Geeshsha Maxaafaa xannaˈada Yihoowa Markka gidaasu. A hagaadan gaasu: “Geeshsha Maxaafan deˈiya ammanttiya tumay taani ufayttiya asa gidanaadan maaddiis. Xoossaa Qaalaappe ammanttiya qofaa demmidoogee taani woppu gaanaadan maaddiis.” Mayliigaadan, nuuni ubbay ‘xumaappe garamissiya ba pooˈuwawu nuna xeesida’ Yihoowa sabboos.—1 PHe. 2:9.
14. Nuuni tumaa waati loytti siiqana danddayiyoo? (“ Geeshsha Maxaafaa Tumaa Hara Aybiira Geeddarssana Danddayiyoo?” giya saaxiniyaakka xeella.)
14 Hageeti tumay keehi alˈˈo gidiyoogaa bessiya amarida leemisotu xalla. Neeni hara daro leemisota qoppana danddayiyoogee qoncce. Nuuni tumaa siiqana koshshiyo hara gaasota eranawu buzo xinaatiyan hegaabaa xannaˈana danddayoos. Nuuni tumaa siiqikko, hegaa siiqiyoogaa bessana danddayiyo ogeta koyana danddayoos.
NUUNI TUMAA SIIQIYOOGAA WAATI BESSANA DANDDAYIYOO?
15. Nuuni tumaa siiqiyoogaa bessana danddayiyo issi ogee aybee?
15 Nuuni Geeshsha Maxaafaanne Geeshsha Maxaafaa qofay deˈiyo xuufeta ubbatoo nabbabiyoogan tumaa siiqiyoogaa bessana danddayoos. Nuuni tuman deˈido wodee ay keena gidikkokka, ubbatoo tamaarana bessiya darobay deˈees. Koyro kiyida Wochchiyo Keelay hagaadan giis: “Tumay deˈuwaa bazzuwan keehi diccida worddo sharafay cuulli uttido guutta ciishsha mala. Neeni he ciishshaa demmikko, naagana koshshees. . . . Hegaa nebaa oottanawu koyikko, ekkanawu hokkana koshshees. Tumaa ciishshaa issuwaa xalla demmada gidees gooppa. . . . SHiishshiyoogaa aggoppa; qassi haraakka gujjada koya.” Xannaˈanawu baaxetana koshshees, shin yaatiyoogee maaddiyaaba.
16. Neeni xannaˈanawu ayba hiillaa goˈettay? (Leemiso 2:4-6)
16 Nuuppe daroti nabbabanawunne xannaˈanawu dosokko. SHin tumaa loytti akeekanawu aggennan ‘koyanaadan’ Yihooway nuna minttettees. (Leemiso 2:4-6 nabbaba) Nuuni yaatiyaaba gidikko ubbatoo goˈettoos. Koori Geeshsha Maxaafaa nabbabiyoogaara gayttidaagan issi xiqisiyaa xallaa I wudidi xeelliyoogaa yootiis. I hagaadan giis: “Taani tohossa qofata ubbaa nabbabays, geeddarssanawu imettida xiqiseta xeellays, qassi gujjada pilggays. . . . Hegaadan xannaˈidoogee taani darobaa eranaadan maaddiis!” Nuuni xannaˈanawu goˈettiyoy ha hiillaa woy hara hiillaa gidin, nu wodiyaanne wolqqaa goˈettidi xannaˈiyoogan tumaa nashshiyoogaa bessoos.—Maz. 1:1-3.
17. Tuman deˈiyoogaa giyoogee woygiyoogee? (Yaaqooba 1:25)
17 Tumaa xannaˈiyoogaa xallay gidennaagaa nuuni eroos. Nuuni loytti goˈettanawu tuman deˈana bessees, hegaa giyoogee nuuni tamaaridobaa nu deˈuwan oosuwan peeshshana koshshees giyoogaa. Nuuni yaatiyo wode xallan, tumay nuuni keehi ufayttanaadan maaddana. (Yaaqooba 1:25 nabbaba.) Nuuni tuman deˈiyoogaa waati shaakki erana danddayiyoo? Nuuni oosuwan peeshshiiddi deˈiyoobatanne giigissanawu koyiyoobata shaakki eranawu xannaˈiyoogee loˈˈo gidiyoogaa issi ishay yootiis. Kiitettida PHawuloosi hagaadan giis: “Nuuni hanno gakkanaassi de7ido maaraadan, ane sinttau boos.”—Pili. 3:16.
18. Nuuni ‘tuman deˈanawu’ nuussi danddayettida ubbabaa oottana koshshiyoy aybissee?
18 ‘Tuman deˈanawu’ nuuni nuussi danddayettida ubbabaa oottiyoogee ay keena maaddiyaakko takki gaada qoppa! Hegee nu deˈoy giiga gidanaadan oottiyoogaa xalla gidennan, Yihoowaynne nu mala Kiristtaaneti ufayttanaadankka oottees. (Lee. 27:11; 3 Yoh. 4) Hagee nuuni tumaa siiqanawunne tuman deˈanawu keehi loˈˈo gaaso.
MAZAMURE 144 Demmana Woytuwaa Qoppite!
^ Nuuni darotoo nu ammanuwaanne nu deˈiyo ogiyaa tumaa giidi xeegoos. Nuuni mati Yihoowa Markka gididaageeta gidin woy nu deˈo laytta ubban Yihoowa eriyaageeta gidin, nuuni tumaa siiqiyoy aybissakko xannaˈiyoogan loytti goˈettana danddayoos. Yaatiyoogee, nuuni Yihoowan sabettanawu kaseegaappe aaruwan murttanaadan maaddana.
